Jakoba 1

Mandresy lahatra ny hafa hanatona an’i Kristy

Talohan’ny nahafatesan’i Nefia, dia nomeny an’i Jakoba zandriny lahy ny andraikitra hitahiry ireo takelaka sy hirakitra eo amin’izany ny zavatra izay “sarobidy indrindra” amin’izany (Jakoba 1:2). Ny hafatr’i Jakoba dia mampitodika ny hafa any amin’i Jesoa Kristy ka manampy azy ireo hisoroka ny vokatry ny tsy finoana sy fahotana. Ity lesona ity dia afaka manampy anao hahita fomba hanampiana ny hafa hanatona an’i Jesoa Kristy.

Manampy ny mpianatra ho mpandray anjara mavitrika. Ho an’ny mpianatra sasany dia mety toa tsy mahazatra sy somary sarotra ihany ny fanaovana ezaka mba hianarana amin’ny soratra masina. Na izany aza, ny mpianatra dia afaka mivoatra amin’ny fahafahany manao zavatra ka mampitombo tsikelikely ny fandraisany andraikitra ho an’ny fianarany. kokoa amin’ny fianaran’izy ireo tsikelikely. Mitadiava hirika hanampiana ny mpianatra handray anjara mavitrika ao am-pianarana ary derao ny ezaka ataon’izy ireo sy ny fivoarany.

Fiomanan’ny mpianatra: Asao ny mpianatra hieritreritra fotoana hahafahan’izy ireo hiresaka amin’ny hafa momba an’i Jesoa Kristy. Amporisiho izy ireo hivavaka mba hahita fahafahana sy hanana fahasahiana hihetsika amin’ny fotoana itrangan’izany.

Sahanasa fianarana azo atao

Miresaka amin’ny namana iray

Ireto fanontaniana sy horonan-tsary manaraka ireto dia afaka manampy ny mpianatra hifanakalo hevitra amin’ny hoe mety hanao ahoana izany miresaka amin’ny hafa momba an’i Jesoa Kristy izany. Raha nangatahina tamin’ny mpianatra ny hanao ny fiomanan’ny mpianatra, dia asao izy ireo hizara momba-na fotoana mety nahafahan’izy ireo niresaka tamin’ny hafa momba an’i Jesoa Kristy.

• Amin’ny fotoana toy inona no mety hampatahotra ny miresaka momba an’i Jesoa Kristy? Inona no mety hanampy antsika handresy ny tahotsika?

• Iza no olona iray fantatrao ka ohatra tsara amin’ny fizarana ny filazantsaran’i Jesoa Kristy amin’ny hafa?

Ny zatovolahy iray antsoina hoe Junior dia ohatra tsara be amin’ny fizarana ny filazantsara. Izy no hany zatovolahy nandeha niangona tao amin’ny sampana kely iray any Florida, Etazonia. Nanapa-kevitra ny hiresaka tamin’ny iray tamin’ireo namany momba ny filazantsaran’i Jesoa Kristy izy ary nanasa azy ho any am-piangonana. ChurchofJesusChrist.org

Ny ohatry ny hafa dia afaka manome antsika antony sy hevitra momba ny fomba hanasana ny hafa hanatona an’i Kristy. Eo am-pandalinana anio, dia eritrereto ny antony mety hanirianao hanampy ny hafa hanatona ny Mpamonjy sy ny fomba azonao anaovana izany amin’ny fomba tsotra sy mandeha ho azy.

Mandresy lahatra ny hafa hanatona an’i Kristy

Talohan’ny nahafatesan’i Nefia (jereo ny Jakoba 1:12), dia nanome andraikitra an’i Jakoba rahalahiny izy mba hanoratra eo amin’ireo takelaka kely izay nandidian’ny Tompo azy mba hamboariny. Ireo takelaka kely dia mifantoka amina zavatra ara-panahy ary nisy takelaka hafa natokana ho an’ny tantaran’ny vahoaka (Jakoba 1:1–3).

Vakio ny Jakoba 1:4–6, ka tadiavo ny zavatra nangatahin’i Nefia tamin’i Jakoba mba hampidirina ao amin’ireo takelaka sy hampianarina ny vahoaka.

• Inona avy ireo zavatra sasantsasany fantatr’i Nefia sy i Jakoba? Ahoana no nahalalan’izy ireo ireo zavatra ireo?

Ampio ny mpianatra hamantatra ny fijoroana ho vavolombelona nananan’i Jakoba momba an’i Jesoa Kristy sy ny fomba nandrisihan’izany azy hanao zavatra.

Vakio ny Jakoba 1:7–8, ka tadiavo ny zavatra nataon’i Jakoba noho ny fahatakarany. Mety ho azonao atao ny manisy marika andian-teny ao amin’ny soratra masinao izay mampiseho ny zavatra nandrisika an’i Jakoba hanao zavatra. Ireto fanazavana manaraka ireto dia afaka manazava ny zavatra nandrisika an’i Jakoba.

“[Mi]banjina ny fahafatesany”:Azo inoana fa i Jakoba dia nanasa ny Nefita hieritreritra momba an’i Jesoa Kristy izay maty ho azy ireo sy nanao sorompanavotana ho an’ny fahotan’izy ireo.

“[Mi]haritra ny hazofijaliany”:Io andian-teny io dia manondro finiavana handà ny tenantsika amin’ireo zavatra tsy araka an’ Andriamanitra sy ireo filan-dratsin’izao tontolo izao ka hitandrina ireo didin’ny Tompo (jereo ny Dikantenin’i Joseph smith, Matio 16:26 ; Lioka 9:23; 2 Nefia 9:18). Midika ihany koa izany fa afaka maneho ny fahavononantsika hiaritra sy hahafoy tena isika rehefa manaraka ny Mpamonjy.

• Inona tamin’ireo nosoratan’i Jakoba no mety handrisika anao? Inona no antony hafa azonao eritreretina hanasana ny hafa hanatona an’i Kristy?

Hevero ny hanontany ny mpianatra hoe inona amin’ireo andian-teny ao amin’ireo andininy ireo no ilan’izy ireo fanampiana ny fanakarana azy. Asao hifanampy ny mpianatra.

Azonao atao ny manome ireo fanazavana hita ao amin’ny fizarana “Fanazavana sy fampahalalana avy amin’ny zava-miseho” rehefa ilaina.

• Inona no azontsika ianarana amin’ny ohatra nasehon’i Jakoba ao amin’ireo andininy ireo?

Fahamarinana iray azontsika ianarana avy amin’ny ohatra nasehon’i jakoba ny hoe ny fahafantarana an’i Jesoa Kristy sy ny fanjakany dia afaka mandrisika antsika hiasa amim-pahazotoana mba hanampy ny hafa hanatona Azy.

Mety hanampy ny mpianatra ny fandrenesana ny vitsivitsy amin’ireo naman’izy ireo mizara ny valin-teniny amin’ity tari-dresaka ity .

Saintsaino ny zavatra fantatrao momba an’i Jesoa Kristy ary eritrereto ireo fahamarinana tianao ho fantatry ny hafa momba Azy.

Ity manaraka ity dia azon’ny mpianatra atao sahanasa tanterahina anatina vondrona, toe-javatra ikaonan-doha izay ahafahan’izy ireo manampy olona iray hanatona an’i Kristy.

Makà fotoana hieritreretana momba ny zavatra mety hataonao mba hiasana amim-pahazotoana mba handresena lahatra ny hafa hanatona an’i Kristy. Soraty ireo toe-javatra izay mety hanananao fahafahana hanaovana izany. Soraty eo akaikin’ny toe-javatra tsirairay ny fomba mety hahafahanao manampy ny hafa ao anatin’izany sehatra izany hahafantatra sy hitia an’i Jesoa Kristy. Azonao atao ny mampiasa ireto ohatra manaraka ireto sy manampy hafa:

1. Any an-trano

2. Miaraka amin’ny namana iray

3. Amin’ny tamba-jotra sosialy

4. Amin’ny antsonao na amin’ny alalan’ny fanaovana asa fanompoana

Ireo mpianatra dia mety hahazo tombony amina fifanakalozan-kevitra ataon’ny iray kilasy momba ny fomba ahafahan’ny antso ananan’izy ireo na mety hangatahina hotanterahin’izy ireo, manampy azy ireo hitondra ny hafa ho ao amin’i Kristy. Azon’izy ireo atao ny mametraka fanontaniana ananan’izy ireo momba ny fanompoana na mizara torohevitra momba ny fanompoana ao amin’ny Fiangonan’ny Tompo.

Hevero ny hizara zavatra iray niainanao nanampianao olona iray hanatona an’i Kristy.

Azonao atao ihany koa ny mandefa horonan-tsary maneho ohatra. Misafidiana iray amin’ireto horonan-tsary manaraka ireto na hafa azonao ampiasaina.

“Diffusion 2021: Aimer, faire connaître et inviter” (54:06) manomboka eo amin’ny mari-potoana 0:00 hatramin’ny 1:35

“Histoires de membres : Jeunes et jeunes adultes” (5:08)

Rehefa mieritreritra fomba hanampiana ny hafa hanatona an’i Jesoa Kristy ianao, dia afaka mahazo hery avy amin’ireo fampanantenana sy torohevitra ao amin’ny soratra masina.

Vakio ny Fotopampianarana sy Fanekempihavanana 15:6; 18:15–16 mba hahitana ny zavatra nampanantenain’ny Tompo ireo izay manampy ny hafa hanatona Azy.

Vakio ny Almà 31:34–35 mba hianarana avy amin’ny ohatra nasehon’i Almà tamin’ny faniriana hanampy amin’ny fitarihana ny Zôramita hankamin’i Kristy.

• Oviana no nahafahanao nanampy olon-kafa hianatra momba an’i Jesoa Kristy?

• Iza no olona iray tianao hasaina hanatona an’i Kristy? Inona no azonao atao mba hanasana azy ireo? Ahoana no ahafahanao miantehitra amin’ny Mpamonjy mba hanampy anao?

Fanazavana sy fampahalalana avy amin’ny zava-miseho

Jakoba 1:7–8. Inona no dikanireo tenin’i Jakoba?

Ny fahatakarana ireto voambolana manaraka nampiasain’i Jakoba ireto dia afaka manampy.

“Miditra ao amin’ny fitsaharan’[Andriamanitra]”:Rehefa manaraka an’i Jesoa Kristy ihany isika no afaka misitraka fiadanana sy tsy voagejan’ny fanahiana.

“Fihantsiana tamin’ny andron’ny fakam-panahy”:Taorian’ny fanafahana azy ireo hiala tany Egypta, dia nampahatezitra an’ Andriamanitra ny Isiraelita fahiny. Izany hoe, nikomy Taminy izy ireo, nirenireny tany an-tany foana nandritra ny 40 taona, ary namery fitahiana lehibe, isan’izany ny fanatrehan’ Andriamanitra (jereo ny Nomery 14:2–3, 22–23; Hebreo 3:8–9; Fotopampianarana sy Fanekempihavanana 84:23–25).

“Hizaka ny henatr’izao tontolo izao”:Fantatr’i Jakoba fa tsy mora izany hoe mpianatr’i Jesoa Kristy izany. Asaina hanaraka ny Mpamonjy isika na dia eo aza ny fanoherana izay matetika miaraka amin’izany.

Ahoana no ahafahako manao asa fanompoana amin’ny hafa sy mitarika azy ireo hankamin’i Kristy?

Ny Filoha Bonnie H. Cordon, izay Filohan’ny Zatovovavy maneran-tany, dia nanazava hoe:

Rehefa miezaka ny hanaraka ny ohatra nasehon’ny Mpamonjy isika dia tsy maintsy mahafantatra sy manisa ny ondriny aloha. … Tsy ny isa anefa no zava-dehibe ao anatin’ilay fanisana, fa ny fahazoana antoka fa ny olona tsirairay dia mahatsapa ny fitiavan’ny Mpamonjy amin’ny alalan’ny olona iray izay manompo Azy. Amin’izany fomba izany dia afaka mahafantatra ny rehetra fa fantatry ny Ray any an-danitra be fitiavana izy ireo. …

… Rehefa mikatsaka ny fitarihan’ny Tompo ianareo eo amin’ny fomba hampitana ny fitiavany sy eo amin’ny fomba hahitana ireo zavatra ilain’ireo izay tompoinareo, dia hisokatra ny masonareo. (Bonnie H. Cordon, “Lasa mpiandry ondry,” Liahona, nôv. 2018, 75–76)

Ahoana no ahafahan’ny Tompo mitahy ahy rehefa manampy ny hafa hanatona Azy aho?

Nampianatra toy izao ny Filoha Henry B. Eyring ao amin’ny Fiadidiana Voalohany:

Hampitomboin’ny Tompo be dia be ny herinao. Ny hany zavatra angatahiny dia ny hanomezanao ny ezaka tsara indrindra avy aminao sy ny fonao manontolo. Ataovy amim-pifaliana sy amin’ny vavaky ny finoana izany. Ny Ray sy ny Zanany Malalany dia handefa ny Fanahy Masina ho namanao mba hitarika anao. Hankalazaina amin’ny fiainan’ny olona tompoinao ny ezaka ataonao. (Henry B. Eyring, “Élevez-vous jusqu’à votre appel,” Liahona, nov. 2002, 78)

Ahoana no hanandrianako ny antsoko?

Ny Filoha Henry B. Eyring ao amin’ny Fiadidiana Voalohany dia nampianatra ny zavatra takina mba hanandiranana ny antsontsika:

Izany dia miankina amin’ny zoto ananantsika amin’ny fiezahana ny hahafantatra ny sitrapon’ny Tompo sy ireo ezaka ataontsika mba hihainoana ny feony mba hahafahantsika mahafantatra tsaratsara kokoa izay faniriany ho an’ilay olona tompointsika ho Azy. Mandeha tsikelikely izany filofosana izany. Mety handeha miadana izany saingy hisy izany. (Henry B. Eyring, “Hitsodrano amin’ny anarany,” Liahona, mey 2021, 70)

Sahanasa fianarana fanampiny

Jakoba 1:17. Ny iraka rasiko avy amin’ny Tompo

Mety hahazo tombony amin’ny fifanakalozan-kevitra momba ny dikan’ny hoe mahazo iraka avy any amin’ny Tompo ny mpianatra. Ampio ny mpianatra hahatakatra fa mandray iraka avy any amin’ny Tompo isika rehefa manaiky antso iray mba hanompo ao amin’ny Fiangonany na manatanteraka asa fanompoana nampiandraiketina. Azontsika atao ihany koa ny mivavaka mba hahazo fitarihana avy amin’ny Ray any An-danitra sy manaraka ireo fitaomam-panahy azontsika avy amin’ny Fanahy Masina. Hevero ny hampiasa ity fanambarana nataon’ny Filoha Thomas S. Monson (1927–2018) ity: “Rehefa manao ny asan’ny Tompo ianao dia mahazo ny fanampiany. Tsarovy fa izay antsoin’ny Tompo dia omen’ny Tompo fahaiza-manao.” (“Duty Calls,” Ensign, mey 1996, 44).

Jakoba 1:18–19. Ny Tompo dia manome antsika fahafahana hanompoana ny hafa

Hevero ny hizara fa “Ny ho mpanara-dia mahatoky afaka manampy ny hafa ho tonga mpanara-dia mahatoky no tanjona fonosin’ny antso rehetra ao amin’ny Fiangonana” (Boky torolalan’ny Fiangonana maneran-tany: Manompo ao amin’ Ny Fiangonan’i Jesoa Kristy ho an’ny Olomasin’ny Andro Farany, 4.1, ChurchofJesusChrist.org). Vakio miaraka amin’ny iray kilasy ny Jakoba 1:18–19. Ampio ny mpianatra hahita fa i Jakoba sy i Josefa rahalahiny dia nandray tamim-pahamatorana ny andraikitr’izy ireo satria nantsoin’ny Tompo izy ireo. Azonao atao ny mampiasa fanambarana ao amin’ny fizarana hoe “Fanazavana sy fampahalalana avy amin’ny zava-miseho” mba hampaherezana ny mpianatra hanompo ny Tompo ao amin’ny Fiangonany.

Jakoba 1:19. “Nandrianinay ny adidinay”

Mba hanampiana ny mpianatra hahatakatra ny dikan’ny hoe manandriana ny antso iray, dia mitondrà fitaratra manalehibe ao am-pianarana ary mifanakaloza hevtra momba ny hevitry ny hoe manalehibe zavatra. Avy eo dia ampio ny mpianatra hifanakalo hevitra amin’ny mety ho dikan’izany hoe manandriana antso izany. Mety hanampy ny Fotopampianarana sy Fanekempihavana 24:9; 84:33 na fanambarana avy amina mpitarika ato amin’ny Fiangonana.