2 Nephi 5:1-9

Ang mga Pasidaan sa Dios

Tingale nakapasubo kini alang kang Nephi. Tungod kay sila si Laman ug Lemuel nagplano sa pagpatay kaniya, si Nephi gipasidan-an sa pagdala sa “kadto sila kinsa mituo sa mga pasidaan ug mga pagpadayag sa Dios” (2 Nephi 5:6) ug molayas ngadto sa kamingawan. Usahay, kita usab mahimong mapasidan-an sa Ginoo sa pisikal ug espirituwal nga mga kapeligrohan sa atong palibot. Kini nga leksiyon makatabang kanimo sa pagsunod sa mga pasidaan nga mahigugmaong gihatag sa Ginoo aron sa pagpanalipod kanimo.

Pagpalambo sa usa ka palibot nga madinawaton ug adunay pagtahod. Pag-ugmad og pagbati nga nahisakop sa matag tigkat-on pinaagi sa tinud-anay nga pag-ila nga ang matag estudyante gikinahanglan, paghatag og bili sa lain-laing mga kaagi ug mga kahimtang, ug paghatag og mga oportunidad sa mga estudyante nga makakuha og kalig-on gikan sa usag-usa ug sa Manluluwas. Makatabang usab ka sa mga estudyante nga makakita nga sila adunay papel sa buluhaton sa Dios.

Pagpangandam sa estudyante: Ikonsiderar ang pagdapit sa mga estudyante sa pagtambong sa klase nga andam sa pagpaambit og kasinatian sa dihang adunay mihatag kanila og pasidaan nga ilang gikapasalamat.

Mga Posibleng Kalihokan sa Pagkat-on

Mga Pasidaan

Ikonsiderar ang pagpakita og pipila ka mga timailhan sa pasidaan ug pagpangutana sama sa mosunod aron matabangan ang mga estudyante sa paghisgot kon sa unsang paagi ang mga pasidaan mahimong mga panalangin.

Mahimo usab nimong ikonsiderar ang pagbutang og butang nga hugaw o mopilit sa usa sa mga lingkoranan ug pagbutang og mga timailhan sa pasidaan sa palibot niana nga lingkoranan sa dili pa ang klase.

• Ngano nga ang mga timailhan sa pasidaan sama niini mahinungdanon?

• Ngano kaha nga ang ubang mga tawo motan-aw sa mga timailhan sa pasidaan nga may pagpasalamat? nga may kalagot?

• Kanus-a ka nagmapasalamaton nga gipasidan-an?

Samtang nagtuon ka karon, hunahunaa kon nganong ang Dios nagpadala kanato og mga pasidaan. Sulayi usab ang paghinumdom sa lain-laing mga paagi nga tingali mi-reak ka sa mga pasidaan nga Iyang gihatag.

Ang mga pasidaan sa Dios alang kang Nephi

Basaha ang 2 Nephi 5:1–9, nga mangita sa pasidaan nga gihatag sa Ginoo ngadto kang Nephi human siya nahimong espirituhanong lider sa pamilya human sa kamatayon ni Lehi. O mahimo nimong tan-awon ang bidyo nga “Ang mga Nephite Milayas ngadto sa Kamingawan” gikan sa time code 0:00–3:21.

Sulayi nga ibutang ang imong kaugalingon sa dapit sa usa sa mga batan-ong Nephite kansang mga pamilya gidapit sa pagsunod ni Nephi.

• Ngano kaha nga lisod ang pagbiya?

• Unsa ang gikinahanglan alang kanimo sa paghimo og desisyon sa pagsunod ni Nephi ngadto sa kamingawan?

• Sumala sa bersikulo 6, unsay nag-ila sa kinsay mikuyog niya?

Usa ka kamatuoran nga atong makat-onan gikan niini nga asoy mao nga ang Dios makapahilayo kanato gikan sa kapeligrohan kon kita mopili nga motuo sa Iyang mga pagpadayag ug maminaw sa Iyang mga propeta.

Ang diskusyon sa klase mahimong makatabang sa mga estudyante nga mobati og kamapasalamaton nga ang Dios naghigugma kanato og igo aron sa pagpasidaan kanato sa mga kapeligrohan.

Aron mapahapsay ang usa ka panaghisgotan, mahimo nimong awhagon ang mga estudyante sa pagsulay sa paghanduraw kon sa unsang paagi ang kalibotan (o ang ilang personal nga kinabuhi) mahimong lahi kon ang Dios wala gayod mopasidaan kanato mahitungod sa bisan unsa. Dayon dapita ang mga estudyante sa pagpaambit sa ilang mga hunahuna ngadto sa klase. Samtang maghisgot ang mga estudyante sa ilang mga hunahuna, tabangi sila nga makakita nga ang mga pasidaan sa Dios usa ka timailhan sa Iyang gugma ug pagpakabana kanato. Ang mosunod nga bidyo ug pipila sa mosunod nga mga pangutana mahimong gamiton sa pagpauswag sa panaghisgotan sa klase.

• Ngano sa imong hunahuna gikinahanglan nato ang mga pasidaan sa Dios sa atong panahon?

• Unsa ang lain-laing mga paagi nga ang Dios mipahibalo sa Iyang mga pasidaan ngadto sa mga tawo sa kinatibuk-an ug sa mga indibidwal mahitungod sa ilang piho nga mga kahimtang?

• Unsa ang mga rason nga mahimong pilion sa usa ka tawo nga dili sundon ang mga pasidaan sa Dios, ug unsaon kaha nimo sa pagtubag sa usa ka tawo nga mihatag sa usa niini nga mga rason?

• Sa unsang paagi ikaw o ang imong mga minahal napanalipdan pinaagi sa pagsunod sa mga pasidaan gikan sa Dios? Ipaambit ang usa ka piho nga ehemplo kon makahunahuna ka og usa.

Ang Dios nagpasidaan kanato pinaagi sa Iyang mga propeta

Usa sa mga paagi nga ang Dios mahigugmaong nagpasidaan kanato sa kakuyaw mao ang pinaagi sa Iyang buhi nga mga propeta. Pananglitan, diha sa 2 Nephi 5:5–6, daghan sa pamilya ni Nephi ang namati sa pasidaan nga gihatag kaniya sa Ginoo sa pagbiya ngadto sa kamingawan. (Tan-awa usab sa Amos 3:7.) Kita usab makakita og daghang propetikanhong mga pasidaan gikan sa Dios alang kanato diha sa Iyang mga kasulatan.

Paggahin og panahon sa pagsiksik sa mga kasulatan alang sa mga pasidaan nga gihatag sa Dios kanato pinaagi sa Iyang mga propeta kaniadto. (Ang pipila ka mga ehemplo naglakip sa Alma 41:10; Moroni 10:30, 32; Doktrina ug mga Pakigsaad 63:57–58; 89:1–4.)

Ikonsiderar ang pagtugot sa mga estudyante sa pagpangita og mga pasidaan gikan sa Dios diha sa mga kasulatan nga sila ra. Mahimo nimong ihatag ang mga ehemplo sa ibabaw o ubang mga ehemplo kon nanginahanglan sila og tabang.

Ipakita ang mosunod nga mga pangutana samtang sila nagtuon. Dayon dapita sila sa pagpaambit sa ilang mga tubag diha sa gagmay nga mga grupo.

• Unsa nga mga pasidaan ang imong nakit-an nga sa imong hunahuna labing gikinahanglan sa kalibotan karon?

• Unsa sa imong hunahuna ang mga sangpotanan sa pagsunod o dili pagtagad niini nga mga pasidaan?

• Sa unsang paagi kini nga mga pasidaan timaan sa gugma sa Dios?

• Sa unsang paagi nga ang pagsunod sa mga pasidaan nga imong nakaplagan makatabang nimo nga mahimong mas mahisama ni Jesukristo?

• Sa unsang paagi nga ang dili pagtagad sa Iyang mga pasidaan makapahilayo kanato gikan Kaniya?

Ang mga pasidaan sa Dios alang kanimo

Ikonsiderar ang pagpaambit og personal nga kasinatian sa dihang napanalanginan ka pinaagi sa pagsunod sa pasidaan gikan sa Dios.

Dayon hatagi ang mga estudyante og igong hilom nga panahon sa pagpamalandong ug sa pagsulat sa ilang mga hunahuna ug mga pagbati diha sa ilang journal sa pagtuon aron sa pagtapos sa leksiyon. Ang mosunod nga pamahayag ug mga aghat mahimong makatabang sa pag-andam sa mga estudyante sa dili pa mosulat.

Si Presidente Boyd K. Packer (1924–2015) sa Korum sa Napulog Duha ka Apostoles mitudlo:

Wala paabota nga moagi mo niining kinabuhia nga dili masayop, apan dili mo makahimo og dagkong sayop nga wala mapasidan-i daan pinaagi sa mga aghat sa Balaang Espiritu. Kini nga saad magamit sa tanang mga miyembro sa Simbahan. (Boyd K. Packer, “Tambag ngadto sa mga Kabatan-onan,” Liahona, Nob. 2011, 18)

• Ang Langitnong Amahan ba nagpasidaan kanako og usa ka butang nga piho sa akong kinabuhi pinaagi sa mga hunahuna o mga pagbati gikan sa Espiritu?

• Aduna bay piho nga mga pasidaan gikan sa Dios nga akong nadawat pinaagi sa mga lider sa Simbahan, mga ginikanan, mga panalangin sa pagkapari, o sa ubang paagi? Kumusta man ang akong pagsunod niini?

• Unsa ang usa ka butang nga sa akong hunahuna gusto sa Langitnong Amahan nga akong buhaton sa unsay akong nakat-onan o gibati karon?

Komentaryo ug Background nga Impormasyon

Unsaon man nako sa pagpangita og espirituhanong kahilwasan sa kalibotan karon?

Si Presidente Henry B. Eyring sa Unang Kapangulohan mitudlo:

Ingon og walay katapusan ang tinguha sa Manluluwas nga mogiya kanato ngadto sa kaluwasan sa kakuyaw. Ug adunay kamakanunayon diha sa paagi nga Siya magtultol kanato sa dalan. Siya magtawag sa daghan nga pamaagi aron nga kini moabot niadtong andam nga modawat niini. Ug kadto nga mga pamaagi kanunayng naglakip sa pagpadala sa mensahe pinaagi sa ba-ba sa Iyang mga propeta bisan asang dapit nga ang katawhan angayan nga adunay propeta sa Dios diha kanila. Kadtong awtorisado nga mga sulugoon kanunay nga gisangunan sa pagpasidaan sa mga katawhan, nagsulti kanila sa dalan padulong sa kahilwasan. (Henry B. Eyring, “Finding Safety in Counsel,” Ensign, Mayo 1997, 24)

Si Presidente Boyd K. Packer (1924–2015) sa Korum sa Napulog Duha ka Apostoles mitudlo:

Isip sulugoon sa Ginoo, ako mosaad nga kamo mapanalipdan ug maprotektahan gikan sa pagpangataki sa kaaway kon mopatalinghog mo sa mga aghat nga gikan sa Balaang Espiritu. (Boyd K. Packer, “Tambag ngadto sa mga Kabatan-onan,” Liahona, Nob. 2011, 18)

Dugang nga mga Kalihokan sa Pagkat-on

Doktrinal nga kahanas: Ezekiel 3:16–17

Kon maghisgot bahin sa tahas sa mga propeta sa pagpasidaan, ikonsiderar ang pagbasa sa Ezekiel 3:16–17 ug maghisgot kon sa unsang paagi ang mga propeta sama sa mga magbalantay. Dapita ang mga estudyante sa pagpaambit nganong ang panglantaw ug pagsabot sa propeta sa mga sitwasyon mahimong lahi sa panglantaw sa ubang mga tawo.

Pagbulag sa atong kaugalingon gikan sa pagkadautan

Dapita ang mga estudyante sa pagpaambit og mga ehemplo gikan sa mga kasulatan sa Ginoo nga nagpasidaan sa usa ka tawo o grupo sa mga tawo sa pagbulag sa ilang mga kaugalingon gikan sa dautan nga sitwasyon. (Ang mga ehemplo mahimong maglakip sa 1 Nephi 2:1–2; Omni 1:12–13; o Ether 9:2–3.)

Dapita ang mga estudyante sa pagpaambit og mga ehemplo sa atong panahon nga labing maayo nga ibulag ang atong kaugalingon gikan sa makuyaw nga espirituhanong mga sitwasyon. Dapita ang mga boluntaryo nga mopaambit kon sa unsang paagi sila napanalanginan pinaagi sa pagsunod sa usa ka pasidaan gikan sa Dios sa pagbulag sa ilang mga kaugalingon gikan sa ingon nga sitwasyon.

Mahimong makatabang usab ang paghisgot og mga paagi nga makadawat sila og tabang ug proteksiyon gikan sa Dios kon dili posible nga makalayo sa usa ka makuyaw nga espirituhanong sitwasyon sa makadiyot.

Alang sa Kalig-on sa mga Kabatan-onan (booklet, 2011)

Diha sa seksiyon sa leksiyon nga “Ang Dios nagpasidaan kanato pinaagi sa Iyang mga propeta,” ikonsiderar ang pagdapit sa mga estudyante sa pagpangita ug pagpaambit sa mga pasidaan gikan sa modernong mga propeta diha sa Alang sa Kalig-on sa mga Kabatan-onan (booklet, 2011) nga sila nagmapasalamaton.

Makasalig kita sa mga pasidaan sa Dios

Ikonsiderar ang pagdala og duha ka sudlanan ngadto sa klase, ang usa adunay maayo sa sulod ug ang usa adunay mas maayo pa sa sulod.

Sultihi ang usa ka boluntaryo nga maangkon niya kon unsa ang naa sa usa sa mga sudlanan, apan kinahanglan siyang mopili nga wala nahibalo kon unsa ang naa niini. Hangyoa ang boluntaryo sa pagbiya sa kwarto sulod sa usa ka minuto sa dili pa mopili. Samtang wala siya, ipakita sa pipila ka mga estudyante kon unsa ang anaa sa matag sudlanan. Tudloi ang pipila kanila sa pagpasidaan sa estudyante batok sa pagpili sa maayo ug sa uban kanila sa pagpasidaan sa boluntaryo batok sa pagpili sa mas maayo. Dayon dapita ang boluntaryo sa pagbalik sa kwarto ug tugoti ang mga estudyante sa pagsulay sa pag-impluwensya sa iyang desisyon. Human makapili ang boluntaryo, pangutan-a ngano nga lisod mahibaloan kon kinsa nga mga opinyon ug mga pasidaan ang kinahanglan niyang paminawon.

Dapita ang mga estudyante sa pagpaambit og mga butang nga gibati sa kalibotan nga luwas ug maayo apan ang Ginoo pinaagi sa Iyang mga propeta nagpasidaan kanato mahitungod niini. Dapita ang mga estudyante sa pagpaambit nganong makasalig kita sa mga pasidaan ug panglantaw sa Dios labaw sa mga opinyon sa mga tawo sa kalibotan.