Zotërimi Doktrinor: Mosia 2:17

“Në Shërbimin e Perëndisë Tuaj”

Në mësimin “Mosia 2:1–18”, mësove se “kur jeni në shërbimin e bashkëqenieve tuaja, ju jeni vetëm në shërbimin e Perëndisë tuaj” (Mosia 2:17). Ky mësim mund të të ndihmojë ta mësosh përmendsh fragmentin e zotërimit doktrinor dhe frazën kyç të shkrimit të shenjtë për vargun te Mosia 2:17, ta shpjegosh doktrinën dhe të ushtrosh zbatimin e parimeve të marrjes së njohurisë shpirtërore në situata nga jeta reale.

Përdorimi i skenarëve. Diskutimi i situatave nga jeta reale ose skenarëve mund t’i ndihmojë nxënësit ta kuptojnë më mirë se si të vërtetat e ungjillit gjejnë zbatim në jetën e përditshme. Nxitini nxënësit të mendojnë për situata nga vetë jeta e tyre dhe më pas ftojini ata t’i zbatojnë parimet e marrjes së njohurisë shpirtërore për të zbuluar zgjidhje të mundshme për pyetjet e tyre.

Përgatitja e nxënësve: Ftojini nxënësit të vijnë në klasë duke pasur në mendje një rast kur patën një përvojë sfiduese shërbimi ose një mundësi për të shërbyer por nuk deshën të shërbenin.

Veprimtari e Mundshme e të Mësuarit

Ky mësim për fragmentin e zotërimit doktrinor është hartuar për t’u dhënë pas mësimit “Mosia 2:1–18”, i cili është mësimi kontekstual për fragmentin e zotërimit doktrinor te Mosia 2:17. Nëse ky mësim për fragmentin e zotërimit doktrinor nevojitet të zhvendoset në një javë tjetër, sigurohuni që të jepni edhe mësimin përkatës kontekstual gjatë asaj jave.

Shpjego dhe mëso përmendsh

Lexo te Mosia 2:17 dhe fragmentin e zotërimit doktrinor të Dhiatës së Re te Mateu 22:36–39, duke kërkuar ngjashmëritë.

Për larmi, merreni parasysh t’i ndani nxënësit në dyshe dhe ta vini secilin të lexojë njërin nga fragmentet e shkrimeve të shenjta. Më pas ftojini ata të diskutojnë për pyetjet vijuese.

• Çfarë ngjashmërish sheh mes vargjeve te Mateu 22:36–39 dhe te Mosia 2:17?

• Si do ta shpjegoje doktrinën e shërbimit duke përdorur këto fragmente?

Për t’i ndihmuar nxënësit ta mësojnë përmendsh këtë frazë kyç të shkrimit të shenjtë, mund ta ndani klasën në dy gjysma. Caktojini gjysmës së klasës pjesën e parë të frazës “Kur jeni në shërbimin e bashkëqenieve tuaja”. Caktojini pjesës tjetër të klasës pjesën e dytë të frazës: “Ju jeni vetëm në shërbimin e Perëndisë tuaj”. Drejtojini gishtin grupit të parë dhe kërkojini ta përsëritë frazën që iu caktua. Përsëriteni me grupin e dytë. Pasi të përsëriten të dyja frazat, thoni “Mosia 2:17” së bashku si klasë. Mund ta përsëritni veprimtarinë por vërini dy gjysmat e klasës t’i ndërrojnë frazat që përsëritin. Kujtojuni nxënësve të kenë nderim kur flasin rreth Perëndisë.

Ushtroje vënien në zbatim

Kujtoni se qëllimi i përsëritjes së parimeve të marrjes së njohurisë shpirtërore është t’i ndihmoni nxënësit që t’i dinë ato aq mirë sa t’i përdorin natyrshëm në jetën e tyre kur ballafaqohen me pyetje shpirtërore. Përdorini këto ushtrime përsëritjeje për të vlerësuar njohurinë e nxënësve për parimet. Përshtatini ose përsëritini ato sipas nevojës.

Ndajini nxënësit në grupe me nga tre veta dhe caktojini çdo nxënësi një nga parimet vijuese nga Dokumenti Bazë i Zotërimit Doktrinor (2018): veproni me besim, shqyrtojini konceptet dhe pyetjet me një këndvështrim të përjetshëm dhe kërkoni kuptueshmëri të mëtejshme nëpërmjet burimeve të caktuara në mënyrë hyjnore. Ftojeni çdo nxënës të përcaktojë dy fjali nga pjesa që iu caktua të cilat mendon se janë të rëndësishme për t’u kuptuar. Kërkojuni atyre t’ia tregojnë këto fjali grupit të tyre dhe të përfshijnë arsyen pse i zgjodhën ato.

Veprimtaria vijuese mund të bëhet individualisht, në dyshe ose në grupe të vogla. Nëse nxënësit zgjedhin të shkruajnë një skenar, skenari duhet të përfshijë një sfidë ose konflikt që mund të shihet nëpërmjet parimeve të marrjes së njohurisë shpirtërore. Vërini nxënësit t’i këmbejnë skenarët e tyre me njëri-tjetrin. Më pas ftojini ata të punojnë me parimet e marrjes së njohurisë shpirtërore për t’iu përgjigjur skenarit që morën. Nëse nevojitet, jepuni nxënësve pyetjet e renditura në secilën pjesë.

Shërbimi është përgjithësisht një përvojë pozitive për ata që marrin pjesë dhe për ata të cilëve u shërbehet. Sidoqoftë, ka edhe sfida që mund të jenë pjesë e shërbimit. Reflekto për mundësitë e shërbimit më të fundit që ke pasur. Cilat ishin disa nga sfidat që erdhën bashkë me shërbimin? Cilat janë disa arsye përse njerëzit zgjedhin të mos shërbejnë?

Shkruaj vetë skenarin tënd ku përshkruan një sfidë prej shërbimit. Këtu është një shembull: Udhëheqësit e saj të Kishës i kërkuan Sofies t’i çonte një ëmbëlsirë për ditëlindje një vajze më pak aktive në klasën e saj të Të Rejave. Kur vajza doli te dera, ajo nuk u tregua shumë miqësore me Sofien. Duke u ndier e lënduar, Sofia u largua duke ndier keqardhje që e kishte bërë shërbimin.

Vepro me besim

• Në ç’mënyrë është një akt besimi të shërbesh pavarësisht nga sfidat?

• Si mund ta ndihmojë personin në këtë situatë, doktrina që jepet mësim te Mosia 2:17, që të veprojë me besim?

Shqyrtoji konceptet dhe pyetjet me një këndvështrim të përjetshëm

• Çfarë ndryshon kur e sheh skenarin me një këndvështrim të përjetshëm?

• Si mund ta ndihmojë këtë person doktrina që jepet mësim te Mosia 2:17, që t’i shohë gjërat me një këndvështrim të përjetshëm?

• Si mendon se do të vepronte Shpëtimtari në këtë situatë?

Kërko kuptueshmëri të mëtejshme nëpërmjet burimeve të caktuara në mënyrë hyjnore

Për t’i ndihmuar nxënësit të gjejë një thënie, mund të paraqitni citime nga pjesa “Komente dhe Informacion për Rrethanat” e mësimit “Mosia 2:1–18”.

Gjej një shkrim të shenjtë shtesë ose një thënie nga konferenca e përgjithshme që mund ta tregosh për ta ndihmuar një person të shërbejë me një qëndrim me gatishmëri. Për ta bërë këtë, provo të kërkosh fjalën “shërbim” te programi Gospel Library [Biblioteka e Ungjillit] dhe më pas të shohësh shkrimet e shenjta ose bisedat e konferencave që dalin. Mund të kërkosh edhe fjalën “Shërbim” tek Udhëzuesi për Shkrimet e Shenjta.

Ftojini nxënësit të tregojnë atë që gjetën. Mund ta mbyllni duke i inkurajuar nxënësit të përpiqen fort t’i kapërcejnë pengesat që i ndalojnë të shërbejnë. Kujtojuni atyre planin e shërbimit që bënë ndërkohë që po studionin vargjet te Mosia 2:1–18 dhe mundësitë që kanë rreth vetes çdo ditë për t’u shërbyer të tjerëve.

Përsëritja e zotërimit doktrinor

Shkruajini në tabelë referencën e shkrimit të shenjtë dhe frazën kyç të shkrimit të shenjtë dhe ftojini nxënësit t’i përsëritin ato me zë të lartë si klasë. Fshini disa fjalë dhe ftojini nxënësit t’i përsëritin sërish referencën dhe frazën e plotë. Përsëriteni këtë proces derisa të jetë fshirë gjithçka dhe nxënësit të mund t’i përsëritin përmendsh të gjithë referencën dhe frazën.

Veprimtari Plotësuese të të Mësuarit

Skenar i ndryshëm

Nëse është nevoja, skenari vijues mund të përdoret për ushtrimin e vënies në zbatim:

Fqinji ngjitur me Olsin është një burrë i moshuar që jeton vetëm. Familja e Olsit përpiqet të jetë e dobishme për burrin, por Olsit i duket e pavolitshme dhe lodhëse që ta ndihmojë fqinjin e tij. Olsit nuk i pëlqen të ndihmojë sepse ndien se bën plot punë në vetë shtëpinë e tij.