ព្រះគម្ពីរមរមន សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៤ )

មាតិកា
ទំព័រចំណងជើង
សេចក្តីផ្តើមនៃ ព្រះគម្ពីរមរមន សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា
ព្រះគម្ពីរមរមន—ឯកសារណែនាំ
ទំព័របុព្វកថានៃព្រះគម្ពីរមរមន
នីហ្វៃទី ១ ១–៥
នីហ្វៃទី១ ៦–១០
នីហ្វៃទី ១ ១១–១៥
នីហ្វៃទី ១ ១៦–២២
នីហ្វៃទី ២ ១–២
នីហ្វៃទី ២ ៣–៥
នីហ្វៃទី ២ ៦–១០
នីហ្វៃទី ២ ១១–១៩
នីហ្វៃទី ២ ២០–២៥
នីហ្វៃទី ២ ២៦–៣០
នីហ្វៃទី ២ ៣១–៣៣
យ៉ាកុប ១–៤
យ៉ាកុប ៥–៧
អេណុស–ពាក្យសម្ដីនៃមរមន
ម៉ូសាយ ១–៣
ម៉ូសាយ ៤–៦
ម៉ូសាយ ៧–១០
ម៉ូសាយ ១១–១៧
ម៉ូសាយ ១៨–២៤
ម៉ូសាយ ២៥–២៨
ម៉ូសាយ ២៩–អាលម៉ា ៤
អាលម៉ា ៥–៧
អាលម៉ា ៨–១២
អាលម៉ា ១៣–១៦
អាលម៉ា ១៧–២២
អាលម៉ា ២៣–២៩
អាលម៉ា ៣០–៣១
អាលម៉ា ៣២–៣៥
អាលម៉ា ៣៦–៣៨
អាលម៉ា ៣៩–៤២
អាលម៉ា ៤៣–៥២
អាលម៉ា ៥៣–៦៣
ហេលេមិន ១–៦
ហេលេមិន ៧–១២
ហេលេមិន ១៣–១៦
នីហ្វៃទី៣ ១–៧
នីហ្វៃទី ៣ ៨–១១
នីហ្វៃទី ៣ ១២–១៦
នីហ្វៃទី ៣ ១៧–១៩
នីហ្វៃទី ៣ ២០–២៦
នីហ្វៃទី ៣ ២៧–នីហ្វៃទី ៤ ១
មរមន ១–៦
មរមន ៧–៩
អេធើរ ១–៥
អេធើរ ៦–១១
អេធើរ ១២–១៥
មរ៉ូណៃ ១–៦
មរ៉ូណៃ ៧–៩
មរ៉ូណៃ ១០
ឧបសម្ព័ន្ធ

វាយតម្លៃការរៀនសូត្ររបស់អ្នកទី ១ ៖ នីហ្វៃទី ១ ១–១៥

« វាយតម្លៃការរៀនសូត្ររបស់អ្នកទី ១ ៖ នីហ្វៃទី ១ ១–១៥ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )

« វាយតម្លៃការរៀនសូត្ររបស់អ្នកទី ១ ៖ នីហ្វៃទី ១ ១–១៥ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន

វាយតម្លៃការរៀនសូត្ររបស់អ្នកទី ១

គោលបំណងនៃមេរៀននេះគឺជួយអ្នកឲ្យវាយតម្លៃគោលដៅទាំងឡាយដែលអ្នកបានដាក់ និងការរីកចម្រើនដែលអ្នកបានដកពិសោធ អំឡុងការសិក្សាព្រះគម្ពីរមរមនរបស់អ្នក ។

ការជួយសិស្សឲ្យវាយតម្លៃការរៀនសូត្ររបស់ពួកគេ ។ សូមផ្តល់ឱកាសឲ្យសិស្សវាយតម្លៃការរៀនសូត្ររបស់ពួកគេ ។ វិធីមួយគឺត្រូវអញ្ជើញពួកគេឲ្យចែកចាយពីរបៀបដែលពួកគេរីកចម្រើន ឬអភិវឌ្ឍ ដែលជាលទ្ធផលមកពីការសិក្សា និងជំនឿរបស់ពួកគេ ។

ការរៀបចំសិស្ស ៖ សូមអញ្ជើញសិស្សឲ្យមកថ្នាក់ដោយរៀបចំខ្លួន ដើម្បីចែកចាយអ្វីមួយដែលពួកគេបានរៀនកន្លងមកពីព្រះគម្ពីរមរមន ដែលបានជួយពួកគេឲ្យទទួលអារម្មណ៍ខិតកាន់តែជិតព្រះយេស៊ូវគ្រីស្ទ ។

សកម្មភាពរៀនសូត្រដែលអាចមាន

គោលបំណងនៃមេរៀននេះគឺជួយឲ្យសិស្សវាយតម្លៃគោលដៅដែលពួកគេបានដាក់ សមត្ថភាពរបស់ពួកគេដើម្បីពន្យល់អំពីការបង្រៀននៅក្នុងព្រះគម្ពីរមរមន ឬរបៀបដែលអាកប្បកិរិយា បំណងប្រាថ្នា និងសមត្ថភាពរបស់ពួកគេដើម្បីរស់នៅតាមដំណឹងល្អកំពុងផ្លាស់ប្តូរ ។ ការសិក្សារបស់ថ្នាក់អ្នកអំពី នីហ្វៃទី ១ ១–១៥ ប្រហែលជាបានសង្កត់ធ្ងន់លើសេចក្តីពិតជាជាងអ្វីដែលនៅក្នុងសកម្មភាពខាងក្រោមនេះ ។ ប្រសិនបើដូច្នេះមែន សកម្មភាពទាំងនេះអាចត្រូវបានកែសម្រួល ដើម្បីរួមបញ្ចូលសេចក្ដីពិតទាំងនោះ ។

សូមសិក្សាព្រះគម្ពីរមរមនរៀងរាល់ថ្ងៃ

ផ្នែកនេះមានគោលបំណងជួយសិស្សឲ្យវាយតម្លៃពីរបៀបដែលពួកគេកំពុងធ្វើនៅក្នុងគោលដៅសិក្សាព្រះគម្ពីរផ្ទាល់ខ្លួនរបស់ពួកគេ ហើយមានអារម្មណ៍ដឹងពីតម្លៃ និងសារៈសំខាន់នៃការសិក្សាព្រះគម្ពីរមរមន ។

តើអ្នកធ្វើអ្វីខ្លះជារៀងរាល់ថ្ងៃ ឬរាល់យប់ ?

សិស្សអាចឆ្លើយតបជាមួយនឹងចម្លើយដូចជា ដុសធ្មេញ បរិភោគអាហារ ដេកជាដើម ។

តើមានអ្វីអាចកើតឡើង ប្រសិនបើអ្នករំលងសកម្មភាពទាំងនេះមួយថ្ងៃ ឬយូរថ្ងៃជាងនេះ ?
ហេតុអ្វីការសិក្សាព្រះគម្ពីរប្រចាំថ្ងៃជាអ្វីដែលយើងគួរព្យាយាមធ្វើ ?

សូមបង្ហាញការវាយតម្លៃដោយខ្លួនឯងខាងក្រោម ។ សិស្សអាចពិចារណាពីការឆ្លើយតបរបស់ពួកគេដោយសម្ងាត់ ឬកត់ត្រាការឆ្លើយតបរបស់ពួកគេនៅក្នុងសៀវភៅកំណត់ហេតុការសិក្សារបស់ខ្លួន ។

សូមជ្រើសរើសឃ្លាមួយក្នុងចំណោមឃ្លាខាងក្រោម ដើម្បីពិពណ៌នាអំពីរបៀបដែលការសិក្សាប្រចាំថ្ងៃរបស់អ្នកអំពីព្រះគម្ពីរមរមនកំពុងដំណើរការដូចម្តេចដែរ ៖

ខ្ញុំមានអារម្មណ៍ថា ការសិក្សារបស់ខ្ញុំមានអត្ថន័យ និងមានភាពជាប់លាប់ ។
ការសិក្សារបស់ខ្ញុំគឺល្អ នៅពេលដែលវាកើតឡើង ប៉ុន្តែមិនកំពុងកើតឡើងជាប្រចាំទេ ។
ខ្ញុំមានភាពជាប់លាប់នឹងការសិក្សារបស់ខ្ញុំ ប៉ុន្តែមិនបានទទួលផលច្រើនទេ ។
ខ្ញុំពិបាកយល់អ្វីដែលខ្ញុំបានអាន ហើយកម្រនឹងសិក្សាដោយខ្លួនឯងណាស់ ។
ខ្ញុំមិនបានធ្វើអ្វីដើម្បីឆ្ពោះទៅរកគោលដៅសិក្សាព្រះគម្ពីរឡើយ ។
ផ្សេងៗ ៖ ពន្យល់ចម្លើយរបស់អ្នក ។

វាជារឿងធម្មតាដែលមានឧបសគ្គកើតឡើងជាមួយនឹងគោលដៅប្រចាំថ្ងៃបែបនេះ ។ រឿងសំខាន់គឺត្រូវបន្តព្យាយាម ។

សូមពិចារណាសរសេរឧបសគ្គរបស់សិស្សនៅលើក្ដារខៀន ហើយអញ្ជើញសិស្សក្នុងថ្នាក់ពិភាក្សាអំពីរបៀបដែលពួកគេបានឆ្លើយតប ឬអាចឆ្លើយតបទៅនឹងឧបសគ្គទាំងនេះ ។

តើអ្វីបានដំណើរការយ៉ាងល្អជាមួយនឹងការសិក្សាព្រះគម្ពីរមរមនរបស់អ្នក ? តើអ្នកចង់ធ្វើអ្វីប្រសើរជាង ឬផ្សេងពីនោះដែរឬទេ ?

សូមពិចារណាជ្រើសរើសសកម្មភាពមួយ ឬច្រើនខាងក្រោមនេះ ដើម្បីជួយសិស្សទទួលអារម្មណ៍ដឹងពីតម្លៃ និងសេចក្តីពិតដ៏ពោរពេញនៃព្រះគម្ពីរមរមន ។

គំនិត និងអារម្មណ៍ផ្ទាល់ខ្លួនអំពីព្រះគម្ពីរមរមន

សកម្មភាពទី ១ ៖ ការប្រជុំថ្លែងទីបន្ទាល់

ប្រសិនបើអ្នកត្រូវថ្លែងទីបន្ទាល់របស់អ្នកនៅក្នុងការប្រជុំសាក្រាម៉ង់អំពីព្រះគម្ពីរមរមន តើអ្នកនឹងនិយាយអ្វីដើម្បីបង្ហាញពីអារម្មណ៍របស់អ្នក ?

សកម្មភាពទី ២ ៖ ហេតុអ្វីអ្នកសិក្សា ?

សូមស្រមៃគិតថា អ្នកកំពុងសិក្សាព្រះគម្ពីរមរមន នៅពេលប្អូនម្នាក់ដើរចូលមក ហើយសួរថា « តើបងកំពុងអានអ្វី ? » អ្នកឆ្លើយថា « ព្រះគម្ពីរមរមន » ។ ប្អូនរបស់អ្នកសួរថា « ហេតុអ្វី ? » សូមសរសេរប្រយោគពីរ ឬបីដែលពិពណ៌នាពីអ្វីដែលអ្នកអាចនិយាយទៅកាន់ប្អូនរបស់អ្នក ដើម្បីជួយគាត់ឲ្យយល់ពីមូលហេតុដែលអ្នកជ្រើសរើសសិក្សាព្រះគម្ពីរមរមន ។

សកម្មភាពទី ៣ ៖ ការចុះផ្សាយតាមប្រព័ន្ធផ្សព្វផ្សាយសង្គម

មិត្តភក្តិម្នាក់សរសេរការចុះផ្សាយដូចតទៅនេះនៅលើប្រព័ន្ធផ្សព្វផ្សាយសង្គម ៖ « ថ្មីៗនេះ ខ្ញុំបានចាប់ផ្ដើមអានព្រះគម្ពីរមរមន ហើយខ្ញុំចូលចិត្តវាណាស់ ! សម្រាប់អ្នកណាដែលបានអានព្រះគម្ពីរមរមនពីមុនមក តើអ្នកនឹងចែកចាយខគម្ពីរដែលអ្នកចូលចិត្តជាមួយខ្ញុំ និងការពន្យល់ខ្លីអំពីមូលហេតុដែលអ្នកចូលចិត្តខគម្ពីរនោះដែរឬទេ ? »

នេះអាចជាឱកាសដ៏ល្អមួយដើម្បីអញ្ជើញសិស្សឲ្យចែកចាយគំនិតរបស់ពួកគេពីការរៀបចំសិស្ស ។ សូមពិចារណាចែកចាយទីបន្ទាល់របស់អ្នកអំពីរបៀបដែលព្រះគម្ពីរមរមនបានជួយអ្នកឲ្យទទួលអារម្មណ៍កាន់តែខិតជិតព្រះយេស៊ូវគ្រីស្ទក្នុងឆមាសនេះ ។

សុបិនរបស់លីហៃ

ផ្នែកនេះមានគោលបំណងជួយសិស្សពន្យល់ពីផ្នែកផ្សេងៗ និងអត្ថន័យនៃសុបិនរបស់លីហៃ ហើយគិតពិចារណាពីកន្លែងដែលពួកគេឃើញខ្លួនឯងនៅក្នុងសុបិននោះ ។

វិធីមួយដែលអ្នកអាចជួយសិស្សរបស់អ្នករំឭកមាតិកានេះគឺត្រូវអញ្ជើញពួកគេឲ្យមើលរូបភាព និងសំណួរខាងក្រោមរៀងៗខ្លួន ។ បន្ទាប់មកចែកសិស្សជាគូៗ ហើយអញ្ជើញពួកគេឲ្យប្តូរវេនគ្នាពន្យល់ដល់ដៃគូរបស់ពួកគេឲ្យបានច្រើនអំពីព័ត៌មានលម្អិត និងអត្ថន័យនៃសុបិនរបស់លីហៃ តាមដែលពួកគេអាចធ្វើបានក្នុងរយៈពេល ៣០ វិនាទី ។

ការបង្ហាញសំណួរដែលមានរូបភាពអាចមានប្រយោជន៍ ។

ការនិមិត្តឃើញដើមជីវិតរបស់លីហៃ ជាមួយនឹងដើមឈើមាសភ្លឺ មនុស្សកាន់ដំបងដែក និងអគារដ៏ធំ ហើយទូលាយ ។

តើអ្នកចងចាំផ្នែកផ្សេងៗ ឬនិមិត្តរូបអ្វីខ្លះនៃសុបិននោះ ?
តើនិមិត្តរូបមួយណាដែលអ្នកចាប់អារម្មណ៍ខ្លាំងបំផុត ? ហេតុអ្វី ?
តើសុបិនរបស់លីហៃស្រដៀងនឹងពិភពលោករបស់យើងសព្វថ្ងៃនេះយ៉ាងដូចម្ដេច ?

សូមពិចារណាពីរបៀបដែលផ្នែកផ្សេងៗនៃសុបិនរបស់លីហៃ អាចជួយបុគ្គលម្នាក់ៗនៅក្នុងស្ថានភាពខាងក្រោមនេះ ៖

យុវជនម្នាក់កំពុងចំណាយពេលជាមួយមនុស្សមួយក្រុម ដែលជ្រើសរើសបំពានលើពាក្យសម្ដីនៃប្រាជ្ញាវាងវៃ ហើយដាក់សម្ពាធឲ្យគាត់ធ្វើដូច្នេះផងដែរ ។
យុវនារីម្នាក់គិតថា នាងនឹងយកចិត្តទុកដាក់ក្នុងការសិក្សាព្រះគម្ពីររបស់នាងឲ្យកាន់តែស៊ីជម្រៅ នៅពេលជីវិតដ៏តានតឹងរបស់នាងបានស្ងប់សុខបន្តិច ។
យុវជនម្នាក់ចាប់ផ្តើមមានអារម្មណ៍ខ្មាស ចំពោះសមាជិកភាពរបស់គាត់នៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ នៅពេលគាត់ឮអ្នកដទៃចំអកឲ្យមនុស្សដែលកាន់សាសនានេះ ។

តើអ្នកអាចប្រើសុបិនរបស់លីហៃ ដើម្បីដោះស្រាយស្ថានភាពនីមួយៗដោយរបៀបណា ?
តើការបង្រៀន ឬសេចក្ដីពិតអ្វីខ្លះពីសុបិនរបស់លីហៃ ដែលអ្នកមានអារម្មណ៍ថា អាចជួយអ្នកឲ្យខិតកាន់តែជិតសេចក្ដីស្រឡាញ់របស់ព្រះក្នុងជីវិតអ្នក ?

អ្នកអាចគោរពព្រះបញ្ញត្តិ

ផ្នែកនេះមានគោលបំណងអនុញ្ញាតឲ្យសិស្សមើលថា តើពួកគេកំពុងធ្វើល្អបានប៉ុនណាហើយលើផែនការរបស់ពួកគេ ( ពី នីហ្វៃទី ១ ៣ ) ដើម្បីធ្វើតាមបទបញ្ញត្តិរបស់ព្រះឲ្យបានកាន់តែពេញលេញ ។

អំឡុងមេរៀនស្តីពី នីហ្វៃទី ១ ៣ អ្នកប្រហែលជាបានដាក់គោលដៅឲ្យកាន់តែគោរពតាមបទបញ្ញត្តិដែលពិបាកនឹងគោរព ។ សូមសញ្ជឹងគិតពីភាពរីកចម្រើនរបស់អ្នកឆ្ពោះទៅរកគោលដៅនេះ ហើយកត់ត្រាគំនិតរបស់អ្នកនៅក្នុងសៀវភៅកំណត់ហេតុការសិក្សា ឬសៀវភៅកំណត់ហេតុផ្ទាល់ខ្លួនរបស់អ្នក ។ សូមពិចារណាសំណួរខាងក្រោម នៅពេលអ្នកសញ្ជឹងគិត និងសរសេរ ៖

តើការខិតខំរបស់អ្នកក្នុងការគោរពតាមព្រះបញ្ញត្តិនេះមានសភាពយ៉ាងណាដែរ ?
តើអ្នកបានជួបប្រទះជោគជ័យ ឬឧបសគ្គអ្វីខ្លះ ?
តើអ្នកអាចកែសម្រួលផែនការរបស់អ្នកដោយរបៀបណា ?
តើអ្នកបានទទួលពរដោយរបៀបណាចំពោះការខិតខំរបស់អ្នក ?
តើព្រះអម្ចាស់បានរៀបចំផ្លូវសម្រាប់អ្នកដើម្បីគោរពប្រតិបត្តិយ៉ាងដូចម្ដេច ?

ប្រសិនបើអ្នកមិនបានគិតអំពីព្រះបញ្ញត្តិមួយ ដែលអ្នកអាចនឹងពិបាកគោរពតាមនោះ សូមគិតអំពីបទបញ្ញត្តិមួយក្នុងពេលឥឡូវនេះ ។ សូមសម្រេចចិត្តថាតើអ្នកអាចធ្វើសកម្មភាពអ្វីខ្លះ ដើម្បីគោរពបទបញ្ញត្តិនោះឲ្យកាន់តែពេញលេញ ។

សូមពិចារណាផ្តល់ឱកាសដល់សិស្សចែកចាយចម្លើយចំពោះសំណួរទាំងនេះ ឬអ្វីដែលពួកគេបានរៀនជាមួយសិស្សក្នុងថ្នាក់ ប្រសិនបើវាមិនមែនជារឿងផ្ទាល់ខ្លួនពេក ។ អ្នកអាចចែកចាយទីបន្ទាល់របស់អ្នក អំពីរបៀបដែលព្រះនឹងប្រទានពរដល់យើង ដើម្បីបំពេញតាមបទបញ្ញត្តិរបស់ទ្រង់ នៅពេលយើងប្រឹងប្រែងប្រកបដោយអត្ថន័យដើម្បីទុកចិត្ត និងគោរពទ្រង់ ។

ប្រធាន ហិនរី ប៊ី អាវរិង ក្នុងគណៈប្រធានទីមួយបានបង្រៀនថា ការទុកចិត្តរបស់នីហ្វៃលើព្រះអម្ចាស់អាចផ្តល់ការលើកទឹកចិត្តដល់យើង នៅពេលយើងពិបាកនឹងគោរពតាមព្រះបញ្ញត្តិរបស់ព្រះអម្ចាស់ ៖

យុវជននីហ្វៃនៅក្នុងព្រះគម្ពីរមរមន បំផុសគំនិតដល់យើងឲ្យមានបំណងប្រាថ្នា ដើម្បីបង្កើតការទុកចិត្តរបស់យើងលើព្រះអម្ចាស់ ក្នុងការគោរពតាមព្រះបញ្ញត្តិទ្រង់ ទោះបីយើងមើលឃើញថា បទបញ្ញត្តិទាំងនោះពិបាកក៏ដោយ ។ នីហ្វៃបានប្រឈមនឹងគ្រោះថ្នាក់ ហើយអាចនឹងស្លាប់ផង ពេលលោកបាននិយាយពាក្យពេចន៍នៃការទុកចិត្តទាំងនេះថា យើងអាច ហើយត្រូវតែមានអារម្មណ៍ខ្ជាប់ខ្ជួននៅក្នុងដួងចិត្តយើង ៖ « ខ្ញុំនឹងទៅ ហើយធ្វើនូវអ្វីៗដែលព្រះអម្ចាស់ទ្រង់បានបញ្ជា ដ្បិតខ្ញុំដឹងថា ព្រះអម្ចាស់ទ្រង់មិនចេញបញ្ជាដល់កូនចៅមនុស្សណាឡើយ លើកលែងតែទ្រង់នឹងរៀបចំផ្លូវ ដើម្បីឲ្យគេអាចសម្រេចនូវអ្វីៗ ដែលទ្រង់បានបញ្ជាដល់ពួកគេទុកជាមុនសិន » [ នីហ្វៃទី ១ ៣:៧ ] ។ ( ហិនរី ប៊ី អាវរិង « Trust in God, Then Go and Do » Liahona ខែ វិច្ឆិកា ឆ្នាំ ២០១០ ទំព័រ ៧១ )