2 Nephi 12–15

“Mahinabo nga sa Kataposan nga mga Adlaw”

Nabantayan ba nimo nga ang pipila ka mga propeta nagsulti, nagtudlo, o nagsulat sa paagi nga nakatandog sa imong kalag? Alang kang Nephi, kini mao si Isaias. “Kay ang akong kalag nahimuot sa iyang mga pulong,” si Nephi misulat (2 Nephi 11:2). Mahimo usab nga mahimuot ka sa gipadayag sa Ginoo bahin sa kataposang mga adlaw pinaagi ni Isaias. Kini nga leksiyon makatabang kanimo nga makasabot sa simbolikong mga panagna ni Isaias ug mamalandong kon sa unsang paagi kini makatabang kanimo sa imong kinabuhi.

Pagsabot sa simbolismo. Ang simbolo sa ebanghelyo mahimong usa ka butang, panghitabo, aksyon, o pagtudlo nga nagrepresentar sa espirituhanong kamatuoran. Ang mga simbolo makatabang nato nga makasabot sa mga butang sa Dios pinaagi sa paggiya sa atong mga hunahuna ngadto sa mga kamatuoran mahitungod sa plano sa kaluwasan ug sa atong relasyon sa atong Langitnong Amahan ug sa Iyang Anak, si Jesukristo. Kita makakat-on ug makasabot sa kahulugan sa mga simbolo pinaagi sa atong pagtuon ug sa gahom sa Espiritu Santo.

Pagpangandam sa estudyante: Ipunting ang pagtagad sa mga estudyante nga si Nephi misulat og daghang mga kapitulo sa mga panagna ni Isaias ngadto sa iyang kaugalingong rekord ug nga si Isaias migamit og daghang simbolo. Dayon dapita ang mga estudyante sa pagbasa sa 2 Nephi 12:1–3 o 2 Nephi 14:5–6 ug pamalandong kon unsa kaha ang gipasabot niini nga mga bersikulo.

Mga Posibleng Kalihokan sa Pagkat-on

Ang labing maayo ug ang labing bati

Dapita ang pipila ka mga estudyante sa pagpaambit sa ilang mga tubag sa mosunod nga mga pamahayag:

• Ang labing maayong mga butang bahin sa pagkabuhi sa kataposang mga adlaw mao

• Ang labing bati nga mga butang bahin sa pagkabuhi sa kataposang mga adlaw mao

Pamalandongi ang mosunod nga mga pangutana. Mobalik ka niini nga mga pangutana pag-usab sa kataposan sa leksiyon.

• Ngano kaha nga ang Ginoo nagpadayag og mga panalangin ug mga pasidaan bahin sa kataposang mga adlaw ngari kanato?

• Unsa ang gitudlo niana kanimo mahitungod Kaniya?

• Sa unsang paagi nga ang pagkahibalo niini nga mga butang makatabang kanimo?

Tinguhaa ang giya sa Espiritu Santo aron sa pagtabang kanimo sa pagtubag niini nga mga pangutana sa tibuok niini nga leksiyon.

Mga hagit sa atong adlaw

Gipasidan-an kita ni Isaias sa piho nga mga pamatasan ug mga kinaiya sa kataposang mga adlaw. Basaha ang mosunod nga mga hugpong sa mga bersikulo, nga mangita kon unsay gipanagna ni Isaias.

• 2 Nephi 12:7–11 (Pagkahambog nagpasabot sa garbo ug ang kadaotan nagpasabot sa kakuwang sa dignidad o pagka ubos nga tawo.)

• 2 Nephi 13:5, 9, 15–17 (Ang Sodoma maoy usa ka dapit sa pagkadaotan ug imoralidad. Madanihon nagpasabot nga maibogon.)

• 2 Nephi 15:20–23

• Unsay mipatigbabaw alang kanimo?

• Unsa ang pipila ka mga ehemplo niini nga mga butang sa kalibotan karon?

• Ngano nga usa man ka panalangin nga ang Ginoo misulti kanato nga magbantay niini nga mga butang?

Samtang magpadayon ka sa imong pagtuon, pangitaa ang mga panalangin nga gihatag sa Ginoo sa kataposang mga adlaw. Pagpamalandong kon sa unsang paagi kini nga mga panalangin makatabang kanato samtang kita nag-atubang sa mga hagit nga nakita nang daan ni Isaias.

Ikonsiderar ang pagdrowing og yano nga hulagway sa usa ka bukid sa usa ka habig sa pisara nga may pakisayran sa 2 Nephi 12:1–3 sa ubos niini. Sa pikas habig, pagdrowing og hulagway sa panganod ug haligi sa kalayo nga adunay pakisayran sa 2 Nephi 14:5–6. Dapita ang mga estudyante sa pagpili og usa sa mga simbolo ug sa pagbasa sa katugbang nga mga bersikulo. Dayon hangyoa sila sa pagpaambit unsa sa ilang hunahuna ang gipasabot sa mga simbolo ug unsa nga mga baroganan ang ilang makat-onan nga makatabang kanila niining kataposang mga adlaw. Ang mosunod nga impormasyon mahimong makatabang.

Ang bungtod diin ang balay sa Ginoo

Si Isaias migamit og daghang simbolo sa iyang mga panagna. Ang pagpamalandong kon unsay girepresentar niini nga mga simbolo makatabang nimo sa pag-abli sa personal nga kahulugan gikan sa mga kasulatan.

Basaha ang 2 Nephi 12:1–3, nga mangita sa nag-unang simbolo nga gigamit ni Isaias sa pagtudlo unsa ang “mahinabo … sa kataposan nga mga adlaw” (2 Nephi 12:2).

• Unsa sa imong hunahuna ang gipasabot sa “ang bungtod diin ang balay sa Ginoo”? Ngano man?

Mahimong mapuslanon ang pagpamalandong kon ang usa ka simbolo, niini nga kaso usa ka bungtod, nahimong mahinungdanon sa ubang mga kasulatan. Pananglitan, si Moises ug ang ubang mga propeta miadto sa usa ka bungtod aron makaila sa Ginoo ug makadawat og instruksiyon gikan Kaniya (tan-awa sa Exodo 3; 20). Usahay, ang mga bukid adunay katuyoan nga susama sa mga templo.

• Sa unsang paagi nga ang bukid mahisama sa templo?

Pipila ka posible nga mga tubag naglakip nga ang mga bukid ug mga templo makatabang sa pagpalayo kanato gikan sa kalibotan ug makahatag kanato og mas maayong panglantaw. Mahimo usab nga kining duha matahom, makadasig sa pagpamalandong sa kaugalingon, mapunting ang atong mga hunahuna ngadto sa Dios, ug makatabang kanato nga maabli ang atong mga kasingkasing sa pagpadayag.

Uban sa simbolo nga nailhan, basaha pag-usab kini nga mga bersikulo ug pangitaa kon unsay gibuhat sa Ginoo alang kanato sa Iyang balay.

Usa sa mga kamatuoran nga mahimong mahibaloan sa mga estudyante gikan sa 2 Nephi 12:3 mao nga samtang kita nagsimba sa templo, ang Ginoo motudlo kanato sa Iyang mga paagi ug motabang kanato sa paglakaw sa Iyang mga dalan.

• Sa unsang paagi nga ang pagsimba diha sa templo (o pag-andam sa pagsulod sa templo) nakatabang nimo nga makat-on sa mga paagi sa Ginoo o maglakaw sa Iyang mga dalan?

• Sa unsang paagi ang mga templo makatabang kanato samtang nag-atubang kita sa mga hagit sa kataposang mga adlaw?

Usa ka panganod ug kalayo

Si Isaias naghatag og laing panagna. Basaha ang 2 Nephi 14:5–6, nga mangita sa unsay buhaton sa Ginoo alang sa Iyang katawhan. Ang mosunod nga impormasyon mahimong mapuslanon alang kanimo:

•  Ang pinuy-anan usa ka panimalay.

• Ang mga katigoman sa Bukid sa Zion mao ang dapit diin magtagbo ang katawhan sa Ginoo, sama sa mga branch, ward, ug stake.

• Ang tabernakulo sa panahon sa Daang Tugon piho nga nagpasabot sa madaladala nga tolda nga nagsilbing templo sa mga Israelita sulod sa gatosan ka tuig. Kini mahimong magrepresentar sa templo o usa ka dapit sa pagsimba karon.

• Ang tagoanan maoy usa ka dapit nga katagoan o kapuy-an.

• Unsa sa imong hunahuna ang gisimbolo sa panganod sa adlaw ug sa nagdilaab nga kalayo sa gabii?

  Ikonsiderar ang pagpangutana kon makahunahuna ba ang mga estudyante og usa ka dapit sa mga kasulatan diin kini nga mga hulagway importante.

• Sa unsang paagi nga ang panganod ug kalayo importante kang Moises ug sa mga anak sa Israel? (tan-awa sa Exodo 13:21).

• Sa ingon niana nga pagsabot, unsa sa imong hunahuna ang gisaad sa Ginoo nga Iyang buhaton alang sa Iyang katawhan diha sa 2 Nephi 14:5–6?

Ang mga estudyante mahimong makadiskobre og baroganan nga susama sa: Ang Ginoo mogiya ug manalipod kanato samtang magpundok kita sa atong mga panimalay, sa mga kongregasyon sa Simbahan, ug sa mga templo.

Si Elder Ronald A. Rasband sa Korum sa Napulog Duha ka mga Apostoles mihatag og susama nga saad:

Ang atong mga pagpamatuod sa ebanghelyo ni Jesukristo, ang atong mga panimalay, ang atong mga pamilya, ug ang atong pagkamiyembro sa Ang Simbahan ni Jesukristo sa mga Santos sa Ulahing mga Adlaw mahimong atong personal nga mga kuta sa pagpanalipod nga nagpalibot kanato ug nanalipod kanato batok sa gahom sa dautan.(Ronald A. Rasband, “Magtukod og Kuta sa Pagkaespirituhanon ug Proteksiyon,” Liahona, Mayo 2019, 110)

• Sa unsang paagi nga ang imong panimalay, ward, o branch o ang templo nahimong dapit sa espirituhanong proteksiyon ug dangpanan alang kanimo?

• Sa unsang paagi kini nga mga saad makatabang kanato samtang nag-atubang kita sa mga hagit sa kataposang mga adlaw?

Ang mga pulong ni Isaias sa imong kinabuhi

Paggahin og panahon sa pagtubag sa tulo ka mga pangutana nga imong gipamalandong sa sinugdanan sa leksiyon. Ikonsiderar ang pagsulat diha sa imong journal sa pagtuon kon unsay imong nakat-onan mahitungod sa Ginoo ug sa unsang paagi kini nga mga panagna makatabang kanimo. Mahimo nimong iapil ang batasan o mga kinaiya nga gusto nimong likayan, ingon man ang mga paagi nga mahimo kang mangayo og espirituhanong tabang gikan sa Ginoo sa imong panimalay, ward, o branch o sa templo.

Komentaryo ug Background nga Impormasyon

Sa unsang paagi nga ang mga panagna ni Isaias natuman karon?

Si Presidente Gordon B. Hinckley (1910–2008) mitudlo:

Sukad mapahinungod ang Templo sa Salt Lake, atong gihubad kana nga kasulatan sa Isaias, gisubli pag-usab sa Miqueas (tan-awa sa Miqueas 4:1–2), alang niining sagrado nga balay sa Ginoo. Ug bahin niining dapita, sukad sa adlaw sa pagpahinungod niini, ang nagkadugang nga gidaghanon gikan sa laing dapit sa kalibotan miingon, “Umari kamo, ug mangadto kita sa bukid sa Ginoo, ngadto sa balay sa Dios ni Jacob; ug Siya magatudlo kanato sa Iyang mga dalan, ug kita magalakaw sa Iyang mga alagianan.”

Ako nagtuo ug mopamatuod nga misyon niini nga simbahan nga mobarog isip usa ka bandila ngadto sa mga nasod ug usa ka kahayag ngadto sa kalibotan. Gihatag ngari kanato ang usa ka dako, malukpanon nga mando diin dili kita makaatras ni makalikay.Atong gidawat kana nga mando ug determinado sa pagtuman niini, ug uban sa tabang sa Dios kita mobuhat niini.” (Gordon B. Hinckley, “Usa ka Bandila ngadto sa mga Nasod, usa ka Kahayag ngadto sa Kalibutan,” Liahona, Nob. 2003, 82–83)

Dugang nga mga Kalihokan sa Pagkat-on

Si Nephi mitabang kanato nga makasabot ni Isaias

Sa ulahing kapitulo, si Nephi mitudlo og mga kahanas nga makatabang sa mga estudyante nga makasabot sa mga pulong ni Isaias:

• 2 Nephi 25:5—Mahimong pamilyar sa “mga matang sa mga butang sa mga Judeo.” Mahimong maglakip kini og simbolismo sa Balaod ni Moises o Levitical nga mga ordinansa sa pagkapari, mga tradisyon, kasaysayan, ug mga estilo sa literatura.

• 2 Nephi 25:3, 6—Mahimong pamilyar ug pangita “sa mga paghukom sa Dios, nga [nahinabo] taliwala sa mga Judeo. ”Si Nephi, sa dihang nakig-istorya sa iyang mga igsoong lalaki, mihatag og daghang mga ehemplo niini. Tan-awa sa 1 Nephi 4:2–3; 17:23–34, 40–43. Ilha nga ang mga paghukom sa Dios mahimong maglakip sa posible nga katumanan sa panagna, sa karaan ug sa moderno nga mga panahon.

• 2 Nephi 25:4—Pagkahimo nga “napuno sa espiritu sa panagna.” Sa Pinadayag 19:10, atong makat-onan nga “ang pagpanghimatuod ni Jesus mao ang espiritu sa propesiya.”

• 2 Nephi 25:6—Pagtuon bahin sa Jerusalem ug sa “mga dapit nga nag-alirong niini.” Kining geograpikanhon ug politikanhong kahibalo sa dapit nakatabang ni Nephi nga makakita og kahulugan sa mga pulong ni Isaias.

• 2 Nephi 25:7—“Niana nga mga adlaw nga ang mga panagna ni Isaias matuman ang mga tawo masayod sa pagkatinuod.” Samtang nagkat-on ka pinaagi sa pagtuon ug pinaagi sa hugot nga pagtuo (tan-awa sa Doktrina ug mga Pakigsaad 88:118), ang Ginoo motabang kanimo sa pag-ila kanus-a ug sa unsang paagi kini nga mga panagna matuman.

Mga ideya sa paghisgot sa mga pasidaan sa kataposang mga adlaw

Ang garbo sa kataposang mga adlaw: 2 Nephi 12:6–12, 17. Ang Ginoo balik-balik nga mipasidaan sa Iyang katawhan sa garbo. Dapita ang mga estudyante sa pagpangita og mga simbolo sa garbo ug itandi kini nga mga bersikulo sa unsay gitudlo sa Manluluwas sa Iyang mga disipulo sa Lucas 14:11.

Pagdumili sa pag-atiman sa mga kabos ug timawa: 2 Nephi 13:13–15. Dapita ang mga estudyante sa paghisgot sa simbolismo sa bersikulo 15. Unsay ilang mahimo sa pag-atiman sa mga kabos, bisag ang kabos nga ilang nailhan mao lamang kadtong mga kabos sa espirituwal nga mga butang?

Pagkamapagarbohon sa mga anak nga babaye sa Zion: 2 Nephi 13:16–26. Bisan tuod pihong gigamit ni Isaias ang hugpong sa mga pulong nga “ang anak nga mga babaye sa Zion” (bersikulo 16), ang iyang mga pulong mahimong magamit kanatong tanan.

Si Isaias migamit og alahas, sinina, ug ubang mga simbolo sa paghulagway sa mga batasan ug kinaiya sa anak nga mga babaye sa Zion ug sa pagbadlong ug pagpasidaan kanila mahitungod sa mga paghukom nga moabot isip resulta sa ilang pagkamapagarbohon. Sa unsang paagi nga ang kaligdong sa tanang aspeto sa atong kinabuhi makatabang kanato sa pagrepresentar sa Ginoo ug sa pagdala sa uban ngadto Kaniya?

Dugang panalangin nga gitagna sa Ginoo

Usa ka bandila ngadto sa mga kanasoran: 2 Nephi 15:26. Ang bandila [ensign] usa ka bandera, bandila, o sumbanan nga kasagarang gigamit sa pag-ila sa mga yunit sa militar, barko, o mga nasod. Unsa ang gipataas sa Ginoo “ngadto sa layo nga mga kanasoran” nga makapahimo kanila nga magpundok ubos sa usa ka nahiusang titulo o ngalan?