2 Nephi 29

Makadawat og Dugang pa sa Pulong sa Dios

Daghang mga tawo ang nagtuo nga ang Biblia maoy pulong sa Dios. Apan, dili tanan kanila andam nga makadawat og dugang pa sa pulong sa Dios kay sa nabatonan na nila. Si Nephi nanagna nga sa kataposang mga adlaw, daghang mga tawo ang mosalikway sa Basahon ni Mormon tungod kay aduna na silay Biblia. Gusto sa Ginoo nga mahibaloan nato nga ang Iyang ebanghelyo para sa tanang tawo ug nga ang Iyang pulong dili limitado sa Biblia. Kini nga leksiyon gituyo aron sa pagtabang kanimo nga mahimong mas andam sa pagdawat sa pulong sa Ginoo sa imong kinabuhi.

Pagkat-on gikan sa Biblia ug sa Basahon ni Mormon.Ang Biblia ug ang Basahon ni Mormon magkauban nga kasulatan ug nagsuporta sa usag usa sa pagtudlo sa doktrina ni Jesukristo. Dugang pa, ang Basahon ni Mormon nagpahiuli sa yano ug bililhon nga mga kamatuoran nga nawala gikan sa Biblia. Tabangi ang mga estudyante nga makasabot nga kon magtuon kita sa Basahon ni Mormon, makapatin-aw kini sa atong pagsabot sa doktrina nga anaa sa Biblia.

Pagpangandam sa estudyante: Dapita ang mga estudyante sa paghunahuna kon unsay ilang gibuhat aron mahimong madinawaton sa komunikasyon gikan sa Dios.

Mga Posibleng Kalihokan sa Pagkat-on

Pagkahimong andam sa pagdawat og mas dakong pagsabot

Hunahunaa nga si Oliver, sa edad nga 15, nakahukom nga ang tanang impormasyon ug teknolohiya nga anaa kaniya nianang puntoha mao ra ang iyang gikinahanglan.

Kon gikinahanglan, ikonsiderar ang pag-adjust sa tuig sa mosunod nga pangutana aron mahimo kining mas makahuluganon sa imong mga estudyante.

• Unsa man ang mahimong mawala kang Oliver kon nadesisyonan niya kini sa tuig 1950? Unsang impormasyon o teknolohiya ang nahimong nagamit sukad niadto?

• Sa unsang paagi kini nga sitwasyon may kalabotan sa pagkat-on sa espirituhanong mga kamatuoran?

Dapita ang mga estudyante sa paghunahuna kon unsa nga mga panalangin ang moabot gikan sa pagkaandam o gani kahinam sa pagkat-on gikan sa Dios.

Samtang imong basahon ang mosunod nga pamahayag gikan ni Presidente Russell M. Nelson, hunahunaa kon unsa ang pasabot niini alang kanimo.

O, aduna pay daghang gusto sa inyong Amahan sa Langit nga inyong mahibaloan. Sama sa gitudlo ni Elder Neal A. Maxwell, “Alang niadtong adunay mga mata sa pagtan-aw ug mga dalunggan sa pagpaminaw, tataw kaayo nga ang Amahan ug ang Anak mihatag sa mga sikreto sa uniberso!” [“Meek and Lowly” (Brigham Young University devotional, Okt. 21, 1986), 9, speeches.byu.edu]. (Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96)

Aron matabangan ang mga estudyante sa pagtimbang-timbang sa ilang pagkamadinawaton sa pulong sa Dios sa ilang mga kinabuhi, ikonsiderar ang pag-apud-apod sa mosunod nga handout ug dapita ang mga estudyante sa pagkompleto niini sa tagsa-tagsa.

Ang Akong Tinguha sa Pagkat-on sa Espirituwal nga mga Kamatuoran gikan sa Dios

Manwal sa Magtutudlo sa Basahon ni Mormon—2 Nephi 29: Makadawat og Dugang pa sa Pulong sa Dios

Paggahin og kadiyot sa pagpamalandong sa imong kinaiya mahitungod sa pagdawat sa espirituhanong mga kamatuoran gikan sa Dios. Sulayi nga tan-awon kon unsa ang imong nahimo nga maayo ug kon diin ka mahimo nga molambo.

• Panagsa: 1

• Usahay: 2

• Kasagaran: 3

• Kanunay: 4

Gihatagan nako og bili ug gitun-an ang Biblia ug ang Basahon ni Mormon.

Nangita ko og mga tubag sa akong mga pangutana pinaagi sa pagtuon sa mga kasulatan.

Nagtinguha ko nga makat-on gikan sa Dios ug mahitungod Kaniya pinaagi sa mga kasulatan.

Nagtinguha ko ug nagsunod sa personal nga pagpadayag gikan sa Espiritu Santo.

Akong gitun-an ang mga pulong nga gisulti diha sa kinatibuk-ang komperensiya aron makat-on kon unsa ang gusto sa Dios nga akong mahibaloan.

© 2024 by Intellectual Reserve, Inc. All rights reserved.

Samtang magtuon ka karon, pangitaa kon unsay imong mahimo aron makapadayon sa pagkat-on sa tanan nga gusto sa Dios nga itudlo kanimo.

Lahi nga mga kinaiya sa pagdawat sa pulong sa Dios

Sa 2 Nephi 28–29, si Nephi nanagna mahitungod sa kinaiya sa pipila ka mga tawo sa ulahing mga adlaw mahitungod sa pagdawat og dugang pa sa pulong sa Dios. Basaha ang 2 Nephi 28:29 ug ang 2 Nephi 29:3, nga mangita sa unsay gitudlo ni Nephi ug sa Ginoo mahitungod sa unsay reaksiyon sa pipila ka mga tawo sa pagdawat og dugang nga kasulatan sa kataposang mga adlaw.

• Unsay imong napalgan?

• Unsa ang pipila ka mga rason nga ang mga tawo mahimong adunay ingon niini nga panglantaw?

Ikonsiderar ang pagpakita sa mosunod isip usa ka butang nga gamiton sa leksiyon [object lesson]. Hisgoti kon unsa ang dili mahimo sa usa ka nagkulob nga tasa, ug tabangi ang mga estudyante nga itandi kini niadtong kinsa misalikway sa Basahon ni Mormon.

Pagkuha og usa ka walay sulod nga tasa ug hunahunaa kon asa kini magamit. Karon kuloba kini. Magamit pa ba kini sa paagi nga kini gituyo nga gamiton? Itandi kini sa Basahon ni Mormon ug sa posible nga impluwensiya niini sa kinabuhi sa usa ka tawo.

• Unsa nga kahibalo ug mga panalangin sa imong hunahuna ang gusto sa Dios nga atong madawat pinaagi sa Basahon ni Mormon?

Atol sa leksiyon sa ibabaw nga naggamit og usa ka butang, hayanga ang tasa aron magsimbolo nga andam sa pagdawat. Mahimong maghatag ka og gagmay nga mga piraso sa papel ngadto sa matag estudyante. Dapita ang matag estudyante sa pagsulat og bisan usa ka butang nga gusto sa Dios nga atong mahibaloan o madawat pinaagi sa Basahon ni Mormon. Mahimong pun-on sa mga estudyante ang tasa sa ilang mga tubag. Ikonsiderar ang pagbasa niini og kusog aron matabangan ang mga estudyante nga makaila unsa nga dagkong mga panalangin ang mahimong maanaa niadtong andam nga modawat niini.

Basaha ang 2 Nephi 29:7–11, nga mangita sa unsay gusto ni Jesukristo nga mahibaloan sa mga tawo kinsa misalikway sa Basahon ni Mormon.

Ang ubang mga estudyante mahimong makadiskobre og dugang pa kon sila mobasa nga magkauban diha sa gagmay nga grupo. Ikonsiderar ang pagbahin sa mga estudyante ngadto sa mga grupo aron basahon ang mga bersikulo 7–11 kon kini mas makatubag sa ilang mga panginahanglan.

• Unsa ang kamatuoran nga imong nakat-onan mahitungod ni Jesukristo gikan niini nga mga bersikulo?

Hatagi ang mga estudyante og oportunidad sa pagpaambit og lain-laing mga kamatuoran, ug dapita ang mga estudyante sa pagpasabot kon unsa ang mahimong epekto niini nga mga kamatuoran.

Usa ka kamatuoran nga atong makat-onan mao nga ang Dios nahinumdom sa tanang katawhan ug nakig-istorya kanila sa tanang mga nasod.

• Unsa ang pipila sa nagkalain-laing mga paagi nga ang Dios nakig-istorya ngadto sa Iyang mga anak sa tanang mga nasod?

• Unsa nga mga kasinatian ang nakatabang kanimo nga makaamgo nga ang Dios nahinumdom kanimo ug nakig-istorya kanimo?

ChurchofJesusChrist.org

Ikonsiderar ang pagtapos sa leksiyon pinaagi sa pagdapit sa mga estudyante sa pagpamalandong kon sa unsang paagi sila mahimong mas madinawaton sa pulong sa Dios. Usa ka paagi sa pagbuhat niini mao ang pagdapit sa mga estudyante sa pagkompleto sa mosunod nga mga lakang diha sa ilang journal sa pagtuon. Human ang mga estudyante adunay igong panahon sa pagkompleto sa mga lakang, pagpamatuod sa mga kamatuoran nga imong nahisgotan.

1. Paghimo og lista sa tanang paagi nga gihimo sa Dios ang Iyang pulong nga mahimong maangkon nimo.

2. Pamalandongi kon unsa ka kaandam nga modawat sa pulong sa Dios pinaagi sa matag usa niini nga mga paagi. (Mahimo kang magdrowing og usa ka yano nga tasa sunod sa matag paagi nga imong gibati nga labing madinawaton sa pagpaminaw sa Ginoo.)

3. Isulat ang usa o daghang mga kausaban nga imong mahimo aron mas andam sa pagdawat sa pulong sa Dios sa mas daghan niini nga mga paagi.

Komentaryo ug Background nga Impormasyon

Unsa ang akong mahimo aron sa pagpaminaw sa unsay buot sa Dios nga akong madungog?

Tan-awa ang “#PaminawKaniya: Si Presidente Nelson Nagdapit Kanato sa Pagpaminaw sa Tingog sa Ginoo” (2:32) aron sa pagkat-on sa importante nga tambag gikan ni Presidente Russell M. Nelson.

Si Presidente Nelson mitudlo usab:

Walay lain nga makabukas sa kalangitan sama sa kombinasyon sa nagtubo nga kaputli, hingpit nga kamasulundon, sinserong nangita, inadlaw nga magbusog sa mga pulong ni Kristo diha sa Basahon ni Mormon, ug regular nga panahon nga ipasalig alang sa buhat sa templo ug family history.

Sa tinuod lang, aduna tingali mga higayon nga inyong bation nga daw sirado ang kalangitan. Apan ako mosaad nga samtang kamo magpadayon nga magmasulundon, mopahayag og pasalamat alang sa matag panalangin nga gihatag sa Ginoo kaninyo, ug samtang kamo mapailobon nga motahod sa panahon sa Ginoo, pagatagaan kamo sa kahibalo ug pagsabot nga inyong gipangita. (Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96)

Sa unsang paagi ang Dios nakig-istorya kanato pinaagi sa Basahon ni Mormon?

Aduna pa bay dugang mga basahon sa kasulatan sa umaabot?

Si Presidente Dallin H. Oaks sa Unang Kapangulohan miingon:

Ang Ginoo sa kataposan mopahinabo sa dinasig nga mga pagtulun-an nga Iyang gihatag ngadto sa Iyang mga anak sa nagkalainlaing kanasoran nga ipadayag alang sa kaayohan sa tanang mga tawo. Kini maglakip sa mga asoy sa pagbisita sa nabanhaw nga Ginoo ngadto sa atong gitawag nga nawala nga mga tribo sa Israel ug sa Iyang mga pagpadayag ngadto sa tanang mga binhi ni Abraham. …

Kon bag-o nga mga kasulatan motunga—ug sumala sa panagna mahitabo gayod—maglaom kita nga dili kini tagdon nga may pagsalikway nga gihimo sa uban sa Basahon ni Mormon tungod kay aduna silay Biblia. (Dallin H. Oaks, “Tanang Tawo sa Tanang Dapit,” Liahona, Mayo 2006, 80)

Dugang nga mga Kalihokan sa Pagkat-on

2 Nephi 29:7, 11. Ang pulong sa Ginoo diha sa tanan nga mga nasod

Usa ka paagi sa pagtabang sa mga estudyante nga makasabot nga si Jesukristo namulong sa mga tawo sa tanang kanasoran mao ang pagpakita og mapa sa kalibotan ug dapita ang mga estudyante sa pag-ila sa pipila sa daghan nga mga nasod sa yuta.

Tabangi ang mga estudyante nga makasabot nga si Jesukristo mao ang pangulo niining tibuok kalibotan nga Simbahan ug namulong sa mga tawo sa tanan nga mga nasod. Sama pananglit, mahimo nimong ipasabot nga ang mga lider sa Simbahan karon naggikan sa daghang bahin sa kalibotan. Si Presidente Russell M. Nelson misulti sa mosunod atol sa sesyon sa Dominggo sa buntag sa kinatibuk-ang komperensiya niadtong Abril 2021:

Karong buntaga, nakadungog kita gikan sa mga lider sa Simbahan nga naggikan sa matag gipamuy-an nga kontinente sa kalibotan. Sa pagkatinuod, ang mga panalangin sa ebanghelyo alang kini sa matag kaliwat, pinulongan, ug katawhan. Ang Simbahan ni Jesukristo usa ka tibuok kalibotan nga simbahan. Si Jesukristo ang atong pangulo. (Russell M. Nelson, “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 102)

Mahimong makalingaw alang sa mga estudyante ang pagpangita kon kinsa nga mga lider sa Simbahan ang namulong sa pinakabag-o nga kinatibuk-ang komperensiya ug itudlo kon asa nga mga nasod sila gikan.

Usa ka kahibalo ni Jesukristo pinaagi sa Basahon ni Mormon

Tabangi ang mga estudyante nga makaila nga ang Basahon ni Mormon makatabang nato nga makaila ni Jesukristo ug sa Iyang ebanghelyo. Mahimong basahon sa mga estudyante ang 2 Nephi 30:3–8, nga mangita sa mga panalangin nga giingon ni Nephi nga moabot tungod sa daghang mga tawo sa kataposang mga adlaw kinsa motuo sa Basahon ni Mormon. Mahimo usab nimong ipaambit ang lain-laing mga pamahayag gikan sa daghang mga babaye ug mga lalaki kinsa mipaambit sa ilang pagsaksi sa Basahon ni Mormon diha sa kinatibuk-ang komperensiya. Dugang pa, ikonsiderar ang pagpaambit sa imong personal nga pagpamatuod ug dapita ang mga estudyante sa pagpaambit kon sa unsang paagi sila nakaila sa ilang Manluluwas pinaagi sa pagtuon sa Basahon ni Mormon.