Գնահատեք ձեր գիտելիքները 1

1 Նեփի 1–15

Այս դասի նպատակն է օգնել ձեզ գնահատել ձեր սահմանած նպատակները, նաև, թե ինչ աճ եք ունեցել Մորմոնի Գրքի՝ մինչ այժմ կատարած ուսումնասիրության ընթացքում:

Օգնեք ուսանողներին գնահատել իրենց գիտելիքները Ուսանողներին հնարավորություն տվեք գնահատել իրենց գիտելիքները: Որպես դա անելու եղանակներից մեկը՝ կարող եք նրանց առաջարկել կիսվել, թե ուսումնասիրությունների և հավատքի շնորհիվ ինչ աճ կամ զարգացում են ունեցել:

Ուսանողի նախապատրաստում. ուսանողներին առաջարկեք դասի համար պատրաստել և ներկայացնել Մորմոնի Գրքից մինչ այժմ սովորած մի բան, որը նրանց օգնել է ավելի մոտենալ Հիսուս Քրիստոսին:

Հնարավոր ուսումնական վարժություններ

Այս դասի նպատակն է օգնել ուսանողներին գնահատել իրենց սահմանած նպատակները, Մորմոնի Գրքի ուսմունքները բացատրելու իրենց կարողությունը, և թե ինչպես են փոխվում իրենց մոտեցումները, ցանկությունները և ավետարանով ապրելու կարողությունը: Դասարանով 1 Նեփի 1–15 գլուխներն ուսումնասիրելու արդյունքում գուցե շեշտվել են ճշմարտություններ, որոնք տարբերվում են ստորև ներկայացվող վարժությունների ճշմարտություններից: Այդ դեպքում վարժությունները կարող են հարմարեցվել՝ ընդգրկելով այդ ճշմարտությունները:

Ուսումնասիրեք Մորմոնի Գիրքն ամեն օր

Այս բաժինը նախատեսված է օգնելու ուսանողներին գնահատել, թե ինչպես են իրականացրել սուրբ գրությունների ուսումնասիրության իրենց անձնական նպատակները և ինչ չափով են զգում Մորմոնի Գրքի ուսումնասիրության արժեքն ու կարևորությունը:

• Ի՞նչ որոշակի բաներ կան, որ անում եք ամեն օր կամ ամեն գիշեր:

Ուսանողները կարող են պատասխանել, օրինակ՝ լվանալ ատամները, ուտել, քնել և այլն:

• Ի՞նչ կարող է պատահել, եթե մի օր կամ ավելի երկար չանեք այս գործողությունները:

• Ինչո՞ւ պետք է ձգտենք ամեն օր ուսումնասիրել սուրբ գրություններ:

Ցուցադրեք ստորև ներկայացվող ինքնագնահատումը: Ուսանողները կարող են իրենց համար մտածել իրենց պատասխանների շուրջ կամ գրանցել դրանք իրենց օրագրերում:

Ընտրեք ստորև ներկայացված պնդումներից մեկը, որով կնկարագրեիք Մորմոնի Գրքի ձեր ամենօրյա ուսումնասիրությունը.

1. Իմ ուսումնասիրությունն ինձ իմաստալից է թվում և շարունակական է եղել:

2. Իմ ուսումնասիրությունը լավ է, երբ անում եմ այն, բայց ոչ պարբերաբար:

3. Ես հետևողականորեն ուսումնասիրում եմ, բայց շատ բան չեմ ստանում դրանից:

4. Ես դժվարությամբ եմ հասկանում այն, ինչ կարդում եմ և հազվադեպ եմ ինքնուրույն ուսումնասիրում:

5. Սուրբ գրությունների ուսումնասիրության նպատակին հասնելու համար ես ոչինչ չեմ արել:

6. Այլ. բացատրեք ձեր պատասխանը:

Ամենօրյա նպատակին հասնելու ուղղությամբ խոչընդոտ ունենալը բնական է: Կարևոր է անընդհատ փորձելը:

Ուսանողների նշած խոչընդոտները կարող եք գրել գրատախտակին և դասարանին առաջարկել քննարկել, թե ինչպես են արձագանքել կամ կարող էին արձագանքել այդ խոչընդոտներին:

• Ի՞նչն է հաջողվել Մորմոնի Գիրքն ուսումնասիրելիս: Ի՞նչը կցանկանայիք ավելի լավ կամ այլ կերպ անել:

Կարող եք ընտրել ստորև ներկայացվող վարժություններից մեկը կամ մի քանիսը, որպեսզի օգնեք ուսանողներին զգալ Մորմոնի Գրքի արժեքն ու ճշմարտացիությունը:

Անձնական մտքեր ու զգացողություններ Մորմոնի Գրքի մասին

Վարժություն 1. Վկայության ժողով

Եթե վկայություն բերեիք Մորմոնի Գրքի մասին հաղորդության ժողովին, ի՞նչ կասեիք, որով կփոխանցեիք ձեր զգացողությունները:

Վարժություն 2. Ինչո՞ւ եք ուսումնասիրում

Պատկերացրեք, որ Մորմոնի Գիրքն ուսումնասիրելիս ներս է մտնում ձեր կրտսեր քույրը կամ եղբայրը և հարցնում. «Ի՞նչ ես կարդում»: Դուք պատասխանում եք. «Մորմոնի Գիրքը»: Ձեր քույրը կամ եղբայրը հարցնում է. «Ինչո՞ւ»: Գրեք երկու կամ երեք նախադասություն, որոնք նկարագրում են, թե ինչ կարող էիք ասել ձեր կրտսեր եղբորը կամ քրոջը, որպեսզի օգնեք նրան հասկանալ, թե ինչու եք որոշել ուսումնասիրել Մորմոնի Գիրքը:

Վարժություն 3. Գրառում սոցիալական ցանցերում

Մի ընկեր սոցիալական ցանցերում կատարում է հետևյալ գրառումը. «Ես վերջերս սկսել եմ ուսումնասիրել Մորմոնի Գիրքը, և այն ինձ դուր է գալիս: Ով արդեն կարդացել է Մորմոնի Գիրքը, կարո՞ղ է ինձ հետ կիսվել իր սիրած հատվածով և կարճ բացատրել, թե ինչու է սիրում այն»:

Սա կարող է լավ հնարավորություն լինել առաջարկելու ուսանողներին կիսվել ուսանողի պատրաստվածությանն ուղղված աշխատանքի իրենց մտքերով: Կարող եք կիսվել ձեր վկայությամբ, թե ինչպես է Մորմոնի Գիրքն այս կիսամյակում օգնել ձեզ ավելի մոտ լինել Հիսուս Քրիստոսին:

Լեքիի երազը

Այս բաժնի նպատակն է օգնել ուսանողներին՝ բացատրել Լեքիի երազի հատվածներն ու նշանակությունը և մտածել այն մասին, թե իրենք որտեղ են իրենց տեսնում երազում:

Ձեր ուսանողներին այս բովանդակությունը վերանայելու հարցում օգնելու համար կարող եք առաջարկել նրանց անհատապես ուսումնասիրել ստորև ներկայացվող նկարներն ու հարցերը: Ապա ուսանողներին բաժանեք զույգերի և առաջարկեք նրանց 30 վայրկյանի ընթացքում հերթով զուգընկերոջը հնարավորինս մանրամասն բացատրել Լեքիի երազը և դրա նշանակությունը:

Օգտակար կլինի ցուցադրել նկարներին հաջորդող հարցերը:

• Երազի ի՞նչ տարբեր հատվածներ կամ խորհրդանիշներ եք հիշում:

• Խորհրդանիշներից որո՞նք են ամենաշատը տպավորել ձեզ: Ինչո՞ւ:

• Լեքիի երազն ինչո՞վ է նման այսօրվա մեր աշխարհին:

Մտածեք, թե Լեքիի երազի տարբեր հատվածներն ինչպես կարող են օգնել մարդկանց հետևյալ իրավիճակներում.

• Մի երիտասարդ տղա ժամանակ է անցկացնում մի խումբ մարդկանց հետ, որոնք որոշում են հետ կանգնել Իմաստության խոսքից և նրան էլ ստիպում են նույնն անել:

• Մի երիտասարդ կին կարծում է, որ կարող է լրջորեն զբաղվել սուրբ գրությունների ուսումնասիրությամբ, երբ իր լարված կյանքի ռիթմը խաղաղվի:

• Մի երիտասարդ տղամարդ սկսում է ամաչել Հիսուս Քրիստոսի Վերջին Օրերի Սրբերի Եկեղեցու անդամությունից, երբ լսում է, որ ուրիշները ծաղրում են հավատացյալ մարդկանց:

• Ինչպե՞ս կարող եք օգտագործել Լեքիի երազը՝ իրավիճակներից յուրաքանչյուրին լուծում տալու համար:

• Ըստ ձեզ՝ Լեքիի երազի ո՞ր ուսմունքը կամ ճշմարտությունը կարող է օգնել ձեզ ձեր կյանքում ավելի մոտենալ Աստծո սիրուն:

Դուք կարող եք պահել պատվիրանները

Այս հատվածի նպատակն է հնարավորություն տալ ուսանողներին տեսնել, թե ինչպես են իրենք կատարում Աստծո պատվիրաններով լիարժեք առաջնորդվելու իրենց ծրագիրը (1 Նեփի 3-ից):

1 Նեփի 3 գլխին վերաբերող դասի ժամանակ դուք, գուցե, նպատակ եք սահմանել՝ ավելի հնազանդ լինել մի պատվիրանի, որը պահելը դժվար էր ձեզ համար: Մտածեք, թե այդ նպատակին հասնելու ուղղությամբ ինչ առաջընթաց ունեք և գրի առեք ձեր մտքերը սուրբ գրությունների ուսումնասիրության կամ ձեր անձնական օրագրում: Մտածելիս և գրելիս դիտարկեք հետևյալ հարցերը․

• Ի՞նչ արդյունքի եք հասել այս պատվիրանին հնազանդվելու ջանքերում:

• Ի՞նչ հաջողություններ կամ խոչընդոտներ եք ունեցել:

• Ինչպե՞ս կհարմարեցնեիք ձեր ծրագիրը:

• Ինչպե՞ս եք օրհնվել ձեր ջանքերի համար:

• Ինչպե՞ս է Տերը ճանապարհ պատրաստել ձեր հնազանդության համար:

Եթե դուք չեք մտածել որևէ պատվիրանի մասին, որը կարող է դժվար լինել ձեզ համար պահել, մտածեք դրա մասին հիմա: Որոշեք, թե ինչ գործողություններ կարող եք ձեռնարկել այն լիարժեք պահելու համար:

Կարող եք ուսանողներին հնարավորություն տալ դասարանի հետ կիսվել այս հարցերի պատասխաններով կամ ներկայացնել, թե ինչ սովորեցին, եթե դա խիստ անձնական չէ: Կարող եք կիսվել ձեր վկայությամբ այն մասին, թե Աստված ինչպես կօրհնի մեզ Իր պատվիրանները կատարելու համար, երբ մենք նշանակալի ջանքեր ենք գործադրում Նրան վստահելու և հնազանդվելու ուղղությամբ:

Առաջին Նախագահությունից նախագահ Հենրի Բ. Այրինգն ուսուցանել է, որ Տիրոջ հանդեպ ունեցած Նեփիի վստահությունը կարող է քաջալերել մեզ այն պահերին, երբ դժվարանանք հնազանդվել Տիրոջ պատվիրաններին.

Երիտասարդ Նեփին Մորմոնի Գրքում մեր մեջ ցանկություն է սերմանում զարգացնել վստահություն Տիրոջ հանդեպ՝ Նրա պատվիրաններին հնազանդվելու համար, որքան էլ դա դժվար թվա մեզ: Նեփին հանդիպեց վտանգի և հնարավոր մահվան, երբ ասաց վստահության այս խոսքերը, որոնք մենք կարող ենք և պետք է ամուր պահենք մեր սրտերում. «Ես կգնամ ու կանեմ այն բաները, որոնք Տերը պատվիրել է, քանզի գիտեմ, որ Տերը պատվիրաններ չի տալիս մարդկանց զավակներին՝ առանց ուղի պատրաստելու նրանց համար, որպեսզի նրանք կարողանան իրագործել այն, ինչ նա պատվիրել է իրենց» [1 Նեփի 3.7] (Հենրի բ. Այրինգ, «Վստահիր Աստծուն, հետո գնա ու արա», Լիահոնա, նոյեմբեր 2010, 71):