« នីហ្វៃទី ១ ១៣:២០–៤២ ៖ សេចក្ដីពិតដ៏ច្បាស់ និងពិសេស » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« នីហ្វៃទី ១ ១៣:២០–៤២ ៖ សេចក្ដីពិតដ៏ច្បាស់ និងពិសេស » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
នីហ្វៃទី ១ ១៣:២០–៤២
សេចក្ដីពិតដ៏ច្បាស់ និងពិសេស
ការស្ដារឡើងវិញនៃដំណឹងល្អរបស់ព្រះអង្គសង្គ្រោះគឺជាពរជ័យមួយក្នុងរបៀបជាច្រើន ។ ពរជ័យមួយគឺថា វានាំមកនូវការបំភ្លឺអំពីសេចក្ដីពិតដ៏ច្បាស់ និងពិសេសជាច្រើនដែលបានបាត់បង់ពីព្រះគម្ពីរប៊ីប ។ នីហ្វៃបានឃើញព្រឹត្តិការណ៍នៃការស្ដារឡើងវិញជាយូរមកហើយ មុនពេលហេតុការណ៍ទាំងនោះបានកើតឡើង ហើយយល់ពីតួនាទីដ៏សំខាន់ដែលបញ្ជីរបស់លោកនឹងមានចំពោះការស្ដារឡើងវិញនោះ ។ មេរៀននេះអាចជួយអ្នកឲ្យយល់ពីរបៀបដែលព្រះគម្ពីរមរមន និងព្រះគម្ពីរផ្សេងទៀតដែលបានបើកសម្តែង ជួយស្ដារឡើងវិញនូវសេចក្ដីពិតដ៏ច្បាស់ និងពិសេសៗនៃដំណឹងល្អរបស់ព្រះអង្គសង្គ្រោះ ។
ការរៀបចំខ្លួនអ្នកដើម្បីបង្រៀន ។ ការបង្រៀនដំណឹងល្អប្រកបដោយអានុភាពមានន័យថា មិនគ្រាន់តែជាការរៀបចំមេរៀនមួយប៉ុណ្ណោះទេ ប៉ុន្តែវាជាការរៀបចំខ្លួនរបស់យើងផងដែរ ។ ដោយសារព្រះវិញ្ញាណថ្លែងទីបន្ទាល់អំពីសេចក្ដីពិត និងជាប្រភពនៃការប្រែចិត្តជឿ នោះគ្រូបង្រៀនដំណឹងល្អដ៏មានប្រសិទ្ធភាពផ្តោតលើការបំពេញដួងចិត្តពួកគេជាមួយនឹងព្រះវិញ្ញាណបរិសុទ្ធ មុនពេលពួកគេគិតអំពីការបំពេញម៉ោងក្នុងថ្នាក់ ។ សូមពិចារណាសួរខ្លួនឯងថា « តើខ្ញុំត្រៀមខ្លួនជាស្រេចដើម្បីបង្រៀនដោយព្រះវិញ្ញាណហើយឬនៅ ? »
ការរៀបចំសិស្ស ៖ សូមពិចារណាអញ្ជើញសិស្សឲ្យមកដោយរៀបចំខ្លួន ដើម្បីចែកចាយអ្វីមួយដែលពួកគេបានរៀនថ្មីៗនេះពីការសិក្សាព្រះគម្ពីរផ្ទាល់ខ្លួនរបស់ពួកគេ ។
សកម្មភាពរៀនសូត្រដែលអាចមាន
ការត្រួតពិនិត្យសុវត្ថិភាព
សូមបង្ហាញរូបភាពកង់មួយដល់សិស្ស ឬប្រសិនបើអាច សូមពិចារណាយកកង់មួយមកថ្នាក់រៀន ។ សូមអញ្ជើញសិស្សឲ្យគិតអំពីផ្នែកសំខាន់ៗរបស់កង់ ហើយសរសេរវានៅលើក្ដារខៀន ។
កង់គឺជាមធ្យោបាយធ្វើដំណើរមួយដ៏សាមញ្ញ និងមានប្រសិទ្ធភាព ។ ការជិះកង់ក៏អាចជាមានភាពរីករាយ និងទទួលរង្វាន់ជាបទពិសោធន៍ផងដែរ ។ តើផ្នែកសំខាន់ៗអ្វីខ្លះដែលអាចធ្វើឲ្យមនុស្សម្នាក់ប្រើកង់ដោយសុវត្ថិភាព និងមានប្រសិទ្ធភាព ? សូមស្រមៃថាអ្នកមានកង់មួយ ហើយមាននរណាម្នាក់បានដកផ្នែកសំខាន់ៗមួយចំនួនចេញពីកង់នោះដោយចេតនា ។
-
តើសកម្មភាពទាំងនោះអាចបង្ហាញអ្វីខ្លះអំពីអារម្មណ៍របស់គាត់ចំពោះអ្នក ?
-
តើមានអ្វីខ្លះអាចកើតឡើង ប្រសិនបើអ្នកព្យាយាមប្រើកង់ដែលគ្មានផ្នែកសំខាន់ទាំងនោះ ?
-
តើអ្នកអាចទាក់ទងអ្នកណាដើម្បីជួសជុល និងធ្វើឲ្យកង់របស់អ្នកដំណើរការបានត្រឹមត្រូវឡើងវិញ ?
តាមរបៀបស្រដៀងគ្នានេះ សាតាំងបានព្យាយាមធ្វើបាប និងបំភាន់បុត្រាបុត្រីរបស់ព្រះ ដោយដកចេញ និងផ្លាស់ប្តូរផ្នែកសំខាន់ៗនៃដំណឹងល្អរបស់ព្រះយេស៊ូវគ្រីស្ទ ។ នៅពេលអ្នកសិក្សា នីហ្វៃទី ១ ១៣ សូមរកមើលអ្វីដែលព្រះអង្គសង្គ្រោះបានធ្វើដើម្បីជួយយើងឲ្យយកឈ្នះលើឧបសគ្គរបស់សាតាំង ។
មានមនុស្សជាច្រើនដែលជំពប់ជើងដួល
នីហ្វៃត្រូវបានបង្ហាញនៅក្នុងការនិមិត្តអំពីព្រឹត្តិការណ៍សំខាន់ៗនៅថ្ងៃចុងក្រោយ រួមទាំងគម្ពីរមួយក្បាលដែលត្រូវបាននាំទៅកាន់ដែនដីសន្យាដោយសាសន៍ដទៃ ។ សូមអានអំពីគម្ពីរនោះនៅក្នុង នីហ្វៃទី ១ ១៣:២០–២៥ ហើយរកមើលអ្វីដែលគម្ពីរនោះមាន ។
វាអាចនឹងមានប្រយោជន៍ក្នុងការធ្វើបញ្ជីមួយអំពីអ្វីដែលសិស្សបានរកឃើញដាក់នៅលើក្ដារខៀន ដូចជា « សេចក្ដីសញ្ញាទាំងឡាយនៃព្រះអម្ចាស់ » « ពាក្យព្យាករណ៍ជាច្រើននៃពួកព្យាការីបរិសុទ្ធទាំងឡាយ » និង « ភាពពោរលេញនៃដំណឹងល្អ » ( នីហ្វៃទី ១ ១៣:២៣–២៤ ) ។ សូមពិចារណាសួរសិស្សថា តើពួកគេដឹងថាគម្ពីរនោះមានអ្វីខ្លះនៅក្នុង ខទី ២០ គឺមុនពេលអញ្ជើញពួកគេឲ្យធ្វើការកត់ចំណាំនៅក្នុងព្រះគម្ពីររបស់ពួកគេ ។
-
តើអ្នកបានរៀនអ្វីខ្លះពីការអានរបស់អ្នក ?
សូមពិចារណាធ្វើការកត់ចំណាំនៅក្នុង ខទី ២០ ថា គម្ពីរ ដែលនីហ្វៃបានមើលឃើញ សំដៅទៅលើព្រះគម្ពីរបរិសុទ្ធ ។ ការធ្វើការកត់ចំណាំនៅក្នុងព្រះគម្ពីររបស់អ្នកអាចជួយអ្នកឲ្យបង្កើតលក្ខណៈផ្ទាល់ខ្លួនចំពោះខគម្ពីរទាំងនោះ និងបង្កើនប្រសិទ្ធភាពនៃការសិក្សាព្រះគម្ពីររបស់អ្នក ។ ឧទាហរណ៍ ការធ្វើការកត់ចំណាំនៅក្នុងព្រះគម្ពីររបស់អ្នកអាចជួយអ្នកចងចាំការយល់ដឹងខាងវិញ្ញាណនាពេលអនាគត ឬក្លាយជាពរជ័យដល់អ្នក ឬអ្នកផ្សេងទៀតក្នុងគ្រាដែលត្រូវការ ។
-
តើអ្នកបានកត់សម្គាល់អ្វីខ្លះអំពីរបៀបដែលព្រះគម្ពីរប៊ីបត្រូវបានពិពណ៌នា ?
សូមពិចារណាឲ្យសិស្សសិក្សាខគម្ពីរបន្ទាប់ជាគូៗ ឬក្រុមតូចៗ ហើយអញ្ជើញពួកគេឲ្យពិភាក្សាអំពីសំណួរដូចតទៅនេះ ។ នៅពេលសិស្សបានបញ្ចប់ការអានហើយ សូមពិចារណាអញ្ជើញពួកគេឲ្យគិតអំពីរបៀបដែលពួកគេបានឃើញការខិតខំរបស់សាតាំងក្នុងការដកចេញនូវសេចក្ដីពិតដ៏ច្បាស់ និងពិសេសៗ ដែលបណ្តាលឲ្យមនុស្សនៅក្នុងពិភពលោកជំពប់ដួល ។
សូមអាន នីហ្វៃទី ១ ១៣:២៦–២៩ ដោយរកមើលអ្វីដែលបានកើតឡើងចំពោះព្រះគម្ពីរប៊ីប បន្ទាប់ពីវាបានចេញមកពី « ពួកសាវកនៃកូនចៀម » ។
-
តើមានអ្វីកើតឡើងចំពោះព្រះគម្ពីរប៊ីប ?
-
តើការដកយកសេចក្ដីពិតដ៏ច្បាស់ និងពិសេសៗចេញពីព្រះគម្ពីរប៊ីបអាចបណ្ដាលឲ្យមនុស្សជំពប់ដួលខាងវិញ្ញាណយ៉ាងដូចម្ដេច ?
-
តើខគម្ពីរទាំងនេះស្រដៀងនឹងការប្រៀបធៀបអំពីកង់យ៉ាងដូចម្ដេច ?
« អំណោយទាន និងព្រះចេស្ដានៃកូនចៀម »
បន្ទាប់ពីបានឃើញថាសេចក្តីពិតដ៏ច្បាស់ និងពិសេសៗត្រូវបានកែប្រែ ឬដកចេញពីព្រះគម្ពីរប៊ីប នោះនីហ្វៃបានរៀនថា នៅក្នុងសេចក្តីមេត្តាករុណារបស់ទ្រង់ព្រះអម្ចាស់នឹងមិនអនុញ្ញាតឲ្យពិភពលោកនៅតែមានភាពច្របូកច្របល់ ឬងងឹតសូន្យឡើយ ( សូមមើល នីហ្វៃទី ១ ១៣:៣០–៣៤ ) ។ នីហ្វៃបានឃើញថាដំណឹងល្អនឹងត្រូវបានស្ដារឡើងវិញក្នុងភាពពេញលេញរបស់វា តាមរយៈ « អំណោយទាន និងព្រះចេស្តានៃកូនចៀម » ( នីហ្វៃទី ១ ១៣:៣៥ ) ។
ដើម្បីរៀនពីរបៀបដែលព្រះអង្គសង្គ្រោះបានសម្រេចកិច្ចការនេះ សូមអាន នីហ្វៃទី ១ ១៣:៣៥–៣៩ ហើយពិចារណាគូសចំណាំឃ្លាខាងក្រោមនេះ ហើយកត់ចំណាំអត្ថន័យរបស់វានៅក្នុងព្រះគម្ពីរ ឬសៀវភៅកំណត់ហេតុការសិក្សារបស់អ្នក ។
ជំនួសឲ្យការប្រាប់សិស្សនូវព័ត៌មានខាងក្រោមដោយសាមញ្ញ អ្នកអាចធ្វើបញ្ជីបទគម្ពីរ និងឃ្លានៅក្នុងសញ្ញាសម្រង់ដាក់នៅលើក្ដារខៀនក្នុងជួរឈរមួយ ។ នៅក្នុងជួរឈរទីពីរ អ្នកអាចធ្វើបញ្ជីអំពីការបកស្រាយតាមលំដាប់ផ្សេងមួយទៀតពីអ្វីដែលបានរៀបរាប់នៅទីនេះ ។ សូមអញ្ជើញសិស្សឲ្យសិក្សាខគម្ពីរ ហើយផ្គូផ្គងឃ្លានោះទៅនឹងការបកស្រាយដែលត្រឹមត្រូវ ។ សិស្សក៏អាចត្រូវបានផ្តល់ឱកាសមួយដើម្បីសួរសំណួរអំពីខគម្ពីរទាំងនេះផងដែរ ។
|
សេចក្តីយោងបទគម្ពីរ និងឃ្លា |
ការបកស្រាយ |
|---|---|
សេចក្តីយោងបទគម្ពីរ និងឃ្លា នីហ្វៃទី ១ ១៣:៣៥ « សេចក្តីទាំងនេះ » | ការបកស្រាយ ព្រះគម្ពីរមរមន |
សេចក្តីយោងបទគម្ពីរ និងឃ្លា នីហ្វៃទី ១ ១៣:៣៩ « គម្ពីរផ្សេងៗទៀត » | ការបកស្រាយ រួមបញ្ចូលទាំងព្រះគម្ពីរមរមន គោលលទ្ធិ និងសេចក្តីសញ្ញា មុក្តាដ៏មានតម្លៃមហិមា និងការបកប្រែព្រះគម្ពីរប៊ីបដោយយ៉ូសែប ស្ម៊ីធ |
សេចក្តីយោងបទគម្ពីរ និងឃ្លា នីហ្វៃទី ១ ១៣:៣៩ « បញ្ជីទាំងឡាយនៃពួកព្យាការី និងនៃពួកសាវកដប់ពីរនាក់នៃកូនចៀម » | ការបកស្រាយ ព្រះគម្ពីរបរិសុទ្ធ |
សូមអាន នីហ្វៃទី ១ ១៣:៤០–៤១ ដោយរកមើលការពិពណ៌នាអំពីអ្វីដែលបទគម្ពីរនៃការស្ដារឡើងវិញនឹងធ្វើឲ្យមនុស្សទាំងអស់ដឹង ។
-
តើអ្នកបានរកឃើញអ្វីខ្លះ ?
សូមពិចារណាកត់ត្រាសេចក្ដីពិតខាងក្រោមនៅក្នុងព្រះគម្ពីរ ឬសៀវភៅកំណត់ហេតុការសិក្សារបស់អ្នក ៖ ព្រះគម្ពីរមរមន និងព្រះគម្ពីរថ្ងៃចុងក្រោយផ្សេងទៀត ស្ដារឡើងវិញនូវសេចក្ដីពិតដ៏ច្បាស់ និងពិសេសៗ ដែលថ្លែងទីបន្ទាល់អំពីព្រះយេស៊ូវគ្រីស្ទ ហើយបង្កើតភាពពេញលេញនៃដំណឹងល្អដ៏អស់កល្បរបស់ទ្រង់ ។
សូមពិចារណាអញ្ជើញសិស្សឲ្យសរសេរចម្លើយរបស់ពួកគេចំពោះសំណួរទីពីរ និងទីបីខាងក្រោមនៅលើក្រដាសមួយសន្លឹក ។ សូមប្រមូលចម្លើយរបស់ពួកគេ ហើយដាក់បង្ហាញចម្លើយរបស់ពួកគេនៅជុំវិញបន្ទប់រៀនដើម្បីឲ្យអ្នកដទៃអាន ។
-
ហេតុអ្វីអ្នកគិតថាសេចក្ដីពិតមកពីដំណឹងល្អរបស់ព្រះអង្គសង្គ្រោះត្រូវបានពិពណ៌នាថាច្បាស់ និងពិសេស ?
-
តើអ្នករៀនអ្វីខ្លះអំពីព្រះអម្ចាស់ចេញពីតួនាទីរបស់ទ្រង់ក្នុងការស្ដារឡើងវិញនូវសេចក្ដីពិតដ៏ច្បាស់ និងពិសេសនោះ ?
-
តើសេចក្ដីពិត ឬការបង្រៀនអ្វីខ្លះចេញពីបទគម្ពីរថ្ងៃចុងក្រោយដែលវាមានលក្ខណៈដ៏ច្បាស់ និងពិសេសៗចំពោះអ្នក ?
-
តើសេចក្ដីពិតនោះបានជួយអ្នកខិតកាន់តែជិតព្រះយេស៊ូវគ្រីស្ទយ៉ាងដូចម្ដេច ?
សេចក្តីពិតដ៏ច្បាស់ និងពិសេសត្រូវបានស្តារឡើងវិញ
សូមបង្ហាញប្រធានបទខាងក្រោម និងបទគម្ពីរដែលទាក់ទងនៅលើក្ដារខៀន ។ សិស្សអាចជ្រើសរើសជម្រើសមួយ ឬច្រើនដើម្បីសិក្សាឲ្យកាន់តែលម្អិត ។ សូមឲ្យសិស្សសិក្សាវគ្គបទគម្ពីរនៅក្នុងព្រះគម្ពីប៊ីបជាមុនសិន ហើយស្រមៃថា នេះជាព័ត៌មានតែមួយគត់ដែលទាក់ទងនឹងប្រធានបទនោះ ។ បន្ទាប់មក សូមឲ្យពួកគេសិក្សាវគ្គបទគម្ពីរផ្សេងទៀត ដោយរកមើលរបៀបដែលបទគម្ពីរទាំងនោះបញ្ជាក់អំពីអ្វីដែលមាននៅក្នុងព្រះគម្ពីរប៊ីប ។ ការណ៍នេះអាចធ្វើជាគូៗ ហើយសិស្សអាចពិភាក្សាពីការសង្កេតឃើញរបស់ពួកគេជាមួយគ្នា ។ ម៉្យាងទៀត សិស្សអាចសិក្សារៀងៗខ្លួន និងពិភាក្សាពីការរកឃើញរបស់ពួកគេនៅពេលក្រោយជាមួយសិស្សក្នុងថ្នាក់ទាំងមូល ។
ក្រុមព្រះ ( ម៉ាថាយ ៣:១៦–១៧ )
ដង្វាយធួននៃព្រះយេស៊ូវគ្រីស្ទ ( លូកា ២២:៤១–៤៤ )
ជីវិតមុនផែនដី ( យេរេមា ១:៥ )
សាក្រាម៉ង់ ( ម៉ាថាយ ២៦:២៦–២៨ )
ដំណឹងល្អនៃព្រះយេស៊ូវគ្រីស្ទ ( ម៉ាកុស ១:១៤–១៥ )
-
សូមអញ្ជើញសិស្សដែលស្ម័គ្រចិត្តឲ្យចែកចាយនូវអ្វីដែលពួកគេបានរៀន ។ អ្នកអាចប្រើសំណួរដូចខាងក្រោម ៖
-
តើអ្នកបានរៀនអ្វីខ្លះអំពីប្រធានបទដែលអ្នកបានជ្រើសរើស ?
-
តើសេចក្ដីពិតនេះអាចជួយអ្នកឲ្យរីករាយនៅក្នុង និងដើរតាមព្រះយេស៊ូវគ្រីស្ទបានកាន់តែប្រសើរឡើងដោយរបៀបណា ?
-
ហេតុអ្វីអ្នកមានអំណរគុណដែលព្រះវរបិតាសួគ៌ និងព្រះយេស៊ូវគ្រីស្ទបាននាំមកនូវបទគម្ពីរបន្ថែម ហើយបានស្ដារឡើងវិញនូវសេចក្ដីពិតដ៏ច្បាស់ និងពិសេស ?