“2 Nephi 28:27–32: ‘Ngadto Kaniya nga Modawat [ang Dios] Mohatag og Dugang Pa,’” Manwal sa Magtutudlo sa Basahon ni Mormon (2024)

“2 Nephi 28:27–32,” Manwal sa Magtutudlo sa Basahon ni Mormon

2 Nephi 28:27–32

“Ngadto Kaniya nga Modawat [ang Dios] Mohatag og Dugang Pa”

Imahe

batan-on nga nag-ampo

Aduna ka bay wala matubag nga espirituhanong mga pangutana, o usahay gusto ba nimo nga ang imong pagpamatuod mas dali nga molambo? Si Nephi mipasabot nga ang kahibalo gikan sa Langitnong Amahan hinay-hinay nga moabot samtang kita andam nga magpadayon sa pagdawat sa unsay Iyang gitudlo kanato. Kini nga leksiyon makatabang kanimo sa pagpalawom sa imong pagsabot kon sa unsang paagi ang Langitnong Amahan mopadayag sa kamatuoran ngari kanato.

Pagtudlo sa mga estudyante sa pagpahisama sa mga kasulatan.Ang pagpahisama sa mga kasulatan mao ang pagtandi niini sa kaugalingong kinabuhi. Awhaga ang mga estudyante sa pagpangutana sama sa, “Unsa nga mga sirkumstansiya ug mga sitwasyon sa akong kinabuhi ang sama sa mga sirkumstansiya ug mga sitwasyon niini nga tudling sa kasulatan?” o “Sa unsang paagi ako nahisama sa mga karakter nga atong gitun-an diha sa mga kasulatan?”

Pagpangandam sa estudyante: Dapita ang mga estudyante sa pagbasa sa 2 Nephi 28:30 ug sa pagtambong sa klase nga andam sa pagpaambit og ehemplo kon sa unsang paagi ang Dios nagtudlo kanato sa Iyang ebanghelyo sa hinay-hinay.

Mga Posibleng Kalihokan sa Pagkat-on

Ang Dios nagtudlo kanato lakang human sa usa ka lakang

Imbes mogamit sa mosunod nga analohiya mahitungod sa usa ka hagdanan, mahimo nimong sugdan ang klase pinaagi sa pagtanyag sa usa ka estudyante og lamian nga pagkaon nga dako ra kaayo nga kan-on sa usa ka hungit. Kon ang estudyante mokaon og gamay, pangutan-a siya nganong misugod siya sa pagkaon og gamay lamang imbes nga kan-on kini tanan sa makausa. Dayon dapita ang mga estudyante sa pagbasa sa 2 Nephi 28:26–30, nga mangita kon sa unsang paagi kini nga leksiyon nga naggamit og usa ka butang [object lesson] nakatabang kanato nga mas makasabot sa proseso sa paglambo sa atong espirituhanong kahibalo.

Imahe

hagdanan paingon sa taas

Hunahunaa nga nagtan-aw ka sa taas nga hagdanan nga nagrepresentar sa imong espirituhanong kahibalo ug pagsabot.

Kon ang tumoy sa hagdanan nagrepresentar sa kahibalo sa Dios, sa imong hunahuna asa dapita ang imong kasamtangan nga lebel sa kahibalo?
Unsa ang mga paagi sa pagtabang sa Dios kanato nga madugangan ang atong espirituhanong kahibalo ug pagsabot sa paglabay sa panahon?
Unsa ang mahitabo sa usa ka tawo nga dili mohimo sa sunod nga lakang tungod kay gibati nila nga kontento na sila sa kahibalo nga anaa na nila?

Sa 2 Nephi 28, si Nephi mipadayon sa iyang panagna sa kataposang mga adlaw. Gihulagway niya ang pipila ka mga kinaiya nga mahimong naglabi sa atong panahon ug mipaambit og usa ka sumbanan nga gigamit sa Ginoo sa pagtabang kanato nga makadawat ug makasabot sa kamatuoran.

Basaha ang 2 Nephi 28:26–30, ug pamalandongi kon sa unsang paagi nga ang pagtandi sa hagdanan makatabang nimo nga masabtan ang mga kamatuoran nga gitudlo ni Nephi mahitungod sa Ginoo. Mahimong makatabang ang pagkahibalo nga ang mga lagda mao ang mga sugo o mga baroganan nga nagtudlo kanato unsaon paglihok.

Ang 2 Nephi 28:30 usa ka tudling sa doktrinal nga kahanas.  Ikonsiderar ang pagmarka sa mga tudling sa doktrinal nga kahanas sa lahi nga paagi aron dali nimo kining mapangita. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.

Unsa ang natabang niini nga tudling kanimo nga makasabot mahitungod sa Ginoo? Sa unsang paagi kini nga pagsabot makapanalangin sa imong kinabuhi?
Ngano sa imong hunahuna nga ang ubang mga tawo misalikway sa oportunidad sa pagkat-on og dugang pa sa pulong sa Dios kay sa anaa na nila?

Basaha pagbalik ang bersikulo 30 ug hunahunaa kon unsaon nimo pagpamubo [summarize] diha sa imong kaugalingong mga pulong kon unsay gitudlo niini. Mahimo nimong irekord ang imong summary nganha sa imong mga kasulatan sunod niini nga bersikulo.

Dapita ang mga estudyante sa pagpaambit sa ilang mga pagpamubo [summary].

Usa ka sumbanan sa atong espirituhanong pag-uswag

Usa sa mga kamatuoran nga makita niini nga tudling mao nga ang Dios mopadayag sa kamatuoran pagtulun-an human sa usa ka pagtulun-an ngadto sa mga tawo kinsa modawat niini.

Sa unsang paagi nahimong usa ka panalangin nga ang Dios nagtudlo kanato sa hinay-hinay imbes sa tanan sa usa ka higayon?
Sa unsang paagi nga ang proseso sa pagkat-on sa hinay-hinay makatabang kanato nga mahimong mas mahisama sa Langitnong Amahan ug ni Jesukristo? Unsa nga Kristohanong mga hiyas ang matabang niini nga proseso nga atong mapalambo?

Mga sumbanan sa kahayag

ChurchofJesusChrist.org

Imbes nga gamiton ang mosunod nga sugyot sa pagtuon, ikonsiderar ang paggamit sa kalihokan sa pagtuon sa kasulatan nga makita diha sa “Dugang nga mga Kalihokan sa Pagkat-on” nga seksiyon.

Basaha ang dili mominos duha sa mosunod nga mga tudling sa kasulatan, nga mangita kon unsay madugang niini sa imong pagsabot sa 2 Nephi 28:30. Ikonsiderar ang pagsumpay [link] o pag-cross reference niini nga mga bersikulo ngadto sa 2 Nephi 28:30 diha sa imong mga kasulatan.

Unsa ang imong nakat-onan gikan niini nga mga tudling nga nagtabang kanimo nga mas makasabot sa 2 Nephi 28:30?
Unsa ang pipila ka mga ehemplo kon sa unsang paagi ang mga kamatuoran nga gitudlo diha sa 2 Nephi 28:30 makatabang sa usa ka tawo?
Kanus-a nimo nakita ang Dios nga nagtudlo sa hinay-hinay diha sa imong kinabuhi o sa kinabuhi niadtong nagpalibot kanimo?

Pagpamalandong kon sa unsang paagi ang imong pagsabot ug pagpamatuod sa ebanghelyo hinay-hinay nga mitubo sa paglabay sa panahon. Irekord sa imong journal sa pagtuon kon unsay imong gibati nga gusto sa Langitnong Amahan nga imong hinumduman ug buhaton tungod sa imong nakat-onan karon.

Ikonsiderar ang pagdapit og pipila ka mga boluntaryo sa pagpaambit og bahin sa unsay ilang nasulat.

Komentaryo ug Background nga Impormasyon

Sa unsang paagi nga ang baroganan sa “pagtulun-an human sa usa ka pagtulun-an” magamit sa atong espirituhanong pag-uswag?

Si Presidente Dieter F. Uchtdorf, kaniadto sa Unang Kapangulohan, mipasabot:

Imahe
Presidente Dieter F. Uchtdorf

Ang pagpadayag ug pagpamatuod dili kanunay moabot uban sa dakong gahom. Kadaghanan, ang pagpamatuod moabot sa hinay-hinay—ginagmay kada higayon. Usahay moabot sa labihan ka hinay nga lisod ang paghinumdom sa ensakto nga gutlo nga kita nasayod nga ang ebanghelyo tinuod. Ang Ginoo mohatag kanato og “pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto” [2 Nephi 28:30]. (Dieter F. Uchtdorf, “Inyong Potensiyal, Inyong Pribilehiyo,” Liahona, Mayo 2011, 60)

Sa unsang paagi mahimo nga usa ka panalangin ang dili makadawat og mga tubag sa usa ka higayon?

Si Elder Richard G. Scott (1928–2015) sa Korum sa Napulog Duha ka Apostoles mitudlo:

Imahe
Elder Richard G. Scott

Samtang kamo nagduhaduha sa inyong pagsabot, sa paggamit sa hugot nga pagtuo, kamo giyahan nga makakaplag og mga solusyon nga dili ninyo mabatonan sa laing paagi. Bisan pa gani sa inyong labing hugot nga pagtuo, ang Dios dili kanunay nga moganti dayon kaninyo sumala sa inyong mga tinguha. Hinoon, ang Dios motubag kaninyo kon unsay anaa sa Iyang mahangturong plano nga labing maayo alang kaninyo, kon kini moani og labing dako nga kaayohan. Pagmapasalamaton nga usahay ang Dios motugot kaninyo nga makigbisog sulod sa dugayng panahon sa dili pa kana nga tubag moabot. Kana ang makapadugang sa inyong hugot nga pagtuo ug makapalambo sa inyong kinaiya. (Richard G. Scott, “Ang Makapausab nga Gahom sa Hugot nga Pagtuo ug Maligdong nga Kinaiya,” Liahona, Nob. 2010, 44)

Si Elder D. Todd Christofferson sa Korum sa Napulog Duha ka Apostoles mipaambit sa mosunod mahitungod sa dihang ang solusyon sa usa ka importante nga problema wala dayon moabot bisan pa sa iyang sinsero nga mga pag-ampo:

Imahe
Elder D. Todd Christofferson

Bisan tuod nga nag-antus ko nianang higayona, mapasalamaton ko karon nga walay dali nga solusyon sa akong problema. Ang kamatuoran nga napugos ko sa pagdangop sa Dios alang sa tabang sa hapit matag adlaw sulod sa taas-taas nga mga katuigan nagtudlo kanako kon unsaon pag-ampo sa tinuoray nga paagi ug pag-angkon og mga tubag sa pag-ampo ug nagtudlo kanako sa praktikal nga paagi sa pagbaton og hugot nga pagtuo sa Dios. Akong nailhan ang akong Manluluwas ug ang akong Langitnong Amahan sa paagi ug sa matang nga wala unta mahitabo sa laing paagi o dugay-dugay pa gayod untang mahitabo kanako. … Nakat-on ko sa pagsalig sa Ginoo sa tibuok nakong kasingkasing. Nakat-on ko sa paglakaw uban Kaniya sa matag adlaw. (D. Todd Christofferson, “Pag-ila sa Kamot sa Dios diha sa Atong Inadlaw nga mga Panalangin,” Liahona, Ene. 2012, 27)

Dugang nga mga Kalihokan sa Pagkat-on

Kalihokan sa pagtuon sa kasulatan

Kini nga kalihokan gituyo aron matabangan ang mga estudyante nga makakita nga kita sagad kinahanglan nga mosunod sa unsay atong nadawat na sa dili pa kita makadawat og dugang pa nga mga instruksiyon.

Pahibaloa ang mga estudyante nga aron makompleto ang kalihokan, ang ilang grupo mobasa ug mo-report og balik kanimo kon sa unsang paagi ang upat ka mga tudling sa kasulatan makadugang sa ilang pagsabot sa 2 Nephi 28:30.

Sultihi ang mga grupo nga ang unang tudling nga ilang tun-an mao ang Doktrina ug mga Pakigsaad 42:61. Samtang ang matag grupo mo-report kanimo kon sa unsang paagi kana nga tudling nagdugang sa ilang pagsabot sa 2 Nephi 28:30, hilom nga ihatag sa grupo ang sunod nga pakisayran sa pagtuon. Kini nga proseso magpadayon hangtod ang matag grupo nakareport sa unsay ilang nakat-onan gikan sa tanang upat sa mosunod nga mga tudling.

Pagtulun-an human sa usa ka pagtulun-an sa kasaysayan sa Simbahan

Mahimong makatabang ang paghisgot sa mga ehemplo gikan sa kasaysayan sa Simbahan nga nagpakita sa Ginoo nga nagpadayag sa Iyang kamatuoran “pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto” (2 Nephi 28:30). Mahimo nimong gamiton ang mosunod nga pamahayag ni Elder David A. Bednar sa Korum sa Napulog Duha ka Apostoles sa pagsugod niini nga diskusyon:

Ang kasaysayan sa Simbahan ug ang atong personal nga kinabuhi puno sa mga ehemplo sa sundanan sa Ginoo alang sa pagdawat og pagpadayag “pagtulun-an human sa usa ka pagtulun-an, lagda human sa usa ka lagda.” Sama pananglit, ang sukaranan nga mga kamatuoran sa gipahiuli nga ebanghelyo wala gihatag ngadto ni Joseph Smith diha-diha dayon sa Sagradong Kakahoyan. Kining bililhon nga mga bahandi gipadayag sigon sa gikinahanglan sa mga kahigayonan ug sigon sa husto nga panahon (David A. Bednar, “Ang Espiritu sa Pagpadayag,” Liahona, Mayo 2011, 88).

Si Jesus miuswag gikan sa grasya ug dugang pa nga grasya

Dapita ang mga estudyante sa pagbasa sa Doktrina ug mga Pakigsaad 93:11–20, og mangita kon sa unsang paagi ang pag-uswag sa Manluluwas nagpakita kon unsay gitudlo diha sa 2 Nephi 28:30. Tabangi ang mga estudyante nga makasabot nga usa sa mga hiyas sa Manluluwas mao ang pailob ug nga kita mahimong mas sama Kaniya samtang kita mapailubon nga magkat-on sa pagtulun-an human sa usa ka pagtulun-an.

Dapita usab sila sa pagbasa sa Lucas 2:40, nga mangita og upat ka mga dapit sa pag-uswag sa Manluluwas nga gihisgotan niini nga bersikulo. Pahinumdumi ang mga estudyante sa programa sa Kabataan ug Kabatan-onan, ug awhaga sila sa paghimo ug sa paglihok sa mga tumong nga makatabang kanila nga mouswag sa pagtulun-an human sa usa ka pagtulun-an sa matag usa niadtong upat ka mga dapit.