2 Nephi 29

Tatanggap pa ng Karagdagang Salita ng Diyos

Maraming tao ang naniniwala na ang Biblia ay salita ng Diyos. Gayunpaman, hindi lahat sa kanila ay handang tumanggap ng salita ng Diyos nang higit pa sa natanggap na nila. Ipinropesiya ni Nephi na sa mga huling araw, tatanggihan ng maraming tao ang Aklat ni Mormon dahil mayroon na silang Biblia. Nais ng Panginoon na malaman natin na ang Kanyang ebanghelyo ay para sa lahat ng tao at ang Kanyang salita ay hindi limitado sa Biblia. Layunin ng lesson na ito na tulungan kang maging mas handang tanggapin ang salita ng Panginoon sa iyong buhay.

Pagkatuto mula sa Biblia at sa Aklat ni Mormon. Ang Biblia at ang Aklat ni Mormon ay magkaagapay na mga banal na kasulatan at sinusuportahan ang isa’t isa sa pagtuturo ng doktrina ni Jesucristo. Bukod pa rito, ipinanumbalik ng Aklat ni Mormon ang malilinaw at mahahalagang katotohanang nawala sa Biblia. Tulungan ang mga estudyante na maunawaan na kapag pinag-aralan natin ang Aklat ni Mormon, mabibigyang-linaw nito ang pagkaunawa natin sa doktrina sa Biblia.

Paghahanda ng estudyante: Sabihin sa mga estudyante na isipin kung ano ang ginagawa nila upang maging handang tumanggap ng pakikipag-ugnayan mula sa Diyos.

Mga Posibleng Aktibidad sa Pag-aaral

Maging handang tumanggap ng higit na pag-unawa

Ipagpalagay na si Oliver, sa edad na 15, ay nagpasiya na ang kakailanganin lamang niya ay ang lahat ng impormasyon at teknolohiya na makukuha niya sa panahong iyon.

Kung kinakailangan, maaari mong baguhin ang taon sa sumusunod na tanong upang gawin itong mas nauugnay sa iyong mga estudyante.

• Ano ang hindi malalaman ni Oliver kung ipinasiya niya ito noong taong 1950? Anong impormasyon o teknolohiya ang naging available mula noon?

• Paano nauugnay ang sitwasyong ito sa pag-aaral ng mga espirituwal na katotohanan?

Sabihin sa mga estudyante na isipin kung anong mga pagpapala ang nagmumula sa pagiging handa o maging sabik pa na matuto mula sa Diyos.

Habang binabasa mo ang sumusunod na pahayag ni Pangulong Russell M. Nelson, isipin kung ano ang maaaring maging kahulugan nito para sa iyo.

Napakarami pang bagay na nais ng Ama sa Langit na malaman ninyo. Tulad ng itinuro ni Elder Neal A. Maxwell, “Sa mga may matang nakakakita at mga taingang nakaririnig, malinaw na ibinibigay ng Ama ang mga lihim ng sansinukob!” [“Meek and Lowly” (Brigham Young University devotional, Okt. 21, 1986), 9, speeches.byu.edu]. (Russell M. Nelson, “Paghahayag para sa Simbahan, Paghahayag para sa Ating Buhay,” Liahona, Mayo 2018, 95)

Upang matulungan ang mga estudyante na masuri ang kanilang pagiging handang tumanggap ng salita ng Diyos sa kanilang buhay, maaari mong ipamahagi ang sumusunod na handout at anyayahan ang mga estudyante na kumpletuhin ito nang mag-isa.

Ang Hangarin Kong Matuto ng mga Espirituwal na Katotohanan mula sa Diyos

Manwal ng Aklat ni Mormon para sa Titser—2 Nephi 29: Tatanggap pa ng Karagdagang Salita ng Diyos

Pagnilayan sandali ang iyong saloobin tungkol sa pagtanggap ng mga espirituwal na katotohanan mula sa Diyos. Sikaping makita kung ano ang nagagawa mo nang mabuti at kung saan ka pa maaaring umunlad.

• Bihira: 1

• Minsan: 2

• Madalas: 3

• Palagi: 4

Pinahahalagahan at pinag-aaralan ko ang Biblia at ang Aklat ni Mormon.

Naghahanap ako ng mga sagot sa aking mga tanong sa pamamagitan ng pag-aaral ng mga banal na kasulatan.

Hinahangad kong matuto mula sa Diyos at matutuhan ang tungkol sa Kanya sa pamamagitan ng mga banal na kasulatan.

Hinahangad at sinusunod ko ang personal na paghahayag mula sa Espiritu Santo.

Pinag-aaralan ko ang mga salitang binigkas sa pangkalahatang kumperensya upang malaman kung ano ang nais ng Diyos na malaman ko.

© 2024 by Intellectual Reserve, Inc. All rights reserved.

Sa pag-aaral mo ngayon, alamin kung ano ang magagawa mo upang patuloy na matutuhan ang lahat ng nais ng Diyos na ituro sa iyo.

Iba’t ibang saloobin sa pagtanggap ng salita ng Diyos

Sa 2 Nephi 28–29, nagpropesiya si Nephi tungkol sa saloobin ng ilang tao sa mga huling araw tungkol sa pagtanggap pa ng karagdagang salita ng Diyos. Basahin ang 2 Nephi 28:29 at 2 Nephi 29:3, at alamin ang itinuro ni Nephi at ng Panginoon tungkol sa magiging reaksyon ng ilang tao sa pagtanggap ng karagdagang banal na kasulatan sa mga huling araw.

• Ano ang nalaman mo?

• Ano ang ilang dahilan kung bakit maaaring ganito ang magiging pananaw ng mga tao?

Maaari mong ipakita ang mga sumusunod bilang object lesson. Talakayin kung ano ang hindi magagawa ng isang nakataob na baso, at tulungan ang mga estudyante na ikumpara ito sa mga taong tinatanggihan ang Aklat ni Mormon.

Kumuha ng basong walang laman at pag-isipan kung saan ito magagamit. Ngayo’y itaob ito. Magagamit pa rin ba ito sa paraang dapat itong gamitin? Ihambing ito sa Aklat ni Mormon at sa potensyal na impluwensya nito sa buhay ng isang tao.

• Sa iyong palagay, anong kaalaman at mga pagpapala ang nais ng Diyos na matanggap natin sa pamamagitan ng Aklat ni Mormon?

Sa object lessonn sa itaas, itihaya ang baso bilang simbolo ng pagiging handang tumanggap. Maaari kang mamigay ng maliliit na pirasong papel sa bawat estudyante. Sabihin sa bawat estudyante na magsulat ng kahit isang bagay na nais ng Diyos na malaman o matanggap natin sa pamamagitan ng Aklat ni Mormon. Maaaring punuin ng mga estudyante ang baso gamit ang kanilang mga sagot. Maaari mong basahin nang malakas ang mga ito upang matulungan ang mga estudyante na matukoy kung anong mga dakilang pagpapala ang makakamtan ng mga taong handang tanggapin ang mga ito.

Basahin ang 2 Nephi 29:7–11, at alamin ang nais ni Jesucristo na malaman ng mga taong tumatanggi sa Aklat ni Mormon.

Maaaring mas maraming matuklasan ang ilang estudyante kung magbabasa sila kasama ang iba pa sa isang maliit na grupo. Maaari mong hatiin ang mga estudyante sa mga grupo upang basahin ang mga talata 7–11 kung mas matutugunan nito ang kanilang mga pangangailangan.

• Ano ang isang katotohanang natutuhan mo tungkol kay Jesucristo mula sa mga talatang ito?

Bigyan ang mga estudyante ng pagkakataong magbahagi ng iba’t ibang katotohanan, at sabihin sa mga estudyante na ipaliwanag kung ano ang maaaring maging epekto ng mga katotohanang ito.

Ang isang katotohanan na matututuhan natin ay naaalala ng Diyos ang lahat ng tao at kinakausap Niya sila sa lahat ng bansa.

• Ano ang ilan sa iba’t ibang paraan ng pakikipag-usap ng Diyos sa Kanyang mga anak sa lahat ng bansa?

• Anong mga karanasan ang nakatulong sa iyo na maunawaan na naaalala at kinakausap ka ng Diyos?

ChurchofJesusChrist.org

Maaari mong tapusin ang lesson sa pamamagitan ng pag-aanyaya sa mga estudyante na pag-isipan kung paano sila magiging mas handang tumanggap ng salita ng Diyos. Ang isang paraan upang magawa ito ay anyayahan ang mga estudyante na kumpletuhin ang mga sumusunod na hakbang sa kanilang study journal. Matapos ang sapat na oras na makumpleto ng mga estudyante ang mga hakbang, patotohanan ang mga katotohanang tinalakay mo.

1. Ilista ang lahat ng paraan na ibinigay ng Diyos sa iyo ang Kanyang salita.

2. Pagnilayan kung gaano ka kahandang tanggapin ang salita ng Diyos sa pamamagitan ng bawat isa sa mga paraang ito. (Maaari kang gumuhit ng isang simpleng baso sa tabi ng bawat paraan na sa iyong palagay ay pinakahanda kang pakinggan ang Panginoon.)

3. Magsulat ng isa o mahigit pang pagbabago na magagawa mo upang maging mas handang tanggapin ang salita ng Diyos sa higit pa sa mga paraang ito.

Komentaryo at Pinagmulang Impormasyon

Ano ang magagawa ko upang marinig ang nais ng Diyos na marinig ko?

Panoorin ang “#PakingganSiya: Inaanyayahan Tayo ni Pangulong Nelson na Pakinggan ang Tinig ng Panginoon” (2:32) upang matutuhan ang mahalagang payo ni Pangulong Russell M. Nelson.

Itinuro din ni Pangulong Nelson:

Walang makapagbubukas ng kalangitan nang higit sa magagawa ng pinagsama-samang kadalisayan, lubos na pagsunod, masigasig na paghahanap, araw-araw na pagpapakabusog sa mga salita ni Cristo sa Aklat ni Mormon, at pag-uukol palagi ng oras para sa templo at gawain sa family history.

Tiyak na may mga pagkakataon na sa pakiramdam ninyo ay tila sarado na ang kalangitan. Ngunit ipinapangako ko na kung patuloy kayong magiging masunurin, nagpasasalamat sa lahat ng pagpapalang ibinibigay ng Panginoon sa inyo, at kung matiyaga kayong maghihintay sa takdang panahon ng Panginoon, ibibigay sa inyo ang kaalaman at pang-unawang hangad ninyo. (Russell M. Nelson, “Paghahayag para sa Simbahan, Paghahayag para sa Ating Buhay,” Liahona, Mayo 2018, 95–96)

Paano nakikipag-usap sa atin ang Diyos sa pamamagitan ng Aklat ni Mormon?

Magkakaroon pa ba ng mga aklat ng banal na kasulatan sa hinaharap?

Sinabi ni Pangulong Dallin H. Oaks ng Unang Panguluhan:

Sa huli ay ilalabas ng Panginoon ang mga inspiradong turong ibinigay Niya sa Kanyang mga anak sa iba’t ibang bansa para sa kapakanan ng lahat ng tao. Kasama na rito ang mga salaysay ng pagbisita ng nabuhay na mag-uling Panginoon sa tinatawag nating nawawalang lipi ni Israel at ang Kanyang mga paghahayag sa lahat ng binhi ni Abraham. …

Kapag lumalabas ang mga bagong talaan—at ayon sa propesiya ay mangyayari ito—sana ay hindi nila ito tanggihang tulad ng Aklat ni Mormon dahil lang sa mayroon na silang Biblia. (Dallin H. Oaks, “Lahat ng Tao sa Lahat ng Dako,” Liahona, Mayo 2006, 80)

Mga Karagdagang Aktibidad sa Pag-aaral

2 Nephi 29:7, 11. Ang salita ng Panginoon sa lahat ng bansa

Ang isang paraan upang matulungan ang mga estudyante na maunawaan na kinakausap ni Jesucristo ang mga tao sa lahat ng bansa ay magpakita ng mapa ng mundo at sabihin sa mga estudyante na tukuyin ang ilan sa maraming bansa sa mundo.

Tulungan ang mga estudyante na maunawaan na si Jesucristo ang pinuno ng pandaigdigang Simbahang ito at nakikipag-usap Siya sa mga tao sa lahat ng bansa. Halimbawa, maaari mong ipaliwanag na ang mga lider ng Simbahan ngayon ay nagmula sa maraming bahagi ng mundo. Sinabi ni Pangulong Russell M. Nelson ang sumusunod sa sesyon sa Linggo ng umaga ng pangkalahatang kumperensya noong Abril 2021:

Sa umagang ito, napakinggan natin ang mga lider ng Simbahan na nagmula sa bawat mataong kontinente ng mundo. Talagang ang mga pagpapala ng ebanghelyo ay para sa lahat ng lahi, wika, at tao. Ang Simbahan ni Jesucristo ay isang pandaigdigang simbahan. Si Jesucristo ang ating pinuno. (Russell M. Nelson, “Si Cristo ay Nagbangon; Ang Pananampalataya sa Kanya ay Makapagpapalipat ng mga Bundok,” Liahona, Mayo 2021, 101–2)

Maaaring maging interesado ang mga estudyante na hanapin kung sinong mga lider ng Simbahan ang nagsalita sa pinakahuling pangkalahatang kumperensya at tukuyin kung saang mga bansa sila nanggaling.

Kaalaman tungkol kay Jesucristo sa pamamagitan ng Aklat ni Mormon

Tulungan ang mga estudyante na maunawaan na matutulungan tayo ng Aklat ni Mormon na makilala si Jesucristo at malaman ang Kanyang ebanghelyo. Maaaring basahin ng mga estudyante ang 2 Nephi 30:3–8, at alamin ang mga pagpapalang sinabi ni Nephi na darating dahil maraming tao sa mga huling araw ang maniniwala sa Aklat ni Mormon. Maaari ka ring magbahagi ng iba’t ibang pahayag mula sa maraming kababaihan at kalalakihan na nagbahagi ng kanilang patotoo tungkol sa Aklat ni Mormon sa pangkalahatang kumperensya. Bukod pa rito, maaari mong ibahagi ang iyong personal na patotoo at anyayahan ang mga estudyante na ibahagi kung paano nila nakilala ang kanilang Tagapagligtas sa pamamagitan ng pag-aaral ng Aklat ni Mormon.