2 Nephi 27

“Isang Kagila-gilalas at Kamangha-manghang Gawain”

Mag-isip ng mga pangyayaring ituturing mong kagila-gilalas at kung paano nakaapekto sa iyo at sa mga tao sa paligid mo ang mga pangyayaring ito. Nangako si Jesucristo na isasagawa ang kagila-gilalas na gawain ng pagpapanumbalik ng Kanyang ebanghelyo sa mundo, kabilang na ang Aklat ni Mormon, sa mga huling araw. Ang lesson na ito ay makatutulong sa iyo na makadama ng higit na pasasalamat sa Panginoon para sa pagpapanumbalik ng Aklat ni Mormon sa mundo.

Pagtuturo sa pamamagitan ng Espiritu. Walang mortal na guro, gaano man siya kagaling o kahusay, na maaaring pumalit sa Espiritu. Ngunit maaari tayong maging mga kasangkapan sa mga kamay ng Diyos upang tulungan ang Kanyang mga anak na matuto sa pamamagitan ng Espiritu. Itinuro ni Pangulong Henry B. Eyring, “Hindi magagawang makilala ng ating mga estudyante ang Diyos, at hindi rin nila magagawang magmahal kung paano nila kailangang magmahal, maliban kung sila ay tinuruan ng Banal na Espiritu” (“The Importance of the Holy Ghost,” Old Testament Seminary Teacher Material [2018], ChurchofJesusChrist.org).

Paghahanda ng estudyante: Sabihin sa mga estudyante na pumasok na handang magbahagi tungkol sa isang tao na nakagawa ng isang bagay na kagila-gilalas para sa kanila o para sa isang taong kakilala nila. Halimbawa, marahil ay may nagligtas sa kanila mula sa mapanganib na sitwasyon o nagbigay sa kanila ng maganda at mamahaling regalo.

Mga Posibleng Aktibidad sa Pag-aaral

Isang kagila-gilalas na bagay

Upang maihanda ang mga estudyante na ibahagi ang sumusunod, maaari kang magbahagi tungkol sa isang taong gumawa ng isang bagay para sa iyo na itinuturing mong kagila-gilalas o mahalaga.

Mag-isip ng isang taong gumawa ng isang bagay na kagila-gilalas para sa iyo o para sa isang taong kakilala mo.

• Ano ang ginawa ng taong ito?

• Ano ang nadama mo tungkol sa taong gumawa nito? Bakit?

Sa 2 Nephi 27, nagpatotoo ang Panginoon tungkol sa isang kagila-gilalas na bagay na gagawin Niya upang tulungan tayong madaig ang kasamaan at apostasiya sa mga huling araw. Habang nag-aaral ka, isipin kung paano nakaapekto ang natututuhan mo sa nadarama mo tungkol sa Panginoon.

Basahin ang 2 Nephi 27:25–26, at alamin ang ipinangako ng Panginoon na gagawin Niya.

Sabihin sa mga estudyante na ibahagi kung ano sa palagay nila ang tinutukoy ng “kagila-gilalas at kamangha-manghang gawain.” Kung kinakailangan, ibahagi ang sumusunod na paliwanag mula kay Pangulong Russell M. Nelson.

Ipinahayag ni Pangulong Russell M. Nelson na “kasama sa kagila-gilalas na gawaing iyon ang paglabas ng Aklat ni Mormon at Pagpapanumbalik ng ebanghelyo” (“Mga Saksi sa mga Banal na Kasulatan,” Liahona, Nob. 2007, 46).

Ang isang katotohanan na matututuhan natin mula sa propesiyang ito ay isinagawa ng Panginoon ang isang kagila-gilalas at kamangha-manghang gawain sa pamamagitan ng paglabas ng Aklat ni Mormon at Pagpapanumbalik ng Kanyang ebanghelyo.

• Ano ang nalalaman mo tungkol sa Aklat ni Mormon at sa ipinanumbalik na ebanghelyo na maaaring maging dahilan upang tukuyin mo ang mga ito bilang “kagila-gilalas”?

Ang Aklat ni Mormon: Isang kagilas-gilas at kamangha-manghang gawain

Malaking bahagi ng 2 Nephi 27 ay nakatuon sa paglabas ng Aklat ni Mormon. Bago pag-aralan nang lubos ang kabanatang ito, isipin sandali ang sarili mong nadarama tungkol sa Aklat ni Mormon. Kagila-gilalas ba ito para sa iyo? Bakit oo o bakit hindi? Ano ang mga tanong mo? Sa iyong pag-aaral, maghanap ng mga turo na makatutulong sa iyo na mas malinaw na makita ang Aklat ni Mormon bilang isang “kagila-gilalas at kamangha-manghang gawain.”

Maaaring makatulong na basahin nang sabay-sabay bilang isang klase ang mga talatang nakalista sa sumusunod na buod.

Ipinropesiya ni Nephi na darating ang Aklat ni Mormon upang tumulong sa paglutas sa mga problema sa mga huling araw (tingnan sa 2 Nephi 27:6). Isinulat din niya na pahihintulutan ng Diyos ang ilang saksi na makita ang mga lamina ng Aklat ni Mormon, at patotohanan ang katotohanan ng aklat sa mundo (tingnan sa 2 Nephi 27:12–14). Pagkatapos ay nagbahagi si Nephi ng isang propesiya tungkol sa ilan sa mga detalyeng nauugnay sa pagsasalin ng Aklat ni Mormon.

Maaari mong bigyan ang mga estudyante ng sumusunod na chart o ipakita ito. Magagawa ng mga estudyante na pag-aralan ang mga talata at punan ang chart nang magkakapartner o sa maliliit na grupo.

	Propesiya tungkol sa dapat gawin ng lalaki (2 Nephi 27:15–19)	Ang pangalan ng lalaking tumupad sa propesiya (Joseph Smith—Kasaysayan 1:63–65)
Unang lalaki (“hindi marunong”)
Pangalawang lalaki (“ibang tao”)
Pangatlong lalaki (“marunong”)

Matapos ang sapat na oras na makapag-aral ang mga estudyante, sabihin sa ilang boluntaryo na ibahagi ang natutuhan nila. Maaari mong itanong ang sumusunod bilang bahagi ng talakayang ito.

• Sa iyong palagay, bakit ginamit ng Panginoon si Joseph Smith, na isang taong hindi marunong, upang ilabas ang Aklat ni Mormon?

Basahin ang 2 Nephi 27:20–23, at alamin ang mga dahilan kung bakit pinili ng Diyos ang isang taong hindi marunong upang isalin ang Aklat ni Mormon.

• Ano ang nalaman mo tungkol sa Panginoon mula sa mga talatang ito? Paano makakaimpluwensya sa iyo ang mga bagay na ito na nalaman mo tungkol sa Kanya?

• Paanong naging katibayan ang paglabas ng Aklat ni Mormon sa pahayag ng Panginoon na “May kakayahan akong gawin ang aking sariling gawain”? (talata 21).

Bukod pa sa sumusunod na pahayag, maaari mong ibahagi ang pahayag ni Pangulong Russell M. Nelson sa bahaging “Komentaryo at Pinagmulang Impormasyon.”

Si Emma Smith (1804–1879), ang asawa ng Propeta, ay nagpatotoo tungkol sa banal na tulong na natanggap ni Joseph sa kanyang pagsasalin ng Aklat ni Mormon:

Si Joseph ay hindi makasulat ni makadikta ng malinaw at maayos na liham; lalo na ang makadikta ng isang aklat na gaya ng Aklat ni Mormon. At, bagama’t naging bahagi ako ng mga nangyari, … kagila-gilalas ito sa akin, “kagila-gilalas at kamangha-mangha.” …

Naniniwala ako na ang Aklat ni Mormon ay totoong galing sa Diyos—wala ako ni katiting na pagdududa tungkol dito. … Imposible itong magawa ng isang taong may pinag-aralan; at, para sa isang taong napakaignorante at walang pinag-aralan na tulad niya, imposible talaga. (Emma Smith, sa “Last Testimony of Sister Emma,” The Saints’ Herald, Okt. 1, 1879, 290)

• Batay sa natutuhan mo ngayon, paano naging “kagila-gilalas at kamangha-manghang gawain” ang paglabas ng Aklat ni Mormon?

• Paano nakakaapekto sa nadarama mo tungkol sa Panginoon ang kaalamang binigyan Niya tayo ng pagpapalang ito?

• Ano ang mga naranasan mo o ng ibang tao na nagpapakita kung gaano kagila-gilalas ang Aklat ni Mormon?

Maaari kang magbahagi ng isang personal na karanasan o ng sumusunod na video bilang bahagi ng iyong talakayan tungkol sa mga naunang tanong.

Upang makita kung gaano kagila-gilalas ang Aklat ni Mormon, maaari mong panoorin ang “Ang Aklat ni Mormon: Ano Kaya ang Buhay Ninyo Kung Wala Ito?” mula sa time code na 5:38 hanggang 11:26. Ang video na ito ay matatagpuan sa ChurchofJesusChrist.org.

Sa simula ng lesson, hiniling sa iyo na isipin ang nadarama mo tungkol sa Aklat ni Mormon. Isipin kung naapektuhan ng alinman sa mga katotohanang napag-aralan mo ngayon ang iyong patotoo tungkol sa sagradong aklat na ito. Sa iyong study journal, itala ang anumang saloobin o impresyon na natanggap mo, gayundin ang mga gagawin mo sa hinaharap na nadama mong dapat mong gawin.

Maaari mong anyayahan ang ilang boluntaryo na magbahagi ng mga makabuluhang ideya o natutuhan nila sa oras ng lesson. Patotohanan ang mga katotohanang tinalakay mo ngayon.

Komentaryo at Pinagmulang Impormasyon

Paano naging kagila-gilalas at kamangha-manghang gawain ang paglabas ng Aklat ni Mormon?

Itinuro ni Pangulong Russell M. Nelson:

Isipin ang maikling panahon na ginugol ni Joseph sa pagsasalin ng Aklat ni Mormon. Gumawa mula Abril hanggang Hunyo ng 1828, isinalin ni Joseph ang 116 na pahina na nawala kalaunan ni Martin Harris. Si Joseph ay nagsimulang magsaling muli noong Martes, Abril 7, 1829, kasama si Oliver Cowdery bilang tagasulat. Ang manuskrito ay natapos pagkalipas ng walumpu’t limang araw, noong Hunyo 30 ng taong iyon. Siyempre, hindi lahat ng oras na iyon ay ginugol sa pagsasalin. Ang Propeta at ang kanyang mga tagasulat ay naglaan din ng oras upang kumain, matulog, maghanap ng trabaho, tanggapin ang mga Aaronic at Melchizedek priesthood, maglakbay nang isang beses (at marahil dalawang beses) patungo sa Colesville tatlumpung milya ang layo, tumanggap at magtala ng labintatlong paghahayag na ngayon ay mga bahagi ng Doktrina at mga Tipan, lumipat sa Fayette mula Harmony, kumuha ng copyright ng Aklat ni Mormon, at simulang isaayos ang paglalathala ng Aklat ni Mormon. Sa konserbatibong pagtatantiya, animnapu’t limang araw o mas kaunti ang mga natirang araw ng paggawa kung saan isinalin ng propeta at ng kanyang mga tagasulat ang aklat na ito, na naglalaman ng 531 pahina sa kasalukuyang edisyon nito. (Tingnan sa John W. Welch, Ensign, Ene. 1988, p. 46–47.) Tinatayang iyon ay may average na walong pahina bawat araw. Pag-isipan ito kapag nagsasalin ka ng isang aklat, o kapag nag-iiskedyul ka ng sarili mong pagbabasa ng Aklat ni Mormon. (Russell M. Nelson, “A Treasured Testament,” Ensign, Hulyo 1993, 61–62)

Pinatotohanan ni Elder Ulisses Soares ng Korum ng Labindalawang Apostol:

Ang proseso ng pagsasalin ng Aklat ni Mormon ay … himala. Ang sagradong sinaunang talaang ito ay hindi “isinalin” sa tradisyonal na paraan na tulad ng pagsasalin ng mga iskolar sa sinaunang mga teksto sa pamamagitan ng pag-aaral ng isang sinaunang wika. Dapat nating mas ituring ang proseso na isang “paghahayag” sa tulong ng pisikal na mga kasangkapang inilaan ng Panginoon, kaysa isang “pagsasalin” ng isang taong may kaalaman sa mga wika. … Maliwanag ding makikita ang tulong ng Panginoon sa pagsasalin ng mga lamina—o paghahayag, ika nga—kung iisipin ang mahimalang ikli ng panahon na ginugol ni Joseph sa pagsasalin nito. (Ulisses Soares, “Ang Paglabas ng Aklat ni Mormon,” Liahona, Mayo 2020, 33)

 

Ano ang kagila-gilalas tungkol sa Pagpapanumbalik ng Simbahan at ebanghelyo ni Cristo?

Panoorin ang “Isang Proklamasyon sa Mundo para sa Ika-200 Taong Anibersaryo” mula sa time code na 2:41 hanggang 9:13 o basahin ang “Ang Pagpapanumbalik ng Kabuuan ng Ebanghelyo ni Jesucristo: Isang Proklamasyon sa Mundo para sa Ika-200 Taong Anibersaryo” (ChurchofJesusChrist.org), at alamin kung ano ang kagila-gilalas tungkol sa Pagpapanumbalik ng Simbahan at ebanghelyo ni Cristo.

Mga Karagdagang Aktibidad sa Pag-aaral

Aktibidad sa pagpapaliwanag

Maaari mong anyayahan ang mga estudyante na ihambing ang mga kalagayang inilarawan sa 2 Nephi 27:1–5 sa mga pangako ng Panginoon sa 2 Nephi 27:29–31, 35. Upang matulungan ang mga estudyante na pag-isipan ang epekto ng Aklat ni Mormon at ng ipinanumbalik na ebanghelyo sa mundo, sabihin sa kanila na pumili ng isa o mahigit pa sa mga sumusunod na sitwasyon (hango sa 2 Nephi 27:1–5). Sa bawat sitwasyong pipiliin nila, maaari silang makahanap ng isang katotohanan na itinuro sa isang scripture passage ng Aklat ni Mormon na sa palagay nila ay makatutulong sa kanila.

• Isang taong marupok o may adiksyon

• Isang taong nangangailangan ng kanlungan mula sa mga unos ng buhay

• Isang taong kailangang matugunan ang kanyang espirituwal na pagkagutom o pagkauhaw

• Isang taong kailangang makakita nang mas malinaw

Bilang halimbawa, ang isang taong may adiksyon ay maaaring matulungan ng katotohanang itinuro sa Alma 7:11–13 na ang Tagapagligtas ay nakauunawa at makatutulong sa pagdaig sa anumang tukso.

Sabihin sa mga estudyante na ibahagi ang nahanap nila.

2 Nephi 27:15–19. Katuparan ng propesiya tungkol sa lalaking hindi marunong

Maaari din ninyong magkakasamang basahin ito sa Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 (2018), 50–56.