Doktrinal nga Kahanas: 2 Nephi 2:27

Kita Gawasnon sa Pagpili Pinaagi sa Halangdon nga Tigpataliwala

Sa miaging leksiyon sa, “2 Nephi 2:26–30,” imong nakat-onan nga kita gawasnon sa pagpili sa kalingkawasan ug kinabuhing dayon pinaagi ni Jesukristo. Kini nga leksiyon makatabang kanimo sa pagsag-ulo sa pakisayran sa doktrinal nga kahanas ug sa mahinungdanong hugpong sa mga pulong sa kasulatan sa 2 Nephi 2:27, makapasabot sa doktrina, ug makagamit sa mga baroganan sa pag-angkon og espirituhanong kahibalo sa tinuod nga kahimtang sa kinabuhi.

Pagpalapad sa kahibalo pinaagi sa mga kalihokan sa pagrebyo sa doktrinal nga kahanas. Ang paghimo niini nga mga kalihokan kanunay makatabang sa mga estudyante sa pagsag-ulo sa mahinungdanong hugpong sa mga pulong sa kasulatan. Mahimo nimong awhagon ang imong mga estudyante nga magpadayon sa pagtuon sa mga tudling sa doktrinal nga kahanas nga dili diha sa klase.

Pagpangandam sa estudyante: Mahimo nimong dapiton ang mga estudyante sa pagsulay sa pagsag-ulo sa 2 Nephi 2:27. Pahinumdumi ang mga estudyante nga mahimo silang mogamit sa Doktrinal nga Kahanas nga app.

Mga Posibleng Kalihokan sa Pagkat-on

Gidisenyo kini nga leksiyon sa tudling sa doktrinal nga kahanas aron itudlo human sa leksiyon sa “2 Nephi 2:26–30,” nga mao ang pangkontekstong leksiyon alang sa tudling sa doktrinal nga kahanas sa 2 Nephi 2:27. Kon kinahanglang ibalhin kini nga leksiyon sa tudling sa doktrinal nga kahanas sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Isag-ulo ug ipasabot

Gamita ang bisan unsa nga epektibo ug angay nga pamaagi aron matabangan ang mga estudyante sa pagsag-ulo sa pakisayran sa kasulatan ug sa mahinungdanong hugpong sa mga pulong sa kasulatan sa 2 Nephi 2:27 ug ipasabot ang mga kamatuoran nga makita niini nga tudling.

Kon gamiton ang mosunod nga sugyot, ikonsiderar ang pagdapit sa mga estudyante sa paghimo og drowing isip usa ka klase diha sa pisara o sa usa ka dako nga palid sa papel. Magmabinantayon sa paghimong mubo sa kalihokan sa pagdrowing aron adunay igong panahon alang sa pagbansay sa paggamit. Kon mahimo, ipakita ang drowing sa klase sulod sa pipila ka adlaw aron matabangan ang mga estudyante nga mas makasag-ulo sa pakisayran ug sa mahinungdanong hugpong sa mga pulong sa kasulatan.

Basaha ang 2 Nephi 2:27 ug pagdrowing og hulagway nga makatabang nimo sa paghanduraw sa kahulugan sa mahinungdanong hugpong sa mga pulong sa kasulatan: “Sila gawasnon sa pagpili sa kalingkawasan ug sa kinabuhi nga dayon … o … sa pagkabihag ug sa kamatayon.” Ilakip ang mahinungdanong hugpong sa mga pulong sa imong drowing aron matabangan ka sa pagsag-ulo niini.

Sunod, isulat sa imong drowing kon unsay kahulogan nianang Kita gawasnon sa pagpili sa kalingkawasan ug sa kinabuhi nga dayon pinaagi ni Jesukristo, o pagpili sa pagkabihag ug sa kamatayon. Ilakip ang personal nga kahulugan niini nga bersikulo nganha kanimo ug sa unsang paagi kini makatabang kanimo nga mas makasunod ni Jesukristo.

Kon usa ka drowing sa klase gihimo, dapita ang mga estudyante nga magtinabangay sa pagsulat og pagpasabot sa bersikulo.

Kon ang mga estudyante mikompleto sa drowing sa tinagsa, dapita sila sa pagsulat sa ilang kaugalingong mga pagpasabot ug dayon sa paglibot sa lawak klasehanan ug ipaambit ang ilang drowing ug pagpasabot ngadto sa labing menos duha ka laing mga estudyante.

Sa kataposan, samtang nagtan-aw sa hulagway, balika pagsulti ang pakisayran sa kasulatan ug ang mahinungdanong hugpong sa mga pulong sa kasulatan hangtod nga imong mahibaloan kini gikan sa memorya.

Pagbansay sa paggamit

Usa ka alternatibo sa mosunod nga sugyot aron matabangan ang mga estudyante sa pagrebyo sa mga baroganan sa pag-angkon og espirituhanong kahibalo mao ang pagdapit og tulo ka mga estudyante sa dili pa ang klase nga ang matag usa magtuon og usa sa mga baroganan. Niini nga punto sa leksiyon, dapita sila nga ang matag usa mogahin og usa o duha ka minuto sa pagpasabot sa baroganan nga ilang gitun-an ngadto sa klase.

Sa pagrebyo sa mga baroganan sa pag-angkon og espirituhanong kahibalo, tan-awa kon makahinumdom ka ba kon unsa ang matag usa sa tulo ka mga baroganan. Dayon tan-awa kon makahimo ka ba sa pagpares sa mosunod nga mga hugpong sa mga pulong ngadto sa husto nga baroganan. (Gamita ang mga parapo 5–12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas [2022] aron masusi ang imong pagkaeksakto.)

• “Makapanalipud nato gikan sa sayop nga impormasyon ug niadtong mga nagtinguha sa pagdaot sa atong tinuohan”

• “Matan-aw ang mga ideya basi sa sumbanan sa kamatuoran nga gihimo sa Ginoo kay sa pagdawat sa ideya o mga pagbana-bana nga gihimo sa kalibotan”

• “Mosalig kita sa pagpamatuod nga ato nang naangkon”

Mobati nga gawasnon sa pagpahiangay sa mga senaryo nga gisugyot sa kurikulum aron mas mohaum sa mga kahimtang sa imong mga estudyante. Pananglitan, sa mosunod nga senaryo ang laing makasasala nga kinaiya mahimong ipanghalili sa alkohol.

Mahimo usab nga magamit ang laing mga senaryo aron matuman ang parehas nga katuyoan. Sama pananglit, ang mga estudyante mahimong motutok sa usa ka alternatibo nga sitwasyon mahitungod sa usa ka miyembro sa Simbahan kinsa nasuko tungod kay ang iyang mga ginikanan nag-awhag sa pagsunod sa usa ka piho nga sumbanan sa Simbahan. Sa kasagmuyo, tingale nakatubag siya, “Aduna akoy kabubut-on! Mahimo nako ang bisan unsang gusto nako!” Mahimong magamit dayon sa mga estudyante ang mga baroganan sa pag-angkon og espirituhanong kahibalo ug ang 2 Nephi 2:27 niini nga senaryo.

Basaha ang mosunod nga senaryo ug hunahunaa kon sa unsang paagi nga ang mga baroganan sa pag-angkon og espirituhanong kahibalo magamit ni Ivan.

Nagplano si Ivan nga mogahin og Sabado sa hapon uban sa iyang mga higala, apan sa dihang ang usa kanila sa wala damha mitunga nga nagdala og alkohol aron pagasaw-an, iyang gibati nga panahon na nga siya mobiya. Nasayod siya nga ang iyang mga higala dili matingala tungod kay siya kanunay nga mopauli sa sama nga mga sitwasyon kaniadto. Sa iyang paglakaw, iyang nadungog ang iyang higala nga si Daniel nga miingon, “Murag ang simbahan ni Ivan dili motugot kaniya nga mobuhat og bisan unsa.”

Si Ivan nagpadayon sa paghunahuna bahin sa komento ni Daniel samtang naglakaw siya pauli.

Susihon ang mga konsepto ug mga pangutana inubanan sa mahangtorong panglantaw

Basaha ang parapo 8 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022). Hatagi og espesyal nga pagtagad kon unsa ang gipasabot sa pag-usab sa mga pangutana sa lahi nga paagi.

• Unsaon nimo paghulagway kon unsa ang gipasabot sa pag-usab og usa ka komento o pangutana sa lahi nga paagi?

Paminaw pag-ayo sa mga tubag sa estudyante sa miaging pangutana aron matabangan ka nga mahibalo kon unsa ka maayo ang pagsabot sa mga estudyante niini nga konsepto. Kon nasabtan nila kini og maayo, ikonsiderar ang pagdapit og usa ka estudyante sa paggiya sa ubang mga estudyante sa pagsusi og balik sa komento ni Daniel sa lahi nga paagi.

Kon ang mga estudyante dili pa andam sa pagsusi og balik sa mga ideya sa lahi nga paagi nga walay tabang, ikonsiderar ang paggamit sa pipila sa mosunod nga mga sugyot aron sa pagtabang kanila.

1. Ilha ang posible nga mga ideya o mga pangagpas.

   • Unsa kaha ang gituohan ni Daniel mahitungod sa kagawasan ug sa katuyoan sa kabubut-on?

   • Unsa kaha ang iyang gituohan mahitungod sa mga sumbanan sa Simbahan sa Manluluwas?

2. Ikonsiderar ang isyu diha sa konteksto sa plano sa kaluwasan ug sa mga pagtulun-an sa Manluluwas.

   • Unsa ang imong nasinati pinaagi sa pagsunod sa ebanghelyo ni Jesukristo nga nakatabang nimo nga makakita sa mga butang nga lahi kay ni Daniel?

   • Unsa nga mga aspeto sa laraw sa kaluwasan sa imong hunahuna ang labing makatabang nga masabtan ni Daniel?

   • Unsa nga matang sa kagawasan ang gitanyag sa Manluluwas niadtong mogamit sa ilang kabubut-on sa pagtuman sa Iyang mga sugo? Unsa nga matang sa pagkabihag ang resulta sa pagsalikway niini?

Ikonsiderar ang pagbahin sa mga estudyante ngadto sa managpares nga ang matag estudyante magtuon sa usa sa mosunod nga duha ka mga baroganan sa pag-angkon og espirituhanong kahibalo. Dayon dapita sila sa pagpaambit sa ilang mga tubag sa nag-ubang mga pangutana ngadto sa ilang kapares.

Basaha ang mga parapo 5–7, 11 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022) ug pamalandongi kon sa unsang paagi ang mosunod nga duha ka mga baroganan magamit sa sitwasyon ni Ivan.

Lihokon Inubanan sa hugot nga Pagtuo

• Kon si Ivan magsugod sa pagkuwestiyon sa iyang desisyon sa pagpalayo sa espirituhanong peligro nga mga sitwasyon, unsay mahimo nimong ipaambit kaniya gikan sa mga parapo 5–7? Ngano man?

Tinguhaa ang dugang nga panabot pinaagi sa balaanong gitudlo nga mga tinubdan

• Unsa nga mga tinubdan ang gihisgotan sa mga parapo 11 sa imong hunahuna ang labing makatabang kang Ivan?

• Sa unsang paagi ang mga kamatuoran sa 2 Nephi 2:27 makatabang kaniya?

Rebyo sa doktrinal nga kahanas

Atol sa umaabot nga mga leksiyon, tabangi ang mga estudyante sa pagrebyo og daklit sa pakisayran sa kasulatan ug sa mahinungdanong hugpong sa mga pulong sa 2 Nephi 2:27. Usa ka paagi sa pagbuhat niini mao ang pagdapit sa mga estudyante sa pagtan-aw sa drowing nga ilang gihimo ug tan-awon kon makahinumdom pa ba sila sa pakisayran ug sa mahinungdanong hugpong sa mga pulong sa kasulatan. Mahimo kining sublion sa sinugdanan o sa kataposan sa nagkalain-laing umaabot nga mga leksiyon.