Seminare
2 Nifae 31–33: Vaaiga Aoao

“2 Nifae 31–33: Vaaiga Aoao,” Tusi Lesona a le Faiaoga o le Tusi a Mamona (2024)

“2 Nifae 31–33: Vaaiga Aoao,” Tusi Lesona a le Faiaoga o le Tusi a Mamona

2 Nifae 31–33

Vaaiga Aoao

Na aoao mai Nifae o le mulimuli ia Iesu Keriso e ala i le papatisoina ma le mauaina o le Agaga Paia sa taua tele i le faaolaina i le malo o le Atua. Ina ua uma ona aoao atu lona nuu e uiga i le mulimuli ia Iesu Keriso i luga o le ala o feagaiga, sa lagona e Nifae sa latou le mautinoa lava po o le a le mea e fai pe a uma le papatisoga. Sa ia tali atu e ala i le uunaia o i latou ia “taumamafa fiafia i afioga a Keriso” ma faamautinoa atu ia i latou o afioga a le Faaola o le a taialaina ai i latou i luma (2 Nifae 32:3). Sa ia faamanatu atu foi ia i latou le taua o le tatalo ma faamanuiaga e oo mai mai fesootaiga faifaipea ma lo tatou Tama Faalelagi.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

2 Nifae 31:1–13

Faamoemoega o le lesona: O lenei lesona e mafai ona fesoasoani i tagata aoga ia malamalama atili ma faamatala le taua o le papatisoga ma faamanuiaga e maua mai ai.

  • Sauniuniga a le tagata aoga: Uunaia tagata aoga e mafaufau pe faapefea ona latou faamatalaina le mafuaaga o le a manao ai se tagata e papatiso. Afai latou te mananao ai, e mafai ona latou fesili atu i se toatasi pe toalua o le aiga po o ni uo pe aisea na latou filifili ai e papatiso.

  • Vitio: “O Le Papatisoga o Iesu” (2:54); “Papatisoga” (3:13)

  • Fautuaga faafaiaoga vitio: A uma ona faitau e tagata aoga le 2 Nifae 31:5–11, mafaufau e faaali atu se tasi pe sili atu o fuaiupu e te manao e talanoaina. Valaaulia tagata aoga e faaaoga le meafaigaluega o faamatalaga faailogaina, pe afai o maua, e faailoga ai vaega o soo se fuaiupu e tulaga ese ia i latou ma faasoa mai mea na latou aoaoina mai na upu po o fasifuaitau.

2 Nifae 31:14–21

Faamoemoega o le lesona: O lenei lesona e mafai ona fesoasoani i tagata aoga e faateleina ai lo latou manao e fetaomi atu i luma ma tumau e oo i le iuga ina ia i ai se aso latou te ausia ai lo latou taunuuga faaiu: o le ola e faavavau faatasi ma lo latou Tama Faalelagi.

  • Sauniuniga a le tagata aoga: Valaaulia tagata aoga e o mai saunia i le vasega e faasoa mai pe faapefea ona latou fesoasoani i se tasi o loo tauivi ia manao e agai pea i luma i le amiotonu i la latou malaga e toe foi atu ai i le Tama Faalelagi.

  • Anotusi e faaali atu: O fesili e lua i le amataga o le lesona mo tagata aoga e tali i totonu o a latou api talaaga

  • Vitio: “E Le Tuua Lava Na o Oe” (2:54); “Ua Aoao Atu e Nifae le Aoaoga Faavae a Keriso” (5:10; matamata mai le faailotaimi 2:55 i le 3:47); “O a Taeao e Faia ai e Ieova o Mea Ofoofogia i o Outou Luma” (19:24; matamata mai le faailotaimi 15:12 i le 16:20)

  • Fautuaga faafaiaoga faavitio: Pe a talosagaina tagata aoga e tusi ata ma faaigoa le ala o loo faamatalaina i le 2 Nifae 31:17–20, mafaufau e valaaulia i latou e tusi se ata, a le o luga o se fasipepa pe faaaoga a latou komepiuta po o masini feaveai. E mafai foi ona e valaaulia se tagata aoga se toatasi e tusi se ata e faaaoga ai le meafaigaluega o le laupapa paepae.

2 Nifae 32:1–7

Faamoemoega o le lesona: O lenei lesona ua faamoemoe e fesoasoani ai i tagata aoga e taumamafa fiafia i afioga a Iesu Keriso.

  • Sauniuniga a le tagata aoga: Valaaulia tagata aoga e faatusatusa a latou suesuega patino o tusitusiga paia i le tausami i meaai ma uunaia i latou e o mai saunia e faasoa mai o latou manatu i le taimi o le vasega.

  • Anotusi e faaali atu: Ata o meaai e pei o se meaai māmā, se ‘aiga, ma se taumafataga

  • Vitio: “Sau Mulimuli Mai ia te A’u—Lito” (0:59)

  • Fautuaga faafaiaoga faavitio: I le avea ai o se vaega o la outou talanoaga i le uiga o le taumamafa fiafia i afioga a Keriso, atonu e fiafia tagata aoga e sue a latou lava ata e faaalia ai meaai latou te fiafia i ai. Valaaulia i latou e faaaoga a latou komepiuta po o masini feaveai e saili ai mo ata o meaai latou te fiafia e taumamafa ai, ma fai atu ia i latou e faasoa mai ata o loo i luga o le lau.

Atamai i Aoaoga Faavae: 2 Nifae 32:3

Faamoemoega o le lesona: O lenei lesona e mafai ona fesoasoani i tagata aoga e tauloto le mau faasino o le atamai i aoaoga faavae ma le fasifuaitau autu o mau mo le 2 Nifae 32:3, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga masani o le olaga.

  • Sauniuniga a le tagata aoga: Atonu na maua e tagata aoga se avanoa e faataitai ai le “taumamafa fiafia i afioga a Keriso” i le faaiuga o le lesona talu ai. Valaaulia i latou e faaauau pea ona faataitai i a latou suesuega faaletagata lava ia o tusitusiga paia ma o mai saunia i le vasega e faasoa mai e uiga i o latou aafiaga.

  • O anotusi e faaali atu: O se ata o se laulau ua setiina

  • Fautuaga faafaiaoga faavitio: Mafaufau e vaevae tagata aoga i ni vaega taitoatolu ma tuu i ni potu e talanoa ai e faamatala ai mataupu faavae o le mauaina o le malamalama faaleagaga i le tasi ma le isi. Afai e le malamalama se tagata i se tasi o mataupu faavae, valaaulia isi i le vaega e fesoasoani ia i latou.

2 Nifae 32:8–9

Faamoemoega o le lesona: O lenei lesona e mafai ona fesoasoani i tagata aoga e faateleina lo latou manao e fesootai ma lo latou Tama Faalelagi e ala i le tatalo.

  • Sauniuniga a le tagata aoga: Mafaufau e valaaulia tagata aoga e matau pe faafia ona latou tatalo ma pe aisea foi.

  • Vitio: “Ou te Tatalo Pe a …” (1:56); “E Finagalo le Atua e te Tatalo” (3:28)

  • Pepa e Tufa atu: “Aoao Atili e uiga i le Tatalo”

  • Fautuaga faafaiaoga faavitio: A uma ona fai e tagata aoga ia le itiiti ifo ma le lua o gaoioiga e tolu e lata i le faaiuga o le lesona, valaaulia i latou e tusi se fuaiupu se tasi i le vaega o talanoaga e aotele ai se mea se tasi na latou aoaoina pe sa taua ia i latou. Valaaulia ni nai tagata aoga e faasoa mai mea na latou tusia.