“2 Nephi 11: Mga Saksi ni Kristo,” Manwal sa Magtutudlo sa Basahon ni Mormon (2024)
“2 Nephi 11,” Manwal sa Magtutudlo sa Basahon ni Mormon
2 Nephi 11
Mga Saksi ni Kristo
Kinsa ang mosantop sa imong hunahuna kon maghunahuna ka sa mga saksi ni Jesukristo? Si Nephi nahigugma pag-ayo sa mga pagsaksi sa iyang igsoon nga si Jacob ug ni propeta Isaias nga iyang girekord kini uban sa iyang kaugalingong saksi ni Jesukristo. Kini nga leksiyon makatabang sa paglig-on sa imong pagpamatuod sa katinuod ni Jesukristo.
Pagdapit sa mga estudyante sa pagpamatuod ni Jesukristo. Samtang ang mga estudyante makaila ug mohigugma ni Jesukristo, dapita sila sa pagpaambit sa ilang mga pagbati mahitungod Kaniya. Sa pagbuhat sa ingon, ilang gidapit ang Espiritu sa pagsaksi nga ang ilang gisulti tinuod. Si Presidente M. Russell Ballard sa Korum sa Napulog Duha ka Apostoles mipasabot nga “ang Espiritu dili mapugngan kon maghatag og putli nga pagpamatuod ni Kristo” (“Pure Testimony,” Liahona, Nob. 2004, 41).
Pagpangandam sa estudyante: Dapita ang mga estudyante sa paghangyo og usa ka higala o usa ka minahal sa pagpaambit kon sa unsang paagi niya naangkon ang iyang pagpamatuod ni Jesukristo.
Mga Posibleng Kalihokan sa Pagkat-on
Ang kamahinungdanon sa mga saksi
Ikonsiderar ang paggamit sa mosunod nga yano nga sitwasyon aron matabangan ang mga estudyante nga makakita sa kamahinungdanon sa mga saksi. Aron madugangan ang ilang interes, mahimo nimong dugangan ang mga detalye sa senaryo. Pananglitan, ang usa ka higala gusto nga mahibalo kon asa ang mga estudyante. O usa ka krimen ang nahimo nianang higayona, ug ang mga estudyante kinahanglan nga mohatag og usa ka alibi.
Ang laing kapilian mao ang pagpangutana sa mga estudyante kon kinahanglan ba nila sukad nga mosalig sa mga saksi aron pamatud-an nga ang ilang gisulti tinuod.
Hunahunaa nga kinahanglan nimong i-asoy kon asa ka kagabii gikan sa alas 6:00 hangtod alas 7:00 sa gabii.
-
Unsaon nimo pagpamatuod kon unsa ang imong gibuhat niadtong higayona?
-
Aduna bay mga saksi nga makapamatuod kon diin ka?
-
Ngano nga ang mga saksi importante kon kita nagpangita sa kamatuoran?
Basaha ang 2 Nephi 11:2–3, nga mangita sa mga saksi nga nahisgotan ni Nephi ug unsay ilang nasinati.
Dapita ang mga estudyante sa pagpaambit sa unsay ilang napalgan ug sa ilang mga hunahuna mahitungod niini. Kon kini mapuslanon, ikonsiderar ang pagpangutana sa mosunod nga mga pangutana:
-
Ngano nga kining tulo ka mga tawo mahimong gamhanang mga saksi?
-
Unsa ang gusto nimong makat-onan gikan kanila?
-
Unsa nga mga kamatuoran ang imong nakat-onan bahin sa Dios diha sa bersikulo 3?
Samtang motubag ang mga estudyante, ikonsiderar ang pagsulat sa mosunod nga tipik nga kapahayag diha sa pisara: Ang Langitnong Amahan nagpadala og mga saksi aron … Mahimo nimong kompletohon ang kapahayag sa unsay gisulti sa mga estudyante.
Basaha ang 2 Nephi 11:4, 6, nga mangita sa unsay piho nga gusto ni Nephi nga mahibaloan sa iyang katawhan.
Kon ang mga estudyante wala pa makakompleto sa pamahayag diha sa pisara nga adunay susama nga baroganan sa ubos, ikonsiderar ang pagdugang niini.
Usa sa mga kamatuoran nga atong makat-onan sa 2 Nephi 11 mao nga ang Langitnong Amahan nagpadala og mga saksi aron sa pagpamatuod sa katinuod sa Iyang Anak.
-
Ngano sa imong hunahuna nga ang Langitnong Amahan migamit og mga saksi sa pagpamatuod sa Iyang Anak?
Paggahin og higayon sa pagpamalandong sa imong kaugalingong mga pagtuo ug mga pagbati mahitungod sa Manluluwas nga si Jesukristo. Paghunahuna sa mga saksi sa Manluluwas ug sa unsang paagi sila nakaapekto kanimo ug sa imong mga pagtuo mahitungod Kaniya. Sa imong pagpadayon niini nga leksiyon, pangitaa ang mga paagi nga ang mga saksi makatabang ug makapalig-on kanimo sa imong kinabuhi.
Sa wala pa ang 2 Nephi 11, si Nephi milakip sa mga pagtulun-an ug pagpamatuod sa iyang manghod nga lalaki nga si Jacob. Human ang 2 Nephi 11, si Nephi milakip sa mga pagtulun-an ug pagpamatuod ni propeta Isaias. Mahimo nimong isulat ang “2 Nephi 9–10 mao ang saksi ni Jacob” sunod sa ngalan ni Jacob diha sa bersikulo 3 ug “2 Nephi 12–24 mao ang saksi ni Isaias” sunod sa ngalan ni Isaias sa bersikulo 2.
Mga Saksi ni Jesukristo
Kini nga leksiyon makatabang kanimo sa pagpalawom sa imong personal nga pagpamatuod ni Jesukristo. Bisan kon nahibaloan na nimo sa imong kaugalingon nga Siya buhi o naghunahuna ka pa kon Siya tinuod ba, ang Espiritu Santo makatabang nimo nga mas makaila Kaniya pinaagi sa pinili nga mga saksi sa Dios. Ang kalawmon karon sa imong pagpamatuod bahin Kaniya dili sama ka importante sa imong tinguha nga mas makaila Kaniya agig pagpadayon.
Alang sa mosunod nga sugyot sa pagtuon, ikonsiderar nga ibutang ang mga estudyante sa mga grupo nga tagtulo nga ang matag estudyante nagtuon og lain-laing saksi. Human sa igong oras, dapita ang mga estudyante sa pagpaambit sa unsay ilang nakat-onan ngadto sa ilang grupo.
-
Jacob—Pangita og pagtulun-an o pagpamatuod kang Kristo nga makahuluganon kanimo nga gipaambit ni Jacob sa 2 Nephi 9–10. (Ang posible nga mga bersikulo naglakip sa 2 Nephi 9:10–12, 20–23, 41; 10:25.)
-
Isaias—Pangita og pagtulun-an o pagpamatuod kang Kristo nga makahuluganon kanimo nga gipaambit ni Isaias sa 2 Nephi 12–24. (Ang posible nga mga bersikulo naglakip sa 2 Nephi 16:1–3; 17:14; 19:6–7; 22:2; 24:3.)
-
Nephi—Pangita og pagtulun-an o pagpamatuod kang Kristo nga makahuluganon kanimo gikan sa personal nga mga sinulat ni Nephi. (Ang posible nga mga bersikulo naglakip sa 1 Nephi 11:31–33; 19:8–10; 2 Nephi 4:18–21; 25:26, 29.
Moderno nga mga saksi ni Kristo
Hinumdomi nga si Nephi mipamatuod nga “ang Dios mipadala og dugang pa nga mga saksi” (2 Nephi 11:3). Pipila niini nga mga saksi mao ang Iyang Apostoles sa ulahing mga adlaw. Tan-awa ang mga pagpamatuod sa labing menos duha sa mosunod nga moderno nga mga saksi ni Jesukristo. Pagmabinantayon sa mga pagbati ug mga hunahuna nga mahimo nimong madawat gikan sa Espiritu Santo samtang nagtan-aw ka. Ang tibuok nga mga bidyo anaa sa ChurchofJesusChrist.org.
Ikonsiderar ang pagtugot sa mga estudyante sa pagpili kon hain sa mga bidyo ang gusto nilang tan-awon kon walay igong oras alang sa lima. Mahimo nimong hatagan sila og panahon tali sa matag bidyo sa pagrekord sa ilang nakat-onan o gibati mahitungod ni Jesukristo diha sa ilang mga journal sa pagtuon.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fa8%2Fd6%2Fa8d682f7eedb314930bd3bb16adc64ab8373f24c%2Fa8d682f7eedb314930bd3bb16adc64ab8373f24c.jpeg/full/!250,/0/default)
“Espesyal nga mga Saksi ni Kristo—Presidente Russell M. Nelson” (tan-awa gikan sa time code 4:32 hangtod sa 5:47)
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F6b%2F35%2F6b35c160f8af62353fc66309dcd486ff7c5bb56f%2F6b35c160f8af62353fc66309dcd486ff7c5bb56f.jpeg/full/!250,/0/default)
“Espesyal nga mga Saksi ni Kristo—Presidente M. Russell Ballard” (tan-awa gikan sa time code 2:22 hangtod sa 3:45)
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Ff6%2Fda%2Ff6da7df17045567f6772d0849b90cf5952737aa4%2Ff6da7df17045567f6772d0849b90cf5952737aa4.jpeg/full/!250,/0/default)
“Espesyal nga mga Saksi ni Kristo—Elder Quentin L. Cook” (tan-awa gikan sa time code 3:53 hangtod sa 4:57)
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fa4%2F69%2Fa469caf337c613420c7622fa0ae417808cb4d519%2Fa469caf337c613420c7622fa0ae417808cb4d519.jpeg/full/!250,/0/default)
“Espesyal nga mga Saksi ni Kristo—Elder Neil L. Andersen” (tan-awa gikan sa time code 4:20 hangtod sa 5:24)
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F5a%2F62%2F5a626dbfa2998b4d9dd6e8009d1e07ee07bef897%2F5a626dbfa2998b4d9dd6e8009d1e07ee07bef897.jpeg/full/!250,/0/default)
“Espesyal nga mga Saksi ni Kristo—Elder D. Todd Christofferson” (tan-awa gikan sa time code 4:30 hangtod sa 5:51)
Ang imong saksi ni Jesukristo
Matikdi nga si Nephi mipili og propeta nga iyang gidayeg (Isaias), usa ka tawo nga iyang personal nga nailhan (iyang igsoon nga lalaki si Jacob), ug ang iyang kaugalingong pagpamatuod isip tulo ka saksi sa pagpamatuod sa katinuod ni Jesukristo.
Ikonsiderar ang pagdapit sa mga estudyante sa pagrekord sa ilang mga hunahuna mahitungod sa mosunod nga [exercise] diha sa ilang mga journal sa pagtuon. Mahimong makatabang ang pagpakita sa mosunod nga mga bullet point samtang nagsulat ang mga estudyante. Sa dili pa magsugod, ikonsiderar ang pagpahinumdom kanila sa paghunahuna og balik sa ilang nakat-onan atol sa pagpangandam sa estudyante.
-
Pagrekord og pagtulun-an mahitungod sa Manluluwas nga makahuluganon kanimo gikan ni Nephi, Jacob, Isaias, o sa moderno nga propeta.
-
Irekord ang ngalan sa usa ka tawo nga personal nimong kaila nga imong gikonsiderar nga saksi ni Jesukristo. Ilakip ang imong nakat-onan gikan sa ilang pagpamatuod. (Mahimo nimong istoryahan o i-text kana nga tawo aron mangutana kon sa unsang paagi siya nakaangkon og pagpamatuod ni Kristo.)
-
Irekord kon unsay imong gibati mahitungod sa imong kaugalingong pagpamatuod ni Jesukristo. Mahimong maglakip kini sa mga kasinatian nga imong nasinati o mga butang nga imong nakat-onan mahitungod Kaniya. O mahimo nimong pilion nga irekord ang imong tinguha nga makaangkon og pagpamatuod kang Jesukristo ug unsa ang imong andam nga buhaton aron sa pagtabang niana nga pagpamatuod nga molambo.
Pagdapit og pipila ka mga boluntaryo sa pagpaambit og bahin sa ilang gisulat.
Ikonsiderar ang pagkanta o pagpaminaw og himno mahitungod ni Jesukristo aron sa pagtapos sa leksiyon.