Human sa pagbulag gikan sa iyang mga igsoon, si Nephi ug kadtong misunod kaniya mitukod og bag-ong komunidad. Ang mga katawhan ni Nephi milambo ug mipuyo og mga kinabuhi nga miresulta sa kalipay. Kini nga leksiyon makatabang kanimo sa pagkahibalo kon unsa ang imong mahimo aron mabuhi subay sa matang sa pagkamalipayon.
Pag-awhag sa aktibong partisipasyon. Samtang nangandam og mga leksiyon ug nakighalubilo sa mga estudyante, pangita og mga paagi sa pagdapit sa mga estudyante nga aktibong mosalmot. Ang pagbuhat sa ingon makatabang sa mga estudyante nga moapil sa pagkat-on ug makatabang nila nga mas maduol sa Manluluwas.
Pagpangandam sa estudyante: Dapita ang mga estudyante sa paghisgot uban sa usa ka kasaligan nga higala o sakop sa pamilya sa kalainan tali sa kalipay ug kalingawan.
Mga Posibleng Kalihokan sa Pagkat-on
Ang matang sa pagkamalipayon
Ikonsiderar ang pagsulat sa pangutana nga “Unsay makapalipay sa usa ka tawo?” diha sa pisara ug hangyoa ang mga estudyante sa pagpaambit kon sa unsang paagi ang kasagarang tin-edyer motubag; dayon hisgoti kon unsaon pagtubag sa Manluluwas.
Dapita ang mga estudyante nga hilom nga mamalandong kon sa unsang paagi ang ilang tubag matandi sa unsay ilang gihunahuna nga itubag sa Manluluwas. Dapita sila sa pagtinguha og pagpadayag samtang magtuon sila niini nga leksiyon aron makahibalo unsa ang gusto sa Langitnong Amahan nga ilang mahibaloan o buhaton.
Ang kapitulo nga 2 Nephi 5 nagdetalye sa panagbulag sa pamilya ni Lehi ngadto sa mga Nephite ug sa mga Lamanite. Sa dihang si Laman ug si Lemuel miplano sa pagpatay kang Nephi, ang Ginoo mipasidaan kang Nephi sa pagbulag gikan sa iyang mga igsoon (tan-awa sa 2 Nephi 5:1–5). Si Nephi misunod sa Ginoo ug mibiya uban niadtong kinsa “mituo sa mga pasidaan ug mga pagpadayag sa Dios” (2 Nephi 5:6) ug mitukod og bag-ong komunidad.
Ang mga Lamanite mipabilin sa yuta ug misukol batok sa Ginoo. Sila “gipahimulag gikan sa iyang atubangan” (2 Nephi 5:20). Ang tunglo nga gihisgotan niini nga kapitulo mao ang pagkahimulag gikan sa Dios (tan-awa sa 2 Nephi 5:20–24). Ang pagkausab sa panit sa mga Lamanite usa ka timaan o timailhan sa tunglo. Ang kinaiyahan niini nga marka wala hingpit nga nasabtan. Ang timaan sa sinugdanan mipaila sa mga Lamanite gikan sa mga Nephite. Sa kadugayan, sa dihang ang mga Nephite ug mga Lamanite pareho nga miagi og mga panahon sa kadautan ug pagkamatarong, ang timaan dili na tukma nga ilhanan sa kahimtang sa mga Lamanite atubangan sa Dios.
Ayaw pagpangagpas sa tunglo. Kon ang mga estudyante adunay mga pangutana, dugang nga impormasyon anaa sa seksiyon nga “Komentaryo ug Background nga Impormasyon.”
Basaha ang 2 Nephi 5:27 ug matikdi kon giunsa paghulagway ni Nephi ang bag-ong komunidad nga iyang natukod.
Unsa sa imong hunahuna ang gipasabot sa pagpuyo subay sa matang sa pagkamalipayon?
Unsa nga mga hagit ang mahimong anaa sa pagpuyo subay sa matang sa pagkamalipayon?
Tan-awa ang nag-unang mga bersikulo sa kapitulo aron makaangkon og panabot sa unsay gibuhat sa mga Nephite nga midala kanila sa pagpuyo subay sa matang sa pagkamalipayon.
Basaha ang 2 Nephi 5:10–17, 26 ug kompletoha ang mosunod nga pamahayag sa unsay imong nakit-an:
makatabang kanako sa pagsunod sa Manluluwas ug sa pagpuyo subay sa matang sa pagkamalipayon.
Mahimo nimong isulat ang pamahayag diha sa pisara ug pagtawag og mga estudyante sa pagduol ug pagsulat kon unsay ilang nakit-an human sila makabasa.
Unsa pa sa imong hunahuna ang makatabang kanimo nga magpuyo subay sa matang sa pagkamalipayon?
Unsa ka kasagaran nga moapil niining mga matang sa mga kalihokan?
Ang mosunod nga mga kalihokan gidesinyo isip gagmay nga mga leksiyon alang sa mga estudyante aron sa pagtudlo sa usag usa. Ania ang pipila ka mga ideya kon unsaon paggamit niini:
Bahina ang klase ngadto grupo sa tinagtulo ug hangyoa ang matag sakop sa grupo sa pag-andam ug pagtudlo og usa sa tulo ka mga leksiyon ngadto sa ilang grupo.
I-assign ang mga leksiyon sa sayo pa ngadto sa tulo ka mga estudyante nga may katakos nga makaandam ug andam nga motudlo sa klase.
Hisgoti ang usa o daghan pang mga leksiyon isip usa ka klase.
Tulo ka posible nga paagi sa paghuman niini nga kapahayag mao ang “Pagkamasulundon sa mga balaod sa Dios,” “Trabaho,” ug “Ang templo.” Ang mga kalihokan nga mosunod nagsusi sa matag usa niini sa mas lawom.
Kalihokan 1. Pagkamasulundon sa mga balaod sa Dios
Manwal sa Magtutudlo sa Basahon ni Mormon (2024)—“2 Nephi 5: Nagpuyo subay sa Matang sa Pagkamalipayon
Ikonsiderar ang pagdapit sa mga estudyante sa paghisgot sa mosunod nga mga pangutana nga magtinagurha:
Unsa ang pipila sa mga balaod sa imong komunidad?
Unsa ang mahimong resulta sa makanunayon nga pagsunod o dili pagsunod sa mga balaod?
Sa unsang paagi kini nga pagtandi susama o lahi sa mga balaod sa Dios?
Si Nephi ug ang iyang mga sumusunod misunod sa mga sugo sa Ginoo (tan-awa sa 2 Nephi 5:10). Basaha ang tudling sa doktrinal nga kahanas sa Mosiah 2:41 ug pangitaa kon unsay gusto ni Hari Benjamin nga masabtan sa iyang katawhan mahitungod sa pagsunod sa mga sugo sa Dios. Mahimo nimong ikonsiderar ang pag-cross-reference niini nga bersikulo ngadto sa 2 Nephi 5:10.
Sa imong hunahuna sa unsang paagi ang pagsunod sa mga balaod sa Dios makatabang kanato nga magmalipayon?
Giunsa pagpakita ni Jesukristo ang pagkamasulundon?
Ikonsiderar ang pagsulat diha sa pisara o sa usa ka piraso sa papel og lista sa mga sugo nga makatabang kanato nga mahimong mas malipayon. Pangutan-a ang mga estudyante nganong gipili nila ang mga sugo nga ilang napilian.
Unsa ang pipila sa mga sugo sa Dios nga nakahatag kanimo og mas dakong kalipay?
Ikonsiderar ang pagpaambit sa imong kaugalingong kasinatian o pagpaambit sa imong pagpamatuod mahitungod sa koneksiyon tali sa kalipay ug pagkamasulundon sa mga sugo sa Dios.
Kalihokan 2. Trabaho ug kaugalingon nga pagpaningkamot
Manwal sa Magtutudlo sa Basahon ni Mormon (2024)—“2 Nephi 5: Nagpuyo subay sa Matang sa Pagkamalipayon
Sa usa ka palid sa papel o sa imong journal sa pagtuon, paggahin og kadiyot sa paghimo og lista sa mga benepisyo nga imong masulti nga gikan sa kakugi.
Mahimo nimong dapiton ang pipila ka mga estudyante sa pagpaambit sa unsay ilang nasulat.
Basaha ang 2 Nephi 5:11, 15, 17 ug ilha ang nagkalain-laing mga paagi nga ang mga Nephite mitrabaho ug ang mga resulta sa ilang mga paghago.
Unsay imong nakit-an?
Ikonsiderar nga ipabuhat sa mga estudyante ang mosunod nga magtinagurha.
Basaha ang “Trabaho ug Pagpaningkamot sa Kaugalingon ” diha sa Alang sa Kalig-on sa mga Kabatan-onan nga booklet (2011)ug tan-awa kon unsay imong makat-onan mahitungod sa baroganan sa trabaho.
Unsay dugang nga mga benepisyo sa trabaho ang imong nakaplagan? (Ikonsiderar ang pagdugang niini sa imong listahan.)
Hain niini nga mga benepisyo ang imong nasinati?
Sa unsang paagi ang pagtrabaho makatabang sa usa ka tawo nga mahimong mas mahisama ni Jesukristo?
Manwal sa Magtutudlo sa Basahon ni Mormon (2024)—“2 Nephi 5: Nagpuyo subay sa Matang sa Pagkamalipayon
Imahe
kinabuhi sa pamilya
Basaha ang 2 Nephi 5:16 ug tan-awa unsay imong makat-onan mahitungod sa templo sa Nephite.
Ngano sa imong hunahuna nga si Nephi ug ang iyang mga katawhan mihimo og ingon ka dako nga mga paningkamot sa pagtukod sa templo?
Ngano sa imong hunahuna nga ang Ginoo mihangyo ug nagpadayon sa paghangyo sa Iyang katawhan sa pagsakripisyo sa pagtukod og mga templo?
Si Presidente Russell M. Nelson misulti sa mosunod mahitungod sa katuyoan ug mga panalangin sa mga templo. Mahimo nimong tan-awon ang bidyo nga “Ang Templo ug ang Inyong Espirituwal nga Pundasyon” gikan sa time code 4:27 hangtod sa 5:55 o basaha ang pamahayag sa ubos:
Imahe
Presidente Russell M. Nelson
Ang templo mao ang labing importante nga bahin sa pagpalig-on sa atong hugot nga pagtuo ug espirituwal nga kalig-on tungod kay ang Manluluwas ug ang Iyang doktrina mao ang sentro nga bahin sa templo. Ang tanan nga gitudlo diha sa templo, pinaagi sa instruksiyon ug pinaagi sa Espiritu, makadugang sa atong pagsabot ni Jesukristo. Ang Iyang mahinungdanon nga mga ordinansa nagbugkos nato ngadto Kaniya pinaagi sa sagrado nga mga pakigsaad sa pagkapari. Dayon, kon kita motuman sa atong mga pakigsaad, Siya motuga nato sa Iyang makaayo, makapalig-on nga gahom. Ug oh, kadako sa atong panginahanglan sa Iyang gahom sa mga adlaw nga umaabot.
Kita gisaaran nga “kon [kita] andam dili [kita] mahadlok.” Kini nga kasiguroan adunay dagkong implikasyon karon. Ang Ginoo namahayag nga bisan sa dili ordinaryo nga mga hagit, kadtong kinsa motukod sa ilang mga pundasyon diha kang Jesukristo, ug nakat-on unsaon sa paggamit sa Iyang gahom, dili kinahanglan nga magpadala sa talagsa nga mga kabalaka niining panahona. (Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 93–94)
Unsay nakapadayeg kanimo sa pamahayag ni Presidente Nelson?
Sa unsang paagi nga ang pagtambong sa templo makatabang nimo nga mas matukod ang imong pundasyon diha ni Jesukristo? Mahimo kang mopaambit og usa ka kasinatian kon makahunahuna ka og usa.
Sa unsang paagi nga ang templo nakahatag og mas dakong kalipay nganha kanimo o sa usa ka tawo nga imong nailhan?
Kon mahuman na ang pagtudlo sa mga estudyante, mahimo nimong dapiton sila sa pagpaambit kon sa unsang paagi sila mibati og mas dakong kalipay sa pagsunod sa mga baroganan sa ebanghelyo ni Jesukristo sama sa gihisgotan karon. Ikonsiderar ang pagpaambit sa imong kaugalingong pagpamatuod kon sa unsang paagi kini nga mga baroganan nakahatag kanimo og mas dakong kalipay.
