Jacob 5:1–53

“Ang Ginoo sa Ubasan”

Ang Dios nagpakabana sa tanan Niyang mga anak, kadtong kinsa mga matarong ug kadtong kinsa mipili nga mahimong dili matarong. Gipaambit ni Jacob ang pasumbingay ni Zenos sa mga kahoy nga oliba, nga simbolikanhong naghulagway sa pagkatibulaag sa pipila nga mga matarong ug pipila nga dili. Kini nga pasumbingay naghulagway usab sa mga paningkamot sa Ginoo sa pagpundok sa Israel sa kataposang mga adlaw. Kini nga leksiyon makatabang kanimo nga mobati sa gugma ni Jesukristo alang kanimo ug alang sa tanang mga tawo.

Pagdapit sa Espiritu Santo sa pagpamatuod sa kamatuoran. Samtang imong itudlo ang tinuod nga doktrina gikan sa mga kasulatan ug mga pulong sa mga propeta, ang Espiritu Santo makabaton og kahigayonan sa pagpamatuod sa kamatuoran. Pinaagi sa gahom sa Espiritu Santo, kita mahimo nga “ masayod sa kamatuoran sa tanan nga mga butang” (Moroni 10:5).

Pagpangandam sa estudyante: Ikonsiderar ang paghatag sa mga estudyante sa dayagram nga giulohan og“Ang Pasumbingay sa mga Kahoy nga Oliba (Jacob 5)” nga makita diha sa seksiyon sa “Komentaryo ug Background nga Impormasyon”. Dapita ang mga estudyante sa paggamit sa dayagram aron matabangan sila sa pagtuon sa pasumbingay sa Jacob 5 ug mahimong pamilyar sa kinatibuk-ang mensahe niini.

Mga Posibleng Kalihokan sa Pagkat-on

Ang gugma sa Dios alang niadtong mga nahisalaag

ChurchofJesusChrist.org

Nakonsensiya si Lisa sa pipila ka mga kasaypanan nga bag-o lang niyang nahimo. Nagsugod na siya sa paghunahuna kon ang Dios nagpakabana pa ba kaniya tungod niining mga sayop.

• Unsa kaha ang imong isulti kon ikaw naningkamot sa pagtabang sa usa ka tawo nga adunay mga pagbati sama sa kang Lisa?

• Ngano kaha nga lisod ang pag-ila o pagbati sa gugma sa Dios human kita mipili sa pagpakasala?

Karon magtuon ka sa usa ka asoy sa kasulatan nga nagpakita sa gugma sa Ginoo alang niadtong kinsa mga nahisalaag. Samtang magtuon ka, pangitaa ang importante nga mga leksiyon mahitungod sa kaandam ni Jesukristo sa pagtabang niadtong mibiya Kaniya. Pamalandongi kon sa unsang paagi ang mga kamatuoran nga imong nakat-onan makatabang kanimo sa imong mga kahimtang.

Ang pasumbingay sa mga kahoy nga oliba

Si Jacob nanagna nga ang mga Judeo mosalikway ni Jesukristo (tan-awa sa Jacob 4:15). Aron matabangan ang iyang mga katawhan nga makasabot kon sa unsang paagi ang Manluluwas motabang sa mga Judeo nga makabalik ngadto Kaniya, si Jacob mitudlo kanila og usa ka pasumbingay nga gihatag sa usa ka propeta nga ginganlan og Zenos. Ang usa ka pasumbingay naggamit og simbolikanhong mga karakter, mga butang, ug mga aksiyon aron sa pagtudlo sa mga kamatuoran.

Ang mosunod mao ang pipila sa mahinungdanong mga simbolo sa pasumbingay, uban sa posibleng mga kahulugan niini. Ikonsiderar ang paglista niini nga mga simbolo diha sa imong journal sa pagtuon o sa mga kasulatan.

Ikonsiderar ang pagkopya sa mosunod nga tsart diha sa pisara ug dapita ang mga estudyante sa pagkopya niini ngadto sa ilang mga journal sa pagtuon. Mahimo nimong idugang ang mga panabot ug komento sa mga estudyante diha niini sa tibuok dagan sa leksiyon.

Ang gipalapdan nga tsart nga adunay dugang nga mga simbolo makita diha sa seksiyon nga “Komentaryo ug Background nga Impormasyon”.

Simbolo	Posible nga Kahulugan
Simbolo Ginoo o agalon sa ubasan	Posible nga Kahulugan Jesukristo
Simbolo Ang ubasan	Posible nga Kahulugan Ang kalibotan
Simbolo Maayo nga kahoy nga oliba	Posible nga Kahulugan Ang balay ni Israel, ang katawhan sa pakigsaad sa Ginoo
Simbolo Ihalas nga kahoy nga oliba	Posible nga Kahulugan Mga Hentil (kadtong kinsa wala mihimo og mga pakigsaad uban sa Ginoo) ug mibiya sa kamatuoran nga Israel

Aron sa pagtabang kanimo sa pag-andam sa pagkat-on mahitungod ni Jesukristo samtang ikaw magtuon sa Jacob 5, isulat ang “Unsa ang akong nakat-onan mahitungod ni Jesukristo gikan sa Jacob 5” sa tunga sa blangko nga pahina sa imong journal sa pagtuon ug pagdrowing og lingin palibot niini. Sa tibuok leksiyon, pangitaa ang mga kamatuoran ug mga panabot mahitungod ni Jesukristo, ang Ginoo sa ubasan. Irekord kini nga mga nakaplagan sa sulod o sa palibot sa lingin diha sa imong journal sa pagtuon.

Pagsabot sa pasumbingay

Kon wala pa nimo kini mahimo, hatagi ang mga estudyante sa dayagram nga nag-ulohan og “Ang Pasumbingay sa mga Kahoy nga Oliba (Jacob 5),” nga makita diha sa seksiyon nga “Komentaryo ug Background nga Impormasyon”. Ang mga estudyante mahimong mobalik sa mga bahin niini nga dayagram sa tibuok leksiyon.

Ang sinugdanan sa pasumbingay mahimong nagrepresentar sa panahon sa wala pa ang mortal nga pangalagad ni Jesukristo. Basaha ang Jacob 5:3–6, mangita kon unsay nahitabo sa maayo nga kahoy nga oliba, nga nagrepresentar sa katawhan sa pakigsaad sa Dios.

• Unsa sa imong hunahuna ang gisimbolo sa pagkadunot sa kahoy?

• Unsa kaha sa imong hunahuna ang girepresentar sa pagpul-ong, pagkalot, ug pag-alima sa agalon sa ubasan?

• Unsa ang gitudlo niini nga mga aksiyon kanimo mahitungod ni Jesukristo? (Idugang ang imong mga panabot diha sa imong panid sa journal.)

Mahimong makatabang ang paghulagway sa mosunod nga mga punto pinaagi sa pagdrowing og representasyon niini diha sa pisara.

Human niining unang pagbisita, ang agalon sa ubasan mihimo og duha ka laing importante nga mga aksiyon aron sa pagluwas sa iyang maayo nga kahoy nga oliba:

1. Siya mimando nga ang nag-unang nangadunot nga mga sanga sa kahoy nga oliba tangtangon ug ang pipila ka mga sanga sa ihalas nga kahoy sa oliba isumbak ngadto sa punoan sa kahoy (tan-awa sa Jacob 5:7–10). Kini nga pagsumbak mahimong magrepresentar sa mga paningkamot sa Ginoo sa pagtabang sa mga Hentil nga mahimong kabahin sa Iyang mga katawhan sa pakigsaad pinaagi sa bunyag ug pagkakabig.

2. Siya mikuha og dabong ug linghod nga mga sanga gikan sa punoan sa kahoy nga oliba ug gisumbak kini ngadto sa lain-laing mga bahin sa ubasan (tan-awa sa Jacob 5:8, 13–14). Kini mahimong nagrepresentar sa pagkatibulaag sa Israel ngadto sa lain-laing mga bahin sa kalibotan. Pipila niadtong kinsa natibulaag mga matarong, sama sa pamilya ni Lehi (tan-awa sa 1 Nephi 10:12–13). Ang uban natibulaag tungod sa pagkadaotan.

Ang nahibilin sa pasumbingay naghubit sa mga pagbisita sa ginoo sa ubasan ngadto sa iyang ubasan sa ulahi nga mga panahon. Kini nga mga pagbisita mahimong nagsimbolo sa lainlaing mga yugto sa panahon sa kasaysayan sa kalibotan.

Ikonsiderar ang pagbahin sa mga estudyante ngadto sa manag paresan o sa gagmay nga mga grupo ug i-assign ang matag grupo og usa sa mosunod nga mga hugpong sa mga bersikulo nga tun-an. Ang mga estudyante mahimo dayon nga moreport sa ilang mga nakaplagan ngadto sa klase.

Tun-i ang mosunod nga mga bersikulo, mangita kon unsay nahitabo sa parehong punoan nga kahoy ug sa gitibulaag nga mga kahoy atol sa matag pagbisita.

• Ikaduha nga pagbisita (nagsimbolo sa panahon ni Jesukristo): Jacob 5:15–17, 19–20, 23–28

• Ikatulo nga pagbisita (nagsimbolo sa Dakong Apostasiya): Jacob 5:29–32, 38–41, 46–47

• Unsa ang imong namatikdan mahitungod sa kahimtang sa mga kahoy ug sa bunga niini atol sa mga pagbisita?

• Unsa ang imong namatikdan mahitungod sa mga pulong ug mga aksiyon sa ginoo sa ubasan atol niini nga mga pagbisita?

• Unsa ang gitudlo niini nga mga pulong ug aksiyon kanimo mahitungod ni Jesukristo? (Idugang ang imong mga panabot diha sa imong panid sa journal.)

Si Elder Jeffrey R. Holland sa Korum sa Napulog Duha ka Apostoles mipaambit og usa ka leksiyon nga atong makat-onan mahitungod sa Dios gikan niini nga mga bersikulo:

Human sa pagkalot ug pag-abuno, pamubo ug pagtangtang sa sagbot, pagpung-ol, pagpul-ong, pagluyong, ug pagsumbak, ang bantogan nga Ginoo sa ubasan mihulog sa iyang pala ug sa iyang mga galab ug mihilak, misinggit ngadto ni bisan kinsa nga maminaw, “Unsa pa ang akong dugang nga mahimo alang sa akong ubasan?” [Jacob 5:41, 49].

Unsa ka dili malimtan nga hitsura sa pakiglambigit sa Dios sa atong mga kinabuhi! Unsa ang kaguol sa usa ka ginikanan kon ang Iyang mga anak wala mopili Kaniya o wala mopili “sa ebanghelyo sa Dios” [Mga Taga-Roman 1:1] nga Iyang gipadala! Pagkasayon sa paghigugma sa usa ka tawo nga nag-inusarang nahigugma kanato! (Jeffrey R. Holland, “The Grandeur of God,” Liahona, Nob. 2003, 72)

• Unsa ang mipatigbabaw kanimo gikan niini nga pamahayag? Ngano man?

Ang padayon nga mga paningkamot sa ginoo sa ubasan

Basaha ang Jacob 5:51–53, mangita kon unsa ang gipili sa ginoo sa ubasan nga buhaton human makita ang iyang mga kahoy nga nadunot na.

• Unsa ang gitudlo kanimo niini nga mga bersikulo mahitungod sa Ginoo? (Idugang ang imong mga panabot diha sa imong panid sa journal.)

• Unsaon nimo pagpamubo ang mga leksiyon nga imong nakat-onan sa Jacob 5 ngadto sa usa ka pamahayag sa kamatuoran?

Usa ka kamatuoran nga atong makat-onan gikan sa Jacob 5 mao nga ang Ginoo nahigugma sa tanang anak sa Langitnong Amahan ug nagpadayon nga nagpakabana kanila bisan kon sila mibiya gikan diha Kaniya.

• Sa unsang paagi kini nga kamatuoran makatabang sa usa ka tawo nga mobati og mas dakong tinguha sa paghinulsol?

• Unsa ang pipila ka mga ehemplo gikan sa mga kasulatan o gikan sa imong kinabuhi nga naghulagway kon sa unsang paagi ang Ginoo nagpadayon sa paghigugma ug pagpakabana sa mga tawo bisan nga sila mibiya gikan diha Kaniya?

Kon ang sinugdanan sa mosunod nga bidyo gipakita sa sayo pa, ikonsiderar ang pagtan-aw sa nahabilin dinhi (sa time code 1:41 hangtod sa 5:42).

Hunahunaa kon sa unsang paagi ang imong nakat-onan ug gibati karon makaimpluwensiya sa imong kinabuhi. Ikonsiderar ang pagrekord sa imong mga impresyon diha sa imong journal sa pagtuon.

Komentaryo ug Background nga Impormasyon

Unsa ang dugang pa nga mga simbolo ug posible nga mga kahulugan sa Jacob 5?

Ang mosunod naghatag sa usa ka sukaranan sa kinatibuk-ang pagpasabot sa mga detalye ug simbolo sa pasumbingay sa Jacob 5.

Simbolo	Posible nga Kahulugan
Simbolo Mga gamot sa maayo nga kahoy nga oliba	Posible nga Kahulugan Mga indibidwal kinsa ang Ginoo nakigsaad sa karaan, sama nila ni Abraham, Isaac, ug Jacob (tan-awa sa Jacob 6:4); usab, ang mga pakigsaad nga gihimo sa Ginoo niadtong nagsunod Kaniya
Simbolo Bunga sa kahoy	Posible nga Kahulugan Mga kinabuhi o mga binuhatan sa mga katawhan
Simbolo Pagkalot, pagpul-ong, pag-abuno (pagbutang og hugaw sa hayop)	Posible nga Kahulugan Ang mga paningkamot sa Ginoo sa Iyang mga anak
Simbolo Pagbalhin og tanom sa mga sanga	Posible nga Kahulugan Pagpatibulaag sa mga grupo sa tibuok kalibotan o pagpahiuli kanila sa ilang orihinal nga posisyon
Simbolo Pagsumbak	Posible nga Kahulugan Ang pagpatibulaag ug pagpundok sa mga katawhan sa pakigsaad sa Ginoo; ug, ang pagkakabig niadtong nahimong kabahin sa katawhan sa pakigsaad sa Ginoo (pagsumbak sa ihalas nga mga sanga ngadto sa maayo nga kahoy nga oliba)
Simbolo Nagkadunot nga mga sanga	Posible nga Kahulugan Pagkadaotan ug apostasiya
Simbolo Pagtambog sa mga sanga ngadto sa kalayo	Posible nga Kahulugan Mga paghukom sa Dios ngadto sa mga dautan

Naghulat ba ang Dios sa paghigugma kanako hangtod nga mabuntog nako ang akong mga kahuyang?

Si Presidente Dieter F. Uchtdorf, kanhi sa Unang Kapangulohan, mitudlo:

Ang Dios nahigugma kaninyo karong adlawa ug sa kanunay.

Wala Siya maghulat nga higugmaon kamo hangtod nga inyong mabuntog ang inyong mga kahuyang ug bati nga mga batasan. Siya nahigugma ninyo karon uban sa hingpit nga pagsabot sa tanan ninyong panlimbasog. … Nasayod Siya sa inyong mga pag-antos. Nasayod Siya sa inyong pagmahay sa panahon nga kamo nasayop o napakyas. Ug Siya nahigugma gihapon ninyo. (Dieter F. Uchtdorf, “Pagsunod sa Ebanghelyo nga Malipayon,” Liahona, Nob. 2014, 123)

Unsa ang matabang sa pasumbingay sa mga kahoy nga oliba kanako nga makasabot mahitungod sa Pag-ula sa Manluluwas?

Si Elder Jeffrey R. Holland sa Korum sa Napulog Duha ka Apostoles mipasabot:

Kini nga pasumbingay nga gisaysay ni Jacob maoy gikan sa sinugdanan nga gituyo nga mahitungod kang Kristo. …

Bisan kon ang Ginoo sa ubasan ug ang iyang mga mamumuo naningkamot sa paglig-on, pagpul-ong, paglunsay, ug paghimong mabungahon sa ilang mga kahoy nga mikabat og usa ka kapitulo nga summary sa kasaysayan sa pagkatibulaag ug pagkapundok sa Israel, ang mas lawom nga kahulugan sa Pag-ula nagdasig ug nag-impluwensiya sa ilang mga paghago. Bisan pa sa mga pagputol ug mga pagsumbak ug mga pag-alima nga nagsagol ug nagtapok sa mga kahoy sa halos tanan nga bahin sa ubasan, kini nagdala kanila pagbalik sa ilang gigikanan nga mao ang nag-una nga tema niini nga pasumbingay. Ang pagbalik, paghinulsol, paghiusa pag-usab—pag-ula—mao kini ang kinatibuk-ang mensahe. (Jeffrey R. Holland, Christ and the New Covenant [1997], 165)

Dugang nga mga Kalihokan sa Pagkat-on

Pagbaton sa gahom sa Ginoo pinaagi sa mga pakigsaad

Ang mga gamot sa kahoy niini nga pasumbingay gamhanang mga simbolo sa mga pakigsaad sa Ginoo kanato. Dapita ang mga estudyante sa pagpangita sa pulong nga “mga gamot” sa Jacob 5—ang pulong makita sa Jacob 5:11, 34–37, 48, 53–54, 59–60, 65. Mahimong tun-an sa mga estudyante kini nga mga tudling ug tubagon ang mga pangutana sama sa mosunod: Unsa ang mahimo sa mga gamot alang sa mga kahoy? Sa unsang paagi kini susama sa unsay mabuhat sa mga pakigsaad sa Ginoo alang kanato samtang kita motuman niini? Kanus-a ka o ang usa ka tawo nga imong nailhan nakasinati sa makaalima ug makalig-on nga gahom sa mga pakigsaad?