Atamai i Aoaoga Faavae: 2 Nifae 32: 3

“Ia Taumamafa Fiafia i Afioga a Keriso; aua Faauta, o Afioga a Keriso o le a Ta’u Mai ai ia te Outou Mea Uma e Tatau Ona Outou Faia”

I se lesona talu ai, “2 Nifae 32:1–7,” sa e aoaoina ai le taua o le taumamafa fiafia i afioga a Keriso. O lenei lesona e mafai ona fesoasoani ia te oe e tauloto le mau faasino o le atamai i aoaoga faavae ma le fasifuaitau autu o le mau mo le 2 Nifae 32:3, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga moni o le olaga.

Mana e ala i le suesueina o tusitusiga paia. O suesuega anoa o tusitusiga paia faaletagata lava ia o le a fesoasoani ia te oe e tuputupu a’e ai i lou malamalama i le talalelei a le Faaola ma Lana Togiola, faapea foi ma le aoao atu ma molimau atu ma le mana sili atu. O le a faamanuiaina ma musuia tagata aoga e ala i lau molimau patino i le auala e faamanuiaina ai lou olaga e tusitusiga paia.

Sauniuniga a le tagata aoga: Atonu na maua e tagata aoga se avanoa e faataitai ai le “taumamafa fiafia i afioga a Keriso” i le faaiuga o le lesona talu ai. Valaaulia i latou e faaauau pea ona faataitai i a latou suesuega faaletagata lava ia o tusitusiga paia ma o mai saunia i le vasega e faasoa mai e uiga i o latou aafiaga.

Gaoioiga e Ono Mafai Ona Aoao Ai

O lenei lesona o le fuaitau o le atamai i aoaoga faavae ua mamanuina e aoaoina pe a maea ona fai le lesona o le “2 Nifae 32:1–7,” o le lesona faatatau mo le fuaitau o le atamai i aoaoga faavae o le 2 Nifae 32:3. Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.

Faamatala ma tauloto

Faaaoga soo se metotia aoga e fesoasoani ai i tagata aoga e tauloto le mau faasino ma le fasifuaitau autu o le mau mo le 2 Nifae 32:3 ma ia faamatala upumoni o loo maua i lenei fuaitau.

O gaoioiga nei o ni fautuaga i auala e ono faataunuuina ai lenei mea.

Vaai faalemafaufau faapea ua talosagaina oe e tuuina atu se manatu puupuu i le faigalotu i le seminare e uiga i le taua o le suesueina o tusitusiga paia. Faitau le 2 Nifae 32:3 ma manatua le mataupu faavae pe a tatou taumamafa fiafia i afioga a Iesu Keriso, o le a latou tau mai ia i tatou mea uma e tatau ona tatou faia.

• E mafai faapefea ona e faaaogaina mea sa e aoaoina i le lesona talu ai, ma lou aafiaga patino, e faamalamalama ai le uiga o le “taumamafa fiafia i afioga a Keriso”? (2 Nifae 32:3).

• O le a se eseesega e mafai ona faia e le taumamafa fiafia i afioga a Keriso i le olaga o le autalavou?

E mafai ona avea lenei mea o se nofoaga lelei e valaaulia ai tagata aoga e faaaofia ai o latou lava aafiaga a o latou faasoa mai o latou manatu mai le gaoioiga sauniuni.

Mafaufau e tuuina atu ni anomea e fesoasoani ai i tagata aoga e faamaea le gaoioiga lenei. E mafai ona valaaulia i latou e faia lenei mea i a latou api talaaga mo suesuega. E mafai ona e fetuunaia lenei gaoioiga ina ia mafai ai e tagata aoga ona tusi se ata e sili ona atagia ai la latou aganuu.

Ina ia fesoasoani ia te oe e tauloto ma faaaoga lenei fuaitau, tusi se ata o se laulau ua setiina i luga o se fasipepa. Atonu e talitutusa ma le ata o loo i lalo. E mafai foi ona e tusia ni ata o taumafa po o mau i luga o le ipu. Tusi le fasifuaitau “2 Nifae 32:3—Ia taumamafa fiafia i afioga a Keriso; aua faauta, o afioga a Keriso o le a ta’u mai ai ia te outou mea uma e tatau ona outou faia” i se vaega o lau itulau. Faitau faatele le fasifuaitau lenei seia oo ina e taulotoina. Mafaufau e tuu i luga lau ata tusi i se mea i lou fale po o luga o le pusaaisa lea e mafai ona e faamanatu ai i taimi taitasi e te taumafa ai.

A uma ua lava se taimi, valaaulia tagata aoga e faasoa mai a latou ata i ni vaega toalaiti po o le vasega.

Faataitai le faaaogaina

Vaevae le vasega i ni vaega taitoatolu, ma filifili e tagata aoga taitasi se mataupu faavae ese o le mauaina o le malamalama faaleagaga (tagai i le Pepa Autu o le Atamai i Aoaoga Faavae [2022], “Mauaina o le Malamalama Faaleagaga,” parakalafa 5–12). Fai i le vasega e toe faamanatu puupuu le mataupu faavae ona faamalamalama atu lea i la latou vaega.

Ona faasoa atu lea o le ata faataitai lenei. Pe afai e sili atu ona talafeagai i au tagata aoga, mafaufau e fai atu ia i latou e fai se lisi o mafuaaga e ono tauivi ai se tagata ma le suesueina o a latou tusitusiga paia. Ona mafai lea ona valaaulia tagata aoga e filifili se tauiviga mai le lisi ma galulue e faatoilalo e ala i le faaaogaina o mataupu faavae o le mauaina o le malamalama faaleagaga.

• E faapefea ona e faamatalaina faapuupuu le mataupu faavae na e filifilia i se tagata e le masani i ai?

Manatu faapea a uma se lesona seminare e uiga i le taua o le suesue i tusitusiga paia i aso taitasi, ua fai atu lau uo ia te oe, “Ou te iloa o le suesueina o tusitusiga paia o se mea lelei e fai, ae faatasi ai ma mea uma o loo tutupu i lo’u olaga i le taimi nei, e leai so’u taimi, ae maise lava e le o aso uma.”

Atonu e aoga le fesili atu i tagata aoga pe mafai ona latou fesootai i lenei tulaga ma pe aisea.

Iloilo manatu faavae ma fesili ma se vaaiga e faavavau.

• O le a se mea e te manao ia iloa e lau uo e uiga ia Iesu Keriso po o le fuafuaga o le faaolataga lea e mafai ona fesoasoani ia i latou e mananao ai e taumafai e taumamafa i Ana afioga i aso uma?

• E mafai faapefea e le taumamafa e le aunoa i afioga a Keriso ona aafia ai i tatou i le taualumaga o taimi, e oo lava i le faavavau?

Saili le malamalama atili e ala i punaoa mamana ua filifilia

Vaai faalemafaufau faapea a uma ona talanoaina se vaaiga e faavavau, ua fai mai lau uo, “Faafetai. Ua maua sina fesoasoani i lena mea. Ae ou te manatu lava o le a ou tauivi e sue se taimi i aso uma e suesue ai a’u tusitusiga paia.”

• O le a sou manatu e faapefea ona fesoasoani le 2 Nifae 32:3 i lau uo?

• O a mau po o saunoaga mai perofeta e mafai ona fesoasoani i lau uo?

Mafaufau e tuu atu i tagata aoga se taimi e sue ai mau ma saunoaga.

O nisi o faataitaiga e mafai ona aofia ai le Mataupu Faavae ma Feagaiga 26:1 faapea foi ma le saunoaga lenei mai ia Elder Richard G. Scott (1928–2015) o le Korama a Aposetolo e Toasefululua:

Aua nei gauai atu i pepelo a Satani faapea e leai sou taimi e suesue ai i tusitusiga paia. Filifili e faaalu se taimi e suesue ai. O le taumamafa i afioga a le Atua i aso taitasi e sili atu le taua nai lo le moe, a’oga, faigaluega, ata o le tv, taaloga vitio, po o faasalalauga faaagafesootai. Atonu e manaomia ona e reorganize toe faatulagaina mea e ave i ai lau faamuamua ia maua ai se taimi mo le suesueina o le afioga a le Atua. Afai o le tulaga lea, ia fai loa! (Richard G. Scott, “Ia Avea le Faaaogaina o le Faatuatua ma Mea e te Faamuamua,” Liahona, Nov. 2014, 93)

• E mafai faapefea ona fesoasoani nei aoaoga?

Faatino i le faatuatua

Tuu atu i tagata aoga se taimi e mafaufau loloto ai i fautuaga ma fesili nei. A uma ua lava se taimi, valaaulia nisi o tagata aoga e faasoa mai mea na latou maua i le vasega. E mafai foi ona e faasoa atu lau molimau patino i le suesueina o tusitusiga paia i le vasega.

Vaai faalemafaufau faapea e tali lelei atu lau uo i mea sa e faasoaina atu, ae e te iloa o le a latou le faatoilaloina moni o latou popolega seia latou faatinoina i le faatuatua, faalagolago i le Alii.

Faaalu se taimi e mafaufau ai i aafiaga patino na e maua i afioga a Keriso ma mea e te iloa e uiga i le Faaola e ono faaosofia ai lau uo e taumafa i Ana afioga i aso taitasi.

• O a ni aafiaga po o se molimau e mafai ona e faasoa atu e mafai ona fesoasoani ai i lau uo e faatino i le faatuatua?

• O le a se mea ua e aoaoina e te lagona e mafai ona fesoasoani ia te oe e faaleleia ai lau suesuega patino o tusitusiga paia?

Toe faamanatuina o le atamai i aoaoga faavae

I le taimi o se lesona o le a sosoo ai, faaaoga ni nai minute e toe faamanatu ai le mau faasino ma le fasifuaitau autu mo le 2 Nifae 32:3. O se tasi o auala e faia ai lenei mea o le faaali atu lea o le fuaitau ua faafefiloi ma le fasifuaitau autu o le mau ma valaaulia tagata aoga e toe faatulaga:

afioga a e tatau ona outou 32: aua faauta, a Keriso o afioga ia taumamafa fiafia 2 i Keriso; ia te taʼu mai ai outou o Nifae le a 3 mea uma faia.

O se isi filifiliga o le tusi lea o upu taitasi nei i luga o se fasipepa laitiiti ma tuu atu se tasi pe sili atu i tagata aoga taitasi. Valaaulia tagata aoga e galulue faatasi e faatulaga i le faasologa sa’o.

Tali: 2 Nifae 32:3 Ia taumamafa fiafia i afioga a Keriso; aua faauta, o afioga a Keriso o le a ta’u mai ai ia te outou mea uma e tatau ona outou faia.