“1 Nifae 13:20–42: Upumoni Manino ma Pele” Tusi Lesona a le Faiaoga o le Tusi a Mamona (2024)

“1 Nifae 13:20–42: Upumoni Manino ma Pele” Tusi Lesona a le Faiaoga o le Tusi a Mamona

1 Nifae 13:20–42

O Upumoni Manino ma Pele

O le Toefuataiga o le talalelei a le Faaola o se faamanuiaga i le tele o auala. O se tasi o faamanuiaga o le aumaia lea i le malamalama o le tele o upumoni manino ma pele ia na leiloloa mai le Tusi Paia. Na vaai Nifae i mea na tutupu i le Toefuataiga a o lei taitai ona tutupu ma malamalama i le matafaioi taua o le a faia e lana talafaamaumau i le Toefuataiga. O lenei lesona e mafai ona fesoasoani ia te oe e malamalama ai pe faapefea e le Tusi a Mamona ma isi mau ua faaalia ona fesoasoani e toefuatai ai upumoni manino ma pele o le talalelei a le Faaola.

Sauniaina o oe lava e aoao atu. O le aoaoina mamana o le talalelei o lona uiga e le na o le sauniaina o se lesona ae o le sauniaina o i tatou lava. Talu ai e molimau mai le Agaga i le upumoni ma o le punavai o le liuaina, o lea e taulai atu ai faiaoga mataalia o le talalelei i le faatumuina o o latou loto i le Agaga Paia ae latou te lei mafaufau e faatumuina le taimi o le vasega. Mafaufau e fesili ifo ia te oe lava, “Ua ou saunia ea e aoao atu e ala i le Agaga?”

Sauniuniga a le tamaititi aoga: Mafaufau e valaaulia tamaiti aoga e o mai saunia e faasoa mai se mea na latou aoaoina talu ai nei mai a latou suesuega patino o tusitusiga paia.

Gaoioiga e Ono Mafai Ona Aoao Ai

Siaki o le saogalemu

Faaali i tamaiti aoga se ata o se uila pe, afai e mafai, mafaufau e aumai se uila vilivae i le vasega. Valaaulia tamaiti aoga e mafaufau i vaega taua o se uila vilivae ma lisi i luga o le laupapa.

O le uila o se auala faigofie ma aoga o femalagaaiga. O tietiega uila e mafai foi ona avea o se aafiaga fiafia ma tauia. O a nisi o vaega taua e mafai ai e se tagata ona faagaoioia ma le saogalemu ma le mataalia se uila vilivae? Mafaufau faapea na e umia se uila vilivae ma sa aveesea mai ma le loto i ai e se tasi ni vaega taua faapitoa.

O a ni mea e ono faailoa mai e na faatinoga e uiga i ona lagona ia te oe?
O le a se mea e ono tupu pe a e taumafai e faagaoioia le uila ma ni vaega o loo misi?
O ai e mafai ona e faafesootaia e lipea ma toe faafoi lau uila i se tulaga lelei?

I se auala talitutusa, sa saili ai Satani e faatiga ma faalemautonu fanau a le Atua e ala i le aveesea ma le suia o vaega taua o le talalelei a Iesu Keriso. A o e suesue i le 1 Nifae 13, vaavaai mo mea na faia e le Faaola e fesoasoani ai ia i tatou e faatoilalo faalavefau a Satani.

E toatele o loo tautevateva

Na faaalia ia Nifae i se faaaliga mea taua na tutupu i aso e gata ai, e aofia ai se tusi na aumaia i le nuu folafolaina e Nuuese. Faitau e uiga i le tusi i le 1 Nifae 13:20–25 ma vaavaai mo mea o loo i ai.

Atonu e fesoasoani le lisi o mea na maua e tamaiti aoga i luga o le laupapa, e pei “o feagaiga a le Alii,” “o valoaga a perofeta paia,” ma “le atoatoaga o le talalelei” (1 Nifae 13:23–24). Mafaufau e fesili i tamaiti aoga pe latou te iloa po o le a le tusi i le fuaiupu 20 ae lei valaauliaina i latou e tusi se faamatalaga i a latou tusitusiga paia.

O le a se mea na e aoaoina mai i lau faitauga?

Mafaufau e tusi se faamatalaga i le fuaiupu 20 e faapea o le tusi na vaai i ai Nifae e faasino i le Tusi Paia. O le faia o ni faamatalaga i au tusitusiga paia e mafai ona fesoasoani ia te oe e faapatino ai ma faateleina ai le aoga o lau suesuega o tusitusiga paia. Mo se faataitaiga, o le faia o ni faamatalaga i au tusitusiga paia e mafai ona fesoasoani ia te oe e manatua ai malamalamaaga faaleagaga i le lumanai po o le avea ma se faamanuiaga ia te oe po o isi i se taimi e manaomia ai.

O le a se mea na e matauina e uiga i le ala na faamatalaina ai le Tusi Paia?

Mafaufau e tuu atu i tamaiti aoga e suesue fuaiupu e sosoo ai i ni paga po o ni vaega toalaiti ma valaaulia i latou e talanoaina fesili e pei o nei. A uma ona faitau tamaiti aoga, mafaufau e valaaulia i latou e mafaufau pe na faapefea ona latou vaaia taumafaiga a Satani e aveese upumoni manino ma pele ua mafua ai ona tautevateva tagata i le lalolagi.

Faitau le 1 Nifae 13:26–29, ma vaavaai mo le mea na tupu i le Tusi Paia ina ua mavae ona alu atu mai “aposetolo a le Tamai Mamoe.”

O le a le mea na tupu i le Tusi Paia?
E faapefea i le aveesea o upu moni manino ma pele mai le Tusi Paia ona mafua ai le tautevateva faaleagaga o tagata?
E faapefea ona talitutusa nei fuaiupu ma le talafaatusa o le uila vilivae?

“O le meaalofa ma le mana o le Tamai Mamoe”

Ina ua uma ona molimauina o upumoni manino ma pele na suia pe aveesea mai le Tusi Paia, sa aoao ai e Nifae o le Alii i Lona alofa mutimutivale o le a le faatagaina ai le lalolagi e tumau pea le le mautonu pe faatauasoina. (tagai 1 Nifae 13:30–34). Na vaai Nifae o le a toefuatai mai le talalelei i lona atoatoa e ala i le “meaalofa ma le mana o le Tamai Mamoe” (1 Nifae 13:35).

Ina ia aoao pe na faapefea ona ausia e le Faaola lenei mea, faitau le 1 Nifae 13:35–39 ma mafaufau e maka ia fasifuaitau nei ma faamau o latou uiga i au tusitusiga paia po o lau api talaaga mo suesuega.

Nai lo le na o le tau atu i tamaiti aoga o faamatalaga nei, e mafai ona e lisiina mau ma fasifuaitau i faailoga o upusii i luga o le laupapa i se koluma se tasi. I se koluma lona lua, e mafai ona e lisiina ia faaliliuga i se faasologa e ese mai nai lo mea o loo lisi atu iinei. Valaaulia tamaiti aoga e suesue ia fuaiupu ma faafetaui le fasifuaitau i le faaliliuga sao. E mafai foi ona tuu atu i tamaiti aoga se avanoa e fai ai fesili e uiga i nei fuaiupu.

Mau faasino ma le fasifuaitau	Faaliliuga
Mau faasino ma le fasifuaitau 1 Nifae 13:35 “nei mea”	Faaliliuga O Le Tusi a Mamona
Mau faasino ma le fasifuaitau 1 Nifae 13:39 “isi tusi”	Faaliliuga E aofia ai le Tusi a Mamona, le Mataupu Faavae ma Feagaiga, le Penina Tau Tele, ma le Faaliliuga a Iosefa Samita o le Tusi Paia
Mau faasino ma le fasifuaitau 1 Nifae 13:39 “talafaamaumau a perofeta ma aposetolo e toasefululua a le Tamai Mamoe.”	Faaliliuga O Le Tusi Paia

Faitau le 1 Nifae 13:40–41, vaavaai mo se faamatalaga o mea o le a faailoa mai e mau o le Toefuataiga i tagata uma.

O le a se mea na e mauaina?

Mafaufau e faamaumau le upumoni lenei i au tusitusiga paia po o lau api talaaga o suesuega: O le Tusi a Mamona ma isi tusitusiga paia o aso e gata ai ua toefuatai mai ai upumoni manino ma pele lea e molimau mai ia Iesu Keriso ma faatuina le atoaga o Lana talalelei e faavavau.

Mafaufau e valaaulia tamaiti aoga e tusi a latou tali i fesili lona lua ma le lona tolu o loo i lalo i se fasipepa. Ao mai a latou tali ma faapipii i le potu mo isi e faitau ai.

Aisea e te manatu ai o upumoni mai le talalelei a le Faaola ua faamatalaina e manino ma pele?
O le a se mea ua e aoaoina e uiga i le Alii mai Lana matafaioi i le toefuataiina mai o upumoni manino ma pele?
O le a se upumoni po o se aoaoga mai tusitusiga paia o aso e gata ai e manino ma pele ia te oe?
Ua faapefea ona fesoasoani lena upumoni e te latalata atili ai ia Iesu Keriso?

Ua toe fuatai upumoni manino ma pele

Faaali atu autu nei ma mau fesootai i luga o le laupapa. E mafai e tamaiti aoga ona filifili se filifiliga se tasi pe tele e suesue auiliili atili ai. Tuu i tamaiti aoga e suesue muamua le fuaitau i le Tusi Paia ma mafaufau faapea ua na o le pau lea o le faamatalaga e faatatau i le autu. Ona fai atu lea ia i latou e suesue i isi fuaitau, ma vaavaai pe faapefea ona latou faamaninoina mea o loo i le Tusi Paia. E mafai ona faia lenei mea i ni paga, ma e mafai e tamaiti aoga ona talanoaina mea na latou matauina i le tasi ma le isi. I se isi itu, e mafai e tamaiti aoga ona suesue taitoatasi ma talanoaina mea na mulimuli ane o latou maua o se vasega.

O Le Aiga Atua (Mataio 3:16–17)

O Le Togiola a Iesu Keriso (Luka 22:41–44)

Muai olaga (Ieremia 1:5)

O le faamanatuga (Mataio 26:26–28)

O le talalelei a Iesu Keriso (Mareko 1:14–15)

3 Nifae 11:31–35; 27:13–21
Mataupu Faavae o le Faatuatua 1:4

Valaaulia ni tamaiti aoga e faasoa mai mea sa latou aoaoina. E mafai ona e faaaoga fesili e pei o nei:
O a ni mea na e aoaoina e uiga i lau autu filifilia?
E faapefea e lenei upumoni ona fesoasoani ia te oe e olioli ai ma mulimuli atili ai ia Iesu Keriso?
Aisea e te faafetai ai i le aumaia e le Tama Faalelagi ma Iesu Keriso o tusitusiga paia faaopoopo ma toefuatai mai upumoni manino ma pele?

Manatu ma Talaaga o Faamatalaga

O faapefea ona fesoasoani le Tusi a Mamona ou te sau ia Iesu Keriso?

I le vitio “Bishop Caussé—Upumoni Manino ma Pele (mo le Autalavou)” (0:48), na aoao mai ai e Epikopo Gérald Caussé, Epikopo Pulefaamalumalu o le Ekalesia, le auala o loo aoao mai ai i tatou e le Tusi a Mamona e uiga ia Iesu Keriso ma valaaulia i tatou e o mai ia te Ia.

0:48

1 Nifae 13:20–29. Aisea e taua tele ai le Tusi a Mamona ma isi tusitusiga paia o aso e gata ai?

Na aoao mai le Perofeta o Iosefa Samita e faapea “o le tele o vaega taua e uiga i le faaolataga o le tagata, ua aveeseina mai le Tusi Paia, po ua leiloa a o lei tuufaatasia” (Aoaoga a Peresitene o le Ekalesia: Iosefa Samita [2007], 217). Na ia saunoa foi faapea na te talitonu i le Tusi Paia “e pei ona faitauina mai i tusitusiga a uluai tusiupu,” ma o le “aufaaliliu le magafagafa, o le au tusitusi faatamala, po o ositaulaga taufaasese ma le le faamaoni ua latou faia mea sese e tele” (Aoaoga: Iosefa Samita, 207).

Na aoao mai Elder Jeffrey R. Holland o le Korama a Aposetolo e Toasefululua:

O elemene … o loo misi mai le Tusi Paia sa “manino ma sili ona pele.” Sa manino i lo latou faigofie ma manino, sa faigofie i “le malamalama o le … tagata”; sa pele i latou i lo latou mama aiai ma lo latou taua loloto, lo latou taua faaolaina ma le taua e faavavau i fanau a le Atua. (Jeffrey R. Holland, Keriso ma le Feagaiga Fou: O le Savali Faale Mesia o le Tusi a Mamona [1997), 5)

Pe tatau pea ona ou suesue i le Tusi Paia faatasi ai ma le Tusi a Mamona ma isi tusitusiga paia o aso e gata ai?

Na folafola mai e Peresitene M. Russell Ballard o le Korama a Aposetolo e Toasefululua:

E talitonu tagata O Le Ekalesia a Iesu Keriso o le Au Paia o Aso e Gata Ai, “o Tusi Paia uma lava e mai le Agaga o le Atua ia, ma e aoga” (2 Timoteo 3:16). Tatou te fiafia i le Tusi Paia ma isi tusitusiga paia. Atonu o se mea lena e faateia ai isi o e atonu e le o silafia lo tatou talitonuga o le Tusi Paia o se afioga ua faaalia mai a le Atua. O se tasi o poutu o la tatou talitonuga, o se molimau mamana i le Faaola ma le faatosinaga faifaipea a Keriso i olaga o i latou o e tapuai ma mulimuli ia te Ia. O le tele lava o lo tatou faitau ma suesue i le Tusi Paia ma ona aoaoga, o le manino foi lena o la tatou vaaiga i aoaoga faavae autu o le talalelei toefuataiina a Iesu Keriso. …

Ae maise lava outou tupulaga talavou, aua nei [outou] manatu mama pe tauleaogaina le Tusi Paia. O le faamaumauga paia, ma le mamalu o le soifuaga o le Alii. (M. Russell Ballard, “O le Vavega o le Tusi Paia,” Liahona, Me 2007, 81–82)

Gaoioiga Faaopoopo e Aoao Ai

Isi amataga

Mafaufau e amata le vasega i le faaali atu o se faailoilo “tulaga lamatia e pau ai” ma fai atu i tamaiti aoga e mafaufau i se taimi na latou pauu pe tautevateva ai i se mea. Valaaulia i latou e faamalamalama mai aoga o faailoilo “tulaga lamatia e pau ai” po o isi faailoilo lapatai a o lei iloiloina le 1 Nifae 13. Valaaulia tamaiti aoga e vaavaai mo mea na faia e Satani e faapogai ai le tautevateva o le toatele i le lalolagi ma le ala na tuuina atu ai e le Faaola ia i latou le fesoasoani.

Mau-fefaasinoai

A o suesue e tamaiti aoga fuaiupu i le 1 Nifae 13:20–42 ma faailoa mai pe faapefea ona toefuatai mai e le Tusi a Mamona upumoni manino ma pele na aumaia mai le Tusi Paia, mafaufau e valaaulia i latou e fefaasinoai nei fuaiupu ma le Esekielu 37:15–19. E mafai foi ona faaaoga fesili e pei o fesili nei:

O le a sou manatu i le uiga o nei laau e lua, po o tusi o tusitusiga paia, o le a avea ma tasi i ou lima?
O a faamanuiaga ua avanoa pe a tatou suesue faatasi le Tusi a Mamona ma le Tusi Paia o se tusi e tasi?
Ua faapefea e le suesueina faatasi o le Tusi a Mamona ma le Tusi Paia ona faalolotoina lou malamalama ma le molimau ia Iesu Keriso?