Rebyo 4 sa Doktrinal nga Kahanas

Gamita ang mga Tudling sa Kasulatan sa Doktrinal nga Kahanas

Atong gamiton ang mga kasulatan sa atong kinabuhi pinaagi sa paggamit sa doktrina ug mga baroganan nga anaa niini aron sa pagtabang kanato nga mahimong mas mahisama sa Langitnong Amahan ug ni Jesukristo. Kini nga leksiyon gituyo aron sa pagtabang kanimo sa paggamit sa doktrina nga gitudlo sa nagkalain-laing mga tudling sa doktrinal nga kahanas sa Basahon ni Mormon.

Pag-awhag sa mga estudyante sa pagpraktis sa pagsunod sa ebanghelyo.Kon ang mga estudyante mogamit sa ebanghelyo sa ilang inadlaw-adlaw nga kinabuhi, mas may kalagmitan nga sila adunay malungtaron ug lawom nga espirituhanong pagtubo. Pagpaambit og mga ehemplo kon giunsa nimo paggamit ang mga kamatuoran sa ebanghelyo ug ang mga panalangin nga miresulta. Dapita kanunay ang mga estudyante sa paggamit sa mga kamatuoran diha sa ilang kaugalingong kinabuhi.

Pagpangandam sa estudyante: Dapita ang mga estudyante sa pag-andam sa pagpaambit og paboritong tudling sa kasulatan ug isulti nganong usa kini sa ilang paborito. Mahimo nimong hangyoon sila sa paglakip kon sa unsang paagi kini magamit sa ilang mga kinabuhi. Mahimong makatabang ang paghangyo og pipila ka mga estudyante sa pagtambong nga andam sa pagpaambit.

Mga Posibleng Kalihokan sa Pagkat-on

Ang usa ka leksiyon sa tudling sa doktrinal nga kahanas mahimong kinahanglan nga itudlo puli niini nga leksiyon. Tan-awa ang eskedyul sa pagtudlo nga gihatag sa direktor o koordinitor sa lugar o rehiyon aron maseguro nga matudlo ang matag leksiyon sa tudling sa doktrinal nga kahanas samtang anaa sa sesyon ang seminary.

Nakahimo ba kini og kalainan?

Ikonsiderar ang pagsugod sa klase pinaagi sa pagpaambit sa usa sa imong paborito nga mga tudling sa kasulatan. Dayon ipangutana sa mga estudyante ang mosunod nga mga pangutana:

• Aduna ka bay paborito nga tudling sa kasulatan? Nganong nahimo kini nimong paborito?

Kasagaran, ang mga tudling nga labing mahinungdanon alang kanato mao kadtong atong gigamit sa atong kaugalingon nga mga kinabuhi. Sama pananglit, makatubag kini og lisod nga pangutana, makahatag kanato og kalinaw sa panahon nga mahagiton, o makatabang sa pagtukod sa atong pagpamatuod.

Basaha ang mosunod nga pamahayag ni Presidente Russell M. Nelson “Presidente Nelson—Ang mga Kasulatan Nagtudlo Kanato mahitungod ni Jesukristo” (0:59), anaa sa ChurchofJesusChrist.org

Kita makaadto sa mga kasulatan. Kini nagtudlo kanato kabahin ni Jesukristo ug sa Iyang ebanghelyo, sa gidak-on sa Iyang Pag-ula, ug mahinungdanong plano sa Amahan sa kalipay ug katubsanan. Inadlaw nga pagbasa sa pulong sa Dios importante alang sa espirituhanong kaluwasan, ilabi na niining panahon sa nagkagrabe nga kaguliyang. Samtang kita magbusog sa mga pulong ni Kristo matag adlaw, ang mga pulong ni Kristo mosulti nato unsaon sa pagtubag sa mga kalisod nga wala nato mahunahunai nga atong atubangon. (Presidente Russell M. Nelson, “Paminaw Kaniya,” Liahona, Mayo 2020, 90)

• Unsa ang mipatigbabaw kanimo sa pamahayag ni Presidente Nelson?

Mga pakisayran sa doktrinal nga kahanas sa Basahon ni Mormon ug mahinungdanon nga hugpong sa mga pulong sa kasulatan

Ang paggamit sa mga kasulatan nagpasabot nga atong ilhon ang mga tudling sa kasulatan nga mohaum sa atong mga panginahanglan, dayon molihok kon unsay gitudlo kanato niadto nga mga tudling. Aron matabangan ka nga masabtan kini nga proseso, basaha ang mosunod nga mga senaryo:

Imbis nga gamiton ang mosunod nga mga senaryo, ikonsiderar ang pagbutang sa mga estudyante ngadto sa gagmay nga mga grupo. Hangyoa sila sa pagsulat sa usa ka piraso nga papel og duha ngadto sa tulo ka mga problema o mga hagit nga komon sa kabatan-onan. Dayon dapita ang mga estudyante nga ibaylo ang ilang papel sa laing grupo.

• Si Guillermo adunay lisod nga desisyon nga himoon ug nahadlok siya nga basin makahimo siya og sayop nga pagpili.

• Si Maggie nanlimbasog sa pagtuman og usa ka piho nga sugo.

Basaha ang mosunod nga mga pakisayran sa doktrinal nga kahanas sa Basahon ni Mormon ug ang mahinungdanon nga hugpong sa mga pulong sa kasulatan. Pangitaa kadtong tan-aw nimo nga mahimong magamit ni Guillermo o Maggie. Kon sa imong hunahuna makatabang ang usa ka piho nga tudling, seguroha nga basahon ang tibuok tudling ug dili lang kay ang mahinungdanon nga hugpong sa mga pulong sa kasulatan nga nalista sa ubos.

Kon ang mga estudyante nakigbaylo og mga papel sa laing grupo, mahimo nilang pangitaon ang mosunod nga tsart alang sa mga tudling nga makatabang sa usa ka tawo nga nag-atubang sa mga problema o mga hagit nga ilang nadawat. Ikonsiderar ang pagpakita sa tsart samtang ang mga estudyante naghimo niini nga kalihokan.

Pakisayran sa Kasulatan	Mahinungdanon nga Hugpong sa mga Pulong sa Kasulatan
Pakisayran sa Kasulatan 1 Nephi 3:7	Mahinungdanon nga Hugpong sa mga Pulong sa Kasulatan “Ako moadto ug mobuhat sa mga butang nga ang Ginoo nagsugo.”
Pakisayran sa Kasulatan 2 Nephi 2:25	Mahinungdanon nga Hugpong sa mga Pulong sa Kasulatan “Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay.”
Pakisayran sa Kasulatan 2 Nephi 2:27	Mahinungdanon nga Hugpong sa mga Pulong sa Kasulatan “Sila gawasnon sa pagpili sa kalingkawasan ug sa kinabuhi nga dayon … o … pagkabihag ug sa kamatayon.”
Pakisayran sa Kasulatan 2 Nephi 26:33	Mahinungdanon nga Hugpong sa mga Pulong sa Kasulatan “Ang tanan managsama ngadto sa Dios.”
Pakisayran sa Kasulatan 2 Nephi 28:30	Mahinungdanon nga Hugpong sa mga Pulong sa Kasulatan Ang Dios “mopadayag ngadto sa mga katawhan og pagtulun-an human sa usa ka pagtulun-an, lagda human sa usa ka lagda.”
Pakisayran sa Kasulatan 2 Nephi 32:3	Mahinungdanon nga Hugpong sa mga Pulong sa Kasulatan “Pagbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton.”
Pakisayran sa Kasulatan 2 Nephi 32:8–9	Mahinungdanon nga Hugpong sa mga Pulong sa Kasulatan “Kamo kinahanglan gayod nga mag-ampo sa kanunay.”
Pakisayran sa Kasulatan Mosiah 2:17	Mahinungdanon nga Hugpong sa mga Pulong sa Kasulatan “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios.”
Pakisayran sa Kasulatan Mosiah 2:41	Mahinungdanon nga Hugpong sa mga Pulong sa Kasulatan “[Kadto] nga naghupot sa mga sugo sa Dios … bulahan sa tanan nga mga butang.”
Pakisayran sa Kasulatan Mosiah 3:19	Mahinungdanon nga Hugpong sa mga Pulong sa Kasulatan “[Isalikway] ang iyang kinaiyanhon nga pagkatawo ug [mahimo] nga usa ka santos pinaagi sa pag-ula ni Kristo ang Ginoo.”
Pakisayran sa Kasulatan Mosiah 4:9	Mahinungdanon nga Hugpong sa mga Pulong sa Kasulatan “Tuo sa Dios; … tuo nga siya aduna sa tanan nga kaalam.”
Pakisayran sa Kasulatan Mosiah 18:8–10	Mahinungdanon nga Hugpong sa mga Pulong sa Kasulatan “Pagpabunyag diha sa ngalan sa Ginoo, ingon og usa ka saksi … nga kamo nakasulod ngadto sa usa ka pakigsaad uban kaniya.”

Sa unsang paagi makatabang ang mga kasulatan?

Kon ang mga estudyante nakigbaylo og mga papel, imbis nga mangutana sa mosunod nga mga pangutana, dapita sila sa pagpaambit sa mga tudling nga ilang napalgan ngadto sa grupo nga ilang gikabaylo og mga papel.

• Unsa nga mga tudling sa doktrinal nga kahanas ang makatabang ni Guillermo o Maggie? Ngano man?

• Unsa kaha ang mabuhat nila ni Guillermo ug Maggie tungod sa mga kamatuoran nga gitudlo niini nga mga bersikulo?

Samtang nagpaambit ang mga estudyante, ipasabot og maayo nga dili lang usa ang husto nga tubag; daghang kasulatan ang makatabang sa lainlaing paagi.

Paggamit sa mga kasulatan ngadto sa atong mga kinabuhi

Pamalandongi kon unsa nga mga panginahanglan o mga hagit ang aduna ka. Tingali nagkinahanglan ka og tabang sa pag-eskwela, pagpalambo sa imong relasyon ngadto sa imong mga ginikanan o mga igsoon, dugang nga hugot nga pagtuo kang Kristo aron maghinulsol, o pailob. Paghimo og lista sa imong mga kalisdanan o mga hagit diha sa imong journal sa pagtuon. Sulayi paglakip ang bisan unsa nga mosantop sa imong hunahuna.

Pagpili og usa sa mga panginahanglan o mga hagit nga imong gisulat.

Basaha ang mahinungdanon nga hugpong sa mga pulong sa kasulatan sa doktrinal nga kahanas ug ilha kadtong mahimong makatubag sa imong mga panginahanglan, mga kalisdanan, o mga hagit. Daghang mga tudling sa doktrinal nga kahanas ang mahimong makatabang. Tinguhaa ang giya sa Langitnong Amahan samtang ikaw magtuon.

Ang mosunod nga mga aghat o susama nga mga pamahayag mahimong makatabang sa mga estudyante. Mahimo nimong isulat sa pisara ang mga pag-aghat nga pilian sa mga estudyante kon unsay ilang magamit.

• Hain nga mahinungdanon nga hugpong sa mga pulong sa kasulatan sa doktrinal nga kahanas ang imong gipili?

  1. Kini nga bersikulo makatabang nako sa akong mga hagit pinaagi sa …

  2. Kini nga bersikulo nagtabang kanako nga makasabot o makasunod sa Langitnong Amahan ug ni Jesukristo pinaagi sa …

  3. Ako nagtuo nga ang pagsunod sa mga kamatuoran niini nga mga bersikulo makahatag kanako og kalipay tungod kay …

Taposa pinaagi sa pagpasalamat sa mga estudyante sa ilang mga komentaryo, hilabi na niadtong mipaambit sa ilang makahuluganon nga mga bersikulo sa pagsugod sa klase.