Rebyo 5 sa Doktrinal nga Kahanas

Isag-ulo ang mga Pakisayran sa Kasulatan ug ang Mahinungdanon nga mga Hugpong sa mga Pulong

Ang paghinumdom sa mga tudling sa kasulatan ug unsay gitudlo niini makapanalangin kanimo sa daghang paagi. Kini nga leksiyon makatabang kanimo sa pagsag-ulo sa mga pakisayran sa kasulatan ug sa mahinungdanon nga mga hugpong sa mga pulong sa kasulatan alang sa mga tudling sa doktrinal nga kahanas diha sa Basahon ni Mormon.

Paggamit sa mga kalihokan sa pagrebyo sa doktrinal nga kahanas. Usa sa mga katuyoan sa mga kalihokan sa pagrebyo sa doktrinal nga kahanas mao ang pagtabang sa mga estudyante sa pagsag-ulo sa mahinungdanon nga mga hugpong sa mga pulong sa kasulatan. Ang paghimo niini nga mga kalihokan kanunayng makatabang sa mga estudyante sa pagsag-ulo sa matag hugpong sa mga pulong. Mahimo nimong dasigon ang imong mga estudyante nga magpadayon sa pagtuon sa mga tudling sa doktrinal nga kahanas nga dili diha sa klase.

Pagpangandam sa estudyante: Dapita ang mga estudyante sa pagtambong nga andam sa pagpaambit og mga paagi nga ilang mahinumduman si Jesukristo kada adlaw.

Mga Posibleng Kalihokan sa Pagkat-on

Ang usa ka leksiyon sa tudling sa doktrinal nga kahanas mahimong kinahanglan nga itudlo puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor o koordinitor sa lugar o rehiyon aron maseguro nga matudlo ang matag leksiyon sa tudling sa doktrinal nga kahanas samtang anaa sa sesyon ang seminary.

Paghinumdom

Ikonsiderar ang pagdapit sa mga estudyante sa paghisgot og daklit sa mosunod nga pangutana nga magpares o sa gagmay nga mga grupo sa dili pa ipaambit ang pamahayag ni Elder Gong.

• Unsa ang butang nga imong gibati nga kanunay nimong mahinumduman? Ngano man?

Si Elder Gerrit W. Gong sa Korum sa Napulog Duha ka Apostoles mitudlo nga “nagdapit kanato ang Manluluwas sa kanunay nga paghinumdom Kaniya sama sa Iyang kanunay nga paghinumdom kanato” (“Kanunay nga Mohinumdom Kaniya,” Liahona, Mayo 2016, 110).

Atol niini nga bahin sa leksiyon, dapita ang mga estudyante sa pagpaambit og mga ideya gikan sa ilang kalihokan sa pagpangandam sa estudyante.

• Ngano kaha nga gusto sa Langitnong Amahan nga kanunay natong hinumduman ang Iyang Anak?

• Unsa ang pipila ka mga paagi nga ikaw nakahimo sa paghinumdom kang Jesukristo kada adlaw?

• Sa unsang paagi nga ang paghinumdom sa Manluluwas ug sa tanan Niyang nabuhat nahimong panalangin sa imong kinabuhi?

Usa ka importante nga paagi nga imong mahinumduman si Jesukristo mao ang pagsag-ulo sa Iyang mga pagtulun-an diha sa mga kasulatan. Niini nga leksiyon, makabaton ka og kahigayonan sa pagsag-ulo sa pipila ka mga pakisayran sa kasulatan sa doktrinal nga kahanas ug sa mahinungdanon nga mga hugpong sa mga pulong sa kasulatan nga anaa sa mosunod nga tsart. Samtang nagsag-ulo ka, pamalandongi kon sa unsang paagi ang paghinumdom niini nga mga pakisayran ug mahinungdanon nga mga hugpong sa mga pulong makatabang kanimo nga mas makahinumdom kang Jesukristo matag adlaw.

Ikonsiderar ang pagmarka niini nga mga tudling kauban ang mahinungdanon nga mga hugpong sa mga pulong niini kon wala pa nimo kini mabuhat.

Sagola ug itukma

Ipakita ang mosunod nga tsart samtang nagsulat ang mga estudyante sa mga pakisayran sa kasulatan ug sa mahinungdanon nga mga hugpong sa mga pulong diha sa ilang mga papel sumala pa sa lakang numero 1 sa mga instruksiyon sa ubos.

Pakisayran sa Kasulatan	Mahinungdanon nga Hugpong sa mga Pulong sa Kasulatan
Pakisayran sa Kasulatan 1 Nephi 3:7	Mahinungdanon nga Hugpong sa mga Pulong sa Kasulatan “Ako moadto ug mobuhat sa mga butang nga ang Ginoo nagsugo.”
Pakisayran sa Kasulatan 2 Nephi 2:25	Mahinungdanon nga Hugpong sa mga Pulong sa Kasulatan “Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay.”
Pakisayran sa Kasulatan 2 Nephi 2:27	Mahinungdanon nga Hugpong sa mga Pulong sa Kasulatan “Sila gawasnon sa pagpili sa kalingkawasan ug sa kinabuhi nga dayon … o … sa pagkabihag ug sa kamatayon.”
Pakisayran sa Kasulatan 2 Nephi 26:33	Mahinungdanon nga Hugpong sa mga Pulong sa Kasulatan “Ang tanan managsama ngadto sa Dios.”
Pakisayran sa Kasulatan 2 Nephi 28:30	Mahinungdanon nga Hugpong sa mga Pulong sa Kasulatan Ang Dios “mopadayag ngadto sa mga katawhan og pagtulun-an human sa usa ka pagtulun-an, lagda human sa usa ka lagda.”
Pakisayran sa Kasulatan 2 Nephi 32:3	Mahinungdanon nga Hugpong sa mga Pulong sa Kasulatan “Pagbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton.”
Pakisayran sa Kasulatan 2 Nephi 32:8–9	Mahinungdanon nga Hugpong sa mga Pulong sa Kasulatan “Kamo kinahanglan gayod nga mag-ampo sa kanunay.”
Pakisayran sa Kasulatan Mosiah 2:17	Mahinungdanon nga Hugpong sa mga Pulong sa Kasulatan “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios.”
Pakisayran sa Kasulatan Mosiah 2:41	Mahinungdanon nga Hugpong sa mga Pulong sa Kasulatan “[Kadto] nga naghupot sa mga sugo sa Dios … bulahan sa tanan nga mga butang.”
Pakisayran sa Kasulatan Mosiah 3:19	Mahinungdanon nga Hugpong sa mga Pulong sa Kasulatan “[Isalikway] ang … kinaiyanhon nga pagkatawo ug [mahimo] nga usa ka santos pinaagi sa pag-ula ni Kristo ang Ginoo.”
Pakisayran sa Kasulatan Mosiah 4:9	Mahinungdanon nga Hugpong sa mga Pulong sa Kasulatan “Tuo sa Dios; … tuo nga siya aduna sa tanan nga kaalam.”
Pakisayran sa Kasulatan Mosiah 18:8–10	Mahinungdanon nga Hugpong sa mga Pulong sa Kasulatan “Pagpabunyag diha sa ngalan sa Ginoo, ingon og usa ka saksi … nga kamo nakasulod ngadto sa usa ka pakigsaad uban kaniya.”

Ikonsiderar ang oras nga magamit sa klase aron matino kon pila ka mga pakisayran sa doktrinal nga kahanas ug mahinungdanon nga hugpong sa mga pulong sa kasulatan ang idapit sa mga estudyante nga sag-ulohon niini nga leksiyon. Sa ubos mao ang usa ka paagi sa pagsag-ulo. Gamita ang ubang mga paagi sa pagsag-ulo sumala sa gitinguha. Kon kini nga kalihokan wala gihimo nga dungan isip usa ka klase, ipakita o sa laing paagi ihatag sa mga estudyante ang mosunod nga mga instruksiyon.

Pag-ila og upat ka mga tudling nga imong gibati nga labing makatabang kanimo sa paghinumdom kang Jesukristo karon sa imong kinabuhi, ug hunahunaa kon nganong ingon niana ang imong gibati. Dayon buhata ang mosunod nga kalihokan. Mahimo nimong buhaton ang susama nga kalihokan gamit ang Doktrinal nga Kahanas nga mobile app.

1. Guntinga ang usa ka panid sa papel ngadto sa upat ka mga gilis [strips] nga managsama ang gidak-on. Alang sa matag usa sa mga tudling sa doktrinal nga kahanas nga imong gipili, buhata ang mosunod:

   1. Isulat ang pakisayran sa kasulatan ug ang kauban nga mahinungdanon nga hugpong sa mga pulong niini sa usa ka gilis [strip] nga papel.

   2. Guntinga ang mahinungdanon nga hugpong sa mga pulong, bahina kini gikan sa pakisayran, sama sa ehemplo sa ubos (putla diha sa “/” nga simbolo):

      2 Nephi 26:33 / “Ang tanan managsama ngadto sa Dios.”

   Hunonga ang pagpakita sa tsart sa mga pakisayran sa doktrinal nga kahanas ug sa mahinungdanon nga mga hugpong sa mga pulong sa dili pa sundon sa mga estudyante ang nahabilin nga mga instruksiyon.

2. Kon aduna na kay set sa upat ka mga pakisayran ug mahinungdanon nga mga hugpong sa mga pulong sa kasulatan, ibutang ang mga papel sa usa ka pundok ug sagola kining tanan.

3. Sulayi sa pagtukma ang kada pakisayran ngadto sa mahinungdanon nga hugpong sa mga pulong sa kasulatan nga dili motan-aw sa bisan unsa nga makatabang kanimo. Ikonsiderar ang pagbuhat niini duha o tulo ka higayon. Mahimo nimong orasan ang imong kaugalingon ug sulayi sa pagpalambo ang imong kapaspason sa kada higayon.

4. Dugangi ang kalisod pinaagi sa pagputol sa mga hugpong sa mga pulong sama sa mga ehemplo sa ubos:

   2 Nephi 28:30 / Ang Dios “mopadayag ngadto sa mga katawhan og / pagtulun-an human sa usa ka pagtulun-an, / lagda human sa usa ka lagda.”

   2 Nephi 32:3 / “Pagbusog / sa mga pulong ni Kristo; / kay tan-awa, / ang mga pulong ni Kristo / magtug-an kaninyo / sa tanan nga mga butang / nga inyong buhaton.”

5. Sagola ang mga piraso ug paningkamoti nga mahan-ay kini sa saktong paagi. Mahimo nimong pilion nga isagol ang tanan nga mga pakisayran ug mga hugpong sa mga pulong sa usa ka higayon, o mahimo nimong buhaton ang usa ka tudling sa usa ka higayon. Ikonsiderar ang pagbuhat niini duha o tulo ka higayon. Mahimo nimong orasan ang imong kaugalingon ug sulayi sa pagpalambo ang imong kapaspason sa kada higayon.

6. Kon aduna kay daghang oras, pagpili og pipila pa ka tudling sa doktrinal nga kahanas ug sublia ang proseso.

Human sa igong panahon, dapita ang mga estudyante sa pagtubag sa mosunod nga mga pangutana diha sa ilang mga journal sa pagtuon sa dili pa nila ipaambit ang ilang mga tubag sa manag-pares, sa gagmay nga mga grupo, o ngadto sa klase.

• Hain nga mga pakisayran sa doktrinal nga kahanas ug mahinungdanon nga mga hugpong sa mga pulong sa kasulatan ang imong gisag-ulo?

• Hain nga tudling ang imong gibati nga labing makatabang kanimo karon sa imong kinabuhi? Nganong ingon niana man ang imong gibati?

• Sa unsang mga paagi nga ang mga tudling nga imong gitutukan karon makatabang nimo sa paghinumdom kang Jesukristo?