2 Nifae 31:1–13

“Mulimuli i le Faataitaiga a le Alo o le Atua Soifua”

O a nisi o auala e mafai ona tatou mulimuli ai i le faataitaiga a le Faaola? Na aoao mai Nifae o le mulimuli ia Iesu Keriso e ala i le papatisoina ma le mauaina o le Agaga Paia sa taua mo le faaolaina i le malo o le Atua. O lenei lesona e mafai ona fesoasoani e te malamalama atili ai ma faamatala ai le taua o le papatisoga ma faamanuiaga e maua mai ai.

Molimau soo atu. E mafai e lau molimau ona faateleina le faatuatua o au tagata aoga ma fesoasoani ia i latou e atiina a‘e a latou molimau. Vaavaai mo avanoa e molimau atu ai ia Iesu Keriso ma talanoa e uiga ia te Ia ma le migao, loto faafetai, ma le faamemelo. Faasoa atu ni aafiaga patino na fesoasoani ia te oe e sau ai ia Iesu Keriso.

Sauniuniga a le tagata aoga: Uunaia tagata aoga e mafaufau pe faapefea ona latou faamatalaina le mafuaaga o le a manao ai se tagata e papatiso. E mafai foi ona latou fesili atu i se tagata e toatasi pe toalua o le aiga po o uo pe aisea na latou filifili ai ina ia papatisoina.

Gaoioiga e Ono Mafai Ona Aoao Ai

Mulimuli ia Iesu Keriso e ala i le papatisoina

O le gaoioiga lenei e mafai ona fesoasoani ai i tagata aoga e mafaufau ai e uiga i le faamoemoega o le papatisoga ma le auala e fesoasoani ai ia i tatou.

Mafaufau faapea ua feiloai lau uo o Ada ma faifeautalai o le Ekalesia ma o loo matua fiafia lava i le aafiaga. O loo ia faitauina le Tusi a Mamona ma fiafia i mea o loo ia aoaoina. Na valaaulia talu ai nei o ia e faifeautalai ina ia papatisoina. O le aso na sosoo ma le valaaulia, ua faamatala atu ai e Ada ia te oe ma fai atu, “Ou te fia papatiso, ae ou te mafaufau foi pe aisea e afaina tele ai pe a ou taumafai e na ona avea ma se tagata lelei. O le a le mea e sili ona taua e uiga i le papatisoga?”

• Pe e te lagona ea e mafai ona e taliina le fesili a Ada i se auala e fesoasoani ai ia te ia ia malamalama i le taua o le papatisoga? Aisea pe aisea foi e leai ai?

A o e suesue i le aso, saili mo upumoni e fesoasoani ia oe e malamalama atili ai e uiga i le Faaola ma pe aisea e taua tele ai le mulimuli i Lana faataitaiga o le papatisoga. Mafaufau loloto pe na faapefea ona aafia ai lou olaga ma i latou e te iloa. I le faaiuga o le lesona, o le a e maua se avanoa e tali atu ai i le fesili taua a Ada.

A o latalata atili atu Nifae i le faaiuga o ana tusitusiga i luga o papatusi laiti, sa ia manao e talanoa e uiga “i le aoaoga faavae a Keriso.” Mafaufau e faailoga lenei fasifuaitau i le 2 Nifae 31:2 ma le 2 Nifae 31:21.

O le papatisoga o se vaega taua o le aoaoga faavae a Keriso.

• O le a se mea ua e iloa e uiga i le papatisoga o le Faaola?

Faalogo toto‘a i mea o fai mai ai tagata aoga. Afai e aoga, e mafai ona e valaaulia tagata aoga e fai se tasi o mea nei e toe faamanatu ai le papatisoga o le Faaola.

• Faitau le Mataio 3:13–17.

• Matamata le “O Le Papatisoga o Iesu” (2:54), o loo maua i le ChurchofJesusChrist.org.

• Matamata i tamaiti o faamatala mai le papatisoga o le Faaola i le “Papatisoga” mai le faailotaimi 0:00 i le 1:13, o loo maua i le ChurchofJesusChrist.org.

Sa leai se agasala a Iesu Keriso, peitai sa papatisoina lava o Ia. Faitau le 2 Nifae 31:5–11 ma vaavaai pe aisea na papatisoina ai le Faaola ma mea ua tatou aoaoina e uiga ia te Ia.

• O le a se mea sa e mauaina?

  E mafai e tagata aoga ona faasoa mai ni malamalamaaga eseese e uiga i le Faaola ma le papatisoga. O nisi upumoni atonu latou te faailoa mai e aofia ai: E ui ina leai se agasala, ae sa papatisoina Iesu Keriso e faataunuu ai le amiotonu uma, ma o Iesu Keriso o le faataitaiga atoatoa o le usiusitai. Mafaufau e tusi i luga o le laupapa ia mataupu faavae e faasoa mai e tagata aoga. Faaaoga soo se fesili nei e faaloloto ai le malamalama o tagata aoga.

  Valaaulia tagata aoga e faasoa mai mea na latou maua. Afai e aoga i le talanoaga, mafaufau e faaaoga nisi o fesili nei.

• O le a sou manatu i le uiga o le mulimuli i le Faaola “ma le faamoemoega atoa o le loto, [ma aunoa ma le] faa’ole’ole” (2 Nifae 31:13)?

• O a faamanuiaga e tuuina mai e le Tama Faalelagi ia i latou o e mulimuli ma le faamaoni i le faataitaiga a le Faaola o le papatisoga?

  Afai e aoga, mafaufau e tusi soo se mataupu faavae e faailoa mai e tagata aoga i luga o le laupapa. O se tasi lenei o faataitaiga: Afai tatou te mulimuli ma le faamaoni i le Faaola e ala i le papatisoina, o le a tatou maua le Agaga Paia.

• Ua faapefea ona faamanuiaina oe e le mafutaga a le Agaga Paia i lou olaga?

  Afai o le a fesoasoani i tagata aoga ia malamalama atili i matafaioi a le Agaga Paia, e mafai ona e valaaulia i latou e toe faamanatu le 2 Nifae 31:13, 17 ma faitau le 2 Nifae 31:18; 32:3, 5, 8; ma le 33:1. E mafai e tagata aoga ona mafaufau loloto i matafaioi eseese a le Agaga Paia ma faasoa mai pe na faapefea ona faamanuiaina e le Agaga Paia o latou olaga i le faatinoina o nei matafaioi.

• O a nisi malamalamaaga na e mauaina?

• O le a se mea e tulagaese ia te oe mai le fuaiupu e 5?

• O le a le mea na molimau mai ai Iesu, pe ua folafola, o le a Ia faia e ala i le papatisoina? (tagai 2 Nifae 31:7).

• O a ni mea o aoao mai e nei fuaiupu ia te oe e uiga i lagona o le Faaola i poloaiga a le Tama ma faapea foi ia i tatou?

• O le a se mea ua e iloa e uiga ia Iesu Keriso o le a uunaia ai oe e mulimuli i Lana faataitaiga?

Afai e te manao e vaai i lesona na aoaoina e tamaiti mai le papatisoga o le Faaola, mafaufau e matamata le vitio “Papatisoga” mai le faailotaimi 1:13 i le 3:13, o loo maua i le ChurchofJesusChrist.org.

Sa faaauau ona molimau atu Nifae i lana talafaamaumau e uiga i faamanuiaga o le mulimuli i le faataitaiga a le Faaola o le papatisoga. Ina ia fesoasoani ia te oe ia iloa nei faamanuiaga, faitau le 2 Nifae 31:12–13, 17. Mo nisi malamalamaaga faaopoopo e uiga i le papatisoga, mafaufau e suesue nisi o mea nei: Ioane 3:3, 5; Galuega 2:38; Alema 7:14; 3 Nifae 11:33–34, 37.

E faavae i mea ua e aoaoina, tusi se parakalafa ia Ada. Fesoasoani ia malamalama o ia i le papatisoga ma pe aisea e ono manao ai e mulimuli i le faataitaiga a le Faaola ma papatisoina e pei o Ia. Ia aofia ai mea nei:

• ia le itiiti ifo ma le lua ni mau e te manatu o le a fesoasoani ia te ia

• auala e mafai ai e le papatisoga ona tatou latalata atili atu ai i le Tama Faalelagi ma lo tatou Faaola

  E mafai ona e valaaulia tagata aoga e faasoa mai a latou tali i ni paga, vaega toalaiti, pe o se vasega. Atonu e aoga foi le valaaulia o se tagata aoga e sau i luma o le potu ma faatino le matafaioi a Ada. Valaaulia se isi tagata aoga e faasoa mai se mea se tasi na latou saunia e fesoasoani ai ia Ada. Ona fesili lea po o ai e fia faaopoopoina se isi mea. Valaaulia ni tagata aoga e faasoa mai. Vaavaai mo ni auala e uunaia ai tagata aoga e taulai atu i le Faaola faapea foi ma le faasoa mai o o latou lava aafiaga ma manatu. A o faaauau pea le gaoioiga, valaaulia le tagata aoga o loo faatinoina le vaega a Ada e faasoa mai pe o a ona lagona ma fai mai soo se fesili atonu o ia te ia. Faaauau seia lagona e tagata aoga ua latou fesoasoani ia Ada.

• Mafaufau e faailoa atu le faamemelo mo le filifiliga atonu na faia e tagata aoga ina ia papatisoina. E mafai foi ona e faasoa atu lou lava aafiaga ma lau molimau e uiga i le papatisoga.

• ou manatu patino, aafiaga, po o le molimau e uiga i le papatisoga ma le mafutaga a le Agaga Paia

Ina ia faaiuina lenei lesona, mafaufau e uiga i mea sa e suesueina i le asō. O le a sou lagona e uiga i lou papatisoga? O le a se mea e mafai ona e faia e mulimuli ai i le faataitaiga a le Faaola? E mafai faapefea ona e fesoasoani i isi ia mulimuli i le faataitaiga a le Faaola ma ia papatisoina? Mafaufau e tusi ou manatu i lau api talaaga mo suesuega.

Manatu ma Talaaga o Faamatalaga

Aisea e taua tele ai le papatisoga?

Na aoao mai Elder Robert D. Hales (1932–2017) o le Korama a Aposetolo e Toasefululua:

I le papatisoga tatou te osia ai se feagaiga ma lo tatou Tama Faalelagi, ua tatou naunau e o mai i Lona malo ma tausi Ana poloaiga e amata mai i lena taimi, e ui lava o loo tatou nonofo pea i le lalolagi. …

Pe a tatou malamalama i a tatou feagaiga o le papatisoga ma le meaalofa o le Agaga Paia, o le a suia ai o tatou olaga ma o le a amatalia ai lo tatou faamaoni atoatoa i le malo o le Atua. Pe a oo mai faaosoosoga ia i tatou, afai tatou te faalogo pea, o le a faamanatu mai e le Agaga Paia ia i tatou ua uma ona tatou folafola atu e manatua lo tatou Faaola ma usitai i poloaiga a le Atua. (Robert D. Hales, “The Covenant of Baptism: To Be in the Kingdom and of the Kingdom,” Ensign, Nov. 2000, 7)

E faapefea ona faamanuiaina i tatou e le agaga Paia?

Sa aoao mai Peresitene Henry B. Eyring o le Au Peresitene Sili:

A avea [le Agaga Paia] ma au soa, e mafai ona e maua le mautinoa o loo galue le Togiola i lou olaga. …

E le gata i lou lagonaina o le uunaiga a le Agaga Paia o se faailoga o le Togiola, le fofo mo agasala, o loo galue i lou olaga, ae o le a e iloa foi o loo aoga o se puipuiga mai le agasala. (Henry B. Eyring, “Come unto Christ” [faigalotu a le Iunivesite o Polika Iaga, Oke. 29, 1989], speeches.byu.edu)

Na aoao mai Bruce R. McConkie (1915–85) o le Korama a Aposetolo e Toasefululua:

O agasala e le faamagaloina i vai o le papatisoga, e pei ona tatou faia i le gagana faatusatusa, ae o le taimi tatou te maua ai le Agaga Paia. … E avea i tatou ma tagata mamā pe a tatou mauaina moni lava le faaaumea ma le mafutaga a le Agaga Paia. O le taimi lena e susunuina ai le agasala ma le leaga ma le eleelea mai o tatou agaga e faapei ua mu i se afi. O le papatisoga a le Agaga Paia o le papatisoga i le afi. (Bruce R. McConkie, A New Witness for the Articles of Faith [1985], 290)

Gaoioiga Faaopoopo e Aoao Ai

O Le Aoaoga Faavae a Keriso

O se tasi o auala e fesoasoani ai i tagata aoga e aoao e uiga i le papatisoga ma le mauaina o le meaalofa o le Agaga Paia o le aoao atu lea o se vaega o aoaoga faavae a Keriso. O le aoaoga faavae a Keriso ua faauigaina i tusitusiga paia o le faatinoina o le faatuatua ia Iesu Keriso, salamo, papatisoina, mauaina le meaalofa o le Agaga Paia, ma tumau e oo i le iuga. O le aoaoga faavae a Keriso o se faagasologa e mafai ai ona tatou latalata atili atu ma avea atili ai e faapei o Iesu Keriso.

Na aoao mai Peresitene Russell M. Nelson:

O le aoaoga faavae mamā a Keriso e mamana tele. E suia ai le olaga o tagata uma e malamalama i ai ma saili e faatino i lona olaga. E fesoasoani le aoaoga faavae a Keriso ia i tatou e saili atu ma tumau ai i luga o le ala o feagaiga. O le tumau i luga o lena ala vaāpiapi ua faamatalaina lelei o le a faa-agavaaina ai i tatou i le taimi mulimuli e maua mea uma ua i ai i le Atua. E leai se mea e sili atu ona taua i lo mea uma ua i ai i lo tatou Tama! (Russell M. Nelson, “Upumoni Mamā, Aoaoga Faavae Mamā, ma Faaaliga Mamā,” Liahona, Nov. 2021, 6)

O fesili e ono talanoaina e aofia ai: O le a se mea e tulaga ese ia te oe mai aoaoga a Peresitene Nelson? O le a se faamoemoe o i ai i se tasi e malamalama i le aoaoga faavae a Keriso?