Sukda ang Imong Nakat-onan 3

2 Nephi 26–Jacob 7

Kini nga leksiyon gituyo aron matabangan ka nga makakita kon sa unsang paagi ka milambo o nausab atol sa imong pagtuon sa 2 Nephi 26–Jacob 7.

Pagdasig sa mga estudyante sa pagkat-on. Dasiga ang mga estudyante sa paggamit sa ilang kabubut-on sa pag-apil sa kasinatian sa pagkat-on. Si Elder David A. Bednar sa Korum sa Napulog Duha ka Apostoles mitudlo, “Ang usa ka tigkat-on nga naggamit sa kabubut-on pinaagi sa paglihok sumala sa sakto nga mga baroganan mibukas sa iyang kasingkasing ngadto sa Espiritu Santo ug nagdapit sa Iyang pagtudlo, gahom sa pagpamatuod, ug panghimatuod nga saksi” (“Paningkamot sa Pagkat-on pinaagi sa Hugot nga Pagtuo,” Liahona, Sept. 2007, 20).

Pagpangandam sa estudyante: Ikonsiderar ang pagdapit sa mga estudyante sa pagpamalandong kon sa unsang paagi sila milambo sa espirituhanong paagi pinaagi sa ilang pagtuon sa Basahon ni Mormon sa miaging upat ka semana. Mahimo nimo silang dapiton sa pagrebyo sa ilang mga journal sa pagtuon ug pag-ila sa piho nga mga pagtulun-an nga ilang gigamit o mga bersikulo nga labi ka makahuluganon ngadto kanila.

Mga Posibleng Kalihokan sa Pagkat-on

Mas Maayo og Gamay Adlaw matag Adlaw

Ikonsiderar ang pagsugod niini nga leksiyon pinaagi sa diskusiyon mahitungod sa mga katuyoan ug bili sa pagsukod sa kaugalingon. Mahimong mopaambit ang mga estudyante og piho nga mga pagtulun-an gikan sa Basahon ni Mormon nga ilang gigamit sa ilang kinabuhi o mga bersikulo gikan sa Basahon ni Mormon nga labi ka makahuluganon ngadto kanila.

Si Presidente Lorenzo Snow (1814–1901), ikalima nga Presidente sa Simbahan, mitudlo:

Ayaw pagdahom nga mahimong hingpit sa usa lamang ka higayon. Kon kamo nagdahom, kamo masagmuyo. Magmahimong mas maayo karon kay sa kagahapon, ug mas maayo ugma kay sa unsa kamo karon. Ang mga tintasyon nga medyo mibuntog kanato karon, ayaw tugoti nga mobuntog usab kaninyo ugma. Apan padayon nga mahimong mas maayo og gamay matag adlaw; ug ayaw tugoti nga ang inyong kinabuhi matapos nga walay nahimong maayo ngadto sa uban ingon man usab sa atong kaugalingon. (Mga Pagtulun-an sa mga Presidente sa Simbahan: Lorenzo Snow [2012], 121)

• Unsaon nimo pagkahibalo kon mas maayo ka karon kaysa kagahapon?

• Sa unsang paagi ang Langitnong Amahan ug si Jesukristo makatabang kanimo sa imong mga paningkamot nga mahimong mas maayo ugma kaysa karon?

Kini nga leksiyon gituyo aron sa pagtabang kanimo sa paghunahuna mahitungod sa imong paglambo isip usa ka disipulo ni Jesukristo, lakip sa imong katakos sa pagpasabot sa doktrina nga imong nakat-onan diha sa mga kasulatan. Paghunahuna sa mga paagi nga ang imong pagtuon sa Basahon ni Mormon nakatabang nimo nga molambo isip disipulo ni Kristo. Samtang magtuon ka karon, dapita ang Espiritu Santo sa pagtabang kanimo nga makakita kon sa unsang paagi ang imong pagtuon sa Basahon ni Mormon nakaapekto sa imong katakos sa pagsunod ug pagpaambit sa ebanghelyo ni Jesukristo.

Ang pagtuon sa imong klase sa 2 Nephi 26 hangtod sa Jacob 7 mahimong mihatag og gibug-aton sa nagkalain-laing mga kamatuoran kaysa niadtong makita sa mosunod nga mga kalihokan. Mobati nga gawasnon sa pagpili kon unsa nga mga kalihokan ang labing makatubag sa mga panginahanglan sa imong klase o ipahiangay ang mga kalihokan aron maapil ang mga kamatuoran nga nailhan sa imong mga estudyante.

Ang tuyo sa mga kalihokan A ug B mao ang paghatag sa mga estudyante og kahigayonan sa pagpasabot sa doktrina nga gitudlo sa miaging mga leksiyon. Mahimong gikinahanglan nga buhaton lamang ang usa niini aron mahatagan og panahon ang kalihokan C o D.

Kalihokan A: Ipasabot ang doktrina ni Jesukristo

Ang mosunod nga kalihokan magkinahanglan sa mga estudyante sa pagrebyo sa pipila ka mga bersikulo sa kasulatan. Pagmasinabtonon ngadto sa mga estudyante kinsa tingali naglisod sa pagbasa o pagsabot sa mga kasulatan. Ikonsiderar ang pagbutang sa mga estudyante nga managparesan o sa mga grupo, ug tabangi sila sa pag-ila sa mga baroganan ug mga ordinansa sa doktrina ni Kristo. Kini naglakip sa hugot nga pagtuo diha kang Jesukristo, paghinulsol, bunyag alang sa kapasayloan sa mga sala, pagdawat sa gasa sa Espiritu Santo, ug paglahutay hangtod sa katapusan.

Si Nephi mitudlo unsay kinahanglan natong buhaton aron makadawat og kinabuhing dayon. Kini nga mga baroganan ug mga ordinansa gitawag og doktrina ni Kristo (tan-awa sa 2 Nephi 31:2, 21). Ang doktrina ni Kristo “mao ang agianan; ug walay lain nga agianan ni ngalan nga gihatag ubos sa langit diin ang tawo maluwas diha sa gingharian sa Dios” (2 Nephi 31:21). Rebyoha ang 2 Nephi 31:10–12, 17, 20–21, mangita sa mga baroganan ug mga ordinansa nga kabahin sa doktrina ni Kristo.

Dapita ang mga estudyante sa pagtubag sa mosunod nga mga pangutana uban sa ilang grupo o sa pagsulat sa ilang mga tubag diha sa ilang mga journal sa pagtuon.

• Unsaon kaha nimo pagpasabot ang doktrina ni Kristo ngadto sa laing tawo gamit ang unsay girekord ni Nephi sa 2 Nephi 31?

• Sa unsang paagi nga ang doktrina ni Kristo makatabang kanato nga mosalig Kaniya alang sa atong kaluwasan?

• Sa unsang paagi ka napanalanginan pinaagi sa pagsunod sa doktrina ni Kristo?

Kalihokan B: Ipasabot ang tahas sa Basahon ni Mormon sa Pagpahiuli sa ebanghelyo ni Jesukristo

Mahimo nimong ipresentar ang mosunod nga senaryo isip usa ka drama-drama, diin ikaw ang modala isip presidente sa stake ug ang mga estudyante motubag isip si Luca. Kon buhaton nimo kini, pangutana og follow-up nga mga pangutana nga makatabang sa mga estudyante sa paghatag og pagpamatuod sa Basahon ni Mormon isip kauban ug saksi sa kamatuoran sa Biblia. (tan-awa sa 1 Nephi 13:40–42; 2 Nephi 3:11–12), usa ka timaan sa Pagpahiuli (tan-awa sa 2 Nephi 27; 29:1–10), ug “ang sukaranan sa atong tinuohan” (pasiuna sa Basahon ni Mormon).

Handurawa ang mosunod nga senaryo:

Si Luca nangandam nga mahimong full-time nga misyonaryo. Ang iyang presidente sa stake mipadala sa mosunod nga mensahe usa ka semana sa wala pa sila magkita alang sa usa ka interbyo:

“Luca, naghinam-hinam ko nga makigkita nimo. Agi og pagpangandam sa atong panagkita, palihog og pangandam sa paggamit sa Basahon ni Mormon aron pagtubag niini nga pangutana: Unsa ang tahas sa Basahon ni Mormon sa Pagpahiuli sa ebanghelyo ni Jesukristo? (tan-awa sa 2 Nephi 3:11–12; 2 Nephi 27:25–26; 2 Nephi 29:7–11).”

• Unsa ang mahimong mapaambit ni Luca gikan sa Basahon ni Mormon mahitungod sa tahas niini sa Pagpahiuli sa ebanghelyo ni Jesukristo?

Kalihokan C: Sukli ang yawa uban sa hugot nga pagtuo diha kang Jesukristo

Kon ang mga estudyante wala dapita sa paghimo og plano isip kabahin sa leksiyon sa “2 Nephi 28:1–26,” kini nga bahin gikinahanglan nga ipahiangay sumala niana. Sama pananglit, mahimo nimong tabangan ang mga estudyante sa paghimo og plano o hisgotan ang mga estratehiya nga makapugong sa mga paningkamot ni Satanas.

Sa 2 Nephi 28:20–22, si Nephi mitudlo mahitungod sa mga estratehiya nga gamiton ni Satanas sa pagpahilayo sa mga tawo gikan sa Dios sa kataposang mga adlaw. Kini naglakip sa pagkutaw sa mga tawo sa kasuko batok niana nga maayo, paghupay sa mga tawo ug malipoton nga pagpahiluna kanila ngadto sa kalibutanon nga kasegurohan, ug pagsulti sa mga tawo nga walay impyerno ug walay yawa. Isip kabahin sa imong pagtuon sa leksiyon sa“2 Nephi 28:1–26,” tingali nakahimo ka og plano aron mas mapanalipdan ang imong kaugalingon batok sa mga taktika ni Satanas. Rebyoha unsay imong gisulat sa imong journal sa pagtuon gikan niana nga leksiyon.

• Unsa ka epektibo ang imong pagpatuman sa imong plano? Ngano man?

• Sa unsang mga paagi nga ang imong plano nakatabang nimo nga makadawat sa panalipod sa Manluluwas batok sa mga taktika ni Satanas?

• Unsa ang imong nakat-onan o nasinati nga mahimong makatabang kanimo sa pagdugang sa imong plano?

Ikonsiderar ang mga paagi sa pagpasalig pag-usab sa pagtuman sa imong plano. Seguroha ang pagtinguha og tabang ngadto sa Langitnong Amahan ug ni Jesukristo aron sa pagpasidaan kanimo sa kapeligrohan ug paghatag kanimo og gahom sa pag-ikyas o pagbuntog sa mga paningkamot ni Satanas (tan-awa sa Doktrina ug mga Pakigsaad 10:5).

Kalihokan D: Pag-apil sa pagpundok sa Israel

Sila si Nephi ug Jacob adunay dakong interes sa pagpundok sa Israel. Tingali tungod kini kay ang Ginoo mipakita kang Nephi unsa ang mahimong mahitabo sa ilang kaliwatan (tan-awa sa 1 Nephi 12–13).

Mahimong gidapit ka sa pag-apil sa pagpundok sa Israel isip kabahin sa imong pagtuon sa 1 Nephi 19–22; 2 Nephi 6; o Jacob 5:52–77; 6:1–13. Kon mao, rebyoha ang bisan unsang mga pasalig o mga plano nga imong gihimo o ang imong kinaiya ug kaandam nga moapil sa buhat.

• Unsa ang imong nakat-onan sa imong mga pagtuon mahitungod sa pagpundok sa Israel nga imong nakaplagan nga makapadasig o mapuslanon?

• Unsa nga mga paningkamot ang imong nahimo nga wala nimo masulayi kaniadto? Nagmalamposon ka ba? Ngano o nganong wala?

• Sa unsang paagi nimo nabati ang Manluluwas nga naggiya o naglig-on kanimo samtang ikaw miapil sa Iyang buhat?

• Unsa nga mga panalangin ang imong nakita gikan sa pag-apil niini nga buhat?