2 Nifae 32:1–7

“Taumamafa Fiafia i Afioga a Keriso”

Vaai faalemafaufau i se taumafataga faamanatu ma le tele o taumafa mananaia. E faapefea ona e vaai ia te oe lava o loo fiafia i se taumafataga faapena? Ina ua uma ona aoao atu lona nuu e uiga i le mulimuli ia Iesu Keriso i luga o le ala o feagaiga, sa lagona e Nifae sa latou le mautinoa lava po o le a le mea e fai pe a uma le papatisoga. Sa ia tali atu e ala i le uunaia o lona nuu e “taumamafa fiafia i afioga a Keriso” ma faamautinoa atu ia i latou o afioga a le Faaola o le a taialaina ai i latou i luma (2 Nifae 32:3). O lenei lesona ua faamoemoe e fesoasoani ia te oe e taumafa fiafia ai i afioga a Iesu Keriso.

O Le Aafiaga a le Tagata Aoao. A o tatou faataunuuina le Faamoemoega o Seminare ma Inisitituti, ua tatou faamoemoe e fesoasoani i tagata aoga taitasi ia oo i le liua, talafeagai, ma le faa-auai. Vaavaai mo ni auala e fesoasoani ai i tagata aoao ia liua ia Iesu Keriso, faafesootai mea o loo latou aoaoina i o latou tulaga faaletagata lava ia, ma lagona le saogalemu ma le lagolagoina i lo latou aoaoina.

Sauniuniga a le tagata aoga: Valaaulia tagata aoga e faatusatusa a latou suesuega patino o tusitusiga paia i le tausami i taumafa ma uunaia i latou e o mai saunia e faasoa mai o latou manatu i le taimi o le vasega.

Gaoioiga e Ono Mafai Ona Aoao Ai

Taimi o le ai!

Ina ia amata le vasega, nai lo le faaali atu o ata o loo i lalo, mafaufau e valaaulia ni tagata aoga se toalua e faatino mai mea nei a o mate mai e le vaega o totoe o le vasega le mea o loo faatinoina: taumafaina o se meaai māmā, taumafaina o se taumafataga mamafa, ma le taumafa i se fiafia po o se aso faamanatu.

Vaai i ata nei ma mafaufau e uiga i mea e tutusa ai ma eseese ai i le va o le taumafaina o se meaai mama, taumafaina o se taumafataga mamafa, po o le taumafa i se fiafia faapitoa.

• O a ni mea e tutusa ai ma ni eseesega na e mafaufau i ai?

• Afai tatou te faatusatusa le suesueina o afioga a Keriso i nei auala e tolu o taumafataga, o le a se mea e ono faatusa i ai nei mea taitasi?

E finagalo le Tama Faalelagi ma Iesu Keriso e faamanuia oe i le taialaina, taitaiga, fesoasoaniga, ma le faamafanafanaga. Mafaufau i le taimi mulimuli na e suesueina ai afioga a le Faaola. E mafai ona e faamatalaina le aafiaga o le taumafa ai i se meaai mama, tausamiga, po o le talisuaga? Ae faapefea i le taualumaga o le vaiaso po o le masina ua tuanai? A o faaauau lau suesuega, saili le fesoasoani a le Agaga Paia e iloa ai pe na faapefea ona avea le suesueina o afioga a Keriso ma se faamanuiaga i lou olaga. Ia saili foi musumusuga e fesoasoani ia te oe e iloa ai pe faapefea ona faaleleia au taumafaiga e taumafa fiafia ai i afioga a Keriso.

O afioga a Iesu Keriso

Manatua na aoao atu e Nifae lona nuu e uiga i le “ala lauitiiti ma le vaapiapi e tau atu i le ola e faavavau” ma agavaa e amata ai lena malaga (tagai i le 2 Nifae 31:17–18). Na iloa e Nifae na taumanatunatu lona nuu po o le a le mea e fai pe a uma ona maua le sauniga o le papatisoga ma le auala e faaauau ai pea i luga o le ala o feagaiga.

Faitau le 2 Nifae 32:1–3, ma vaavaai mo le fautuaga a Nifae e uiga i le suesueina o afioga a Keriso. A o e faia, mafaufau i ou lava atugaluga, fesili, ma manaoga ma le auala e mafai ona faamanuiaina ai oe i aoaoga a Nifae. Atonu e fesoasoani le iloa o le fasifuaitau “tautatala i le gagana a agelu” (2 Nifae 32:2) “o lona uiga faigofie [ia] … tautala atu ma le mana o le Agaga Paia” (Boyd K. Packer, “The Gift of the Holy Ghost: What Every Member Should Know,” Ensign, Aug. 2006, 50).

O le2 Nifae 32:3 o se fuaitau o le atamai i aoaoga faavae.  Mafaufau e faailoga fuaitau o le atamai i aoaoga faavae i se ala iloga ina ia mafai ai ona e mauaina gofie. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

• O le a se mea na e mauaina?

A o faasoa mai e tagata aoga mea na latou maua, faalogo ma le toto’a ma tusi soo se mataupu faavae moni latou te faasoa atu i luga o le laupapa.

O se tasi o upumoni atonu na e mauaina mai le 2 Nifae 32:3 o le pe a tatou taumamafa fiafia i afioga a Iesu Keriso, o le a latou ta’u mai ia i tatou mea uma e tatau ona tatou faia. Mafaufau e faailoga lenei upumoni i au tusitusiga paia.

• O fea e mafai ona tatou maua ai afioga a Iesu Keriso?

• Aisea e te manatu na faaaoga ai e Nifae le upu “taumamafa fiafia“ ina ua faamatalaina le ala e tatau ona tatou suesue ai i afioga a le Faaola (2 Nifae 32:3)?

Faitau le saunoaga lea a Elder Takashi Wada o le Fitugafulu. Afai e maua, mafaufau e matamata le savali a Elder Wada i le ChurchofJesusChrist.org mai le faailotaimi 0:53 i le 1:42.

A o ou laitiiti, sa ou manatu o le taumafa fiafia o le faia lea o se taumafataga telē o le araisa, sushi ma le sosi. Ua ou iloa nei o le taumafa fiafia e sili atu i lo le olioli i se taumafataga manogi. O se aafiaga o le olioli, faafailelega, faafiafiaga, fetufaaiga, faailoaina o le alofa i aiga ma ē pele, tuuina atu o a tatou faafetai i le Atua, ma le fausiaina o sootaga a o olioli i le anoano o taumafa ua matua sasala le manogi. Ou te talitonu a tatou taumamafa fiafia i afioga a Keriso, e tatau ona tatou mafaufau i lea lava aafiaga e tasi. O le taumamafa fiafia i tusitusiga paia e le na o le faitau i ai. E tatau ona aumaia ia i tatou le olioli moni ma fausia ai o tatou sootaga ma le Faaola. (Takashi Wada, “Taumamafa Fiafia i Afioga a Keriso,” Liahona, Me 2019, 38–39)

• O le a se mea sa tulaga ese ia te oe mai le saunoaga a Elder Wada?

  Mafaufau e faaaoga nisi o fesili po o fesili uma nei e fesoasoani ai i tagata aoga e iloilo ai le upumoni taua.

  Valaaulia nisi o tagata aoga e tali mai ma mafaufau e lisi mea latou te fai atu ai i luga o le laupapa. Afai e manaomia, faamanatu atu ia i latou mea nei:

• O le a se mea e fesoasoani ia te oe, pe mafai foi ona fesoasoani ia oe, e le na o le faitauina o afioga a Keriso ae taumafa fiafia i ai?

• O le manatuaina o mea ua e iloa e uiga ia Iesu Keriso, aisea e ono aumaia ai e Ana afioga lagona o le olioli, faamalieina, ma le alofa?

• E mafai faapefea e le taumamafa fiafia i afioga a le Faaola ona saunia le taitaiga mo lou olaga ma ta’u atu mea e tatau ona e faia?

Afai e mafai, matamata le “Sau Mulimuli Mai ia te A’u—Lito” (0:59), o loo maua i le ChurchofJesusChrist.org, e aoao ai pe mafai faapefea e le Alii ona faaali mai le malamalama ma le upumoni a o e taumafa fiafia i Ana afioga.

O le mafaufau i ou lava aafiaga e mafai ona fesoasoani ia te oe e taumafa fiafia ai i afioga a Keriso.

E tele metotia suesue e faaleleia ai le taumamafa i afioga a Keriso e mafai ona fesoasoani, e aofia ai le tatalo mo musumusuga ae e te lei suesue, fai atu ni au fesili a o lei faia ma i le taimi o suesuega, faamatalaina o upu, mafaufau loloto, fefaasinoa’i, tusitusia o faamatalaga, vaavaai mo upumoni e uiga i le Tama Faalelagi ma le Faaola, ma le faatatauina o tusitusiga paia i o tatou lava olaga (Tagai 1 Nifae 19:23).

• O a ni uunaiga lautele po o se taitaiga patino ua oo mai ia te oe a o taumafa fiafia i afioga a Keriso?

Taumamafa i afioga a Keriso

Tuu atu i tagata aoga ia lava se taimi talafeagai mo le gaoioiga lenei. Faasino tagata aoga i manatu o i le laupapa mo metotia suesue e mafai ona latou faataitaia a o latou faamaeaina le gaoioiga o le taumamafa fiafia.

I le faaaogaina o mea ua e aoaoina i le aso, faaaoga ni nai minute e faataitai ai le taumamafa fiafia i afioga a Keriso. E mafai ona aofia ai le suesueina o tusitusiga paia po o upu a perofeta. Taumafai e ausia se tasi pe sili atu o mea nei a o e taumafa fiafia:

• Fausia lau sootaga ma le Tama Faalelagi ma Iesu Keriso.

• Alofa ma faalagolago atili ia i Laua.

• Saili upumoni e aumaia ia te oe le olioli ma le faamalieina.

• Maua le taitaiga mo mea e tatau ona e faia i lou olaga.

Tusifaamaumau nisi o mea na e aoaoina, lagonaina, ma oo i ai a o taumafa fiafia i afioga a Keriso.

Mo nai minute mulimuli o le vasega, valaaulia ni nai tagata aoga e faasoa mai e uiga i o latou aafiaga i le taumamafa fiafia i afioga a Keriso. Pe a talafeagai, uunaia i latou e faasoa mai upumoni na latou maua, o latou lagona, po o le taitaiga na latou mauaina. O le faalogo atu i a latou tupulaga e mafai ona avea ma se aafiaga mamana mo tagata aoga.

Mafaufau e faasoa atu ou lava aafiaga ma tuuina atu lau molimau i faamanuiaga tatou te maua a o tatou taumamafa i afioga a Keriso.

Manatu ma Talaaga o Faamatalaga

2 Nifae 32:2. E mafai faapefea ona ou tautala i le gagana a agelu?

Sa faamalamalama mai e Elder Jeffrey R. Holland o le Korama a Aposetolo e Toasefululua e faapea, a tatou tautatala atu ma le fiafia ma le alofa i isi, ua tatou tautatala i le gagana a agelu.

Uso e ma tuafafine, i lenei sailiga umi e faavavau ina ia avea atili e faapei o lo tatou Faaola, ia tatou taumafai ina ia avea o ni alii ma ni tamaitai “atoatoa” ia le itiiti ifo i lenei ala e tasi i le taimi nei—ia le faatiga lava i se upu po o i se isi tulaga lelei e faaupu ai, e ala i se gagana fou, o le gagana lea a agelu. O a tatou upu, e faapei foi o a tatou amioga, e ao ina tumu i le faatuatua ma le faamoemoe ma le alofa mama, o mataupu faavae sili faaKerisiano nei e tolu e matua manaomia lava i le lalolagi i le taimi nei. Faatasi ai ma ia upu, e tautalagia i le uunaiga a le Agaga, e mafai ai ona faamatu loimata, e mafai ona faamaloloina loto, e mafai ona siitia olaga, e mafai ona toe foi mai le faamoemoe, e mafai ona manumalo le mautinoa. (Jeffrey R. Holland, “O Gagana a Agelu,” Liahona, Me 2007, 18)

E mafai faapefea e le taumamafa fiafia i afioga a Iesu Keriso i tusitusiga paia ona faaali mai ia te a’u le mea e fai?

Na aoao mai Elder Spencer J. Condie o le Fitugafulu:

Atonu e te feagai ma le faiga o ni faaiuga e faatatau i se misiona, o lau galuega i le lumanai, ma, mulimuli ane o se faaipoipoga. A o e faitau i tusitusiga paia ma tatalo mo se taitaiga, atonu e te le vaai tino i le tali i se ituaiga o upu ua lomia i luga o itulau, ae a o e faitau, o le a e mauaina ni uunaiga uiga ese, ma ni musumusuga, ma, e pei ona folafola mai, o le Agaga Paia “o le a faaali mai e ia ia te outou mea uma e tatau ona outou faia” [2 Nifae 32:5]. (Spencer J. Condie, “Becoming a Great Benefit to Our Fellow Beings,” Ensign, Me 2002, 45)

Aisea e manaomia ai ona ou taumafa e le aunoa i afioga a le Faaola?

Matamata le vitio “Areto o Aso Taitasi: Mamanu” (2:51) e aoao ai mai ia Elder D. Todd Christofferson o le Korama a Aposetolo e Toasefululua pe aisea e tutusa ai le taua o le fafagaina o o tatou agaga ma le fafagaina o o tatou tino faaletino.

Gaoioiga Faaopoopo e Aoao Ai

Taitaiga i Mea Uma

Ina ia fesoasoani i tagata aoga ia malamalama i le sootaga i le va o le taumamafa fiafia i afioga a Keriso ma le taitaiga e le Agaga Paia, mafaufau e faitau le 2 Nifae 32:3, 5 ma valaaulia i latou e faailoga le fasifuaitau “ta’u mai ai ia te outou mea uma” i le fuaiupu 3 ma “faaali mai [e ia] ia te outou mea uma” i le fuaiupu 5. E mafai ona faaaoga fesili nei mo talanoaga:

• E mafai faapefea e afioga a Iesu Keriso ona tuuina atu ia te oe le taitaiga patino ma le fesoasoani?

• E faapefea e le taumamafa fiafia i afioga a Keriso ona fesoasoani e saunia oe e maua le taitaiga ma le faamafanafanaga mai le Agaga Paia?

• O a ni aafiaga ua e iloa i le mea na faaali atu ai e le Agaga Paia i se tasi le mea e fai po o le auala e tali atu ai i ni tulaga patino?

O faataitaiga i tusitusiga paia

Mafaufau e valaaulia tagata aoga e mafaufau i faataitaiga i tusitusiga paia pe mai le talafaasolopito o le Ekalesia ina ua taialaina e afioga a Keriso se tasi i a latou faaiuga. Afai e manaomia e tagata aoga se fesoasoani e mafaufau ai i ni faataitaiga, e mafai ona e lisiina mau nei i luga o le laupapa ma valaaulia vaega eseese o tagata aoga e faitau le fuaitau ma faasoa mai i le vasega mea na latou aoaoina.

• Iosefa Samita—Talafaasolopito 1:11–14

• Iosua 1:7–8

• 2 Tupu 23:1–3

• Mataio 4:1–11

Iloiloga faaletagata lava ia

Mafaufau e tusi le lisi lenei i luga o le laupapa ma valaaulia tagata aoga e mafaufau pe faapefea ona latou suesue i afioga a Iesu Keriso i faatulagaga taitasi nei. E mafai ona latou fuaina i latou lava e faaaoga ai le upu meaai māmā, taumafa, po o le taumafa fiafia. Afai latou te le o suesueina i le taimi nei pe o taumafai e faalogo i se tasi o nei faatulagaga, e mafai ona latou faaaogaina le upu pasi.

1. Suesuega faaletagata lava ia o tusitusiga paia

2. Suesuega o le talalelei e faatotonugalemu-i-le-aiga ma le aiga

3. Sauniga faamanatuga

4. Konafesi aoao

5. Seminare

6. Aoga Sa

7. Vasega a Tamaitai Talavou po o le fonotaga a le korama o le Perisitua Arona

Valaaulia tagata aoga e faasoa mai nisi o o latou manatu i auala e mafai ona latou taumamafa fiafia atili ai i afioga a Keriso i se nofoaga faapitoa. E mafai foi ona e valaaulia tagata aoga e faasoa mai pe na faapefea ona faamanuiaina i latou i le taumamafa fiafia i se nofoaga faapitoa. Valaaulia tagata aoga e faatu se sini e faaleleia ai i se tasi o vaega nei.