« យ៉ាកុប ៥:៥៤–៧៧; ៦:១–១៣ ៖ ‹ មានពរហើយ ដល់ពួកអ្នកណាដែលបានធ្វើការយ៉ាងព្យាយាមនៅក្នុងចម្ការរបស់ទ្រង់ › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« យ៉ាកុប ៥:៥៤–៧៧; ៦:១–១៣ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
យ៉ាកុប ៥:៥៤–៧៧; ៦:១–១៣
« មានពរហើយ ដល់ពួកអ្នកណាដែលបានធ្វើការយ៉ាងព្យាយាមនៅក្នុងចម្ការរបស់ទ្រង់ »
តើរូបាធិដ្ឋាននៃដើមអូលីវដែលបានកត់ត្រានៅក្នុង យ៉ាកុប ៥ ទាក់ទងនឹងអ្នករបៀបណា ? ផ្នែកចុងក្រោយនៃរូបាធិដ្ឋាននេះតំណាងឲ្យកិច្ចការរបស់ព្រះអម្ចាស់នៅក្នុងថ្ងៃចុងក្រោយ រួមទាំងកិច្ចខិតខំដែលទ្រង់ និងអ្នកបម្រើរបស់ទ្រង់បានធ្វើ ដើម្បីប្រមូលព្រលឹងទាំងឡាយទៅរកទ្រង់ជាគ្រាចុងក្រោយ ។ គោលបំណងនៃមេរៀននេះគឺដើម្បីជួយសិស្សឲ្យទទួលអារម្មណ៍ថា មានបំណងប្រាថ្នាកាន់តែខ្លាំងក្នុងការធ្វើការជាមួយនឹងព្រះអម្ចាស់ ក្នុងការជួយបុត្រាបុត្រីរបស់ព្រះវរបិតាសួគ៌ឲ្យមករកទ្រង់ ។
សូមជួយសិស្សម្នាក់ៗឲ្យរួមចំណែកដល់បទពិសោធន៍សិក្សានេះ ។សិស្សម្នាក់ៗត្រូវបានត្រូវការ និងមានការរួមចំណែកដែលត្រូវធ្វើ ។ សិស្សមួយចំនួនអាចមានទំនោរចង់ចូលរួមច្រើនជាងសិស្សដទៃទៀត ។ សូមប្រឹងប្រែងជួយសិស្សម្នាក់ៗឲ្យចូលរួមតាមរបៀបប្រកបដោយអត្ថន័យ និងឥតភ័យបារម្ភសម្រាប់ពួកគេ ។
ការរៀបចំសិស្ស ៖ សូមពិចារណាអញ្ជើញសិស្សឲ្យធ្វើសកម្មភាពសិក្សាក្រោមចំណងជើង « យ៉ាកុប ៥:៦១–៧៥ ៖ ព្រះអម្ចាស់អញ្ជើញខ្ញុំឲ្យធ្វើការជាមួយទ្រង់ក្នុងចម្ការរបស់ទ្រង់ » នៅក្នុងគម្រោងមេរៀន « ថ្ងៃទី ៨–១៤ ខែ មេសា ។ យ៉ាកុប ៥–៧ ៖ ‹ ព្រះអម្ចាស់ធ្វើការជាមួយយើង › » នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរមរមន ឆ្នាំ ២០២៤ ។
សកម្មភាពរៀនសូត្រដែលអាចមាន
កិច្ចការអស្ចារ្យ
សូមចែកចាយស្ថានភាពដូចតទៅនេះជាមួយនឹងសិស្សក្នុងថ្នាក់ ៖
ថ្មីៗនេះប៊ីស្សពបានស្នើសុំឲ្យ អានីកាពិចារណាប្រកបដោយការអធិស្ឋាន អំពីវិធីដែលនាងអាចឈោងទៅជួយយុវនារីម្នាក់ក្នុងវួដរបស់នាង ដែលមិនបានចូលក្នុងសាសនាចក្រ ។ អានីកាមានអារម្មណ៍ភ័យបន្តិច ហើយងឿងឆ្ងល់ថា « ហេតុអ្វីប៊ីស្សពឲ្យខ្ញុំធ្វើរឿងនេះ ? គាត់ប្រហែលជាមានប្រសិទ្ធភាពច្រើនក្នុងការជួយនាងជាងខ្ញុំ » ។
-
តើអ្វីអាចជាហេតុផលមួយចំនួនដែលប៊ីស្សពរបស់អានីកា អាចអញ្ជើញនាងឲ្យឈោងទៅជួយយុវនារីនោះ ជាជាងគាត់ឈោងទៅជួយនាងដោយខ្លួនឯង ?
មុននឹងចែកចាយការណែនាំខាងក្រោម វាអាចមានប្រយោជន៍ក្នុងការអញ្ជើញសិស្សស្ម័គ្រចិត្តពីរបីនាក់ឲ្យសង្ខេបនូវអ្វីដែលពួកគេចងចាំអំពីផ្នែកនៃរូបាធិដ្ឋាននេះនៅក្នុង យ៉ាកុប ៥ ដែលពួកគេបានសិក្សានៅក្នុងមេរៀនមុន ។
ថ្ងៃនេះ អ្នកនឹងសិក្សាពីផ្នែកចុងក្រោយនៃរូបាធិដ្ឋាននៃដើមអូលីវដែលបានកត់ត្រានៅក្នុង យ៉ាកុប ៥ ។ ផ្នែកនៃរូបាធិដ្ឋាននេះតំណាងឲ្យថ្ងៃចុងក្រោយបង្អស់ ។ សេចក្តីពិតមួយដែលយើងអាចរៀនបានពីផ្នែកនៃរូបាធិដ្ឋាននេះគឺថា ព្រះអម្ចាស់អញ្ជើញអ្នកបម្រើនៅថ្ងៃចុងក្រោយរបស់ទ្រង់ឲ្យធ្វើការនៅក្នុងចម្ការរបស់ទ្រង់ ដោយចូលរួមក្នុងការប្រមូលសាសន៍អ៊ីស្រាអែល ។
មុនពេលអ្នកចាប់ផ្តើមសិក្សា សូមពិចារណាពីអារម្មណ៍របស់អ្នកអំពីការត្រូវបានអញ្ជើញដោយព្រះអម្ចាស់ឲ្យជួយប្រមូលមនុស្សមករកទ្រង់ ។ តើអ្នកធ្លាប់ឆ្ងល់ថា ហេតុអ្វីទ្រង់អញ្ជើញអ្នកឲ្យជួយទ្រង់ក្នុងកិច្ចការរបស់ទ្រង់អំពីការសង្គ្រោះព្រលឹងទាំងឡាយដែរឬទេ ? នៅពេលអ្នកសិក្សា សូមរកមើលការបង្រៀនដែលអាចជួយអ្នកឲ្យយល់កាន់តែច្បាស់ អំពីព្រះរាជបំណងរបស់ព្រះអម្ចាស់ សម្រាប់ការអញ្ជើញយើងឲ្យចូលរួមជាមួយទ្រង់ ក្នុងការប្រមូលសាសន៍អ៊ីស្រាអែល ។
ម្ចាស់ចម្ការអញ្ជើញអ្នកបម្រើឲ្យធ្វើការជាមួយគាត់
ផ្នែកចុងក្រោយនៃរូបាធិដ្ឋាននេះចាប់ផ្តើមដោយការសន្ទនា ដែលកើតឡើងរវាងម្ចាស់ចម្ការដែលតំណាងឲ្យព្រះយេស៊ូវគ្រីស្ទ និងអ្នកបម្រើរបស់ទ្រង់ដែលតំណាងឲ្យព្យាការីរបស់ព្រះអម្ចាស់ ។
សូមអាន យ៉ាកុប ៥:៦១–៦២, ៧០ ដោយរកមើលអ្វីដែលម្ចាស់ចម្ការបានបង្គាប់អ្នកបម្រើរបស់គាត់ឲ្យធ្វើ និងមូលហេតុដែលគាត់សុំឲ្យអ្នកបម្រើនោះធ្វើកិច្ចការនេះ ។
-
តើនរណានៅក្នុងខគម្ពីរទាំងនេះអាចតំណាងឲ្យអ្នក និងសមាជិកផ្សេងទៀតនៃសាសនាចក្រ ?
ប្រធាន រ័សុល អិម ណិលសុន បានពិភាក្សាអំពីកិច្ចការដែលព្រះអម្ចាស់ និងអ្នកបម្រើទ្រង់ធ្វើនៅថ្ងៃចុងក្រោយ ៖
ការប្រជុំធម្មនិដ្ឋានទូទាំងពិភពលោកសម្រាប់យុវវ័យ ឆ្នាំ ២០១៨
ប្រធាន រ័សុល អិម ណិលសុន និង ស៊ីស្ទើរ វិនឌី ណិលសុន ថ្លែងសុន្ទរកថានៅក្នុងការប្រជុំធម្មនិដ្ឋានទូទាំងពិភពលោកសម្រាប់យុវវ័យ នៅថ្ងៃទី ៣ ខែមិថុនា ឆ្នាំ ២០១៨
ព្រះអម្ចាស់បានមានបន្ទូលប្រាប់ព្យាការី យ៉ូសែប ស្ម៊ីធ ថា ឥឡូវនេះ មានន័យថា ជំនាន់របស់យើង គឺជាម៉ោងទីដប់មួយ និងជាពេលចុងក្រោយដែលទ្រង់នឹងហៅពួកអ្នកធ្វើការចូលក្នុងចម្ការរបស់ទ្រង់ក្នុងគោលបំណងប្រមូលអ្នករើសតាំងពីទិសទាំងបួននៃផែនដី [ សូមមើល គោលលទ្ធិ និងសេចក្តីសញ្ញា ៣៣:៣, ៦ ] ។…
តើអ្នកចង់ជួយប្រមូលសាសន៍អ៊ីស្រាអែល អំឡុងថ្ងៃចុងក្រោយដ៏មានតម្លៃនេះឬទេ ?…
… ចូរគិតពីចំណុចនេះ ! ក្នុងចំណោមមនុស្សទាំងអស់ដែលធ្លាប់រស់នៅលើផែនដីនេះ ពួកយើងគឺជាមនុស្សដែលបានចូលរួមនៅក្នុងព្រឹត្តការណ៍នៃការប្រមូលផ្ដុំដ៏អស្ចារ្យចុងក្រោយនេះ ។ ឱ នោះជារឿងរំភើបណាស់ !
ព្រះវរបិតាសួគ៌របស់យើងបានរក្សាទុកវិញ្ញាណដ៏អស្ចារ្យៗបំផុតជាច្រើន—ប្រហែលជាខ្ញុំអាចនិយាយថា ជាក្រុមដ៏ល្អបំផុតរបស់ទ្រង់—សម្រាប់ដំណាក់កាលចុងក្រោយនេះ ។ ពួកវិញ្ញាណដ៏អស្ចារ្យៗ ជាវីរបុរសទាំងនោះ—អ្នកដែលសំខាន់បំផុតទាំងនោះ—គឺជាអ្នក ! ( ប្រធាន រ័សុល អិម ណិលសុន និង វិនឌី ដបុលយូ ណិលសុន « Hope of Israel » [ ការប្រជុំធម្មនិដ្ឋានសម្រាប់យុវវ័យទូទាំងពិភពលោក ថ្ងៃទី ៣ ខែ មិថុនា ឆ្នាំ ២០១៨ ] បន្ថែមទៅនឹង New Era និង Ensign ទំព័រ ៨ ChurchofJesusChrist.org )
-
តើសេចក្ដីថ្លែងការណ៍របស់ប្រធាន ណិលសុន បានជួយអ្នកឲ្យរៀន ឬទទួលអារម្មណ៍អ្វីខ្លះអំពីព្រះ ?
-
តើវាបានបង្រៀនអ្នកអ្វីខ្លះអំពីខ្លួនអ្នក និងតួនាទីដែលអ្នកត្រូវធ្វើនៅក្នុងការប្រមូលសាសន៍អ៊ីស្រាអែល ?
-
តើអ្នកគិតថាមានមូលហេតុអ្វីខ្លះដែលព្រះអម្ចាស់អញ្ជើញយើងឲ្យជួយប្រមូលមនុស្សមករកទ្រង់ ?
ផ្នែករបស់អ្នកនៃចម្ការរបស់ព្រះអម្ចាស់
សូមពិចារណាបំពេញសកម្មភាពខាងក្រោមដោយខ្លួនអ្នក ពីមុនមកថ្នាក់រៀន ហើយបង្ហាញសិស្សនូវរូបភាពរបស់អ្នកជាឧទាហរណ៍ ។
នៅក្នុងសៀវភៅកំណត់ហេតុការសិក្សារបស់អ្នក ឬនៅលើក្រដាសមួយសន្លឹកផ្សេងទៀត សូមគូររូបភាពនៃចម្ការ ឬវាលដែលតំណាងឲ្យចម្ការរបស់ព្រះអម្ចាស់ ។ បន្ទាប់មកគូរ ឬសរសេរអ្វីមួយចំនួនដែលតំណាងឲ្យចំណុចដូចខាងក្រោម ៖
-
ឱកាសដែលអ្នកត្រូវធ្វើការក្នុងចម្ការរបស់ព្រះអម្ចាស់ ហើយជួយប្រមូលសាសន៍អ៊ីស្រាអែល ។ឧទាហរណ៍ខ្លះៗ អាចរួមបញ្ចូលរូបភាព ឬពាក្យដែលតំណាងឲ្យមនុស្សដែលអ្នកអាចជួយឲ្យខិតទៅជិតព្រះអង្គសង្គ្រោះ សកម្មភាពដែលអ្នកអាចធ្វើបានដើម្បីចែកចាយដំណឹងល្អដោយផ្ទាល់ ឬតាមអ៊ីនធឺណិត ឬកិច្ចខិតខំដើម្បីផ្តល់ពរដល់មនុស្សនៅផ្នែកម្ខាងទៀតនៃវាំងននតាមរយៈកិច្ចការព្រះវិហារបរិសុទ្ធ និងពង្សប្រវត្តិ ។
-
ឧបសគ្គដែលអ្នកប្រឈមមុខក្នុងការខិតខំរបស់អ្នកក្នុងការធ្វើការក្នុងចម្ការរបស់ព្រះអម្ចាស់ ។ឧទាហរណ៍ខ្លះៗ អាចរួមបញ្ចូលរូបភាព ឬពាក្យដែលតំណាងឲ្យឧបសគ្គនានា ដូចជាការភ័យខ្លាច ការមិនប្រាកដប្រជាអំពីអ្វីដែលត្រូវធ្វើ ឬមានអារម្មណ៍មមាញឹកនឹងកិច្ចការផ្សេងទៀត ។
សូមសិក្សាខគម្ពីរខាងក្រោមនេះ ដោយរកមើលការបង្រៀនដែលអាចជួយអ្នកយកឈ្នះលើឧបសគ្គដែលអ្នកបានរកឃើញ ។ សូមពិចារណាបន្ថែមរូបភាព ឬពាក្យទៅលើគំនូរចម្ការរបស់អ្នក ដោយផ្អែកលើអ្វីដែលអ្នកបានរៀន ។
-
យ៉ាកុប ៦:២–៨ ( ការបង្រៀនដែលយ៉ាកុបបានចែកចាយបន្ទាប់ពីបានដកស្រង់រូបាធិដ្ឋាននោះ )
-
តើយើងបានរៀនអ្វីខ្លះអំពីព្រះអម្ចាស់ក្នុងខគម្ពីរទាំងនេះ ?
-
តើពាក្យ ឬឃ្លាអ្វីខ្លះពីខគម្ពីរទាំងនេះអាចជួយនរណាម្នាក់ដែលស្ទាក់ស្ទើរក្នុងការចូលរួមក្នុងការប្រមូលសាសន៍អ៊ីស្រាអែល ?
សូមពិចារណាចែកចាយឧទាហរណ៍ផ្ទាល់ខ្លួនជាផ្នែកនៃការពិភាក្សាសម្រាប់សំណួរបន្ទាប់ ។
-
តើពរជ័យអ្វីខ្លះដែលអ្នកបានឃើញ ឬទទួលបទពិសោធន៍សម្រាប់ការចូលរួមជាមួយព្រះអម្ចាស់ ក្នុងការធ្វើការដើម្បីនាំព្រលឹងទាំងឡាយមកកាន់ទ្រង់ ?
សូមចំណាយពេលមួយភ្លែតដើម្បីគិតអំពីជំហានបន្ទាប់របស់អ្នក សម្រាប់ការចូលរួមជាមួយព្រះអម្ចាស់ក្នុងការប្រមូលសាសន៍អ៊ីស្រាអែល ។ សូមកត់ត្រាគោលដៅដែលទាក់ទងនឹងបញ្ហានេះនៅក្នុងសៀវភៅកំណត់ហេតុការសិក្សារបស់អ្នក ឬបង្កើតគោលដៅដែលអ្នកបានកំណត់សម្រាប់ខ្លួនអ្នករួចហើយ ។ អ្នកក៏អាចបញ្ចូលពាក្យ ឬរូបភាពនានាដែលតំណាងឲ្យគោលដៅរបស់អ្នកនៅលើគំនូរចម្ការរបស់អ្នក ។ សូមពិចារណាមើល « ចម្រៀងបាវចនាយុវវ័យឆ្នាំ ២០២១ ៖ ‹ A Great Work › » ( ៤:០៦ ) ដែលមាននៅ ChurchofJesusChrist.orgនៅពេលអ្នកគិតអំពីអ្វីដែលអ្នកចង់ឲ្យគោលដៅរបស់អ្នកបានសម្រេច ។
2021 Youth Theme Song: “A Great Work”
This is the lyric video of the 2021 Youth Theme, “A Great Work,” sung by Nik Day. The inspirational video details the work and the promises of the Lord in the latter days.
សូមពិចារណាអញ្ជើញសិស្សស្ម័គ្រចិត្តពីរបីនាក់ឲ្យចែកចាយរូបភាពដែលបានបញ្ចប់របស់ពួកគេ រួមជាមួយនឹងគោលដៅរបស់ពួកគេជាមួយនឹងសិស្សក្នុងថ្នាក់រៀន ។ សូមថ្លែងទីបន្ទាល់អំពីសេចក្តីពិតដែលបានពិភាក្សានៅថ្ងៃនេះ ហើយអញ្ជើញសិស្សឲ្យធ្វើសកម្មភាពលើគោលដៅដែលពួកគេបានបង្កើតសម្រាប់ខ្លួនពួកគេ ។ សិស្សនឹងមានឱកាសដើម្បីពិនិត្យមើលឡើងវិញនូវគោលដៅនេះនៅក្នុងមេរៀនវាយតម្លៃការសិក្សារបស់អ្នកនាពេលអនាគត ។