1 Nifae 13–14

“Faaauupegaina i le Amiotonu ma le Mana o le Atua”

Ina ua uma ona faaali atu i se faaaliga le liliuese ma le faatafunaga mulimuli ane o lona nuu, sa vaai Nifae o se ekalesia tele ma le inosia o le a faaleagaina aoaoga a le Tusi Paia ma tau faasaga i le Au Paia a le Atua. Vaai faalemafaufau i le olioli o Nifae i le vaaia ai foi o le a toefuataiina le talalelei, ma faamanuiaina ai i latou uma o e o le a taliaina aoaoga ma feagaiga a le Faaola. O le faamoemoega o lenei lesona o le fesoasoani lea ia te oe ia malamalama i le taua o feagaiga ma ia faateleina lou manao e osia ma tausia i latou.

O le faailoa atu o saofaga a tagata aoao e faatauaina. A sii lima o tamaiti aoga e fai faaali se manatu, valaau i latou i o latou igoa ma fesoasoani ia latou lagona o o latou manatu e mafai ona fesoasoani i isi e aoao ai.

Sauniuniga a le tamaitiiti aoga: Mafaufau e valaaulia tamaiti aoga e o mai saunia e faasoa mai mea latou te manatu o nisi o mea aupito sili ona taua e mai le 500 tausaga ua mavae.

Gaoioiga e Ono Mafai Ona Aoao Ai

Manatua: 1 Nifae 13:20–42 o le a aoaoina auiliili atili i le lesona e sosoo ai.

O le aao o le Atua i le talafaasolopito

Mafaufau faapea ua faaali atu ia te oe se faaaliga o mea aupito sili ona taua na tutupu i le 500 tausaga ua mavae, e aofia ai o tatou taimi.

Mafaufau e tusi pe tuu atu i tamaiti aoga e tusi tali i le fesili lenei i luga o le laupapa. O le vaaia o tali i luga o le laupapa e ono faaosofia ai manatu mai isi tamaiti aoga.

• O a ni mea e te manatu e mafai ona e vaaia i lenei faaaliga? Aisea?

Sa faaali atu i le perofeta o Nifae se faaaliga lea na aofia ai mea taua na tutupu mai lenei vaitaimi. Matau le mea na folafola mai e Peresitene Russell M. Nelson e uiga i le faaaliga a Nifae:

Ua i ai o tatou nofoa e pito i luma e vaai tino ai lava ma molimau moni i mea sa na o le faaaligana vaai i ai le perofeta o Nifae. …

O outou, o’u uso e ma tuafafine, ua i ai faatasi ma na alii, tamaitai, ma fanau ia na vaai i ai Nifae. Mafaufau i lena mea! Russell M. Nelson, “Faalogo ia te Ia,” Liahona, Me 2020, 88)

A o e suesue i le 1 Nifae 13–14, vaavaai mo faamaoniga o le mana o le Atua i mea na tutupu e tau mai i o tatou aso faapea foi ma folafolaga taua o le a faataunuuina e le Alii i lou olaga.

O le gaoioiga lenei e mafai ona faaaoga i le tele o auala. Mo se faataitaiga, e mafai ona e faaali atu mea na tutupu ma a latou mau talafeagai ona valaaulia lea o tamaiti aoga e faitau ia fuaiupu ma tusi se aotelega puupuu o mea uma na tutupu. E mafai foi ona e fatuina se suega puupuu lea e mafai ai e tamaiti aoga ona faafetaui mea na tutupu i fuaiupu.

Faitau fuaitau o mau ma faafetaui mea o loo faamatala mai i fuaiupu ma mea na tutupu o loo lisi atu i lalo. Manatua: O Nuuese e pei ona faaaogaina i nei fuaiupu e faasino i tagata e le o mai pe le nonofo i le laueleele o Iuta.

1 Nifae 13:12–13, 16–19	O talafaamaumau o sa Nifae (Tusi a Mamona) ma isi mau ua faavaeina ai le moni o talafaamaumau a Iutaia (Tusi Paia) ma toefuatai mai ai upumoni manino ma pele.
1 Nifae 13:23–26	O le mauaina ma le nofoia o le nuu o le folafolaga e Nuuese.
1 Nifae 13:35–36, 39–40	O faamaumauga o tagata Iutaia (le Tusi Paia) na faaleagaina e le ekalesia tele ma le inosia.
1 Nifae 14:7–10	Ua oo mai le galuega ofoofogia (Toefuataiga o le talalelei). E filifili Nuuese pe talia pe teena ona faamanuiaga.

Tali: 1-e, 2-i, 3-a, 4-o. E mafai ona e fesili atu i tamaiti aoga po o a mea latou te iloa pe i ai ni a latou fesili e uiga i mea na tutupu.

• O le a sou manatu o le a se mea taua e uiga i nei valoaga?

E mafai ona aoga mo tamaiti aoga le suesueina o le 1 Nifae 13:12–13, 16–19 e iloa ai pe na faapefea ona i ai le Agaga ma le mana o le Atua i luga o i latou o e na malaga atu i le nuu folafolaina.

• O le a se mea ua e aoaoina e uiga i le Atua mai nei fuaiupu?

  E mafai ona avea lenei mea o se avanoa lelei e faasoa atu ai lau molimau i le faaalia mai o le Toefuataiga e le aao o le Atua. E mafai foi ona e valaaulia tamaiti aoga e faasoa mai o latou lagona.

• E mafai faapefea e lenei malamalamaaga e uiga ia te Ia ona faamanuiaina ai lou olaga i le taimi nei?

Mauaina o le mana o le Atua i o tatou olaga

Sa faaali atu ia Nifae aso e gata ai ma vaaia ai le Toefuataiga o le Ekalesia a Iesu Keriso ma le tetee o le a feagai ai. Sa ia vaaia foi faamanuiaga na folafola atu i soo tausi feagaiga o Iesu Keriso.

Faitau le 1 Nifae 14:12–14, vaavaai mo mea na aoaoina e Nifae e uiga i tagata o aso e gata ai o le Ekalesia a Iesu Keriso.

• O le a se mea e tulaga ese ia te oe mai le faamatalaga a Nifae e uiga i le Ekalesia a Iesu Keriso ma ona tagata i o tatou aso? Aisea?

  Mafaufau e talanoaina manatu ma lagona o tamaiti aoga e uiga i le i ai faatasi ma nai tagata o le Ekalesia i le lalolagi atoa. E mafai ona e valaaulia i latou e faasoa mai ni auala na latou vaaia ai tagata o tau faasaga i le Faaola ma pe faapefea ona latou tali atu ma le faamaoni ma le alofa i na luitau.

  Ina ia faafaigofie le talanoaga, mafaufau e valaaulia tamaiti aoga e tali mai i manatu na faia e a latou uo. Saili le taitaiga mai le Agaga ia iloa ai po o a fesili tulitatao e fai atu.

• O le a le mataupu faavae e mafai ona tatou iloa mai le fuaiupu 14?

O se tasi o mataupu faavae e mafai ona tatou aoao mai i nei fuaiupu o le afai tatou te tausia a tatou feagaiga, o le a faaauupegaina i tatou i le amiotonu ma le mana o le Atua.

• O a feagaiga ua e osia pe o le a e osia ma le Atua?

• O a nisi o auala e fesoasoani ia te oe e tumau ai le taulai atu i le tausia o feagaiga ua e osia?

Na aoao mai Elder David A. Bednar o le Korama a Aposetolo e Toasefululua e uiga i le faauigaga o le faaauupegaina i le amiotonu ma le mana o le Atua i le mamalu tele:

O le fasifuaitau o le “faaauupegaina i latou i le amiotonu ma le mana o le Atua i le mamalu tele” [1 Nifae 14:14] ua le na o se manatu manaia po o se faataitaiga o le gagana matagofie faatusi paia. Ae, o nei faamanuiaga o faamaoniga moni i olaga o soo lē mafaitaulia o le Alii i aso e gata ai.

… Ou te molimau atu o le nuu o le feagaiga a le Alii i ona po nei, e moni lava ua faaauupegaina i le amiotonu ma le mana o le Atua i le mamalu tele. Ua ou molimauina le faatuatua, lotototoa, magafagafa, naunautai, ma le olioli ua oo atu i talaatu o le malosi faaleolaga nei—ma e na o le Atua e mafai ona maua mai ai. (David A. Bednar, “Ma le Mana o le Atua i le Mamalu Tele,” Liahona, Nov. 2021, 29–30)

• O a nisi o faataitaiga o tagata o lau tupulaga ua “faaauupegaina i le amiotonu”?

• O anafea na e maua ai nisi o nei faamanuiaga “e na o le Atua e mafai ona tuuina mai”?

Ina ia vaai i se faataitaiga o se tamaitai talavou e osia ma tausia feagaiga, maimoa le vitio “Tutu i Nofoaga Paia” (5:36), o loo maua i le ChurchofJesusChrist.org.

Ua tomanatu se tamaitai talavou i faamanuiaga o le savalia o le ala o feagaiga a o ia agai atu i le malumalu.

• O a ni mea o ta’u atu e au faatinoga o aso taitasi ia te oe e uiga i le taua o feagaiga na e osia?

• Aisea e te manaomia ai le mana lea e sau mai feagaiga ma le Tama Faalelagi?

• E faapefea ona e valaaulia atoatoa i lou olaga ia faamanuiaga o le osia ma le faamamaluina o feagaiga ma le Tama Faalelagi?

Manatu ma Talaaga o Faamatalaga

1 Nifae 13. O le a le uiga o le upu Nuuese i le Tusi a Mamona?

Nuuese e mafai ona faauiga “o malo.” E faasino ia i (1) latou o e e le o le aiga o Isaraelu, (2) latou o e le talitonu i le Atua o Isaraelu pe e le o mauaina le talalelei, e tusa po o le a lo latou gafa; ma (3) tagata o e le mai le, pe le o nonofo i le laueleele o Iuta. Mo se faataitaiga, o tagata saili lotu ma tagata saili malo i le laueleele o Amerika, ua taua o Nuuese i le 1 Nifae 13:3–13. O i latou o e na aumaia le Tusi a Mamona ua taua o Nuuese i le 1 Nifae 13:38. O le Mataupu Faavae ma Feagaiga ma le Penina Tau Tele sa faapea foi ona aumaia e Nuuese (tagai 1 Nifae 13:39; Mataupu Faavae ma Feagaiga 109:60).

1 Nifae 13:12. O ai le tagata lea e i le faaaliga a Nifae?

Na faailoa mai e Peresitene Ezra Taft Benson (1899–1994) lenei tagata o Nuuese o Christopher Columbus:

Na musuia e le Atua “se tagata i totonu o Nuuese” (1 Nifae 13:12) o le, e ala i le Agaga o le Atua na taitaiina e toe maua mai le laueleele o Amerika ma aumai lenei laueleele fou tamaoaiga i le taulaiga a tagata i Europa. Ioe, o lena alii, o Christopher Columbus, o le sa molimau mai sa musuia o ia i le mea sa ia faia.

“O Lo matou Alii,” na fai mai ai Columbus, “na tatalaina lo’u mafaufau, auina mai a’u i luga o le sami, ma aumai ia te a’u le afi mo le galuega. O i latou na faalogo i la’u pisinisi na ta’ua e faavalevalea, tauemu ia te au, ma talie. Ae o ai na te masalomia ae na musuia au e le Agaga Paia?” (Jacob Wasserman, Columbus, Don Quixote of the Seas, i. 19–20). Aoaoga a Ezra Taft Benson [1988], 577)

1 Nifae 14:10. O a ekalesia e lua o loo ta’ua?

Sa faamalamalama mai e Elder Dallin H. Oaks e faapea o le “ekalesia tele ma le inosia” sa faamatalaina e Nifae “o soo se filosofia po o se faalapotopotoga e tetee i le talitonuga i le Atua. Ma o le ‘faatagataotauaina’ lea e taumafai lenei ‘ekalesia’ e aumai i ai le au paia, o le a le tele foi se taofiofiga faaletino e pei o le faatagataotauaina o manatu sese” (“Laulaututu e Fai ma Molimau a le Atua,” Liahona, Mat. 2015, 32).

O le a faapefea ona faamanuiaina e le Atua e amiotonu i aso e gata ai?

Ua aoao mai Elder Neil L. Andersen o le Korama a Aposetolo e Toasefululua:

Ua tatou ola, uso e ma tuafafine, i taimi o loo loma ai le Afio Mai Faalua o le Alii, o se taimi ua loa ona faatalitali i ai le au faatuatua i le faagasologa o tausaga. Ua tatou ola i taimi o taua ma tala o taua, o taimi o faalavelave faalenatura, o aso ua fetosoa’i ai le lalolagi e le le mautonu ma fevesiaiga.

Ae ua tatou ola foi i le taimi mamalu o le Toefuataiga, o le taimi ua avatu ai le talalelei i le lalolagi uma—o se taimi sa folafola mai ai e le Alii faapea o le a Ia “faatu mai … se nuu mama” [Mataupu Faavae ma Feagaiga 100:16] ma faaauupegaina “i le amiotonu ma le mana o le Atua.” [1 Nifae 14:14].

Ua tatou sapi i lo tatou olioli i nei aso ma tatalo o le a mafai ona tatou fetaiai ma le lotototoa o tatou tauiviga ma mea e le o mautinoa. (Neil L. Andersen, “Ia Oo Mai Lou Malo,” Liahona, Me 2015, 119)

O faapefea ona faamanuiaina i tatou ona o le savavali i le ala o le feagaiga?

Faitau, maimoa, pe faalogologo i le saunoaga a Elder D. Todd Christofferson ua faaulutalaina “Aisea i le Ala o Feagaiga” (Liahona, Me 2021, 116–19).

Gaoioiga Faaopoopo e Aoao Ai

1 Nifae 14:1–7. Taunuuga o la tatou tali atu i le upumoni

O le isi auala e faamalamalama ai i le 1 Nifae 14 o le faaali atu lea o le ata lenei, e pei o se magaala i se auala, e aunoa ma ni upu.

Faitau le 1 Nifae 14:1–2, 5–7. Fesoasoani i tamaiti aoga e matau filifiliga eseese e faia e tagata e tali atu ai i le Toefuataiga o le talalelei ma taunuuga mo na filifiliga. Faaopoopo tali i le ata ina ia foliga tutusa ma le tali o loo i luga.