Jacob 7

Dili Matarog nga Hugot nga Pagtuo diha ni Jesukristo

Kon gibati nimo nga ang ubang mga tawo karon tinuyo nga naningkamot sa pagtarog sa hugot nga pagtuo sa mga miyembro sa Simbahan sa Manluluwas, husto ka. Kini dili na bag-o. Taliwala sa mga Nephite, usa ka tawo nga ginganlan og Sherem ang “naghago sa kakugi nga siya unta makalingla sa mga kasingkasing sa mga katawhan” (Jacob 7:3). Kini nga leksiyon makatabang kanimo nga maandam sa pagbuntog sa mga hagit sa imong hugot nga pagtuo diha ni Jesukristo ug sa Iyang ebanghelyo.

Pagtabang sa mga estudyante nga makasabot sa unod sa mga kasulatan. Ang unod sa mga kasulatan mao ang dagan sa istorya, mga tawo, mga panghitabo, mga sermon, ug mga pagpasabot. Ang pagsabot niini nga mga elemento makatabang sa mga estudyante nga makonektar sa mga indibidwal diha sa mga kasulatan ug mapalig-on pinaagi sa dinasig nga narekord nga mga sermon.

Pagpangandam sa estudyante: Dapita ang mga estudyante nga motambong sa klase nga andam sa pagpaambit og ehemplo sa usa ka tawo nga lig-on nga nagbarog sa iyang hugot nga pagtuo sa dihang ang uban mihagit kaniya.

Mga Posibleng Kalihokan sa Pagkat-on

Pagpangandam alang sa umaabot nga mga hagit

Sa dili pa ipaambit ang mosunod nga pamahayag, ikonsiderar ang pagpangutana, “Sa sukod nga usa ngadto sa napulo, unsa kalisod sa imong hunahuna ang mahimong maisog nga disipulo ni Jesukristo karon?” Mahimo nimong hangyoon ang mga estudyante sa pagpataas sa gidaghanon sa mga tudlo nga nagrepresentar sa ilang tubag ug dayon hangyoa ang pipila kanila sa pagpaambit nganong mitubag sila sa paagi nga ilang nahimo.

Si Presidente Russell M. Nelson mipaambit sa mosunod mahitungod sa usa ka lisod nga hagit nga atong atubangon:

Malisod nga mga adlaw anaa sa unahan. Panagsa ra unya sa umaabot nga mahimong sayon o sikat ang mamahimong Santos sa Ulahing mga Adlaw. Matag usa kanato pagasulayan. Si Apostol Pablo mipahimangno nga sa ulahing mga adlaw, kadtong matinguhaon nga nagsunod sa Ginoo “pagalutoson gayod” [2 Timoteo 3:12]. Kana nga paglutos mahimong mobitad kaninyo ngadto sa pagkahuyang o modasig kaninyo nga mas sulundon ug maisogon sa inyong inadlaw-adlaw nga kinabuhi. (Russell M. Nelson, “Atubanga ang Umaabot uban sa Hugot nga Pagtuo,” Liahona, Mayo 2011, 35–36)

• Si Presidente Nelson mihatag niini nga pakigpulong niadtong 2011. Sa unsang mga paagi nga nasinati o nakita na nimo unsa ang iyang gihulagway?

• Ngano kaha nga dili kaayo inila sa umaabot ang pagpabiling matinud-anon ngadto sa gipahiuli nga ebanghelyo ni Jesukristo? Ngano sa imong hunahuna nga takos pa kini?

• Ngano sa imong hunahuna nga ang Ginoo misulti kanato mahitungod niini nga mga kalisdanan sa sayo pa nga panahon?

Pamalandongi sa makadiyot ang kasamtangang kalig-on sa imong pagpamatuod sa ebanghelyo ni Jesukristo ug unsa ka kaandam nga magpabilin nga matinud-anon ngadto Kaniya sa umaabot nga lisod nga mga adlaw. Samtang nagtuon ka sa Jacob 7, pangitaa kon giunsa pag-andam ni Jacob ang iyang kaugalingon nga magpabiling matinud-anon sa dihang ang dautang tawo nga ginganlan og Sherem misulay sa pag-uyog sa iyang hugot nga pagtuo.

Si Sherem nagsangyaw batok kang Kristo

Basaha ang Jacob 7:1–7, o tan-awa ang bidyo nga “Si Sherem Milimod kang Kristo” gikan sa time code 0:33 hangtod sa 2:21. Kini nga bidyo anaa sa ChurchofJesusChrist.org ChurchofJesusChrist.org. Pangitaa kon unsay gitudlo ni Sherem aron pagsulay sa pag-uyog sa hugot nga pagtuo sa mga Nephite diha kang Kristo.

• Unsa ang gitudlo ni Sherem aron pagsulay sa pag-uyog sa hugot nga pagtuo sa mga Nephite?

• Unsa ang pipila ka mga paagi nga ang mga tawo mahimong mohagit sa hugot nga pagtuo sa mga disipulo ni Kristo karon?

Dapita ang mga estudyante sa hilom nga pagpamalandong sa mosunod:

Pamalandongi kon nakakita ka ba ni bisan kinsa sa imong palibot nga nagsugod sa pagduhaduha sa ilang hugot nga pagtuo diha kang Jesukristo ug sa Iyang gipahiuli nga ebanghelyo tungod sa impluwensiya sa uban. Nakamatikod ka ba nga adunay tawo nga naghagit sa imong hugot nga pagtuo diha Kaniya?

Ang hugot nga pagtuo ni Jacob dili matarog

Ikonsiderar ang pagdapit sa mga estudyante sa pagbasa sa mosunod nga mga bersikulo diha sa gamay nga grupo. Dayon dapita ang matag grupo nga ipasulat sa usa ka representante diha sa pisara ang unsay ilang nakat-onan gikan sa ehemplo ni Jacob. Kini ang pipila ka mga kamatuoran nga mahimong makaplagan sa mga estudyante: ang Espiritu makatabang kanato nga mahibalo unsay buhaton ug isulti kon ang atong hugot nga pagtuo gihagit, ug makasalig kita sa mga pagtulun-an sa mga propeta sa paglig-on sa atong hugot nga pagtuo diha kang Kristo.

Samtang mopaambit ang mga estudyante, ikonsiderar ang pagpahinumdum kanila nga ang pagtuon sa mga tudling sa doktrinal nga kahanas ug sa mga baroganan sa pag-angkon og espirituhanong kahibalo makaandam kanila sa pagsagubang sa mga hagit sa ilang hugot nga pagtuo diha kang Jesukristo.

Basaha ang Jacob 7:5, 8–12, mangita kon unsay nakatabang ni Jacob sa pagsalikway sa mga pagtulun-an ni Sherem.

Usa ka baroganan nga atong makat-onan sa bersikulo 5 mao nga atong mabuntog ang mga hagit sa atong hugot nga pagtuo diha kang Jesukristo pinaagi sa paghinumdom sa nangaging espirituhanong mga kasinatian nga nakapalig-on sa atong hugot nga pagtuo.

• Unsang piho nga mga butang ang nahinumduman ni Jacob atol niining pagpakigharong nga nakatabang kaniya?

• Ngano nga ang paghinumdom sa atong nangaging espirituhanong mga kasinatian makapalig-on kanato kon kita mag-atubang og mga hagit sa atong hugot nga pagtuo?

Si Elder Neil L. Andersen sa Korum sa Napulog Duha ka Apostoles mitudlo:

Kauban sa malinawong direksiyon nga atong nadawat gikan sa Espiritu Santo, sa matag karon ug unya, ang Dios sa impluwensiyal ug sa personal kaayo nga paagi misiguro sa matag usa kanato nga Siya nakaila ug nahigugma kanato ug Siya nanalangin kanato sa piho ug sa dayag nga paagi. Dayon, sa atong mga kalisdanan, kining mga kasinatian ibalik sa Manluluwas diha sa atong hunahuna. …

Hangupa ang sagrado ninyong mga panumduman. Tuohi kini. Isulat kini. … Mosaad ko ninyo nga samtang kamo andam nga moila ug mainampingon nga mobahandi sa espirituhanong mga hitabo nga angay hinumduman sa inyong kinabuhi, magkadaghan pa ang moabot kaninyo. Ang Langitnong Amahan nakaila ug nahigugma kaninyo! (Neil L. Andersen, “Mga Espirituhanong Panumduman nga Angay Hinumduman,” Liahona, Mayo 2020, 19, 22)

Kon imong gamiton ang mosunod nga ideya, hatagi og igong panahon ang mga estudyante sa pagpamalandong, pag-ampo, ug pagrekord sa ilang mga pagbati ug mga kasinatian. Dayon pagdapit og mga boluntaryo sa pagpaambit og mga kasinatian nga dili kaayo sagrado. Ikonsiderar ang pagpaambit og personal nga ehemplo nga dili kaayo sagrado o talagsaon aron ang mga estudyante maka-relate sa imong kasinatian.

Paggahin og igong panahon sa paghinumdom sa mga pagbati ug mga kasinatian nga gihatag sa Dios kanimo aron sa pagseguro kanimo nga Siya nakaila ug nahigugma kanimo. Irekord ang pipila niini diha sa imong journal sa pagtuon o sa imong mga kasulatan. Kon nagkinahanglan ka og tabang sa paghinumdom sa maong mga kasinatian, hangyoa ang Langitnong Amahan diha sa pag-ampo aron pagtabang kanimo sa pag-ila o paghinumdom sa pipila nga nagpadayon. Iyaha kini nga buhaton sa Iyang kaugalingon nga higayon ug paagi.

Mahimo nimong tan-awon ang bidyo sa “Mga Espirituhanong Panumduman nga Angay Hinumduman” gikan sa time code 13:40 hangtod sa 14:46. Pangitaa kon sa unsang paagi ang paghulagway ni Elder Andersen nagpakita nga ang atong espirituhanong mga panumduman makapadan-ag sa dalan alang kanato ug sa uban atol sa panahon sa mga pagsulay. Kini nga video anaa sa ChurchofJesusChrist.org.

Mahimo nimong gamiton ang mosunod nga mga sugyot ug hatagi ang mga estudyante og pipila ka minuto sa pag-text o pag-email sa usa ka mahal sa kinabuhi. Mahimong makatabang ang pagpahinumdom kanila nga pipila ka sagrado nga mga kasinatian kinahanglang tipigan nga personal.

Pamalandongi kon kinsa ang imong nailhan nga mahimong malig-on pinaagi sa pagpaminaw sa usa sa imong mga kasinatian. Ikonsiderar ang pagpangita og paagi sa pagpaambit niini ngadto kanila.

Hunahunaa usab ang mahitungod sa mga mahal sa kinabuhi ug mga lider sa Simbahan kansang hugot nga pagtuo ug mga kasinatian makapalig-on sa imong kaugalingon. Ikonsiderar ang pagduol ngadto kanila alang sa tabang.

Usa ka timaan gikan sa Dios

Basaha ang Jacob 7:13–23, o tan-awa ang bidyo nga “Si Sherem Milimod kang Kristo” gikan sa time code 2:22 hangtod sa 7:16, aron mahibalo kon unsa ang nahitabo ni Sherem.

Ikonsiderar ang pagpakita sa mosunod nga mga pangutana ug paghatag og panahon sa mga estudyante sa pagpamalandong niini. Dayon pagdapit og mga boluntaryo sa pagpaambit sa ilang mga tubag.

• Ngano sa imong hunahuna nga girekord ni Jacob kini nga asoy alang sa mga tawo sa atong panahon karon?

• Sa imong hunahuna sa unsang paagi kaha gusto sa Langitnong Amahan nga imong gamiton ang imong nakat-onan karon sa usa ka sitwasyon nga imong giatubang?

Komentaryo ug Background nga Impormasyon

Unsaon nako nga mas makaila ug makahinumdom sa espirituhanong mga kasinatian?

Si Presidente Henry B. Eyring sa Unang Kapangulohan mipaambit mahitungod sa usa ka higayon sa dihang naaghat siya sa pagrekord diha sa iyang journal kon giunsa niya pagkakita sa kamot sa Ginoo:

Nagsulat ako og pipila ka mga linya matag adlaw sulod sa mga katuigan. … Sa dili pa ako mosulat, ako mamalandong niini nga pangutana: “Nakita ba nako ang kamot sa Dios nga nagkab-ot aron paghikap kanamo o sa among mga anak o sa among pamilya karon?” Samtang nagpadayon ako sa paghimo niini, adunay butang nga nagsugod sa pagkahitabo. Samtang naghanduraw sa nanghitabo sulod nianang adlawa, akong nakita ang timaan sa unsay gibuhat sa Dios alang sa usa kanamo nga wala nako namatikdi diha sa kabise nianang adlawa. Samtang kana nahitabo, ug kana sagad nanghitabo, akong nasabtan nga ang pagsulay og paghinumdom naghatag og higayon sa Dios sa pagpakita kanako unsay Iyang gibuhat. (Henry B. Eyring, “O Hinumdumi, Hinumdumi,” Liahona, Nob. 2007, 67)

Unsaon nako pag-ila sa mga pagtulun-an niadtong kinsa nagtinguha sa pagguba sa hugot nga pagtuo diha kang Kristo sa atong panahon?

Si Elder D. Todd Christofferson sa Korum sa Napulog Duha ka Apostoles miingon:

Ang paagi sa kalibotan, sa inyong nahibaloan, mao ang kontra ni Kristo, o “tanang butang gawas ni Kristo.” Ang atong panahon usa ka pagbalik sa kasaysayanan sa Basahon ni Mormon diin ang madanihon nga mga tawo nagtinguha sa dili matarong nga kamandoan ngadto sa uban, maglipay diha sa kagawasan sa sekswal nga pagbuot, ug magtuboy sa pagpadaghan sa bahandi isip maoy tumong sa atong pagpakabuhi. Ang ilang mga pilosopiya sa “pagpangatarongan sa paghimo og gamayng sala” [2 Nephi 28:8] o gani sa daghang sala, apan walay makatanyag og katubsanan. Kana moabot lang pinaagi sa dugo sa Kordero. Ang labing maayo nga gitanyag sa mga tawo nga nagsuporta sa mga ideya nga “bisan unsang butang gawas ni Kristo” o “bisan unsang butang gawas sa paghinulsol” mao ang walay proweba nga pangangkon nga walay sala, o nga kon kini anaa, wala gayod kini mga sangpotanan sa kataposan. Dili nako makita nga kana nga argumento epektibo diha sa Kataposang Paghukom. (D. Todd Christofferson, “Ang Gugma sa Dios,” Liahona, Nob. 2021, 17)

Ikonsiderar ang pagtuon sa parapo 12 diha sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2022).

Unsa kaha kon dili ko kahibalo kon unsaon pagtubag kon adunay mokwestiyon sa akong hugot nga pagtuo?

Si Elder Jörg Klebingat sa Seventy miingon:

Hinumdumi nga bisan ang usa ka bata mahimong usa ka tigpanalipod ni Kristo diha sa lugar nga dulaanan pinaagi sa paghatag og yano nga pagpamatuod; dili kinahanglan nga mahimo kamong eskolar sa ebanghelyo aron makasaksi sa kamatuoran; dili kinahanglan nga anaa ninyo ang tanang tubag; nga OK ra nga mosulti usahay nga, “wala ko kahibalo.” (Jörg Klebingat, “Pagpanalipod sa Tinuohan,” Liahona, Sept. 2017, 33)

Dugang nga mga Kalihokan sa Pagkat-on

Pagdumala sa pagpakigharong nga walay panagbingkil

Mahimong lisod ang dili pagtubag og dili maayo kon ang imong mga gituohan gikuwestiyon o giatake.

Ikonsiderar ang paghisgot og mga sitwasyon diin ang mga gituohan sa mga estudyante mahimong gikwestiyon sa personal o online. Dayon dapita ang mga estudyante sa pagpaambit og mga ideya kon unsaon pagbarog nga lig-on sa ilang hugot nga pagtuo samtang dili magmugna o modugang og panagbingkil nga mga pagbati ngadto sa uban.

Pagpalawom sa pagsabot pinaagi sa mga cross-reference

Dapita ang mga estudyante sa pag-cross-reference o pagtakdo sa Jacob 7:5 ngadto sa Helaman 5:12 ug Joseph Smith—Kasaysayan 1:22–26. Dayon dapita sila sa pagtuon niini nga mga pakisayran uban sa usa ka kapares aron masabtan kon unsaon nga mahimong mas lig-on sa ilang hugot nga pagtuo.

Pagtuon sa mga kasulatan kon mag-atubang og pagduda