Mosia 3:1–17

Shpëtimi nëpërmjet Jezu Krishtit

Jezu Krishti

Gjatë gjithë historisë, engjëjt e kanë vizituar tokën për të dëshmuar për Jezu Krishtin dhe për të shpallur “lajmet e gëzuara të gëzimit të madh” (Mosia 3:3; Alma 13:22; Helamani 16:14). Mbreti Beniamin e mori një vizitë të tillë. Ai ia tregoi popullit të vet dëshminë e engjëllit për Jezu Krishtin, gjërat që Shpëtimtari do të përjetonte dhe të vërtetën që shpëtimi vjen vetëm nëpërmjet emrit të Krishtit. Ky mësim mund të të ndihmojë ta kuptosh rëndësinë e asaj që bëri Jezu Krishti, që të mund të shpëtohesh.

Ndihmesa ndaj nxënësve që të mësojnë të përsiatin. “Të përsiatësh” do të thotë të meditosh ose të mendosh thellë rreth diçkaje dhe ajo shpesh përfshin lutjen. Kur nxënësit mësojnë të përsiatin gjatë studimit të tyre vetjak të shkrimeve të shenjta, Shpirti do t’iu shfaqë atyre të vërtetën dhe do t’i ndihmojë të dinë se si mund të bëhen më shumë si Jezu Krishti.

Përgatitja e nxënësve: Mund t’i ftoni nxënësit t’i diskutojnë me një pjesëtar të familjes, mik ose udhëheqës të Kishës bekimet që janë të mundura vetëm për shkak të Jezu Krishtit.

Veprimtari e Mundshme e të Mësuarit

Lajme të gëzuara të gëzimit të madh

Merreni parasysh të paraqitni një figurë të engjëjve që lajmërojnë lindjen e Shpëtimtarit.

• A mund të mendosh për kohët kur engjëjt erdhën në tokë për të dëshmuar për Jezu Krishtin?

Një shembull është te Lluka 2:10–12. ChurchofJesusChrist.org

Një engjëll iu shfaq edhe mbretit Beniamin. Lexo te Mosia 3:3–4, duke kërkuar ngjashmëritë mes asaj që engjëlli u tha barinjve, dhe asaj që engjëlli i tha mbretit Beniamin.

• Çfarë di ti rreth Jezu Krishtit që do të konsiderohej “lajme [të] gëzuara të gëzimit të madh”?

Në fjalimin drejtuar popullit të vet që përfshihet te Mosia 3:1–17, mbreti Beniamin tregoi ca nga mesazhi i engjëllit. Ky mesazh trajtonte jetën dhe misionin e Jezu Krishtit, si ata mund të merrnin gëzim dhe atë që ofron Jezusi që askush tjetër nuk mundet ta ofrojë.

I vetmi emër nëpërmjet të cilit vjen shpëtimi

Lexo te Mosia 3:17, duke kërkuar atë që ofron Jezu Krishti.

• Çfarë të vërtete mund të përcaktosh nga vargu 17?

Nxënësit mund të përcaktojnë një larmi të vërtetash, për shembull, shpëtimi vjen vetëm nëpërmjet Jezu Krishtit. Falënderojini nxënësit që i treguan të vërtetat që gjetën, dhe merreni parasysh të shkruani një ose më shumë në tabelë.

Lexoje thënien vijuese nga Plaku Nil L. Andersen, i Kuorumit të Dymbëdhjetë Apostujve, duke kërkuar se nga çfarë na shpëton Jezu Krishti:

Plaku Nil L. Andersen

“Zoti dhe Shpëtimtari ynë, Jezu Krishti, nëpërmjet dhuratës së pamatshme të Shlyerjes së Tij, jo vetëm që na shpëton nga vdekja dhe na ofron falje për mëkatet tona nëpërmjet pendimit, por Ai gjithashtu rri gati për të na shpëtuar nga pikëllimet dhe dhembjet e shpirtrave tanë të plagosur”. (Nil L. Andersen, “Të Plagosur”, Liahona, nëntor 2018, f. 84–85)

Pyetjet në vijim kanë për qëllim tʼi ndihmojnë nxënësit të ndiejnë nevojën e tyre për Shpëtimtarin. Ftojini nxënësit të përsiatin në heshtje për përgjigjet e tyre. Kërkoni udhërrëfim nga Shpirti për të ditur mënyra të tjera se si mund tʼi ndihmoni nxënësit ta ndiejnë nevojën e tyre individuale për Jezu Krishtin.

Mendo se nga çfarë ke nevojë të shpëtohesh. A ka mëkate që po përpiqesh tʼi kapërcesh? A ka pikëllime ose dhembje që po përjeton? Ndërsa studion kapitullin te Mosia 3, kërko frymëzim nëpërmjet Frymës së Shenjtë që të të ndihmojë të dish se si mund ta marrësh shpëtimin që ofron Jezu Krishti.

Lexo te Mosia 3:5–10, duke kërkuar atë që bëri Jezu Krishti, që ti të mund të shpëtohesh. Shpenzo kohë për të lexuar me ngadalë dhe për të përsiatur. Përsiatja është një mënyrë për ta ftuar Frymën e Shenjtë që të të mësojë. Nëse dëshiron mund të shkruash ide dhe mendime në shkrimet e tua të shenjta ose ditarin tënd të studimit.

Sigurohuni që nxënësit të kenë kohë të mjaftueshme për tʼi lexuar dhe përsiatur shkrimet e shenjta. Ndërsa disa nxënës përfundojnë së lexuari përpara të tjerëve, merreni parasysh t’i ftoni ata të rilexojnë vargje të caktuara, të kërkojnë nëpër poshtëshënime ose të marrin më tepër kohë për të përsiatur.

Pas një kohe të mjaftueshme, inkurajojini nxënësit të tregojnë se çfarë u la mbresë nga studimi. Merreni parasysh të përdorni disa nga pyetjet në vijim ose të gjitha. Mund tʼi ftoni nxënësit edhe që të bëjnë pyetje rreth vargjeve.

• Çfarë mbresash pate teksa i studiove këto vargje?

• Cilat janë disa fraza në këto vargje që të bien më shumë në sy?

• Çfarë gjete që të bën të gëzohesh?

ChurchofJesusChrist.org

Merreni parasysh të tregoni një përvojë vetjake ose dëshmi për Shpëtimtarin dhe shpëtimin që ofron Ai. Ftojini nxënësit e gatshëm të japin edhe përvojat dhe dëshmitë e tyre.

Lexo te Mosia 3:11–13, duke kërkuar atë që ke nevojë të bësh për të marrë gëzim dhe shpëtim nëpërmjet Jezu Krishtit. Lexo ngadalë dhe përsiati këto vargje. Pyetjet vijuese mund të të ndihmojnë të përsiatësh.

Përdorini disa nga pyetjet më poshtë ose pyetje të tjera që ndiheni i frymëzuar të bëni, për tʼi ndihmuar nxënësit të diskutojnë për gëzimin që mund të vijë nëpërmjet pendimit. Mund të tregoni gjithashtu thënien e Plakut Dejll G. Renland rreth gëzimit dhe pendimit në pjesën “Komente dhe Informacion për Rrethanat”.

Nxënësit mund të përfitojnë nga përcaktimi i parimit vijues: Nëse ushtrojmë besim te Jezu Krishti dhe pendohemi, ne mund të shpëtohemi nga mëkatet tona dhe gëzohemi me gëzim jashtëzakonisht të madh.

• Çfarë ke mësuar apo ndier për Jezu Krishtin që të jep shtysë të pendohesh?

• Pse mendon se heqja e mëkateve sjell gëzim?

Kujto se nga çfarë ke nevojë të shpëtohesh. Mendo rreth asaj që studiove te Mosia 3 dhe mbresat që more nga Shpirti. Përpiqu të ushtrosh besim, të pendohesh dhe të besosh te Krishti në mënyrë që të mund të marrësh ndihmën e Shpëtimtarit dhe gëzimin që vjen nga të qenit i falur.

Komente dhe Informacion për Rrethanat

Mosia 3:7. Sa vuajti Jezu Krishti në mënyrë që unë të shpëtohem?

Plaku Xhejms E. Talmixh (1862–1933), i Kuorumit të Dymbëdhjetë Apostujve, dha mësim:

Plaku Xhejms E. Talmixh

“Ai u përpoq dhe rënkoi nën një barrë të atillë që asnjë qenie tjetër që ka jetuar në tokë, nuk mund ta marrë as si të mundur. Nuk qe vetëm dhembja fizike, as ankthi mendor, që e bënë Atë të vuante një torturë të atillë sa të prodhonte rrjedhje gjaku nga çdo por; por një agoni shpirtërore e shpirtit, e tillë sa vetëm Perëndia qe në gjendje ta përjetonte. … Në atë orë ankthi, Krishti u ndesh dhe i mposhti të gjitha tmerret që Satani, ‘princi i kësaj bote’ [Gjoni 14:30], mund të shkaktonte. …

Në njëfarë mënyre, aktuale dhe tmerrësisht të vërtetë, edhe pse të pakuptueshme për njeriun, Shpëtimtari mori mbi Vete barrën e mëkateve të njerëzimit nga Adami deri në fund të botës.” (James E. Talmage, Jesus the Christ, bot. i 3‑të [1916], f. 613)

Mosia 3:8. Pse u lind Jezusi nga një Atë i pavdekshëm dhe një nënë e vdekshme?

Plaku Robert D. Hejls (1932–2017), i Kuorumit të Dymbëdhjetë Apostujve, tregoi:

Plaku Robert D. Hejls

“Përse Jezu Krishti dhe vetëm Ai, mund të shlyente për mëkatet e botës? …

Vetëm Jezu Krishti mund ta kryente flijimin shlyes – ngaqë u lind prej një nëne të vdekshme, Maries, dhe kishte marrë fuqinë e jetës nga Ati i Tij (shih te Gjoni 5:26). Për shkak të kësaj fuqie të jetës, Ai e mposhti vdekjen, fuqia e varrit u asgjësua dhe Ai u bë Shpëtimtari e Ndërmjetësi ynë dhe Zoti i Ringjalljes – mjeti me anë të të cilit shpëtimi dhe pavdekësia na jepen neve të gjithëve. Ne të gjithë vërtet do të ringjallemi e bëhemi të pavdekshëm për shkak të flijimit shlyes të Jezu Krishtit.” (Robert D. Hejls, “Shlyerja e Shpëtimtarit: Themeli i Krishterimit të Vërtetë”, Ensign ose Liahona, prill 2017, f. 9, 11)

Cili është roli i Shpëtimtarit në pendim dhe cili është roli im?

Plaku Diter F. Uhtdorf, i Kuorumit të Dymbëdhjetë Apostujve, dha mësim:

Plaku Diter F. Uhtdorf

“Nuk është pendimi në vetvete që e shpëton njeriun. Është gjaku i Jezu Krishtit që na shpëton. Ne nuk shpëtohemi vetëm nga ndryshimi i sinqertë dhe i ndershëm i sjelljes, por ‘ne shpëtohemi nëpërmjet hirit, pas gjithçkaje që ne mund të bëjmë’ (2 Nefi 25:23). Pendimi i vërtetë, megjithatë, është kushti i kërkuar në mënyrë që falja e Perëndisë të mund të vijë në jetën tonë.” (Diter F. Uhtdorf, “Pikë Kthimi të Sigurt”, Liahona, maj 2007, f. 100; Konferenca e Përgjithshme, prill 2007, f. 123–126.)

Si mund të përjetoj gëzim nëpërmjet pendimit?

Plaku Dejll G. Renland, i Kuorumit të Dymbëdhjetë Apostujve, dha mësim:

Plaku Dejll G. Renland

“Unë ju ftoj të ndieni më shumë gëzim në jetën tuaj: gëzim në njohurinë se Shlyerja e Jezu Krishtit është e vërtetë; gëzim në aftësinë, gatishmërinë dhe dëshirën e Shpëtimtarit për të falur; dhe gëzim në zgjedhjen për t’u penduar. Le të ndjekim udhëzimin për të ‘[marrë] me gëzim ujin nga burimet e shpëtimit’ [Isaia 12:3]. Zgjedhshim të pendohemi, të braktisim mëkatet tona, të kthejmë prapa zemrat dhe vullnetet tona për të ndjekur Shpëtimtarin tonë.” (Dejll G. Renland, “Pendimi: Një Zgjedhje e Gëzueshme”, Liahona, nëntor 2016, f. 124)

Veprimtari Plotësuese të të Mësuarit

Vuajtja e Jezu Krishtit

Nxënësit mund t’i lexojnë fragmentet vijuese të shkrimeve të shenjta për ta kuptuar më mirë vuajtjen e Jezu Krishtit: Mateu 26:38–39; Lluka 22:42–44; Doktrina e Besëlidhje 19:16–19.

Planifikimi për të mëkatuar tani dhe për t’u penduar më vonë

Për t’i ndihmuar nxënësit të shohin rrezikun e të mëkatuarit me paramendim me një plan për t’u penduar më vonë, merreni parasysh ta përdorni këtë veprimtari.

Lexoni te Mosia 3:12 dhe diskutoni se çfarë do të thotë të rebelohesh kundër Perëndisë. Mund të shpërndani sa vijon nga broshura Për Forcën e Rinisë:

“Disa njerëz i thyejnë me dashje urdhërimet e Perëndisë, duke planifikuar të pendohen më vonë, si përpara se të shkojnë në tempull apo të shërbejnë në mision. Një mëkat i tillë me paramendim e përçmon Shlyerjen e Shpëtimtarit” (Për Forcën e Rinisë [broshurë, 2011], f. 28–29).

Diskutoni se si mëkati me paramendim e përçmon Shlyerjen e Shpëtimtarit dhe se si pendimi i sinqertë na tregon se e vlerësojmë atë që Shpëtimtari ka bërë për ne. Mund të përmendni vargun te Mosia 3:7 gjatë këtij diskutimi.

Shpëtimi i fëmijëve të vegjël

Nëse nxënësit do të përfitonin nga të kuptuarit se si fëmijët e vegjël shpëtohen nëpërmjet Shlyerjes së Shpëtimtarit, kjo veprimtari mund të ndihmojë.

Lexoni te Mosia 3:16–18, duke kërkuar atë që mbreti Beniamin dha mësim rreth fëmijëve të vegjël dhe Shlyerjes së Jezu Krishtit. Nxënësit gjithashtu mund të lexojnë dhe diskutojnë vargjet te Moroni 8:8–12 dhe Doktrina e Besëlidhje 137:10. Ftojini nxënësit të tregojnë se çfarë u mëson atyre shpëtimi i fëmijëve të vegjël rreth Atit Qiellor dhe Jezu Krishtit.