Iloilo Lou Aoaoina 1

1 Nifae 1–15

O lenei lesona ua faamoemoe e fesoasoani ia te oe e iloilo ai sini ua e faatuina, ma le tuputupu ae patino na e mauaina i le taimi o au suesuega o le Tusi a Mamona.

Fesoasoani i tamaiti aoga e iloilo lo latou aoaoina. Tuu atu i tamaiti aoga se avanoa e iloilo ai lo latou aoaoina. O se tasi o auala o le valaaulia lea o i latou e faasoa mai pe na faapefea ona latou tuputupu ae pe atiina ae o se taunuuga o a latou suesuega ma le faatuatua.

Sauniuniga a le tamaitiiti aoga: Valaaulia tamaiti aoga e o mai saunia i le vasega e faasoa mai se mea na latou aoaoina mai le Tusi a Mamona lea na fesoasoani latou te lagona ai le latalata atili atu ia Iesu Keriso.

Gaoioiga e Ono Mafai Ona Aoao Ai

Ua faamoemoeina lenei lesona e fesoasoani i tamaiti aoga e iloilo sini na latou faatuina, lo latou gafatia e faamatala ai aoaoga i le Tusi a Mamona, po o le auala ua suia ai o latou uiga, manaoga, ma le gafatia e ola ai i le talalelei. O le suesuega a lau vasega i le 1 Nifae 1–15 sa ono faamamafaina ai isi upumoni e ese mai lo o upumoni i nei gaoioiga. Afai o lea, e mafai ona fetuunai gaoioiga e faaaofia ai na upumoni.

Suesue le Tusi a Mamona i Aso Taitasi

O lenei vaega ua faamoemoe e fesoasoani i tamaiti aoga e iloilo pe o a mai a latou sini mo suesuega faaletagata lava ia o tusitusiga paia ma lagona le aoga ma le taua o le suesueina o le Tusi a Mamona.

• O a nisi o mea e te faia i aso uma po o po uma?

Atonu e tali mai tamaiti aoga i tali e pei o le fufuluina o nifo, aai, momoe, ma isi mea faapena.

• O le a se mea e tupu pe a e misi nei gaoioiga mo se aso pe umi atu?

• Aisea e avea ai le suesueina o tusitusiga paia i aso taitasi o se mea e tatau ona tatou taumafai e fai?

Faaali atu le iloiloga patino lenei. E mafai e tamaiti aoga ona tomanatu faalilolilo i a latou tali pe faamaumau a latou tali i a latou api talaaga mo suesuega.

Filifili se tasi o mea nei e faamatala ai pe o faapefea mai au suesuega i aso taitasi o le Tusi a Mamona:

1. E lagona le anoa o a’u suesuega ma sa faatumauina pea.

2. E lelei la’u suesuega pe a tupu ae e le o tupu soo.

3. Ou te faia lava pea au suesuega ae le tele ni mea e maua mai ai.

4. O loo ou tauivi ia malamalama i mea ou te faitauina ma e seasea ona ou suesue na o au.

5. Ou te lei faia lava se mea e galue ai agai i se sini o le suesueina o tusitusiga paia.

6. Isi: faamalamalama mai lau tali.

O se mea masani le i ai o ni faalavefau e oo mai ma se sini o aso taitasi e pei o lenei. O le mea taua o le taumafai pea.

Mafaufau e tusi faalavefau a tamaiti aoga i luga o le laupapa ma valaaulia le vasega e talanoaina pe na faapefea ona latou tali atu pe mafai foi ona tali atu i nei faalavefau.

• O le a se mea ua lelei i lau suesuega o le Tusi a Mamona? O le a se mea e te manao e fai e sili atu pe ese?

Mafaufau e filifili se tasi pe sili atu o gaoioiga nei e fesoasoani ai i tamaiti aoga ia lagona le taua ma le moni o le Tusi a Mamona.

O manatu ma lagona patino e uiga i le Tusi a Mamona.

Gaoioiga 1: Sauniga molimau

Afai e te tuuina atu lau molimau i le sauniga faamanatuga e uiga i le Tusi a Mamona, o le a sau tala e fai atu e faailoa ai ou lagona?

Gaoioiga 2: Aisea e te suesue ai?

Mafaufau o loo e suesueina le Tusi a Mamona ina ua savali mai i totonu se tei laitiiti ma fesili atu, “O le a lau mea o faitau?” E te tali atu, “O Le Tusi a Mamona.” Ua fesili atu lou tei, “Aisea?” Tusi ni fuaiupu se lua pe tolu e faamatala ai mea e mafai ona e fai atu i lou tei laitiiti e fesoasoani ai ia te ia ia malamalama pe aisea ua e filifili ai e suesue le Tusi a Mamona.

Gaoioiga 3: O se faasalalauga faaagafesootai

Ua tusia e se uo le faamatalaga lenei o se faasalalauga faaagafesootai: “Talu ai nei na amata ai ona ou faitauina le Tusi a Mamona ma ou te fiafia i ai! Mo soo se tasi o outou na faitauina muamua le Tusi a Mamona, faamolemole pe mafai ona e faasoa mai ia te au lau fuaiupu e sili ona e fiafia i ai ma se faamatalaga puupuu i le pogai e te fiafia ai i ai?”

E mafai ona avea lenei mea o se avanoa lelei e valaaulia ai tamaiti aoga e faasoa mai o latou manatu mai le sauniuniga a le tamaitiiti aoga. Mafaufau e faasoa atu lau molimau i le auala na fesoasoani ai le Tusi a Mamona ia te oe ia e lagona le latalata atili atu ia Iesu Keriso i lenei semesa.

Miti a Liae

O le vaega lenei ua faamoemoe e fesoasoani i tamaiti aoga e faamalamalama ai vaega ma le uiga o le miti a Liae ma toe manatunatu ai i le mea latou te vaai ai ia i latou lava i le miti.

O se tasi o auala e mafai ona e fesoasoani ai i au tamaiti aoga e iloilo lenei anotusi o le valaaulia lea o i latou e vaai i ata ma fesili taitasi nei. Ona vaevae lea o tamaiti aoga i ni paga ma valaaulia i latou e feauauai e faamalamalama atu ia latou paga le tele o le auiliiliga ma le uiga o le miti a Liae i le mea latou te mafaia i le 30 sekone.

E mafai ona fesoasoani le faaali atu o fesili o loo mulimuli mai i ata.

• O a ni vaega po o faatusa eseese o le miti e te manatuaina?

• O le fea o faatusa e sili ona tulaga ese ia te oe? Aisea?

• E faapefea ona tutusa le miti a Liae ma lo tatou lalolagi i aso nei?

Mafaufau pe mafai faapefea e vaega eseese o le miti a Liae ona fesoasoani i tagata taitoatasi i tala faataitai nei:

• O loo faaaluina e se alii talavou se taimi ma se vaega o tagata o e filifili e soli le Upu o le Poto ma uunaia o ia ia faia foi faapea.

• Ua mafaufau se tamaitai talavou o le a ia manatu mamafa i ana suesuega o tusitusiga paia pe a toafilemu lona olaga faigata.

• Ua amata ona lagona e se alii talavou le ma i lona auai i Le Ekalesia a Iesu Keriso o le Au Paia o Aso e Gata Ai pe a ia faalogo atu i isi o faatauemu i tagata e lolotu.

• E mafai faapefea ona e faaaogaina le miti a Liae e aoao ai tala faataitai taitasi?

• O le a le aoaoga po o le upumoni mai le miti a Liae e te lagona e mafai ona fesoasoani e te latalata atili ai i le alofa o le Atua i lou olaga?

E mafai ona e tausia poloaiga.

O lenei vaega ua faamoemoe e faataga ai tamaiti aoga e vaai pe o faapefea mai la latou fuafuaga (mai le 1 Nifae 3) e faatino ai poloaiga a le Atua ma le atoatoa.

I le taimi o le lesona i le 1 Nifae 3, atonu na e faia se sini ina ia usitai atili i se poloaiga sa faigata ona tausia. Toe manatunatu i lou agai i luma i lenei sini, ma faamaumau ou manatu i lau api talaaga mo suesuega po o le api talaaga patino. Mafaufau i fesili nei ao e manatunatu ma tusitusi:

• O a mai lau taumafaiga e usitai i lenei poloaiga?

• O a ni manuia po o ni faalavefau ua e oo i ai?

• O faapefea ona e fetuunaia lau fuafuaga?

• O faapefea ona faamanuiaina oe i au taumafaiga?

• O faapefea ona saunia e le Alii se ala mo oe e te usitai ai?

Afai e te lei mafaufau i se poloaiga atonu e faigata mo oe ona tausia, mafaufau nei loa i ai. Filifili po o a faatinoga e mafai ona e faia e tausia atoatoa ai.

Mafaufau e tuu atu i tamaiti aoga le avanoa e faasoa mai ai soo se tali i nei fesili po o mea sa latou aoaoina, pe afai e le patino tele, i le vasega. E mafai ona e faasoa atu lau molimau i le auala o le a faamanuia ai i tatou e le Atua e faataunuu Ana poloaiga a o tatou faia ni taumafaiga anoa e faalagolago ma usiusitai ia te Ia.

Na aoao mai Peresitene Henry B. Eyring o le Au Peresitene Sili o le faalagolago o Nifae i le Alii e mafai ona aumaia ai le faamalosiauga pe a faigata ia i tatou ona usiusitai i poloaiga a le Alii:

Ua uunaia e le taulealea o Nifae o le Tusi a Mamona se manao ia i tatou, e atiina ae le faalagolago i le Alii e usiusitai i Ana poloaiga, tusa lava po o le a le foliga mai e faigata. Na feagai Nifae ma tulaga lamatia ma na ono oti ai ina ua ia faia nei upu o le faatuatuaina faapea e mafai ma e tatau ona tatou lagona le tumau i o tatou loto: “O le a ou alu ma fai mea ua poloaiina e le Alii, aua ua ou iloa e le tuuina mai e le Alii ni poloaiga i le fanauga a tagata, vagana o le a saunia e ia se ala mo i latou ina ia mafai ai ona latou faataunuuina o le mea ua ia poloaiina ai i latou” [1 Nifae 3:7]. (Henry B. Eyring, “Faalagolago i le Atua, Ona e Alu Ai Lea,” Liahona, Nov. 2010, 71)