2 Nifae 31:14–21

“E Ao Ina Outou Fetaomi Atu i Luma”

O nisi taimi o le malaga agai atu i le ola e faavavau e mafai ona foliga faigata. E lei tuua lava i tatou e lo tatou Tama Faalelagi ma Lona Alo, o Iesu Keriso, i lenei malaga na o i tatou; La te finagalo e fesoasoani ia i tatou i luga o le ala. O lenei lesona e mafai ona fesoasoani ia te oe e faateleina ai lou manao e fetaomi atu i luma ma tumau ai e oo i le iuga ina ia i ai se aso o le a e taunuu ai i lou taunuuga faaiu: o le ola e faavavau faatasi ma lou Tama Faalelagi.

O le vaai atu i tagata aoga e pei ona silasila mai i ai le Alii ia i latou. Pe a taumafai faiaoga e alolofa e pei ona alofa mai le Faaola, e amata ona latou vaai atu i isi e pei ona Ia silasila mai o Ia ia i latou. O le alofa faaKeriso e musuia ai faiaoga ia tumau i le fesoasoani atu i tagata aoga taitasi ia liua moni. E mafai ona fesoasoani le Agaga Paia ia te oe ia iloa le taua paia o tagata aoga uma ma fesoasoani ia i latou ia ausia o latou gafatia.

Sauniuniga a le tagata aoga: Valaaulia tagata aoga e o mai saunia i le vasega e faasoa mai pe faapefea ona latou fesoasoani i se tasi o loo tauivi ia manao e agai pea i luma i le amiotonu i la latou malaga e toe foi atu ai i le Tama Faalelagi.

Gaoioiga e Ono Mafai Ona Aoao Ai

O la tatou malaga mamao

Mafaufau e faaali atu se ata o se tagata tamoe po o se tuuga, e pei o le ata o loo i le amataga o le lesona lenei. Fesili atu pe i ai se tagata aoga na tamoe i se tuuga mamao ma fai atu ia i latou e faamatala mai mea na latou oo i ai.

Afai e aoga, fetuunai lenei faataitaiga i soo se isi lava gaoioiga e ono manaomia ai le tumau e ono fesootai i au tagata aoga.

• I se tuuga mamao, o a ni mea e ono mafua ai ona manao se tagata tamoe e faamaamulu?

• O le a se mea e ono uunaia ai se tagata tamoe e faamae‘a le tuuga pe a faasolo ina faigata?

Afai e mafai, matamata le “E Le Tuua Lava Na o Oe,” o loo maua i le ChurchofJesusChrist.org, mai le faailotaimi 0:00 i le 1:25. I lenei vitio, na toe faamatala ai e Peresitene Elaine S. Dalton, o le sa avea ma Peresitene Aoao o Tamaitai Talavou, ona tauiviga i se tuuga mamao.

Faatusatusa lau malaga e toe foi atu e nonofo faatasi ma le Tama Faalelagi i se tuuga mamao. Mafaufau loloto i fesili nei:

Mafaufau e faaali atu fesili nei ma valaaulia tagata aoga e tusifaamaumau a latou tali i a latou api talaaga mo suesuega.

• O le a se mea o faaosofia ai oe, pe e mafai ona faaosofia ai oe, e fetaomi atu ai i luma i lau malaga e toe foi atu i le Tama Faalelagi?

• O a ni luitau o feagai ma oe?

A o e suesueina lenei lesona, vaavaai mo upumoni po o malamalamaaga e ono fesoasoani ia te oe e faatoilalo ai ou luitau ma taumafai ai e toe foi atu i lou Tama Faalelagi.

O se valaaulia paia

Ina ua uma ona aoao atu Nifae e uiga i le papatisoga ma le mauaina o le Agaga Paia, sa ia aoao atu se isi vaega taua o le aoaoga faavae a Keriso e faaaoga ai se upusii tuusao mai le Tama Faalelagi. Faitau le Nifae 31:15 ma vaavaai mo mea na aoao mai e le Tama Faalelagi.

• O le a sou manatu i le uiga o le tumau e oo i le iuga?

• O le a sou manatu o le a le eseesega i le va o le na o le tumau, ma le tumau e ala i le mulimuli i le faataitaiga a le Faaola?

Sa faaaoga e Nifae ata faatusa e fesoasoani ia i tatou e vaai faalemafaufau ai i la tatou malaga e toe foi atu i le Tama Faalelagi. Faitau le 2 Nifae 31:17–20 ma tusi se ata faigofie o le ala na faamatalaina e Nifae. Faailoga po o a mea o loo faatusa i ai vaega eseese i luga o le ala.

• E faapefea ona e aoteleina le mea na e aoaoina?

O se tasi o mea tatou te aoao mai i nei fuaiupu o le, a o tatou mulimuli i le faataitaiga a le Faaola ma tumau e oo i le iuga, o le a tatou maua le ola e faavavau faatasi ma lo tatou Tama Faalelagi.

• Aisea e te manao ai e maua le ola e faavavau faatasi ma lou Tama Faalelagi?

Fetaomi atu i luma

I le fuaiupu 19–20, na lisi ai e Nifae ni uiga faaalia ma ni faatinoga eseese e manaomia e fetaomi atu ai i luma i luga o le ala agai i le ola e faavavau. Toe faamanatu fuaiupu nei ma lisi i luga o le ala na e tusia ia uiga faaalia ma faatinoga e te mauaina. Afai e te manao e vaai i se vitio o loo faaalia ai Nifae o tuuina atu nei aoaoga, matamata le “Ua Aoao Atu e Nifae le Mataupu Faavae a Keriso,” faailotaimi 2:55 i le 3:47, o loo maua i le ChurchofJesusChrist.org, ma mulimuli i ai i au tusitusiga paia.

Faaalu sina taimi e faatulaga ai oe lava i se fuafaatatau o le 1–5 (1 le maualalo; 5 le maualuga) i le lelei o lou malamalama ma o loo taumafai e ola i nei uiga faaalia ma faatinoga.

Filifili se tasi o fasifuaitau e te manao e malamalama i ai pe ola lelei atili ai. Saili se mau po o se upusii e fesoasoani e faateleina ai lou malamalama. Mafaufau e faaaoga le Taiala o Autu, Taiala i Tusitusiga Paia, Gospel Library app, lauga o konafesi aoao, po o isi punaoa faatuatuaina.

Fuafua e valaaulia tagata aoga e faasoa mai mea na latou aoaoina mai le gaoioiga i le vasega, i ni vaega toalaiti, pe i ni paga. Atonu e te mafaufau e fai atu nisi o fesili po o fesili uma nei e faateleina ai le malamalama ma le manao o tagata aoga e faaaoga mea sa latou aoaoina.

O se isi auala, e mafai ona e faaali atu nisi o fesili po o fesili uma ma tuu atu i tagata aoga e taliina a o latou suesue. Ona valaaulia lea o ni tagata aoga e faasoa mai.

Manatua: O le lesona e sosoo ai o le a taulai atili atu i le taumamafa fiafia i afioga a Keriso.

• O le a se mea na e aoaoina e uiga i le uiga faaalia po o le faatinoga na e filifilia?

• E faape’ī foliga o se tasi e faataitaia le uiga faaalia po o le faatinoga na e filifilia?

• O anafea na e lagonaina ai le faamanuiaina o oe e le Tama Faalelagi po o se tasi e te iloa ona o se tasi o nei uiga faaalia po o faatinoga?

O lau malaga taitoatasi

Mafaufau e matamata le vaega o totoe o le vitio “E Le Tuua Lava Na o Oe,” mai le faailotaimi 1:25–2:54, e vaai ai pe na faapefea ona fesoasoani le Alii ia Peresitene Dalton e tumau e oo i le iuga.

Mafaufau i lou olaga ma lau malaga i le taimi nei e toe foi atu ai i le Tama Faalelagi. Mafaufau loloto pe o faapefea ona e tumau e oo i le iuga.

Mafaufau e valaaulia tagata aoga e tusi a latou tali i se tasi o fesili nei i luga po o tafatafa o le ata na latou tusia. Ona mafai lea ona latou aveina i le fale ma tuu i se mea e mafai ona latou toe vaai i ai.

• O le a se mea ua e aoaoina i le asō e fesoasoani ina ia e manao ai e fetaomi atu i luma i le Tama Faalelagi?

• E faapefea ona e manao e faaaoga mea sa e aoaoina i le asō? (O se faataitaiga atonu o le ola atili ai i se tasi o fasifuaitau na e suesueina.)

Faitau atu le saunoaga lenei mai ia Elder Jeffrey R. Holland o le Korama a Aposetolo e Toasefululua, ma mafaufau loloto i mea na e tusia. Atonu e te mafaufau e matamata i se kilipi mai lana lauga “O a Taeao e Faia ai e le Alii o Mea Ofoofogia i o Outou Luma” mai le faailotaimi 15:12 i le 16:20, o loo maua i le ChurchofJesusChrist.org.

Afai tatou te tuu atu o tatou loto i le Atua, afai tatou te alolofa i le Alii o Iesu Keriso, afai tatou te faia le mea silisili tatou te mafaia e ola ai i le talalelei, o taeao la ma isi aso uma o le a iu lava ina matagofie, e tusa lava pe tatou te le iloaina i taimi uma. Aisea? Ona e finagalo lo tatou Tama Faalelagi ia faapena! E finagalo o Ia e faamanuia i tatou. O se ola e faavavau, tauia ma faamanuiaina o le vaega autu lea o Lana fuafuaga alofa mutimutivale mo Lana fanau! O se fuafuaga e faalagolago i le upumoni “e galue … mea uma lava mo le lelei [ia] i latou o e ua alolofa [i le Atua].” O lea ia alolofa pea. Ia taumafai pea. Ia faalagolago pea. Ia talitonu pea. Ia tuputupu a‘e pea. O le a faamalosiau pea le lagi ia te outou nei, taeao, ma le faavavau. (Jeffrey R. Holland, “O a Taeao o le a Faia ai e le Alii o Mea Ofoofogia i o Outou Luma,” Liahona, Me 2016, 127)

Mafaufau e faasoa atu lau molimau. E mafai foi ona e valaaulia tagata aoga e faasoa mai a latou molimau po o manatu.

Manatu ma Talaaga o Faamatalaga

O le a le uiga o le tumau e oo i le iuga?

Na aoao mai Elder Joseph B. Wirthlin (1917–2009) o le Korama a Aposetolo e Toasefululua:

O le tumau seia oo i le iuga, o lona uiga ua tatou faavaeina mausali o tatou olaga i aoaoga faavae o le talalelei, ma tausia ia aoaoga faavae taliaina o le Ekalesia, auauna atu ma le lotomaulalo i o tatou uso a tagata, ola i ni olaga e faapei o Keriso, ma tausia a tatou feagaiga. O i latou o e tumau e paleni, tumau, lotomaulalo, alualu pea i luma, ma e aunoa ma le faaoleole. O a latou molimau e le faavaeina i vaaiga faalelalolagi—o loo faavae i le upu moni, poto, aafiaga, ma le Agaga. (Joseph B. Wirthlin, “Faamalosi Pea,” Liahona, Nov. 2004, 101)

Na aoao mai Elder Dieter F. Uchtdorf o le Korama a Aposetolo e Toasefululua:

O le tumau e oo i le iuga, o se faagasologa e faaaoga ai minute uma o lo tatou olaga, o itula uma, aso uma, mai le oso a‘e o le la seia toe oso a‘e le la. E ausia lea i le amio pulea faaletagata ma mulimuli i poloaiga a le Atua.

O le talalelei toefuataiina a Iesu Keriso o se ala o le ola. E le mo na o le Aso Sa. E le o se mea e mafai ona tatou faia tau lava o se amio po o se tu masani, pe afai tatou te mananao e selesele ona faamanuiaga uma ua folafola mai. “Aua nei faaseseina outou, e le ulagia le Atua aua o le mea e luluina e le tagata, o le mea lava lea e seleseleina mai ai e ia” (Kalatia 6:7). (Dieter F. Uchtdorf, “E Le Tatau Ea Ona Tatou Olioli?,” Liahona, Nov. 2007, 20)

Ae faapefea pe a ou lagonaina ou te le o i luga o le ala e tau atu i le ola e faavavau?

Na aoao mai Peresitene Russell M. Nelson:

Afai ua e se ese, pe i ai foi ni mea e tatau ona e lafoai e fesoasoani ai i lou mafaufau ma lou loto ia sili atu ona mama, o le asō o le taimi sili lea e sui ai.

Afai e te le o mautinoa pe faapefea ona salamo, talanoa i lou epikopo po o ou matua po o i latou uma. O le a latou fesoasoani ia e malamalama i le Togiola a Iesu Keriso. O le a latou fesoasoani ia e iloa le olioli lea e aumaia pea e le salamo moni.

Faamolemole aua nei e aluese mai le ala o feagaiga mo se isi lava minute se tasi. Faamolemole toe foi mai e ala i le salamo moni, i le taimi nei. (Russell M. Nelson, “Faamoemoe o Isaraelu,” Faigalotu a le Autalavou i le Lalolagi Atoa, Iuni. 2018)

Na aoao mai Elder Jeffrey R. Holland o le Korama a Aposetolo e Toasefululua:

E le popole tele lava le Atua po o fea sa e i ai ae popole o Ia po o fea o loo e i ai ma, faatasi ai ma Lana fesoasoani, o fea le mea o e naunau e te alu i ai. (Jeffrey R. Holland, “O Le a Oo Mai le Mea Sili,” Ensign, Ian. 2010, 27)

Gaoioiga Faaopoopo e Aoao Ai

O se isi amataga o le lesona

Valaaulia tagata aoga e fai ni nai oso faamalositino, faaaoga lima e uunai ai le tino i luga, nofo sa‘o i luga, ma isi mea faapena. Fesili atu i tagata aoga: “Afai e tatau ona e faia nei mea taitasi mo ni nai minute, mata e faapefea ona ese lou aafiaga? Aisea e faigata ai ona faaauau pea ona auai i gaoioiga lelei i le aluga o taimi? O a faamanuiaga tatou te maua?”

Vitio o musika

Ina ia fesoasoani i tagata aoga ia lagona le moni ma le taua o le mataupu faavae “a o tatou fetaomi atu i luma i le ala o feagaiga ma tumau e oo i le iuga, o le a tatou maua le ola e faavavau faatasi ma lo tatou Tama Faalelagi,” mafaufau e faaali le vitio “Autu o le Mutuale 2016: Fetaomi Atu i Luma” (4:12), o loo maua i le ChurchofJesusChrist.org.