2 Nephi 3

“Usa ka Pinili nga Manalagna Ako Mopasanay”

Ang kapitulo 3 sa 2 Nephi nagrekord sa himatyon nga mga pulong ni Lehi ngadto sa iyang kamanghoran nga anak nga lalaki, si Joseph. Si Lehi mikutlo sa panagna nga gihimo ni Jose [Joseph] sa Ehipto mga 1,700 ka tuig sa wala pa ang pagkatawo ni Kristo. Hunahunaa ang katingala ni Joseph Smith sa dihang iyang nahibaloan nga siya ang hilisgotan sa kadaghanan sa panagna nga gihimo ni Jose sa Ehipto. Ang katuyoan niini nga leksiyon mao ang pagtabang kanimo sa pagpalawom sa imong pagpamatuod sa balaan nga calling ni Propeta Joseph Smith.

Pagtudlo sa mga kasulatan ug propetikanhong mga pulong nga adunay pagtuo ug tumong. Ang mga kasulatan ug ang mga pulong sa mga propeta ug apostoles sa ulahing mga adlaw mga tinubdan sa kamatuoran. Seguroha nga ang tanan nimong gitudlo nahiuyon sa mga kasulatan ug sa mga pulong sa mga propeta. Ang pagtudlo sa kamatuoran makadapit sa Espiritu Santo ngadto sa lawak tunghaan.

Pagpangandam sa estudyante: Dapita ang mga estudyante sa pagbasa o pagtan-aw sa pakigpulong ni Elder Neil L. Andersen nga “Joseph Smith,” gikan sa Oktubre 2014 nga kinatibuk-ang komperensiya (tan-awa sa Liahona, Nob. 2014, 28–31), ug pangitaa kon nganong importante ang pagbaton og personal nga pagpamatuod nga si Joseph Smith gitawag sa Dios.

Mga Posibleng Kalihokan sa Pagkat-on

Timan-i nga kini nga leksiyon nagtutok sa balaan nga misyon ni Joseph Smith. Kini nga leksiyon maghisgot sa tahas sa mga kasulatan sama sa gihisgotan diha sa 2 Nephi 3:12.

Upat ka Joseph

Ikosiderar ang usa sa mosunod nga mga posibilidad. Mahimo nimong ipakita ang mosunod nga mga imahe ug mga pakisayran sa kasulatan sa sinagol nga pagkahan-ay ug dapiton ang mga estudyante sa pagpares sa bersikulo ngadto sa eksakto nga litrato. O ipakita ang mga pakisayran sa kasulatan uban sa may kalabotan nga mga bersikulo ug dapita ang mga estudyante sa pagdiskobre kon kinsa ni nga mga tawo. Awhaga ang mga estudyante sa pagrekord niini nga mga ngalan diha sa ilang kaugalingon nga mga kasulatan.

Upat ka mga indibidwal nga gihisgotan sa 2 Nephi 3 ang tanan adunay parehas nga ngalan. Basaha ang mga bersikulo sa matag hulagway ug ilha kon kinsa kining upat ka mga hulagway ang girepresentar.

2 Nephi 3:3; 2 Nephi 3:4; 2 Nephi 3:11; 2 Nephi 3:15

Seguroha nga masabtan sa mga estudyante nga ang mga numero nagrepresentar sa (1) anak ni Lehi nga si Joseph, (2) Jose [Joseph] sa Ehipto, (3) sa Propeta Joseph Smith, ug (4) sa amahan sa Propeta, si Joseph Smith Sr.

Daghan sa 2 Nephi 3 nagtutok sa usa ka panagna nga gihimo ni Jose [Joseph] sa Ehipto mahitungod sa “manalagna” ug ni propeta Joseph Smith ug sa iyang misyon sa ulahing mga adlaw.

Si Presidente Brigham Young (1801–77) mihimo sa mosunod nga pamahayag mahitungod sa pagpangandam sa Ginoo alang sa misyon ni Joseph Smith:

Kini gimando didto sa katigoman sa kahangtoran, dugay na kaayo sa wala pa ang katukoran sa yuta, nga siya, si Joseph Smith, kinahanglan mao ang tawo, sa kataposang dispensasyon niini nga kalibotan, ang modala sa pulong sa Dios ngadto sa mga katawhan, ug modawat sa kahingpitan sa mga yawe ug gahom sa Priesthood sa Anak sa Dios. Ang Ginoo nagtan-aw kaniya, ug sa iyang amahan, ug sa amahan sa iyang amahan, ug sa ilang mga kaliwatan balik … ngadto kang Adan. Iyang gibantayan kana nga pamilya ug kana nga dugo samtang naglatay kini gikan sa gigikanan niini ngadto na sa pagkahimugso niana nga tawo. Gi-ordinahan na siyang daan didto sa kahangtoran sa pagdumala niining kataposang dispensasyon. (Mga Pagtulun-an sa mga Presidente sa Simbahan: Brigham Young [1997], 113, 394)

• Unsa ang gitudlo niini nga mga pulong kanato mahitungod sa calling ni Joseph Smith?

• Unsa ang gitudlo niini kanato mahitungod sa Ginoo?

Mga panagna mahitungod ni Joseph Smith

Alang sa mosunod nga kalihokan, ikonsiderar ang pagbahin sa mga estudyante ngadto sa managpares ug ipabasa sa usa ka estudyante ang 2 Nephi 3:6–12 ug ang laing usa mobasa sa 2 Nephi 3:13–15, 24. Ang matag estudyante mahimo dayon nga motudlo sa lain kon unsay iyang nakit-an. Mahimong makatabang ang paglibot sa kwarto ug tabangan ang si bisan kinsa nga mga estudyante nga adunay mga pangutana bahin sa mga bersikulo.

Samtang nakig-istorya sa iyang anak nga si Joseph, si Lehi mikutlo og usa ka bahin sa usa ka panagna ni Jose [Joseph] sa Ehipto gikan sa mga palid nga tumbaga (tan-awa usab ang Hubad ni Joseph Smith, Genesis 50:24–38 [diha sa apendiks sa Hubad ni Joseph Smith]). Kini nga panagna kasagaran mahitungod ni Propeta Joseph Smith sa ulahing mga adlaw. Basaha ang 2 Nephi 3:6–15, 24, ug markahi ang mga pulong o hugpong sa mga pulong nga nagtudlo kanimo mahitungod ni Joseph Smith. (Timan-i nga ang “bunga sa imong mga kaliwat” nagpasabot sa mga anak o kaliwatan.)

• Unsa ang mipatigbabaw diha kanimo mahitungod ni Joseph Smith?

  Ikonsiderar ang pagdapit sa mga estudyante sa pagsulat og mga pulong o hugpong sa mga pulong nga nakapadani nila diha sa pisara. Mahimo nimong itudlo ang mga hugpong sa mga pulong diha sa pisara ug hangyoa ang mga estudyante sa pagpaambit nganong makahuluganon kini nga mga hugpong sa mga pulong.

• Unsaon nimo pag-summarize ang mga pagtulun-an mahitungod ni Propeta Joseph Smith gikan sa unsay imong nabasa sa 2 Nephi 3?

Usa ka kamatuoran nga atong makat-onan mao nga ang Ginoo mipakatawo ni Propeta Joseph Smith aron sa pagtabang sa pagpahinabo sa Pagpahiuli sa ebanghelyo ni Jesukristo.

• Ngano sa imong hunahuna importante ang pagbaton og personal nga pagpamatuod niini nga kamatuoran?

Si Elder Neil L. Andersen sa Korum sa Napulog Duha ka Apostoles mitudlo:

Ang negatibong komentaryo bahin ni Propeta Joseph Smith modaghan samtang nagpadulong kita sa Ikaduhang Pag-anhi sa Manluluwas. Ang morag mga tinuod ug mga panglingla dili mokunhod. Dunay mga sakop sa pamilya ug mga higala nga magkinahanglan sa inyong tabang. …

Sa kabatan-onan … mohatag ko ninyo og piho nga hagit: Pagbaton og personal nga pagsaksi bahin ni Propeta Joseph Smith. (Neil L. Andersen, “Joseph Smith,” Liahona, Nob. 2014, 30)

Tingali labing maayo nga hinuktokan ug pamalandongan sa mga estudyante ang ilang mga tubag sa sunod nga pangutana sa hilom. Mahimo gani nimong hangyoon sila sa pagrekord sa ilang mga tubag sa usa ka journal sa pagtuon.

• Unsa ka kamasaligon sa imong gibati mahitungod sa balaanong calling ni Propeta Joseph Smith?

Ang mga estudyante mahimong makabenepisyo sa pagpangutana mahitungod ni Joseph Smith o mahitungod sa pag-angkon og pagpamatuod sa iyang propetikanhong tawag. Ang pakigpulong ni Elder Andersen nga gi-refer sa pagpangandam sa estudyante mahimong makatabang nga kapanguhaan sa pagtubag sa ilang mga pangutana. Ang mga estudyante nga nibasa sa pakigpulong agig pagpangandam niini nga leksiyon mahimong makatubag sa pipila sa mga pangutana sa ilang mga klasmeyt.

Pagbaton og pagpamatuod ni Joseph Smith

Handurawa ang mosunod nga senaryo:

Sa dihang nahibaloan sa imong higala nga si Marcos nga miyembro ka sa Ang Simbahan ni Jesukristo sa mga Santos sa Ulahing mga Adlaw, misugod siya sa pagbasa mahitungod ni Joseph Smith diha sa website sa Simbahan. Naintriga siya sa imbitasyon sa pagkat-on sa iyang kaugalingon nga si Joseph Smith usa ka propeta sa Dios. Samtang gipaambit niya kanimo ang pipila sa iyang nakat-onan, nangutana siya, “Unsaon nato pagkahibalo sa atong kaugalingon kon si Joseph Smith usa ka propeta?”

• Unsay imong isulti kang Marcos?

Alang sa ubang mga ideya sa pagbaton og pagpamatuod nga si Joseph Smith propeta sa Ginoo, tan-awa o basaha ang gisugyot ni Elder Andersen:

Ang pagpamatuod bahin ni Propeta Joseph Smith moabot nga lahi sa matag usa nato. Mahimong moabot kini samtang nagluhod kamo sa pag-ampo, naghangyo sa Dios sa pagmatuod nga siya tinuod nga propeta. Mahimong moabot kini samtang nagbasa kamo sa asoy sa Propeta bahin sa Unang Panan-awon. Usa ka pagpamatuod mahimong motuhop diha sa inyong kalag samtang magbalik-balik kamo og basa sa Basahon ni Mormon. Mahimong moabot kini samtang magpamatuod kamo bahin sa Propeta o samtang magbarog kamo sa templo ug makaamgo nga pinaagi ni Joseph Smith ang balaang gahom sa sealing gipahiuli sa yuta. Uban sa hugot nga pagtuo ug tinuod nga katuyoan, ang inyong pagpamatuod kang Propeta Joseph Smith malig-on. (Neil L. Andersen, “Joseph Smith,” Liahona, Nob. 2014, 30)

Mahimo kini nga maayong kahigayonan sa pagdapit sa mga estudyante sa pagpaambit sa ilang mga pagpamatuod ni Joseph Smith. Makatabang ka sa pag-andam sa mga estudyante pinaagi sa pagdapit kanila sa pagsulat sa ilang mga tubag sa pipila sa mosunod nga mga pangutana diha sa ilang mga journal sa pagtuon. Kon makahuman na ang mga estudyante sa pagsulat, dapita kadtong andam nga mopaambit ngadto sa klase. Ikonsiderar ang pagpaambit sa imong kaugalingong pagpamatuod ni Joseph Smith. Maayo usab nga tabangan ang mga estudyante nga makaila nga ang pagpili sa pagtuo sa balaang tawag ni Joseph Smith dalaygon bisan kon walay kasegurohan. Ang ilang pagtuo mahimong mapalig-on sa paglabay sa panahon pinaagi sa kasinatian.

• Unsa ang nakatabang kanimo sa pagtuo nga si Joseph Smith usa ka propeta?

• Unsa ang natabang ni Propeta Joseph Smith kanimo sa pagsabot o pagbati mahitungod ni Jesukristo?

• Unsa ang imong mahimo aron sa pagpalawom sa imong pagpamatuod ni Propeta Joseph Smith?

• Sa unsang paagi nga ang pagbaton og pagpamatuod ni Joseph Smith makaapekto sa imong kinabuhi?

Komentaryo ug Background nga Impormasyon

Gisimba ba nato si Joseph Smith?

Si Elder Gerrit W. Gong sa Korum sa Napulog Duha ka Apostoles mitudlo:

Mosimba kita sa Dios nga Mahangturong Amahan ug sa Iyang Anak, si Jesukristo, dili kang Propeta Joseph o ni bisan kinsang mortal nga lalaki o babaye. (Gerrit W. Gong, “Tanan nga mga Kanasoran, mga Kaliwatan, ug mga Pinulongan,” Liahona, Nob. 2020, 39)

Unsa ang gisulti sa mga propeta sa modernong panahon mahitungod ni Joseph Smith?

Si Presidente Russell M. Nelson mipamatuod:

Ako nasayod nga si Joseph Smith giorden nang daan nga propeta nga gipili sa Ginoo sa pag-abli niining kataposang dispensasyon. Pinaagi kaniya ang Simbahan sa Ginoo gipahiuli nganhi sa yuta. Si Joseph misilyo sa iyang pagpamatuod uban sa iyang dugo. Gihigugma ug gitahod ko siya! (Russell M. Nelson, “Paminaw Kaniya,” Liahona, Mayo 2020, 92)

Si Presidente Dallin H. Oaks sa Unang Kapangulohan mipamatuod:

Sama sa ubang matinud-anong mga Santos sa Ulahing mga Adlaw, akong gitukod ang akong kinabuhi sa pagpamatuod ug misyon ni Propeta Joseph Smith. Sa tanan nakong pagbasa ug orihinal nga pagsiksik, wala gayod ako kawad-i og kadasig sa akong pagpamatuod sa iyang propetikanhong calling ug sa ebanghelyo ug pagpahiuli sa priesthood nga gipasiugdahan sa Ginoo pinaagi kaniya. (Dallin H. Oaks, “Joseph, the Man and the Prophet,” Ensign, Mayo 1996, 73)

Asa pa ako dugang nga makakat-on mahitungod ni Joseph Smith?

Basaha ang Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 (2018).

Dugang nga mga Kalihokan sa Pagkat-on

2 Nephi 3:8. “Ako mohimo kaniya nga halangdon sa akong mga mata”

Ang Ginoo mipahayag nga Iyang himoon si Joseph Smith nga halangdon sa Iyang mga mata tungod kay siya mobuhat sa buluhaton sa Ginoo. Mahimo nimong ipabasa sa mga estudyante kini nga bersikulo ug pangitaon kon unsay nakapahimo ni Joseph nga halangdon sa mga mata sa Ginoo. Ikonsiderar ang paghisgot kon sa unsang paagi ang pagkahalangdon sa mga mata sa Ginoo lahi sa pagkahalangdon sa mga mata sa kalibotan. Mahimo nimong dapiton ang mga estudyante sa paghunahuna kon unsaon nila sa pagsunod ang ehemplo ni Propeta Joseph Smith sa pagbuhat sa buluhaton sa Ginoo.

2 Nephi 3:12. Sa unsang paagi nga ang Biblia ug ang Basahon ni Mormon nagtinabangay

Tabangi ang mga estudyante nga makasabot nga “ang bunga sa imong mga kaliwat” nagpasabot sa mga kaliwat ni Jose [Joseph] sa Ehipto, kinsa motabang sa pagpatungha sa Basahon ni Mormon. Ang bunga sa mga kaliwat ni Juda nagpasabot sa mga kaliwat ni Juda, kinsa motabang sa pagpatungha sa Biblia. Dapita ang mga estudyante sa pagpangita kon sa unsang paagi nagtinabangay ang Biblia ug ang Basahon ni Mormon. Ikonsiderar ang paglista sa unsay makit-an sa mga estudyante diha sa pisara. Ang mga estudyante mahimong maghisgot kon sa unsang paagi ang Biblia ug ang Basahon ni Mormon nagtinabangay aron matuman kadtong mga katuyoan ug mangita og piho nga mga ehemplo. Pananglitan, ang mga estudyante mahimong motandi sa Lucas 11:9 ug sa 2 Nephi 4:35, mahitungod sa pag-ampo, o sa Mateo 6:14–15 ug sa Mosiah 26:30–31, mahitungod sa pagpasaylo.

2 Nephi 3:13. “Gikan sa kahuyang siya pagalig-onon,”

Mahimo nimong dapiton ang mga estudyante sa pagbasa sa 2 Nephi 3:13 ug sa pagpangita kon unsay ilang makat-onan mahitungod ni Joseph Smith. Mahimo kang mangutana sama sa mosunod:

• Sa unsang mga paagi nga tingale si Joseph Smith maisip nga huyang?

• Sa unsang paagi siya gihimo sa Ginoo nga lig-on?

• Sa unsang mga paagi imong giisip ang imong kaugalingon nga huyang?

• Sa unsang paagi ang Ginoo makahimo kanimo nga lig-on?

Bidyo: “Gipanalanginan ni Lehi si Joseph” (1:53)

Kon ang pipila sa imong mga estudyante naglisod sa pagbasa, mahimo nimong ikonsiderar ang paggamit sa mga bahin sa bidyo sa “Gipanalanginan ni Lehi si Joseph,” nga naghulagway kang Lehi nga nakig-istorya sa iyang anak nga si Joseph ug mikutlo og bahin sa 2 Nephi 3.