1 Նեփի 13–14

«Զինված արդարությամբ և Աստծո զորությամբ»

Երբ Նեփիին երևաց հավանական ուրացության և իր ժողովրդի կործանման տեսիլքը, նա տեսավ, որ մի մեծ ու պիղծ եկեղեցի աղավաղելու էր Աստվածաշնչյան ուսմունքները և պայքարելու էր Աստծո Սրբերի դեմ: Պատկերացրեք Նեփիի ուրախությունը, որ նաև տեսնելու էր ավետարանի վերականգնումը՝ օրհնելով բոլոր նրանց, ովքեր կապավինեին Փրկչի ուսմունքներին և ուխտերին: Այս դասի նպատակն է օգնել ձեզ հասկանալ ուխտերի կարևորությունը և մեծացնել ուխտեր կապելու և դրանք պահելու ձեր ցանկությունը:

Բացատրեք ուսանողներին, որ իրենց ներդրումներն արժեքավոր են: Երբ ուսանողները ձեռք են բարձրացնում որևէ մեկնաբանություն անելու համար, դիմեք նրանց անունով և օգնեք նրանց զգալ, որ իրենց մեկնաբանությունները կարող են օգնել մյուսներին սովորել:

Ուսանողի նախապատրաստում. կարող եք ուսանողներին առաջարկել պատրաստվել և դասին ներկայացնել, թե նրանց կարծիքով, որոնք են վերջին 500 տարվա ամենանշանակալից իրադարձությունները:

Հնարավոր ուսումնական վարժություններ

Նշում. 1 Նեփի 13.20–42 հատվածներն ավելի մանրամասն ուսուցանվելու են հաջորդ դասին:

Աստծո ձեռքը պատմության մեջ

Պատկերացրեք, որ ձեզ երևում է վերջին 500 տարվա, այդ թվում՝ մեր ժամանակների ամենանշանակալից իրադարձությունների մի տեսիլք:

Կարող եք ինքներդ կամ ուսանողներին հանձնարարել գրատախտակին գրել ստորև ներկայացվող հարցերի պատասխանները: Պատասխանները գրատախտակին տեսնելիս մյուս ուսանողների մոտ կարող են գաղափարներ առաջ գալ:

• Ձեր կարծիքով ո՞ր իրադարձությունները կարող էիք տեսնել այդ տեսիլքում: Ինչո՞ւ:

Մարգարե Նեփիին երևաց տեսիլք, որն ընդգրկում էր այդ ժամանակաշրջանի նշանավոր իրադարձությունները: Ուշադրություն դարձրեք, թե ինչ է հայտարարել նախագահ Ռասսել Մ. Նելսոնը Նեփիի տեսիլքի մասին.

Մենք առաջին շարքերում ենք նստած, որպեսզի կենդանի վկայությունը տանք այն բանի, ինչ մարգարե Նեփին տեսել էր միայն տեսիլքում: …

Դո՛ւք, իմ եղբայրներ և քույրեր, այն տղամարդկանց, կանանց և երեխաների թվում եք, որոնց Նեփին տեսավ: Մտածե՛ք այդ մասին: (Ռասսել Մ. Նելսոն, «Լսեք Նրան», Լիահոնա, մայիս 2020թ., 88)

1 Նեփի 13–14 գլուխներն ուսումնասիրելիս փնտրեք Աստծո զորության ապացույց մեր օրերին հանգեցնող իրադարձություններում, ինչպես նաև այն նշանակալից խոստումներում, որոնք Տերը պետք է կատարի մեր կյանքում:

Ստորև ներկայացվող վարժությունը կարող է տարբեր ձևերով օգտագործվել: Օրինակ՝ կարող եք ցուցադրել իրադարձությունները և դրանց համապատասխան սուրբ գրությունները, ապա ուսանողներին առաջարկեք կարդալ հատվածները և համառոտ շարադրել բոլոր իրադարձությունները: Կարող եք նաև կազմել ստուգարք, որում ուսանողները կարող են գտնել իրադարձությունների համապատասխանությունը հատվածներին:

Կարդացեք սուրբ գրության հատվածը և գտեք, թե նրանում նկարագրվածը ստորև թվարկված որ իրադարձությանն է համապատասխանում: Նշում. այդ հատվածներում օգտագործված հեթանոսներ բառը վերաբերում է այն մարդկանց, որոնք Հուդայի երկրից չեն կամ այնտեղ չեն ապրում:

1 Նեփի 13.12–13, 16–19	Նեփիացիների հիշատակարանը (Մորմոնի Գիրք) և այլ սուրբ գրությունները հաստատում են հրեաների հիշատակարանի (Աստվածաշունչ) ճշմարտությունը և վերականգնում պարզ ու արժեքավոր ճշմարտությունները:
1 Նեփի 13.23–26	Խոստացված երկրի հայտնաբերումը և գաղութացումը հեթանոսների կողմից:
1 Նեփի 13.35–36, 39–40	Հրեաների հիշատակարանի (Աստվածաշունչ) աղավաղումը մեծ ու պիղծ եկեղեցու կողմից:
1 Նեփի 14.7–10	Տեղի է ունենում զարմանալի գործ (Ավետարանի վերականգնումը): Հեթանոսները որոշում են ընդունել կամ մերժել դրա օրհնությունները:

Պատասխաններ. 1-բ, 2-գ, 3-ա, 4-դ: Ուսանողներին կարող եք հարցնել, թե ինչ գիտեն, կամ արդյոք հարցեր ունեն իրադարձությունների մասին:

• Ըստ ձեզ՝ ի՞նչն է կարևոր այդ մարգարեություններում:

Ուսանողներին կարող է օգտակար լինել 1 Նեփի 13.12–13, 16–19 հատվածների ուսումնասիրումը, որից կբացահայտեն, թե Հոգին և Աստծո զորությունը ինչպես էին նրանց հետ, ովքեր ճանապարհ էին ընկել դեպի խոստացված երկիր:

• Ի՞նչ եք սովորում Աստծո մասին այս հատվածներից:

  Սա լավ հնարավորություն կարող է լինել Վերականգնման բացահայտման մեջ Աստծո ձեռքի մասին ձեր վկայությամբ կիսվելու համար: Նաև կարող եք առաջարկել ուսանողներին կիսվել իրենց զգացողություններով:

• Նրա մասին այս հասկացողությունն ինչպե՞ս կարող է օրհնել ձեզ հիմա:

Աստծո զորությունը մեր կյանքում

Նեփիին երևացին վերջին օրերը, և նա տեսավ Հիսուս Քրիստոսի Եկեղեցու Վերականգնումն ու դիմադրությունը, որին այն բախվելու էր: Նա նաև տեսավ Հիսուս Քրիստոսի ուխտը պահող հետևորդներին խոստացված օրհնությունները:

Կարդացեք 1 Նեփի 14.12–14 հատվածները և փնտրեք, թե ինչ իմացավ Նեփին Հիսուս Քրիստոսի Եկեղեցու՝ վերջին օրերի անդամների մասին:

• Ձեզ համար ի՞նչով է տպավորիչ Հիսուս Քրիստոսի Եկեղեցու և նրա անդամների մասին Նեփիի նկարագրությունը մեր օրերում: Ինչո՞ւ:

  Կարող եք քննարկել ուսանողների մտքերն ու զգացողությունները՝ ամբողջ աշխարհում Եկեղեցու սակավաթիվ անդամների թվում լինելու վերաբերյալ: Կարող եք առաջարկել նրանց կիսվել, թե մարդիկ ինչ ձևերով են պայքարում Փրկչի դեմ, և իրենք ինչպես կարող են հավատքով ու սիրով արձագանքել նման մարտահրավերներին:

  Քննարկումն աշխուժացնելու համար կարող եք ուսանողներին առաջարկել արձագանքել իրենց դասընկերների մեկնաբանություններին: Փնտրեք Հոգու ուղղորդումը, որպեսզի իմանաք, թե ինչ լրացուցիչ հարցեր տալ:

• Ի՞նչ սկզբունքներ կարող եք առանձնացնել հատված 14-ից:

Այդ հատվածներից կարող ենք սովորել հետևյալ սկզբունքը, որ եթե պահենք մեր ուխտերը, զինված կլինենք արդարությամբ և Աստծո զորությամբ:

• Ի՞նչ ուխտեր եք կապել կամ կապելու Աստծո հետ:

• Ի՞նչ եղանակներ կնշեք, որոնք օգնում են ձեզ կենտրոնանալ ձեր կապած ուխտերը պահելու վրա:

Տասներկու Առաքյալների Քվորումից երեց Դեյվիդ Ա. Բեդնարն ուսուցանել է, թե ինչ է նշանակում լինել զինված արդարությամբ և Աստծո զորության մեծ փառքով.

«Զինված էին արդարությամբ և Աստծո զորության մեծ փառքով» արտահայտությունը [1 Նեփի 14.14] պարզապես գեղեցիկ գաղափար կամ սուրբ գրության գեղեցիկ խոսքի օրինակ չէ: Ավելի շուտ այս օրհնություններն ակներև են Տիրոջ վերջին օրերի անթիվ աշակերտների կյանքում: …

… Ես վկայում եմ, որ այսօր Տիրոջ ուխտյալ ժողովուրդն իսկապես զինված է արդարությամբ և Աստծո զորության մեծ փառքով։ Ես ականատես եմ եղել հավատքի, քաջության, ապագայի հանդեպ հեռանկարի, համառության և ուրախության, որոնք վեր են մահկանացու կարողություններից, և որոնք միայն Աստված կարող էր տալ: (Դեյվիդ Ա. Բեդնար, «Աստծո զորության մեծ փառքով», Լիահոնա, նոյեմբեր 2021, 29–30)

• Ձեր տարիքի մարդկանց ի՞նչ հնարավոր օրինակներ կան, որոնք «զինված են արդարությամբ»:

• Ե՞րբ եք զգացել այդ օրհնություններից մի քանիսը, «որ միայն Աստված կարող է տալ»:

Ուխտեր կապող և պահող մի երիտասարդ կնոջ օրինակ տեսնելու համար դիտեք «Կանգնենք սուրբ տեղերում» տեսանյութը (5:36), որը հասանելի է ChurchofJesusChrist.org կայքում:

Մի երիտասարդ կին տաճար ուղևորվելու ճանապարհին մտածում է ուխտի ճանապարհով գնալու օրհնությունների մասին:

• Ձեր ամենօրյա գործողություններից ի՞նչ եք պարզում այն մասին, թե որքան կարևոր են ձեր կապած ուխտերը:

• Ինչո՞ւ է ձեզ անհրաժեշտ այն ուժը, որ գալիս է Երկնային Հոր հետ կապած ուխտերից:

• Ինչպե՞ս կարող եք լիարժեք կերպով ձեր կյանք հրավիրել Երկնային Հոր հետ կապած և պատված ուխտերի օրհնությունները:

Բացատրական և պատմական տեղեկություններ

1 Նեփի 13: Հեթանոսներ բառը ի՞նչ է նշանակում Մորմոնի Գրքում:

Հեթանոսներ բառը կարող է նշանակել «ազգեր»: Դա վերաբերվում է 1) նրանց, ովքեր Իսրայելի տնից չեն, 2) նրանց, ովքեր չեն հավատում Իսրայելի Աստծուն, կամ ովքեր չունեն ավետարան՝ անկախ իրենց ծագումից, և 3) նրանց, ովքեր Հուդայի երկրից չեն կամ այնտեղ չեն ապրում: Օրինակ՝ 1 Նեփի 13.3–13 հատվածներում Ամերիկա մայրցամաքի ուխտագնացներին ու գաղութաբնակներին կոչում են հեթանոսներ: 1 Նեփի 13.38 հատվածում նրանք, ովքեր ստեղծեցին Մորմոնի Գիրքը, կոչվում են հեթանոսներ: Վարդապետություն և Ուխտերը և Թանկագին Մարգարիտը նույնպես ստեղծվեցին հեթանոսների կողմից (տես 1 Նեփի 13.39, Վարդապետություն և Ուխտեր 109.60):

1 Նեփի 13.12 Ո՞վ էր Նեփիի տեսիլքի մարդը

Նախագահ Էզրա Թավտ Բենսոնը (1899–1994) հեթանոսների մեջ ճանաչել է այդ մարդուն՝ որպես Քրիստափոր Կոլումբոս.

Աստված ոգեշնչել է «մի մարդու հեթանոսների մեջ» (1 Նեփի 13,12), որը ուղղորդվելով Աստծո Հոգով, բացահայտեց Ամերիկան և այս նոր հարուստ երկիրը ներկայացրեց Եվրոպայի մարդկանց: Այդ մարդն, իհարկե, Քրիստափոր Կոլումբոսն էր, որը վկայել է, որ ոգեշնչվել էր անելու իր բացահայտումը:

«Մեր Տերը», ասել էր Կոլումբոսը, «պայծառացրեց միտքս, ուղարկեց ինձ ծովերով և այդ արարքը գործելու կրակ վառեց իմ մեջ: Նրանք, ովքեր լսեցին իմ ձեռնարկի մասին, ինձ հիմար անվանեցին, ծաղրեցին ինձ ու ծիծաղեցին: Բայց ո՞վ կարող է կասկածել, որ ինձ Սուրբ Հոգին էր ոգեշնչել»: (Յակոբ Վասերման, Կոլումբոս, Ծովերի Դոն Քիշոտը, էջ 19–20): (Էզրա Թավտ Բենսոնի ուսմունքները [1988], 577)

1 Նեփի 14.10 Որո՞նք են նշված երկու եկեղեցիները:

Երեց Դալլին Հ. Օուքսն ասել է, որ Նեփիի նկարագրած «մեծ ու պիղծ եկեղեցին» պետք է «որևէ փիլիսոփայություն կամ կազմակերպություն լինի, որը հակադրվում է Աստծո հանդեպ հավատքին: Եվ այն «գերությունը», որին այդ «եկեղեցին» ձգտում է տանել սրբերին, այնքան ֆիզիկական բանտարկություն չի լինի, որքան կեղծ գաղափարների գերություն» («Կանգնեք որպես Աստծո վկաներ», Ensign, մարտ 2015թ., 32):

Ինչպե՞ս է Աստված օրհնելու արդարակյացներին վերջին օրերին

Տասներկու Առաքյալների Քվորումից երեց Նիլ Լ․ Անդերսենն ուսուցանել է.

Եղբայրնե՛ր և քույրե՛ր, մենք ապրում ենք Տիրոջ Երկրորդ Գալուստին նախորդող օրերում. մի ժամանակ, որին դարեր շարունակ սպասել են հավատացյալները: Մենք ապրում ենք պատերազմների և պատերազմների մասին լուրերի օրերում, բնական աղետների և այնպիսի օրերում, երբ աշխարհն ընկղմված է խառնաշփոթի մեջ:

Սակայն մենք նաև ապրում ենք Վերականգնման փառահեղ ժամանակներում, երբ ավետարանը տարվում է ամբողջ աշխարհին, երբ Տերը խոստացել է, որ Նա «մաքուր մի ժողովուրդ … կբարձրացնի» [Վարդապետություն և ուխտեր 100.16] և կզինի նրանց «արդարությամբ և Աստծո զորությամբ» [1 Նեփի 14.14]:

Մենք ուրախանում ենք այս օրերին և աղոթում, որ կարողանանք խիզախությամբ տանել մեր դժվարություններն ու անորոշությունները (Նիլ Լ. Անդերսեն, «Քո արքայությունը գայ», Լիահոնա, մայիս 2015, 119):

Ինչպե՞ս ենք մենք օրհնվում՝ քայլելով ուխտի ճանապարհով:

Կարդացեք, դիտեք կամ լսեք երեց Դ․ Թոդ Քրիստոֆերսոնի «Ինչու ուխտի ճանապարհը» ելույթը (Լիահոնա, մայիս 2021, 116–19):

Օժանդակ ուսումնական վարժություններ

1 Նեփի 14.1–7: Ճշմարտությանը տրվող մեր արձագանքի արդյունքները

1 Նեփի 14 գլուխը կարելի է ներկայացնել նաև հետևյալ կերպ՝ առանց բառերի ցուցադրեք հետևյալ նկարը, որը ճամփաբաժան է պատկերում:

Կարդացեք 1 Նեփի 14.1–2, 5–7 հատվածները: Ուսանողներին օգնեք նկատել ավետարանի Վերականգնմանը արձագանքելու մարդկանց տարբեր ընտրությունները և այդ ընտրությունների հետևանքները: Նկարին ավելացրեք պատասխաններ, որպեսզի այն վերևի գծապատկերին նման լինի: