2 Нифай 27

“Ер бусын үйл мөн гайхамшиг”

Ер бусын гэж тооцох үйл явдлуудыг мөн эдгээр нь танд болон эргэн тойрны хүмүүст тань хэрхэн нөлөөлсөн талаар бод. Есүс Христ хожмын өдрүүдэд дэлхий дээр Өөрийн сайн мэдээг, тэр дундаа Мормоны Номыг сэргээх ер бусын үйл гүйцэтгэнэ хэмээн амласан. Энэ хичээл танд дэлхий дээр Мормоны Номыг сэргээж буй Их Эзэнд гүнээ талархаж байгаагаа мэдрэхэд тань тусална.

Сүнсээр заах нь. Ямар ч багш хэчнээн ур чадвар, туршлагатай байсан ч Сүнсийг орлох нь үгүй. Гэхдээ бид хүүхдүүддээ Сүнсээр суралцахад нь туслах Бурханы мутар дахь зэмсэг болж чадна. Ерөнхийлөгч Хэнри Б.Айринг заахдаа “Суралцагчид маань Ариун Сүнсээр заалгахгүй бол Бурханыг болон хайр гэж юу болохыг мэдэх боломжгүй. Учир нь тэд хайрлах ёстой” гэжээ (“The Importance of the Holy Ghost,” Old Testament Seminary Teacher Material [2018], ChurchofJesusChrist.org).

Суралцагчийн бэлтгэл: Суралцагчдыг өөрсдийнх нь төлөө ямар нэгэн ер бусын зүйл хийсэн хүн эсвэл тэдний таньдаг хэн нэгний талаар хуваалцахаар бэлдэж ирэхийг урь. Жишээлбэл: Тэднийг аюултай нөхцөл байдлаас аварсан эсвэл тэдэнд сайхан бэлэг өгсөн ямар ч хүн байж болох юм.

Боломжит суралцах үйл ажиллагаа

Ямар нэгэн ер бусын зүйл

Суралцагчдыг дараах зүйлийг хуваалцахаар бэлтгэхийн тулд таны төлөө ер бусын эсвэл ач холбогдолтой гэж санагддаг зүйл хийсэн хүний талаар хуваалцаж болно.

Таны төлөө ер бусын зүйл хийсэн эсвэл таньдаг хэн нэгнийхээ талаар бод.

• Энэ хүн юу хийсэн бэ?

• Үүнийг хийсэн хүний талаар танд ямар сэтгэгдэл төрдөг вэ? Яагаад?

2 Нифай 27-д Их Эзэн бидэнд эцсийн өдрүүдийн ёс бус байдал, урвалтыг даван туулахад маань туслахын тулд ямар нэгэн ер бусын зүйл хийх болно гэдгээ гэрчилсэн. Суралцах явцдаа таны сурч мэдсэн зүйл Их Эзэний талаар юу гэж боддогт тань хэрхэн нөлөөлж байгааг тунгаан бод.

2 Нифай 27:25–26-г уншаад, Их Эзэний хийнэ гэж амласан зүйлийг олж мэд.

“Ер бусын үйл мөн гайхамшиг” нь ямар утгатай үг гэж бодож байгаагаа хуваалцахад суралцагчдыг урь. Шаардлагатай бол ерөнхийлөгч Рассэлл М.Нэлсоны дараах тайлбарыг хуваалц.

Ерөнхийлөгч Рассэлл М.Нэлсон энэхүү “ер бусын ажилд Мормоны Ном ирсэн нь мөн сайн мэдээний Сэргээлтийг багтаах болно” гэж хэлсэн (“Scriptural Witnesses,” Liahona, Nov. 2007, 46).

Бидний энэ бошиглолоос сурч мэдэж болох нэг үнэн гэвэл Мормоны Ном ирснээр болон сайн мэдээ сэргэснээр Их Эзэн ер бусын үйл мөн гайхамшгаа гүйцэтгэсэн явдал юм.

• Та Мормоны Ном, сэргээгдсэн сайн мэдээний талаар тэднийг “ер бусын” гэж нэрлэхэд хүргэсэн юуг мэдэх вэ?

Мормоны Ном: Ер бусын үйл мөн гайхамшиг

2 Нифай 27-ийн ихэнх хэсэг Мормоны Ном ирсэн дээр төвлөрсөн байдаг. Энэ бүлгээс илүү ихийг судлахаасаа өмнө Мормоны Номын талаарх сэтгэгдлээ тунгаан бодох цаг гарга. Таны хувьд энэ нь ер бусын зүйл мөн үү? Яагаад тийм эсвэл яагаад үгүй вэ? Танд ямар асуулт байна вэ? Суралцах явцдаа Мормоны Номыг “ер бусын үйл мөн гайхамшиг” гэж илүү тодорхой харахад тань туслах сургаалуудыг олж мэд.

Дараах хураангуйд жагсаасан шүлгүүдийг ангиараа унших нь тустай байж болно.

Нифай Мормоны Ном эцсийн өдрүүдийн асуудлуудад туслахаар гарч ирнэ гэж бошиглосон (2 Нифай 27:6-г үзнэ үү). Бурхан Мормоны Номыг орчуулсан ялтаснуудыг харж мөн энэ ном үнэн болохыг дэлхийд гэрчлэхийг цөөхөн гэрчид зөвшөөрнө гэж тэр бичжээ (2 Нифай 27:12–14-ийг үзнэ үү). Дараа нь Нифай Мормоны Номын орчуулгатай холбоотой зарим дэлгэрэнгүй мэдээллийн талаарх бошиглолоо хуваалцсан.

Суралцагчдад дараах хүснэгтийг үзүүл эсвэл тарааж өг. Суралцагчид хоёр хоёроороо эсвэл жижиг бүлэгт хуваарилагдан шүлгүүдийг судалж, хүснэгтийг бөглөж болно.

	Хүн юу хийж болох тухай бошиглол (2 Нифай 27:15–19)	Бошиглолыг биелүүлсэн хүний нэр (Иосеф Смит—Түүх 1:63–65)
Нэг дэх хүн (“суралцаагүй”)
Хоёр дахь хүн (“нөгөө хүн”)
Гурав дахь хүн (“эрдэмт хүн”)

Суралцагчдад суралцах хангалттай цаг гаргаж өгсний дараа сайн дураараа сурч мэдсэн зүйлээ хуваалцахад суралцагчдыг урь. Энэ ярилцлагын нэг хэсэг болгон дараах асуултуудаас асуу.

• Их Эзэн яагаад Мормоны Номыг авчрахын тулд боловсролгүй байсан Иосеф Смитийг ашигласан гэж та бодож байна вэ?

2 Нифай 27:20–23-ыг уншаад, Бурхан яагаад Мормоны Номыг орчуулж сураагүй хүнийг сонгосон шалтгааныг хайж ол.

• Та эдгээр шүлгээс Их Эзэний талаар юу мэдэж авсан бэ? Түүний тухай эдгээр зүйлийг мэдэх нь танд хэрхэн нөлөөлөх вэ?

• Мормоны Ном ирсэн нь Их Эзэний “Би өөрийнхөө ажлыг хийж чадна” гэсэн мэдэгдлийг хэрхэн нотлох вэ? (21-р шүлэг).

Дараах мэдэгдлээс гадна “Тайлбар ба нөхцөл байдлын тухай мэдээлэл” хэсэг дээрх ерөнхийлөгч Рассэлл М.Нэлсоны мэдэгдлийг хуваалц.

Бошиглогчийн эхнэр Эмма Смит (1804–1879) Мормоны Номыг орчуулахдаа Иосефын хүлээн авсан тэнгэрлэг тусламжийн талаар ийн гэрчилсэн.

Иосеф Смит Мормоны Ном мэт ном байтугай ойлгомжтой, сайн найруулгатай захидал ч бичиж эсвэл хэлж бичүүлж чаддаггүй байсан. Уг үйл явдалд оролцсон надад ч бас ер бусын, гайхалтай санагддаг.” …

Мормоны Ном бол бурханлаг чанартай гэдэгт би баттай итгэдэг бөгөөд үүнд огтхон ч эргэлзэж байгаагүй. … Мэдлэгтэй хүн хүртэл үүнийг хийж чадахгүй байх байсан. Түүн шиг мэдлэг, боловсролгүй хүний хувьд энэ нь боломжгүй зүйл байлаа. (Emma Smith, in “Last Testimony of Sister Emma,” The Saints’ Herald, Oct. 1, 1879, 290)

• Өнөөдөр сурч мэдсэн зүйл дээрээ үндэслэвэл Мормоны Номын ирсэн нь хэрхэн “ер бусын үйл мөн гайхамшиг” болох вэ?

• Их Эзэн бидэнд энэ адислалыг хүртээсэн гэдгийг мэдэх нь Түүний тухай бодох бодолд тань хэрхэн нөлөөлж байна вэ?

• Танд болон бусдад Мормоны Ном ер бусын болохыг харуулсан ямар туршлага байна вэ?

Өмнөх асуултуудын ярилцлагын нэг хэсэг болгон дараах видеонуудыг эсвэл хувийн туршлагаасаа хуваалцаж болно.

Мормоны Ном хэр ер бусын болохыг харахын тулд “Мормоны Ном: Үүнгүйгээр таны амьдрал ямар байх байсан бэ?” видеог цагийн код 5:38-аас 11:26 хүртэл үзнэ үү. Энэ видеог олох боломжтой ChurchofJesusChrist.org.

Хичээлийн эхэнд танаас Мормоны Номын талаарх бодлыг тань асуусан. Таны өнөөдөр судалсан үнэнүүдийн аль нэг нь энэхүү ариун номын гэрчлэлд тань нөлөөлсөн эсэхийг бодож үз. Судлах тэмдэглэл дээрээ өөрийн хүлээн авсан аливаа бодол, сэтгэгдэл, мөн танаас хийхийг уриалсан ирээдүйд хийх үйлдэл зэргийг тэмдэглэж бич.

Зарим суралцагчийг хичээлийн туршид ойлгож авсан утга учиртай бодол эсвэл ойлголтоо сайн дураараа хуваалцахад урь. Өнөөдрийн ярилцсан үнэнүүдийнхээ талаар гэрчил.

Тайлбар ба нөхцөл байдлын тухай мэдээлэл

Мормоны Ном ирсэн явдлыг хэрхэн ер бусын үйл мөн гайхамшигт зүйлд тооцож болох вэ?

Ерөнхийлөгч Рассэлл М.Нэлсон ийн заасан.

Иосеф Мормоны Номыг маш богино хугацаанд орчуулсан тухай бодоод үз. 1828 оны 4-р сараас 6-р сар хүртэл Иосеф хожим нь Мартин Харрисын алдсан 116 хуудсыг орчуулсан. Иосеф 1829 оны 4-р сарын 7-ны мягмар гаргаас эхлэн бичээч Оливер Каудерийн хамт дахин орчуулж эхэлжээ. Уг гар бичмэлийг 85 өдрийн дараа буюу тэр жилийнхээ 6-р сарын 30-нд дуусгасан байв. Мэдээж хэрэг, энэ үед дан ганц орчуулгын ажлыг хийгээгүй нь лавтай. Бошиглогч, бичээч хоёр хооллох, унтах, ажил хайх, Аароны болон Мелкизедек санваарыг хүлээн авах, гучин милийн зайд орших Колесвилл руу дор хаяж нэг (болон магадгүй хоёр) удаа аялал хийх, одоо Сургаал ба Гэрээний хэсэг болсон арван гурван илчлэлтийг хүлээн авах, бүртгэх, Хармонигаас Файетте руу нүүх, Мормоны Номын зохиогчийн эрхийг олж авах, Мормоны Номыг хэвлүүлэх ажлыг зохион байгуулах зэрэгт мөн цаг гаргаж байсан. Барагцаалан тооцвол, бошиглогч, бичээч хоёр одоогийн хувилбараар 531 хуудас бүхий энэхүү номыг 65 ба үүнээс ч бага өдөрт орчуулсан байна. (John W. Welch, Ensign, Jan. 1988, pp. 46–47-г үзнэ үү.) Тооцоолж үзвэл, дунджаар өдөрт найман хуудас орчуулж байсан байна. Та ямар нэгэн ном орчуулахдаа эсвэл Мормоны Номыг унших хуваариа төлөвлөхдөө үүнийг бодолцож үзээрэй. (Russell M. Nelson, “A Treasured Testament,” Ensign, July 1993, 61–62)

Арван хоёр төлөөлөгчийн чуулгын ахлагч Үлиссэс Соарэс ийн гэрчилжээ.

Мормоны Номын орчуулгын үйл явц бас … гайхамшиг байсан. Энэхүү эртний ариун нандин цэдгийг эрдэмтдийн эртний хэл сурч, эртний бичвэр орчуулдаг уламжлалт аргаар “орчуулаагүй” байв. Бид энэ үйл явцыг хэлний мэдлэгтэй хүн “орчуулсан” гэж биш, харин Их Эзэнээс хангаж өгсөн хэрэгслүүдийн тусламжтай бий болсон “илчлэлт” хэмээн харах ёстой. … Иосеф Смит ялтаснуудыг гайхамшигтай богино хугацаанд орчуулсныг авч үзвэл, тэдгээрийг орчуулахад Их Эзэн тусалсан нь тодорхой харагддаг. (Үлиссэс Соарэс, “Мормоны Ном ирсэн нь,” 2020 оны 4-р сарын Ерөнхий чуулган, 37)

 

Христийн сэргээгдсэн Сүмийн мөн сайн мэдээний юу нь ер бусын бэ?

“Дэлхий дахинаа өргөх хоёр зуун жилийн ойн тунхаг” видеог цагийн код 2:41-өөс 9:13 хүртэл үз эсвэл “Есүс Христийн сайн мэдээний бүрэн байдлын Сэргээлт: Дэлхий дахинаа өргөх хоёр зуун жилийн ойн тунхаг”-ийг уншиж (ChurchofJesusChrist.org), Христийн сэргээгдсэн Сүмийн, мөн сайн мэдээний юу нь ер бус болохыг олж мэд.

Нэмэлт суралцах үйл ажиллагаа

Үйл ажиллагааг тайлбарлах

Суралцагчдыг 2 Нифай 27:1–5 дээр дүрсэлсэн нөхцөлүүдийг 2 Нифай 27:29–31, 35 дээрх Их Эзэний амлалтуудтай харьцуулахыг урь. Суралцагчдад Мормоны Номын талаар, мөн сэргээгдсэн сайн мэдээний дэлхийд үзүүлсэн нөлөөний талаар бодоход нь туслахын тулд тэднийг дараах нөхцөл байдлаас аль нэгийг нь сонгоход урь (2 Нифай 27:1–5-аас тохируулсан). Суралцагчид сонгосон аль ч нөхцөл байдалдаа тусалж чадна гэж бодсон Мормоны Номын хэсэгт заасан үнэнийг олж болно.

• Тогтворгүй эсвэл донтолттой хэн нэгэн

• Амьдралын шуурганаас хамгаалах байр хэрэгтэй байгаа хэн нэгэн

• Сүнслэг байдлын өлсгөлөн, цангаагаа тайлах хэрэгтэй байгаа хэн нэгэн

• Илүү тодоор харах хэрэгтэй байгаа хэн нэгэн

Жишээлбэл: Алма 7:11–13-т заасан Аврагч ойлгодог бөгөөд ямар ч уруу таталтыг даван туулахад тусалж чадна гэсэн үнэн донтолттой хэн нэгэнд тусалж болох юм.

Суралцагчдыг олж мэдсэн зүйлээ хуваалцахад урь.

2 Нифай 27:15–19. Боловсролгүй хүний талаарх бошиглолын биелэл

2 Нифай 27:15–19 дээрх бошиглолын биеллийн талаар илүү ихийг сурахад суралцагчдад туслахын тулд “Ер бусын үйл мөн гайхамшиг” (5:46) видеог үзүүл. Та мөн энэ талаар Гэгээнтнүүд: Хожмын Үеийн Есүс Христийн Сүмийн түүх, 1-р боть, Үнэний жишиг, 1815–1846 (2018), 44-48 зэргээс хамтдаа уншиж болно.