Doktrinal nga Kahanas: 2 Nephi 28:30

“Pagtulun-an Human Sa Usa Ka Pagtulun-an, Lagda Human Sa Usa Ka Lagda”

batan-on nga nagtuon sa mga kasulatan

Sa miaging leksiyon sa, “2 Nephi 28:27–32,” natun-an nimo ang 2 Nephi 28:30 ug nakakat-on nga ang Dios nagpadayag sa kamatuoran pagtulun-an human sa usa ka pagtulun-an alang niadtong kinsa andam nga modawat niini. Kini nga leksiyon makatabang kanimo sa pagsag-ulo sa pakisayran ug sa mahinungdanon nga hugpong sa mga pulong sa kasulatan alang sa 2 Nephi 28:30, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinud-anay nga mga senaryo.

Pagtabang sa mga estudyante nga mahanas sa mga tudling sa kasulatan sa doktrinal nga kahanas.Seguroha nga ang mga estudyante nakahibalo sa mga kapanguhaan nga makatabang nila nga mahanas sa mga tudling sa kasulatan sa doktrinal nga kahanas. Kini nga mga kapanguhaan naglakip sa Doktrinal nga Kahanas nga mobile app ug sa Mahinungdanon nga Dokumento sa Doktrinal nga Kahanas (2022), nga naglangkob og lista sa mga pakisayran sa doktrinal nga kahanas ug sa mahinungdanon nga hugpong sa mga pulong sa kasulatan.

Pagpangandam sa estudyante: Ikonsiderar ang pagdapit sa mga estudyante sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan “2 Nephi 28:30: Ang Dios ‘mopadayag ngadto sa mga katawhan og pagtulun-an human sa usa ka pagtulun-an, lagda human sa usa ka lagda.’”

Mga Posibleng Kalihokan sa Pagkat-on

Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “2 Nephi 28:27–32,” nga mao ang pangkonteksto nga leksiyon alang sa tudling sa doktrinal nga kahanas sa 2 Nephi 28:30. Kon kini nga leksiyon sa tudling sa doktrinal nga kahanas kinahanglang ibalhin sa laing semana, seguroha nga itudlo usab ang katugbang nga leksiyon sa konteksto niana nga semana.

Isag-ulo ug ipasabot

Gamita ang mosunod nga mga kalihokan o laing epektibong paagi sa pagtabang sa mga estudyante sa pagsag-ulo sa pakisayran sa kasulatan ug sa mahinungdanong hugpong sa mga pulong sa kasulatan alang sa 2 Nephi 28:30 ug ipasabot ang mga kamatuoran nga makita niini nga tudling.

Diha sa pisara, pagdrowing og upat ka pinahigda nga linya nga murag hagdanan.

putol-putol nga mga linya

Dapita ang upat ka mga estudyante nga ang matag usa mosulat og usa ka bahin sa hugpong sa mga pulong sa kasulatan diha sa pisara sama sa makita sa ubos. Tabangi ang mga estudyante nga makasabot nga ang mga hagdanan makapahinumdom kanato kon sa unsang paagi ang Dios nagtudlo kanato “pagtulun-an human sa usa ka pagtulun-an.”

putol-putol nga mga linya nga adunay teksto

Dapita ang mga estudyante sa pagsubli pagsulti sa pakisayran sa kasulatan ug sa mahinungdanong hugpong sa mga pulong sa kasulatan uban sa usa ka pares [partner] hangtod nga sila makasaysay niini gikan sa memorya. Samtang magpraktis ang mga estudyante, ikonsiderar ang pagpapas sa mga hugpong sa mga pulong sa pisara aron matabangan sila nga makamemorya.

Sa miaging leksiyon sa, “2 Nephi 28:27–32,” nakat-on ka nga ang Dios nagpadayag sa kamatuoran pagtulun-an human sa usa ka pagtulun-an alang niadtong kinsa modawat niini. Aron matabangan ka sa pag-andam sa pagpasabot niini nga kamatuoran, pamalandongi ang mosunod nga mga pangutana ug dayon kompletoha ang mosunod nga kalihokan sa pagsulat:

• Unsa sa imong hunahuna ang gipasabot sa “pagtulun-an human sa usa ka pagtulun-an”?

• Sa imong hunahuna sa unsang paagi nga ang pagdawat sa kamatuoran nga gihatag na sa Dios kanato nag-andam kanato sa pagdawat og dugang pa?

Pagpili og usa niini nga mga sitwasyon diin ang usa ka tawo tingali nagkinahanglan og tabang gikan sa Dios:

1. Nagkinahanglan og tambag bahin sa hagit nga iyang giatubang.

2. Nagtinguha sa pagpalambo og mas lig-on nga relasyon uban sa Manluluwas.

3. Gustong makasabot sa iyang patriyarkal nga panalangin.

Pagsulat og mubo nga pagpasabot mahitungod sa unsay imong nakat-onan sa 2 Nephi 28:30 nga makatabang sa sitwasyon nga imong napili.

Dapita ang mga estudyante nga magtinabangay nga magpares o sa gagmay nga mga grupo ug hisgoti ang ilang pagpasabot sa mga sitwasyon nga ilang napili.

Paglibotlibot sa klase ug paghatag og tabang kon gikinahanglan. Human niini nga kalihokan, dapita ang pipila ka mga estudyante sa pagpaambit sa ilang mga pagpasabot ngadto sa klase.

Pagbansay sa Paggamit

Tabangi ang mga estudyante sa pagrebyo sa mga baroganan sa pag-angkon og espirituhanong kahibalo. Mahimo nimong pahinumduman sila sa unang baroganan (paglihok diha sa hugot nga pagtuo) ug hangyoa ang pipila ka mga estudyante sa pagpaambit og mga pulong o hugpong sa mga pulong nga naghulagway sa unsay atong nakat-onan gikan niana nga baroganan. Balika kini sa laing duha ka mga baroganan. Kon gikinahanglan, rebyoha kini nga mga baroganan sa mga parapo 5–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022).

Basaha ang mosunod nga duha ka mga senaryo mahitungod sa kabatan-onan gikan sa samang ward kinsa mitambong sa miting sa pagpuasa ug pagpamatuod. Ang matag usa adunay lainlaing mga hunahuna panahon sa miting.

Ikonsiderar ang pagbahin sa klase sa duha ka grupo ug pag-assign og usa ka senaryo sa matag grupo. I-display ang mga senaryo ug ang mga pangutana ubos sa matag usa sa mosunod nga mga baroganan sa pag-angkon og espirituhanong kahibalo, o hatagi ang matag grupo og kopya niini aron magamit atol sa ilang diskusyon.

Mahimo usab nimong dapiton ang mga estudyante sa paghimo og lahi nga senaryo nga may kalabotan sa 2 Nephi 28:30. Ipagamit nila ang mga barganan sa pag-angkon og espirituhanong kahibalo ug ang doktrina gikan sa 2 Nephi 28:30 aron makatabang sa senaryo nga ilang nahimo.

1. Nagsugod si Thomas sa paghunahuna kon unsa ang sayop kaniya. Nagtuo siya sa Dios ug nga Ang Simbahan ni Jesukristo sa mga Santos sa Ulahing mga Adlaw tinuod. Apan gibati niya nga daw huyang ang iyang pagpamatuod kon itandi sa ubang mga miyembro sa ward. Naghunahuna siya kon posible ba nga mahibaloan niya sa iyang kaugalingon ang tanan nga mga butang nga gipamatud-an sa uban.

2. Sa tungatunga sa miting, si Liz mihunong sa paghatag og atensyon sa mga pagpamatuod. Naghunahuna siya sa iyang kaugalingon, “Nadungog na nako ang tanan nilang gisulti, ug nahibaloan na nako nga kini tanan tinuod.” Mibati usab siya og minos nga tinguha sa pagbasa sa mga kasulatan ug pagtambong sa seminary tungod kay gibati niya nga lig-on na ang iyang pagpamatuod.

Ihulagway kon unsaon nimo paggamit ang matag usa sa mga baroganan sa pag-angkon og espirituhanong kahibalo sa pagtabang ni Thomas o Liz sa ilang sitwasyon. Kon gikinahanglan, ang mosunod nga mga pangutana makatabang kanimo.

Lihokon Inubanan sa hugot nga pagtuo

Basaha ang parapo 7 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas.

• Unsa ang imong mapaambit gikan niini nga parapo aron matabangan sila si Thomas o Liz nga molihok inubanan sa hugot nga pagtuo?

• Sa unsa nga paagi nga ang mga kamatuoran gikan sa 2 Nephi 28:30 makatabang ni Thomas o ni Liz nga molihok inubanan sa hugot nga pagtuo?

Susihon ang mga konsepto ug mga pangutana inubanan sa mahangtorong panglantaw

• Gamit ang imong nakat-onan sa 2 Nephi 28:30, unsa ang imong mapaambit aron matabangan si Thomas o Liz nga makita ang ilang sitwasyon nga mas sama nga paagi sa Ginoo?

• Unsa pa nga mga kamatuoran ang mahimo nimong ipaambit aron matabangan sila nga makita ang ilang mga kabalaka inubanan sa mahangturong panglantaw?

• Unsa ang imong nahibaloan mahitungod sa Dios nga makatabang kanila sa pagtan-aw sa ilang mga kaugalingon sama sa Iyang pagtan-aw?

Tinguhaa ang dugang nga panabot pinaagi sa balaanong gitudlo nga mga tinubdan

• Ngano nga makatabang ni Thomas o Liz nga makig-istorya sa ilang mga ginikanan o mga lider sa simbahan mahitungod sa ilang mga hunahuna?

• Unsa nga mga bersikulo sa kasulatan o mga istorya ang imong mahunahunaan nga makatabang kanila?

Human sa pipila ka panahon, dapita ang mga estudyante sa paglibot sa klasrom, mangita og tawo nga nagtuon og laing senaryo, ug mapaambit ang ilang nakat-onan. Dayon pagdapit og pipila ka mga boluntaryo sa pagpaambit sa klase kon unsay ilang nasulat.

Rebyo sa doktrinal nga kahanas

Atol sa umaabot nga mga leksiyon, tabangi ang mga estudyante sa pagrebyo og daklit sa pakisayran sa kasulatan ug sa mahinungdanon nga hugpong sa mga pulong sa kasulatan alang sa 2 Nephi 28:30. Usa ka paagi sa pagbuhat niini mao ang pagsubli sa kalihokan gikan niini nga leksiyon, pagdrowing og upat ka pinahigda nga linya diha sa pisara ug paghangyo sa mga estudyante sa pagsulat sa pakisayran sa kasulatan ug sa mahinungdanon nga hugpong sa mga pulong sa kasulatan gikan sa memorya. Tabangi ang mga estudyante kon gikinahanglan. Dayon dapita ang mga estudyante sa pagsubli pagsulti sa pakisayran ug sa mahinungdanon nga hugpong sa mga pulong sa pipila ka mga higayon hangtod nga ilaha kining masag-ulo.