2 Nephi 28:1–26

Pag-ila ug Pagbuntog sa mga Taktika ni Satanas

Mibati ka ba og pagsalig sa imong abilidad sa pag-ila sa mga paningkamot ni Satanas sa pagpalayo kanimo gikan sa Manluluwas? Si Nephi miila sa pipila ka sayop nga mga ideya ug mga estratehiya nga gamiton ni Satanas sa pagsulay sa pagpahilayo sa mga tawo gikan sa Langitnong Amahan ug ni Jesukristo sa kataposang mga adlaw. Kini nga leksiyon gituyo aron sa pagtabang kanimo nga makaila sa malimbongon nga mga taktika ni Satanas ug magtinguha og tabang sa Manluluwas sa pagbuntog niini.

Pag-awhag sa mga estudyante nga mosalig ni Jesukristo.Gamita ang mga kasulatan ug mga pulong sa mga propeta aron matabangan ang mga estudyante nga makasabot nga si Jesukristo adunay gahom sa pagtabang kanila. Makapakita sila og hugot nga pagtuo diha Kaniya aron mabuntog ang mga pagtintal, maghinulsol sa sala, ug makalahutay sa mga pagsulay.

Pagpangandam sa estudyante: Ikonsiderar ang pagdapit sa mga estudyante sa pagbasa sa “Mga Cheetah ug mga Topi [Antelope]” nga seksiyon sa pakigpulong nga “Magmabinantayon ngadto sa Pag-ampo Kanunay” ni Elder David A. Bednar sa Korum sa Napulog Duha ka Apostoles (Liahona, Nob. 2019, 32). O ang mga estudyante mahimong dapiton sa pagtan-aw sa “Magmabinantayon ngadto sa Pag-ampo Kanunay” gikan sa time code 1:27 hangtod sa 5:00, nga mangita kon sa unsang paagi ang pagsabot sa manunukob nga mga mananap makatudlo sa importante nga mga kamatuoran mahitungod sa mga taktika ni Satanas. Ang bidyo anaa sa ChurchofJesusChrist.org.

Mga Posibleng Kalihokan sa Pagkat-on

Mga katuyoan ni Satanas

Ikonsiderar ang pagsugod sa leksiyon pinaagi sa pagpaambit sa mosunod nga pamahayag:

Apil kita sa nagpadayong gubat batok sa dautan. Si Presidente Ezra Taft Benson (1899–1994) mitudlo kon sa unsang paagi ang Basahon ni Mormon makatabang kanato niini nga gubat:

Ang Basahon ni Mormon nagbutyag sa mga kaaway ni Kristo. Kini nagbuntog sa bakak nga mga doktrina ug mohunong og panagbingkil. (Tan-awa sa 2 Nephi 3:12.) Kini naglig-on sa mapainubsanong mga sumusunod ni Kristo batok sa dautang mga disenyo, mga taktika, ug mga doktrina sa yawa sa atong panahon. (Ezra Taft Benson, “The Book of Mormon Is the Word of God,” Ensign, Ene. 1988, 3)

• Sa unsa nga mga paagi imong nakita ang Basahon ni Mormon nga nagbuhat sa pipila niini nga mga butang nga gitudlo ni Presidente Benson?

Samtang magtuon ka, pangitaa ang mga kamatuoran nga makatabang nimo nga mas mailhan ug mabuntog ang malimbongon nga mga taktika ni Satanas.

Bakak nga mga pagtulon-an ug mga estratehiya ni Satanas

Depende sa mga panginahanglan ug mga abilidad sa mga estudyante, mahimong mapuslanon ang paghatag sa mga estudyante og panahon sa pagbasa sa tanan sa 2 Nephi 28 sa ilang kaugalingon sa dili pa maghisgot sa kapitulo isip usa ka klase. Ang mga estudyante mahimong mohimo og lista sa mosunod samtang magtuon sila: Ang mga estratehiya ug sayop nga mga pagtulun-an ni Satanas, mga ehemplo niadtong mga estratehiya ug sayop nga mga pagtulun-an sa atong panahon, ug mga pagtulun-an nga makatabang nato sa pagbuntog sa mga paningkamot ni Satanas. Mahimo dayon nga ipaambit sa mga estudyante ang ilang nakat-onan gikan sa ilang pagbasa. Kon imong pilion kini nga opsiyon, ikonsiderar ang pagpahiangay sa mosunod nga materyal sa leksiyon aron matabangan ang mga estudyante sa pagproseso ug paggamit sa unsay ilang nakat-onan.

Sa 2 Nephi 28, si Nephi mipadayon sa iyang panagna sa kataposang mga adlaw. Basaha ang 2 Nephi 28:5–9, nga mangita sa pipila ka mga pagtulun-an ug mga kinaiya nga nakita ni Nephi nga anaa sa atong panahon.

• Unsa nga ebidensiya ang imong nakita niini nga mga pagtulun-an ug mga kinaiya sa atong panahon?

• Sa unsang paagi ang dautan nga mga pagtulun-an nga gipahayag niini nga mga bersikulo ug ang mga kinaiya niadtong mituo niini peligroso sa espirituhanong paagi?

Kini nga mga bersikulo nagrepresentar sa pipila sa mga kinaiya ug mga pagtuo nga resulta sa mga pagpanglimbong ni Satanas. Si Nephi mipadayon sa iyang mga panudlo pinaagi sa pag-ila sa piho nga mga estratehiya nga gamiton ni Satanas sa pagsulay sa paggapos kanato pinaagi sa iyang gahom.

Ikonsiderar ang pagsulat sa mosunod nga dili kompleto nga pamahayag diha sa pisara: Si Satanas nagtinguha sa paggapos kanato sa iyang walay kataposan nga mga kadena pinaagi sa …

Basaha ang 2 Nephi 28:19–22, nga mangita og mga pagtulun-an nga makatabang nimo sa pagkompleto niini nga pamahayag:

• Base sa unsay imong nakat-onan gikan niini nga mga bersikulo, unsa ang pipila ka mga paagi nga imong makompleto ang pamahayag: Si Satanas nagtinguha sa paggapos kanato sa iyang walay kataposan nga mga kadena pinaagi sa … ?

Ikonsiderar ang pagdapit sa mga estudyante sa pagsulat og mga pulong diha sa pisara nga makakompleto sa pamahayag: Si Satanas nagtinguha sa paggapos kanato sa iyang walay kataposan nga mga kadena pinaagi sa … Ang mosunod mao ang pipila sa mga pagtulun-an nga tingali nailhan sa mga estudyante:

• pagpakutaw sa mga tawo ngadto sa kasuko batok niana nga maayo,

• paghupay ug pagpakatulog sa mga indibidwal ngadto sa kalibotanon nga kasiguroan, ug

• pagsulti sa mga tawo nga walay impyerno ug walay yawa.

Mahimong makatabang ang pagkahibalo nga ang hugpong sa mga pulong nga “mopakatulog kanila ngadto sa kalibotanon nga kasiguroan” (bersikulo 21) nagtumong sa mga paningkamot ni Satanas sa paghimo sa mga tawo nga komportable sa ilang makasasala nga kahimtang ug nga sila dili na kinahanglang magbag-o.

Ikonsiderar ang pagdapit sa mga estudyante sa paghunahuna pa gayod kon unsay hitsura kon si Satanas naggamit sa matag usa niini nga mga estratehiya karon. Mahimo nimong ipaambit ang mosunod nga mga senaryo ug hangyoa ang mga estudyante sa pag-ila kon hain sa mga taktika ni Satanas sa mga bersikulo 20–22 ang girepresentar sa matag senaryo.

1. Si Marites mihimo og desisyon nga mangopya sa iyang buluhaton sa eskwelahan aron siya makadawat og maayong puntos. Nakonsensiya siya sa sinugdanan, apan iyang naamgohan nga wala gayod siya masakpi ug sa kataposan nangopya usab sa ubang mga buluhaton. Gibati niya karon nga ang paglihok nga dili matinuoron makatabang kaniya nga makuha ang gusto niya sa kinabuhi.

2. Nakabantay si Juan nga kon magbasa siya og mga post sa social media mahitungod ni Jesukristo o sa Simbahan, kasagaran adunay daghang negatibo nga mga komentaryo nga moatake sa Simbahan o sa mga tawo nga mituo sa Manluluwas.

3. Si Mariposa adunay pipila ka mga higala kinsa misulay sa pagdani kaniya sa pagpaubos sa iyang mga sumbanan. Nangatarongan sila nga tungod kay walay kinabuhi pagkahuman sa kamatayon, kabuang ang pagkabalaka bahin sa usa ka lugar diin ang mga tawo manubag sa ilang gitawag nga mga sala.

• Unsa ang ubang mga ehemplo nga imong mahunahunaan nga naghulagway sa mga estratehiya ni Satanas nga gilista diha sa mga bersikulo 20–22?

Hunahunaa ang imong kaugalingong kinabuhi. Gibati ba nimo nga daw og adunay mga estratehiya ni Satanas nga imong nakat-onan nga nagaapekto kanimo? Ikonsiderar ang pagrekord sa imong mga hunahuna diha sa imong journal sa pagtuon. Samtang magpadayon ka sa pagtuon, pangitaa kon sa unsang paagi ang Langitnong Amahan ug si Jesukristo makatabang kanimo sa pagbuntog sa mga pagpanglimbong ni Satanas sa imong kinabuhi.

Pagdangop ngadto sa Langitnong Amahan ug ni Jesukristo aron sa pagbuntog ni Satanas

Mabuntog nato si Satanas ug ang iyang mga pagpanglimbong samtang mosalig kita sa Langitnong Amahan ug ni Jesukristo. Paghimo sa mosunod nga ulohan diha sa imong journal sa pagtuon: “Sa unsang paagi ang Langitnong Amahan ug si Jesukristo mitabang kanako sa pagbuntog ni Satanas.”

Ikonsiderar ang pagsulat niini nga hugpong sa mga pulong diha sa pisara. Human makompleto sa mga estudyante ang mosunod nga kalihokan sa pagtuon, mahimo nilang isulat sa pisara ang usa o daghan pa sa mga pakisayran sa kasulatan nga ilang nakit-an. Mahimo ninyong basahon ang pipila niini nga mga tudling sa kasulatan isip usa ka klase ug dapita ang mga estudyante sa pag-update sa ilang kaugalingong mga lista base sa unsay ilang nakat-onan gikan sa ilang mga kaedad.

Pangita og mga tudling sa kasulatan o mga pagtulun-an gikan sa mga lider sa Simbahan nga makatabang nimo sa imong mga paningkamot sa pagbuntog ni Satanas. Irekord ang imong mga panabot diha sa imong journal sa pagtuon.

Ikonsiderar ang pagtuon sa pipila ka mga pakisayran sa kasulatan nga gilista sa ubos sa “Pagtintal, Tintal” sa Giya ngadto sa mga Kasulatan. Mahimo usab nimong tun-an ang mga pagtulun-an ni Nephi sa 2 Nephi 28:17, 26–32. Ang ubang makatabang nga mga tudling sa kasulatan naglakip sa 1 Nephi 15:24; Helaman 5:12; ug 3 Nephi 18:15, 18.

• Sa unsang paagi nga ang mga pagtulun-an gikan sa mga lider sa Simbahan ug ang mga tudling sa kasulatan nga imong nakit-an makatabang nimo sa pagbuntog sa mga estratehiya ni Satanas nga imong nailhan sa sayo pa sa leksiyon?

Pamalandongi ang imong mga kasinatian sa pagtuon karon. Paggahin sa makadiyot sa paghimo og plano base sa unsay imong gibati nga gusto sa Ginoo nga imong buhaton aron mas mapanalipdan ang imong kaugalingon batok sa mga taktika ni Satanas. Irekord kini nga plano diha sa imong journal sa pagtuon. Makabaton ka og oportunidad sa pag-refer niini nga plano sa umaabot nga leksiyon sa “Sukda ang Imong Nakat-onan”.

Komentaryo ug Background nga Impormasyon

Unsa ang ubang mga pagtulun-an ug mga estratehiya ang gigamit ni Satanas?

Si Elder Ronald A. Rasband sa Korum sa Napulog Duha ka Apostoles mipamatuod:

Si Satanas usa ka bitin labaw nga maliputon, mosulod sa atong mga hunahuna ug mga kasingkasing kon magkumpyansa ta sa atong mga depensa, makasinati og kapakyas sa paglaom, o mawad-an sa paglaom. Siya motintal kanato uban sa mga bulatik, usa ka saad sa kasayon, komportable, o usa ka temporaryo nga mga pagbati kon magmasulub-on ta. Iyang ipakita nga sakto ang garbo, pagkadili mabination, pagkabakakon, dili kontento, ug imoral, ug sa higayon mahimo kitang “walay pagbati” [1 Nephi 17:45]. Ang Espiritu mahimong mobiya kanato. (Ronald A. Rasband, “Magtukod og Kuta sa Pagkaespirituhanon ug Proteksiyon,” Liahona, Mayo 2019, 108)

Unsa pa ang akong mahimo aron mapanalipdan gikan kang Satanas?

Si Presidente Russell M. Nelson mitudlo:

Mosaad ko kaninyo nga kon mainampuon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw. Mosaad ako kaninyo nga kon mamalandong kamo unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksiyon sa inyong kinabuhi. Mosaad ako nga kon inyong isub-sob ang inyong kaugalingon sa Basahon ni Mormon, mapanalipdan kamo batok sa mga dautan niining panahona, bisan ang grabing pagtakboy sa pornograpiya ug sa ubang matang sa adiksyon. (Russell M. Nelson, “Ang Basahon ni Mormon: Unsa kaha ang Imong Kinabuhi Kon wala Kini?,” Liahona, Nob. 2017, 62–63)

Si Elder Ronald A. Rasband sa Korum sa Napulog Duha ka Apostoles mitudlo:

Mga panimalay nga nakasentro kang Kristo mga kuta alang sa gingharian sa Dios dinhi sa yuta sa adlaw nga, ingon nga gipanagna, ang yawa “mohimo og kayugot sa mga kasingkasing sa mga katawhan, ug mokutaw kanila ngadto sa kasuko batok niana nga maayo” [2 Nephi 28:20]. …

Alang sa atong proteksiyon, kinahanglan kitang magtukod og kuta sa pagkaespirituhanon ug panalipod alang sa atong mga kalag mismo, usa ka kuta nga dili madutlan sa dautan. (Ronald A. Rasband, “Magtukod og Kuta sa Pagkaespirituhanon ug Proteksiyon,” Liahona, Mayo 2019, 108)

Ikonsiderar ang pagtan-aw sa mosunod nga bidyo alang sa mga ideya gikan ni Elder Ulisses Soares sa Korum sa Napulog Duha ka Apostoles kon unsaon nato sa pagbatok si Satanas:

Dugang nga mga Kalihokan sa Pagkat-on

Usa ka alternatibong paagi sa pagsugod sa leksiyon

Ikonsiderar ang pagpakita og mga butang o mga hulagway nga may kalabotan sa pipila ka mga estratehiya ni Satanas nga gilista diha sa 2 Nephi 28:20–26—pananglitan, mga kadena, usa ka tsupon sa bata, ug usa ka rocking chair. Dapita ang mga estudyante sa pagsusi niini nga mga butang, nga maghunahuna mahitungod sa ilang gamit. Pahinumdumi ang mga estudyante nga si Nephi nanagna mahitungod sa kataposang mga adlaw, ug hangyoa sila sa pagkonsiderar kon sa unsang paagi kini nga mga butang nagsimbolo sa mga estratehiya ni Satanas sa atong panahon.

Paggamit sa mga pagtulun-an gikan sa kinatibuk-ang komperensiya sa pagpakigbatok ni Satanas

Dapita ang mga estudyante sa pagtuon sa mga pagtulun-an sa kinatibuk-ang komperensiya aron makahimo og lista sa mga paagi sa pagbuntog ni Satanas. Ang mosunod nga mga pakigpulong mahimong makatabang:

• Dallin H. Oaks, “Be Not Deceived,” Liahona, Nob. 2004, 43–46

• David A. Bednar, “Magmabinantayon ngadto sa Pag-ampo Kanunay,” Liahona, Nob. 2019, 31–35

• Gary E. Stevenson, “Ayaw Paglingla Kanako,” Liahona, Nob. 2019, 93–96

Paggamit sa Alang sa Kalig-on sa mga Kabatan-onan (booklet, 2011)

Mahimong mopili ang mga estudyante kon unsang dapita sila gustong mouswag ug tun-an kana nga hilisgotan. Samtang magtuon sila, mahimo nilang pangitaon kon giunsa pagtintal ni Satanas ang mga tawo nga dili mosunod niana nga sumbanan ug unsaon nila pagbuntog kini nga mga pagtintal.