Սեմինարիա
2 Նեփի 32.1–7. «Սնվեք Քրիստոսի խոսքերով»

«2 Նեփի 32.1–7. «Դուք պետք է առաջ մղվեք», Մորմոնի Գիրքը. Ուսուցչի ձեռնարկ (2024)

«2 Նեփի 32.1–7», Մորմոնի Գիրքը. Ուսուցչի ձեռնարկ

2 Նեփի 32.1–7

«Սնվեք Քրիստոսի խոսքերով»

Նկար
ընտանիք՝ ընթրիքի սեղանի շուրջ

Պատկերեք տոնական խնջույքի սեղան՝ լի համեղ ուտեստներով: Ինչպե՞ս եք տեսնում ձեզ՝ նման խնջույքը վայելելիս: Իր ժողովրդին ուխտի ճանապարհով Հիսուս Քրիստոսին հետևելու մասին ուսուցանելուց հետո Նեփին զգաց, որ նրանք դեռևս չգիտեին ինչ անել մկրտությունից հետո: Նա պատասխանեց՝ խրախուսելով իր ժողովրդին «սնվել Քրիստոսի խոսքերով» և վստահեցրեց նրանց, որ Փրկչի խոսքերը կառաջնորդեն նրանց առաջ մղվելիս (2 Նեփի 32.3): Այս դասը նպատակ ունի օգնել ձեզ սնվել Հիսուս Քրիստոսի խոսքերով:

Սովորողի փորձառությունը Սեմինարիաների և Կրոնի ինստիտուտների նպատակն իրագործելով՝ մենք նպատակ ենք դնում օգնել յուրաքանչյուր ուսանողի դարձի գալ, համապատասխանել և պատկանել: Փնտրեք եղանակներ, որոնցով կօգնեք ուսանողներին դարձի գալ դեպի Հիսուս Քրիստոսը, սովորածը կիրառել անձնական հանգամանքներում, զգալ իրենց անվտանգ և ստանալ աջակցություն ուսումնառության ընթացքում:

Ուսանողի նախապատրաստում. ուսանողներին առաջարկեք սուրբ գրությունների անձնական ուսումնասիրությունը համեմատել ուտելու հետ և խրախուսեք նրանց պատրաստվել և դասի ընթացքում կիսվել իրենց գաղափարներով:

Հնարավոր ուսումնական վարժություններ

Ուտելու ժամանա՛կն է

Դասը սկսելու համար ստորև ներկայացված նկարները ցույց տալու փոխարեն կարող եք երկու ուսանողի առաջարկել, որ մնջախաղի միջոցով ցույց տան նկարները, իսկ մյուս ուսանողները գուշակեն, թե ինչ են ցուցադրում. արագ խորտիկներ ուտել, ճաշել և սնվել խնջույքի կամ տոնակատարության ժամանակ:

Նայեք հետևյալ նկարներին և մտածեք, թե ինչ նմանություններ ու տարբերություններ կան արագ խորտիկներ ուտելու, ճաշելու և հատուկ առիթի ժամանակ սնվելու միջև:

Նկար
բանան
Նկար
խոր ափսեով բրինձ
Նկար
խնջույքի սեղան

  • Ի՞նչ նմանությունների ու տարբերությունների մասին մտածեցիք:

  • Եթե Քրիստոսի խոսքերի ուսումնասիրությունը համեմատենք ուտելու այս երեք ձևերի հետ, ի՞նչ կներկայացնի յուրաքանչյուրը:

Երկնային Հայրը և Հիսուս Քրիստոսը ցանկանում են օրհնել ձեզ՝ առաջնորդելով, ուղղորդելով, օգնելով և մխիթարելով: Մտածեք, ինչպես եք վերջին անգամ ուսումնասիրել Փրկչի խոսքերը: Ինչպե՞ս կնկարագրեիք այդ փորձառությունը. որպես՝ արագ խորտիկներ ուտել, ճաշել, թե՞ խնջույքի ժամանակ սնվել: Ի՞նչ կասեք անցյալ շաբաթվա կամ անցյալ ամսվա մասին: Ուսումնասիրությունը շարունակելիս դիմեք Սուրբ Հոգու օգնությանը՝ իմանալու, թե Քրիստոսի խոսքերի ուսումնասիրումն ինչպես է օրհնում ձեր կյանքը: Փնտրեք նաև ոգեշնչում, որը կօգնի ձեզ իմանալ, թե ինչպես լավացնել Քրիստոսի խոսքերով սնվելու ձեր ջանքերը:

Հիսուս Քրիստոսի խոսքերը

Հիշեք, որ Նեփին իր ժողովրդին ուսուցանում էր «նեղ ու անձուկ արահետի մասին, որը տանում է դեպի հավերժական կյանք» և այդ ճամփորդությունը սկսելու համար անհրաժեշտ հատկությունների մասին (2 Նեփի 31.17–18): Նեփին հասկացավ, որ իր ժողովուրդը չգիտեր ինչ անել մկրտության պատվիրանը ստանալուց հետո և ինչպես շարունակել ուխտի ճանապարհը:

Կարդացեք 2 Նեփի 32.1–3 հատվածը և գտեք Քրիստոսի խոսքերն ուսումնասիրելու մասին Նեփիի խորհուրդը: Այդ ժամանակ մտածեք ձեր սեփական մտահոգությունների, հարցերի, կարիքների և այն մասին, թե Նեփիի ուսմունքներն ինչպես կարող են օգտակար լինել ձեր համար: Օգտակար է իմանալ, որ «խոսել հրեշտակների լեզվով» արտահայտությունը (2 Նեփի 32.2) «պարզապես նշանակում է … խոսել Սուրբ Հոգու զորությամբ» (Բոյդ Ք. Փաքեր, «Սուրբ Հոգու պարգևը. այն, ինչ պետք է իմանա յուրաքանչյուր անդամ», Ensign, օգոստոս 2006թ., 50):

2 Նեփի 32.3 հատվածը վարդապետության սերտման հատված է: Կարող եք առանձնահատուկ ձևով նշել վարդապետության սերտման հատվածները, որպեսզի հեշտությամբ գտնեք դրանք: Հաջորդ դասին դուք հնարավորություն կունենաք կիրառելու այս հատվածում ուսուցանված վարդապետությունը որևէ հարցի կամ իրավիճակի համար:

  • Ի՞նչ բացահայտեցիք:

Երբ ուսանողները կիսվեն իրենց բացահայտածով, ուշադիր լսեք և գրատախտակին գրեք նրանց ներկայացրած բոլոր ճշմարիտ սկզբունքները:

2 Նեփի 32.3 հատվածում ձեր բացահայտած ճշմարտություններից մեկը կարող է լինել այն, որ երբ մենք սնվում ենք Հիսուս Քրիստոսի խոսքերով, դրանք մեզ ասում են բոլոր բաները, որ պետք է անենք: Կարող եք այդ ճշմարտությունը նշել ձեր սուրբ գրություններում:

  • Որտե՞ղ կարող ենք գտնել Հիսուս Քրիստոսի խոսքերը:

  • Ըստ ձեզ՝ Նեփին ինչո՞ւ օգտագործեց «սնվել» բառը, երբ նկարագրում էր, թե ինչպես պետք է ուսումնասիրենք Փրկչի խոսքերը (2 Նեփի 32.3):

Կարդացեք Յոթանասունից երեց Տակաշի Վադայի հետևյալ հայտարարությունը: Առկայության դեպքում կարող եք դիտել Երեց Վադայի ուղերձը տեսանյութի ChurchofJesusChrist.org 0:53-1:42 հատվածը:

Նկար
Երեց Տակաշի Վադա

Երբ երիտասարդ էի, ես կարծում էի, որ խնջույքն ուղղակի ճոխ ճաշ է՝ բրնձով, սուշիով և սոյայի սոուսով: Այժմ ես գիտեմ, որ իսկական խնջույքն ավելին է, քան համեղ կերակուր վայելելը: Դա ուրախության, սնուցման, հանդիսության, ընտանիքի և սիրելիների հանդեպ սիրով կիսվելու, Աստծուն մեր շնորհակալությունը հայտնելու և հարաբերություններ կառուցելու փորձառություն է, մինչ վայելում ենք առատ, աներևակայելի համեղ ուտելիք: Ես հավատում եմ, որ երբ մենք սնվում ենք Քրիստոսի խոսքերով, պարտավոր ենք մտածել նույն տեսակի փորձառության մասին: Սնվել սուրբ գրություններով չի նշանակում ուղղակի կարդալ դրանք: Այն պետք է բերի մեզ իսկական ուրախություն և կառուցի մեր փոխհարաբերությունները Փրկչի հետ: (Տակաշի Վադա, «Սնվեք Քրիստոսի խոսքերով», Լիահոնա, մայիս 2019թ., 38–39)

  • Ի՞նչը տպավորեց ձեզ երեց Վադայի հայտարարության մեջ:

    Կարող եք օգտագործել ստորև ներկայացվող հարցերից մի քանիսը կամ բոլորը, որպեսզի օգնեք ուսանողներին վերլուծել թավագիր ճշմարտությունը:

    Մի քանի ուսանողի առաջարկեք պատասխանել հարցին և նրանց խոսքերը գրեք գրատախտակին: Անհրաժեշտության դեպքում նրանց հիշեցրեք հետևյալը.

  • Ի՞նչն է օգնում կամ կարող է օգնել ձեզ, որ ոչ թե պարզապես կարդաք Քրիստոսի խոսքերը, այլև սնվեք դրանցով:

  • Հիշեք, թե ինչ գիտեք Հիսուս Քրիստոսի մասին և մտածեք, թե Նրա խոսքերն ինչու կարող են ուրախության, սնուցման և սիրո զգացումներ առաջացնել:

  • Փրկչի խոսքով սնվելն ինչպե՞ս կարող է ուղղորդել ձեր կյանքը և ասել ձեզ՝ ինչ անել:

Հնարավորության դեպքում դիտեք «Եկ, հետևիր ինձ. Լիտո» տեսանյութը (0:59) (հասանելի է այստեղ՝ ChurchofJesusChrist.org), որպեսզի իմանաք, թե Տերն ինչպես կարող է բացահայտել գիտելիքն ու ճշմարտությունը, երբ Նրա խոսքերով եք սնվում:

Ձեր սեփական փորձառությունները կարող են օգնել ձեզ սնվել Քրիստոսի խոսքերով:

Ուսումնասիրության բազմաթիվ եղանակներ կան, որոնք կարող են օգնել ավելի լավ սնվել Քրիստոսի խոսքերով, դրանց թվում են՝ աղոթել ոգեշնչման համար նախքան ուսումնասիրումը, ուղղել նախկինում և ուսումնասիրման ժամանակ ունեցած հարցերը, սահմանել բառերը, խորհել, կատարել խաչաձև հղումներ, կատարել նշումներ, փնտրել ճշմարտություններ Երկնային Հոր և Փրկչի մասին և նմանեցնել սուրբ գրությունները մեր սեփական կյանքին (1 Նեփի 19.23):

  • Ի՞նչ ընդհանուր հուշումներ և հատուկ ուղղորդում եք ստացել, երբ սնվել եք Քրիստոսի խոսքերով:

Սնվել Քրիստոսի խոսքերով

Ստորև ներկայացվող վարժության համար ուսանողներին բավարար ժամանակ հատկացրեք: Ուսանողներին ներկայացրեք ուսումնասիրության եղանակների վերաբերյալ գրատախտակին գրված գաղափարները, որոնք կարող են փորձել Քրիստոսի խոսքերով սնվելու վարժությունը կատարելիս:

Օգտվելով այսօր սովորածից՝ մի քանի րոպե կատարեք Քրիստոսի խոսքերով սնվելու վարժությունը: Դա կարող է լինել սուրբ գրությունների կամ մարգարեների խոսքերի ուսումնասիրությունը: Քրիստոսի խոսքերով սնվելիս փորձեք կատարել հետևյալ քայլերից մեկը կամ մի քանիսը.

  • Կառուցեք ձեր հարաբերությունը Երկնային Հոր և Հիսուս Քրիստոսի հետ:

  • Ավելի շատ սիրեք ու վստահեք Նրանց:

  • Գտեք ճշմարտություններ, որոնք ձեզ ուրախություն են բերում և սնուցում են:

  • Ստացեք ուղեցույց, թե ինչ պետք է անեք ձեր կյանքում:

Գրի առեք որոշ բաներ, որոնք սովորեցիք, զգացիք և փորձեցիք Քրիստոսի խոսքերով սնվելու վարժությունը կատարելիս:

Դասի վերջին րոպեների ընթացքում մի քանի ուսանողի առաջարկեք կիսվել Քրիստոսի խոսքերով սնվելու իրենց փորձառությամբ: Ըստ անհրաժեշտության՝ նրանց խրախուսեք կիսվել իրենց գտած ճշմարտություններով, իրենց զգացածով կամ ստացած ուղղորդումով: Դասընկերներին լսելը զորեղ փորձառություն կարող է լինել ուսանողների համար:

Կարող եք կիսվել ձեր սեփական փորձառությամբ և բերել Քրիստոսի խոսքերով սնվելու արդյունքում մեր ստացած օրհնությունների վկայություն:

Տպել