2 Nephi 16

“Balaan, Balaan, Balaan, Ang Ginoo”

Nakasinati ka na ba og usa ka kasinatian nga lisod ihulagway sa mga pulong? Mahimong tinuod kana kang Isaias sa dihang misulat siya mahitungod sa pagkakita sa Ginoo sa tanan Niyang himaya. Aron matabangan sa pag-istorya kini nga kasinatian, si Isaias migamit og simbolikong pinulongan sa paghulagway sa gahom ug kabalaan sa Ginoo ug sa personal nga mga pagbati ni Isaias sa pagka dili sarang. Ang Ginoo milimpyo kaniya sa iyang mga sala ug mitawag kaniya nga mahimong propeta. Kini nga leksiyon makatabang kanimo sa pag-ila sa abilidad sa Ginoo sa pagpasaylo ug paglimpyo kanimo.

Pagtabang sa mga estudyante nga makasabot sa lisod nga mga tudling sa kasulatan. Ang pagtudlo sa mga estudyante sa konteksto sa kasaysayan o kultura gamit ang mga diksyonaryo, mga manwal sa estudyante, ug ubang mga tabang sa pagtuon sa kasulatan makaabli og mas dakong pagsabot sa pinulongan ug mga simbolo sa kasulatan. Dasiga ang mga estudyante nga magmapailobon ug mohangyo og tabang gikan sa Ginoo samtang magtinguha sila sa pagsabot sa Iyang pulong.

Pagpangandam sa estudyante. Dapita ang mga estudyante sa pagpamalandong sa mosunod nga pangutana: Unsa ang gusto sa usa ka mahigugmaong Dios nga atong masabtan kon kita mobati nga kita dili igo ang atong kamaayo?

Mga Posibleng Kalihokan sa Pagkat-on

Ang gahom ug himaya ni Jesukristo

Ang ubang mga propeta ug ang uban adunay pribilehiyo nga makakita ni Jesukristo sa tanan Niyang talagsaong himaya.

• Unsa ang pipila ka mga rason nga ang Ginoo mibisita sa lain-laing mga tawo sa tibuok kasaysayan sa kalibotan?

Ikonsiderar ang pagdapit sa mga estudyante sa paglista og pipila ka mga ehemplo sa mga higayon nga ang Ginoo mipakita ngadto sa mga tawo. Pagpakita og pipila ka mga hulagway nga makatabang sa mga estudyante sa paghinumdom. Mahimo usab nimong hangyoon ang mga estudyante sa pagkonsiderar kon hain nga mga kasinatian ang labing gusto nila nga unta maanaa sila.

The Transfiguration [Ang Transpigurasyon], ni Carl Bloch

Christ in the Land Bountiful [Kristo sa Yuta sa Bountiful], ni Simon Dewey

First Vision [Unang Panan-awon], ni Walter Rane

Jesus Christ Appears to the Prophet Joseph Smith and Oliver Cowdery [Si Jesukristo Nagpakita ngadto ni Propeta Joseph Smith ug ni Oliver Cowdery], ni Walter Rane

• Unsa kaha nga mga hunahuna o mga pagbati ang imong masinati sa presensiya sa Ginoo?

Nakita ni Isaias ang Ginoo sa tanan Niyang himaya sa dihang gitawag siya isip propeta. Iya kining girekord nga kasinatian ug gilakip kini ni Nephi sa iyang mga sinulat. (Tan-awa sa Isaias 6 ug 2 Nephi 16.)

Bisan og ang leksiyon gisulat nga ang mga kasulatan basahon sa gagmay nga mga bahin, laing opsiyon mao ang pagdapit sa mga estudyante sa pagbasa sa 2 Nephi 16:1–8 aron sa pagbasa sa dugang nga panan-awon sa makausa.

Basaha ang 2 Nephi 16:1–4, nga mangita kon giunsa paghulagway ni Isaias ang iyang nakita. Tungod kay si Isaias migamit og simbolikong pinulongan sa paghulagway sa iyang kasinatian, ang mosunod nga mga pagpasabot mahimong makatabang:

Ang mosunod nga impormasyon mahimong ipakita o ipasabot ngadto sa klase.

• Kapa: Ang ubos nga bahin sa kupo sa Ginoo, nga mahimong nagsimbolo sa Iyang pagkamatarong, gahom, ug kaputli. Makahuloganon nga nakita kana ni Isaias nga “nakapuno sa templo” (2 Nephi 16:1).

• Serafines: Mga anghel nga nag-alagad sa mga korte sa Dios. Ang mga pako sa serafines maoy simbolo sa ilang gahom sa paglihok o pagbuhat (tan-awa sa Doktrina ug mga Pakigsaad 77:4).

• Aso o Panganod: Kasagaran simbolo sa presensiya sa Dios (tan-awa sa Exodo 19:18; Pinadayag 15:8).

• Unsa nga mga pulong o hugpong sa mga pulong gikan niini nga mga bersikulo ang nakatabang kanimo nga makasabot sa himaya sa Ginoo?

• Unsa kaha sa imong hunahuna ang imong reaksiyon kon nakita nimo kini?

Basaha ang 2 Nephi 16:5 aron mahibaloan ang reaksiyon ni Isaias sa pagkakita sa Ginoo.

Dapita ang mga estudyante sa pagpaambit sa unsay ilang nakaplagan. Kon makatabang, ikonsiderar ang pagpangutana sa mosunod nga mga pangutana:

• Unsa nga mga pulong o hugpong sa mga pulong ang makatabang nimo nga makasabot nga si Isaias nakahibalo sa iyang mga sala ug mga kahuyang?

• Unsa ang pipila ka mga rason nga ang mga tawo karon mobati nga mahugaw o dili takos sa atubangan sa Dios?

  Ang usa ka butang sa leksiyon makatabang sa mga estudyante sa paghunahuna kon unsaon nato paglantaw ang atong kaugalingon samtang kita moduol sa Dios. Ikonsiderar ang pagtandi sa usa ka mahayag nga puti nga panapton sa usa nga nag-yellow na sa paglabay sa panahon, o bisan sa usa ka mas klaro nga hugaw nga panapton. Mahimo usab nimong itandi ang usa ka madulom nga suga ug usa ka hayag kaayo nga suga. Tabangi ang mga estudyante nga makaamgo nga ang kalainan mahimong klaro kon ang duha ka butang gihiusa ug ang usa klaro nga mas limpyo o mas hayag kay sa lain.

• Sa unsang mga paagi nga maayo alang kanato ang pag-ila sa atong mga sayop samtang kita nagpaduol sa Ginoo?

Ang Ginoo andam nga mopasaylo sa atong mga sala

Basaha ang 2 Nephi 16:6–7, nga mangita sa sunod nga nahitabo kang Isaias. Mahimong makatabang ang paghinumdom nga ang mga altar gigamit kaniadto sa pagsimba sa templo.

• Unsaon nimo pag-summarize ang nahitabo?

• Unsa kaha sa imong hunahuna ang gisimbolo niini?

Hunahunaa ang kasinatian ni Isaias diha sa altar ug sa unsang paagi kini makatudlo mahitungod sa kapasayloan sa mga sala ug mahimong limpyo pinaagi sa Pag-ula ni Jesukristo.

• Sa inyong hunahuna sa unsang paagi naapektohan si Isaias sa pagpasaylo sa Ginoo sa iyang mga sala?

• Unsa nga mga kamatuoran ang natabang niini nga mga bersikulo kanimo nga masabtan ang mahitungod sa Ginoo?

Usa ka kamatuoran nga atong makat-onan mao nga ang Ginoo adunay gahom sa paghimo kanato nga limpyo.

Usahay, dili nato mahinumduman ug mabati ang kamahinungdanon niini nga kamatuoran. Si Brother Bradley R. Wilcox sa Kinatibuk-ang Kapangulohan sa Young Men mipaambit sa mga pulong sa usa ka batan-ong lalaki nga iyang gitawag og Damon. Kining batan-ong lalaki mipaambit sa iyang mga hunahuna ug mga pagbati mahitungod sa iyang mga sala.

[Si] Damon misulat: … “Ako kanunay nga mibati og dakong kaulaw nga dili nako mahimo ang mga butang nga maayo. … Ako nakadesisyon nga angayan ra gayod ko nga mobati og dili maayo sa tanang higayon. Akong nahunahunaan nga ang Dios tingali nasilag kanako tungod kay dili ko ganahan nga molihok og maayo aron nga permanenteng mabuntog ang tentasyon. Makahimo ko og usa ka semana ug usahay gani usa ka bulan, apan human niana mobalik na usab ko og dayon maghunahuna, ‘Wala na gayod koy ayo, mao nga unsa man ang kapuslanan sa pagpaningkamot?’” (Bradley R. Wilcox, “Ang Pagkatakos Dili ang Pagkawalay Tatsa,” Liahona, Nob. 2021, 62)

• Ngano kaha nga ang usa ka batan-ong lalaki sama ni Damon nakahunahuna niini?

Hunahunaa nga aduna kay kahigayonan sa pagtabang sa usa ka tawo sama ni Damon. Hunahunaa ang kasinatian ni Isaias. Usab, paghunahuna mahitungod sa unsay imong personal nga nahibaloan mahitungod sa Manluluwas nga mahimo nimong ipaambit. Isulat kon unsay mahimong makatabang. Mahimo ka usab mangita og bisan unsang mga kasulatan o mga pamahayag gikan sa mga lider sa Simbahan nga mahimo nimong magamit sa imong pagpasabot. Ang mosunod nga mga ehemplo mahimong makatabang:

• Isaias 1:18

• Mosiah 26:30

• Ether 12:27

Si Elder Dieter F. Uchtdorf sa Korum sa Napulog Duha ka Apostoles mitudlo:

Ang Dios wala magkinahanglan sa mga tawo nga walay tatsa. Siya nangita niadtong kinsa mohalad sa ilang “kasingkasing ug sa usa ka andam nga hunahuna” [Doktrina ug mga Pakigsaad 64:34], ug Siya mohimo nila nga “hingpit diha ni Kristo” [Moroni 10:32–33]. (Dieter F. Uchtdorf, “Five Messages That All of God’s Children Need to Hear” [Brigham Young University devotional, Ago. 17, 2021], 3, speeches.byu.edu)

Usa ka bag-ong panglantaw

Basaha ang 2 Nephi 16:8 aron makita kon unsa ang gibuhat ni Isaias human malimpyohan sa Ginoo.

• Sa imong hunahuna sa unsang paagi ang kasinatian ni Isaias nga nalimpyohan nakaimpluwensya sa iyang tubag sa bersikulo 8?

Human niini nga panan-awon, si Isaias mahinangpon nga nag-alagad sa Ginoo. Sa misunod nga pipila ka dekada, mitabang siya sa paggiya sa katawhan sa Juda. Ang mga pagtulun-an ug mga sinulat ni Isaias nakadasig sa dili maihap nga mga tawo, ug gikutlo siya sa Manluluwas labaw pa kaysa ubang propeta.

Nausab usab si Damon. Uban sa tabang sa usa ka lider sa Simbahan, si Damon nakaamgo nga ang Ginoo wala magsud-ong kaniya diha sa kasuko nga paghukom apan sa kaluoy, gusto nga motabang kaniya nga molambo. Basaha ang mga pulong ni Damon sa dihang aduna na siyay bag-ong panglantaw bahin sa Dios:

Si Damon miingon: … “Karong mga adlawa naggahin ko og mas gamay nga panahon sa pagkasilag sa akong kaugalingon tungod sa unsay akong nabuhat ug mas daghan pa nga oras sa paghigugma ni Jesus tungod sa kon unsay Iyang gibuhat.” (Bradley R. Wilcox, “Ang Pagkatakos Dili ang Pagkawalay Tatsa,” Liahona, Nob. 2021, 62)

• Sa unsang paagi nga ang pagsinati sa Pag-ula, gugma, ug pagpasaylo sa Manluluwas nakaimpluwensiya sa imong kinabuhi?

Pamalandongi ang mosunod nga pangutana samtang imong taposon ang imong pagtuon niini nga kapitulo:

• Unsa sa imong hunahuna ang imong mahimo aron mas masinati ang gugma ug pagpasaylo sa Manluluwas sa imong kinabuhi?

Komentaryo ug Background nga Impormasyon

2 Nephi 16:1. Kinsa ang nakita ni Isaias?

Sila si Juan ug si Nephi mipamatuod nga ang Ginoo nga nakita ni Isaias mao ang premortal nga si Jesukristo (tan-awa sa Juan 12:41; 2 Nephi 11:2–3). Dugang pa, ang ubang mga propeta nakasaksi sa susamang talan-awon (tan-awa sa Pinadayag 4:1–11; Doktrina ug mga Pakigsaad 110:1–5).

2 Nephi 16:5–8. Nganong gibutangan sa anghel og init nga uling ang mga ngabil ni Isaias?

Sa dihang si Isaias miingon, “Alaot ngari kanako! Kay ako nalaglag ” (2 Nephi 16:5), siya mipahayag nga siya mibati nga dili takos nga maanaa sa presensiya sa Ginoo. Ang uling nga gibutang sa serafines sa mga ngabil ni Isaias nagsimbolo sa pagkaputli, paghinlo, ug pagpasaylo pinaagi ni Jesukristo. Gisultihan usab si Joseph Smith nga ang iyang mga sala napasaylo sa dihang gitawag siya sa Ginoo (tan-awa sa Doktrina ug mga Pakigsaad 20:2, 5–6).

2 Nephi 16:9–10. Unsa ang atong nahibaloan mahitungod sa mga tawo nga si Isaias gitawag aron sa pagsangyaw?

Ang Ginoo misulti ni Isaias nga ang mga tawo kasagaran mosalikway sa iyang mga pulong. Sila miangkon nga nakadungog ug nakakita, apan ilang gipili nga dili dawaton ang espiritu sa mensahe. Si Isaias misangyaw sa mensahe sa Ginoo, naghimo sa mga tawo nga may tulubagon sa unsay ilang nahibaloan apan wala modawat.

Unsaon nako paglikay nga mawad-an og kadasig kon akong mailhan ang akong kahuyang?

Si Sister Michelle D. Craig sa Kinatibuk-ang Kapangulohan sa Young Women miingon:

Kinahanglan natong hangupon ang mga pagbati sa balaan nga pagkawala matagbaw nga nanawagan kanato ngadto sa mas halangdon nga paagi, samtang nagaila ug naglikay sa sinundog ni Satanas—makaparalisar nga pagkawala sa paglaom. … Makapili kita nga maglakaw sa mas halangdon nga dalan nga modala nato sa pagtinguha sa Dios ug sa Iyang kalinaw ug grasya, o mahimong maminaw kita kang Satanas, kinsa kanunayng mopaluya nato og mga mensahe nga dili gayud kita magmalamposon. … Ang atong pagkawala matagbaw mahimong balaan—o makalaglag. (Michelle D. Craig, “Balaan nga Pagkawala Matagbaw,” Liahona, Nob. 2018, 53)

Dugang nga mga Kalihokan sa Pagkat-on

2 Nephi 16:3. Ang tibuok yuta napuno sa himaya sa Ginoo

Aron matabangan ang mga estudyante sa paghisgot sa himaya ni Jesukristo, ikonsiderar ang paghisgot mahitungod Kaniya isip Tiglalang niining matahom nga yuta. Mahimong ipaambit sa mga estudyante kon unsa nga mga artist ang ilang gidayeg ug ipakita ang pipila sa ilang mga sining. Ang mosunod nga pamahayag ni Presidente M. Russell Ballard sa Korum sa Napulog Duha ka Apostoles mahimong gamiton sa paghisgot mahitungod sa unsay gidayeg sa mga estudyante sa mga gilalang sa Dios.

“Kita usahay mobati og dakong pagtahud ug pagyukbo alang sa mamugnaong henyo nga gipahayag sa talagsaong sining o musika. Unsa pa kaha ka gikinahanglan nga kita motahod sa gahom ug kahalangdon sa atong Langitnong Tiglalang?” (M. Russell Ballard, “The Handiwork of God,” New Era, Mar. 2006, 5; tan-awa usab sa M. Russell Ballard, “God’s Love for His Children,” Ensign, Mayo 1988, 58)

2 Nephi 16:8. Samtang kita gilimpyohan sa Ginoo, kita mobati og tinguha sa pag-alagad Kaniya

Human mabasa ang 2 Nephi 16:8 ikonsiderar ang pagpangutana, “Ngano sa imong hunahuna nga ang atong kaandam sa pagbuhat sa unsay gisugo sa Dios kanato molambo samtang kita gipasaylo sa atong mga sala?” Dapita ang mga estudyante sa pagtimbang-timbang sa ilang kaandam sa pagbuhat sa unsay gisugo sa Dios kanila pinaagi sa hilom nga paggrado sa ilang mga kaugalingon sa sukdanan nga 1 hangtod sa 10 (nga ang 10 andam kaayo ug ang 1 dili gusto). Dayon hangyoa sila sa pagpamalandong kon sa unsang paagi nga ang bisan unsa nga sala, kahadlok, o ubang mga rason mahimong makapugong kanila nga mahimong mas andam sa pagbuhat sa unsay gisugo sa Dios kanila.