Mosias 2:19–41

“Pinagpala sa Lahat ng Bagay”

Ano ang handa mong gawin upang makatanggap ng walang-hanggang kaligayahan? Inanyayahan ni Haring Benjamin ang kanyang mga tao na hangarin ang kaligayahang ito sa pamamagitan ng matwid na pamumuhay at katapatan sa Diyos. Makatutulong sa iyo ang lesson na ito na hangarin “ang pinagpala at maligayang kalagayan ng mga yaong sumusunod sa mga kautusan ng Diyos” (Mosias 2:41).

Magkaroon ng aktibong pakikilahok sa klase. Ang pagtulong sa mga estudyante na maging aktibo sa pakikilahok sa klase ay makatutulong sa kanila na matuto nang mas malalim. Maaari kang gumamit ng mga learning station upang hatiin ang malalaking bahagi ng nilalaman at hayaang maging responsable ang mga estudyante sa kanilang pagkatuto. Habang pumipili at umiikot ang mga estudyante sa mga station, abangan ang mga indibiduwal na maaaring mangailangan ng tulong. Tiyaking magagamit nang epektibo ang oras sa klase.

Paghahanda ng estudyante: Maaaring anyayahan ang mga estudyante na tapusin ang sumusunod na pahayag at maghandang talakayin ang kanilang sagot: “Ang tunay at nagtatagal na kaligayahan ay matatagpuan sa pamamagitan ng …”

Posibleng Aktibidad sa Pag-aaral

Bilangin ang iyong mga pagpapala

Kantahin o basahin ang mga titik ng “Mga Pagpapala ay Bilangin” (Mga Himno, blg. 147), o panoorin ang sumusunod na video. Isipin ang mga titik at kung paano nauugnay ang mga ito sa iyong buhay.

Maaaring ilista ng mga estudyante ang kanilang mga pagpapala sa kanilang study journal nang mag-isa o sa pisara bilang isang klase. Anyayahan sila na ibahagi kung ano ang napansin o natutuhan nila sa paglilista ng kanilang mga pagpapala.

Matapos magturo tungkol sa paglilingkod, inanyayahan ni Haring Benjamin ang mga Nephita na pag-isipan kung paano nila hinahangad at tinatanggap ang mga pagpapala ng Ama sa Langit. Habang nag-aaral ka ngayon, pagnilayan kung paano ka napagpala ng Panginoon sa pagsisikap mong sundin ang Kanyang mga kautusan.

Maaari mong hatiin ang klase sa mga grupong may tigtatatlong estudyante. Italaga sa bawat miyembro ng grupo ang isa sa mga sumusunod na tanong na pag-iisipan habang binabasa nila ang mga sumusunod na talata kasama ang kanilang grupo. Pagkatapos ay sabihin sa kanila na talakayin sa kanilang grupo ang nalaman nila.

Basahin ang Mosias 2:19–25, at alamin ang sagot sa alinman sa mga sumusunod na tanong:

• Sa anong mga paraan pinagpala ng Diyos ang mga Nephita? Maaari mong markahan ang anumang pagpapala na mayroon ka na katulad ng sa kanila.

• Ano ang ginagawa ng Diyos kapag sinusunod natin ang Kanyang mga kautusan? Gaano kabilis Niya ito nagagawa?

• Ano ang itinuturo sa iyo ng mga talatang ito tungkol sa Diyos?

Matapos tulungan ang mga Nephita na matanto ang kanilang mga pagpapala, ipinaalam ni Haring Benjamin na ang kanyang anak na si Mosias ang magiging bagong hari nila. Ipinaalala niya sa kanila ang maraming paraan kung paano maaaring mawala sa mga tao ang kanilang mga pagpapala sa pamamagitan ng pagtatalo, paglabag, paghihimagsik, at pagsuway sa mga kautusan ng Diyos. Itinuro din niya ang mga walang-hanggang bunga ng mga kilos at pag-uugaling iyon at nangako sa mga sumusunod sa mga kautusan. (Tingnan sa Mosias 2:29–40.)

Pinagpala at maligaya

Basahin ang Mosias 2:41, at alamin ang pangakong ibinigay ni Haring Benjamin.

Ang Mosias 2:41 ay isang doctrinal mastery passage. Maaari mong markahan ang mga doctrinal mastery passage sa partikular na paraan upang madali mong mahanap ang mga ito. Magkakaroon ka ng pagkakataon sa susunod na lesson na magamit ang doktrinang itinuro sa passage na ito sa isang tanong o sitwasyon.

• Paano mo maibubuod ang talata 41 sa isang alituntunin ng katotohanan?

Isa sa mga pangakong ginawa sa Mosias 2:41 ay kung susundin natin ang mga kautusan ng Diyos, pagpapalain tayo ng Diyos sa temporal at espirituwal. Gayunpaman, marami pa tayong matututuhan mula sa talatang ito sa pamamagitan ng pag-aaral ng bawat parirala nang isa-isa.

Maaaring kabilang sa mga temporal na pagpapala ang mga bagay tulad ng pisikal na kalusugan, kasaganaan, o iba pang mga pagpapala na may kaugnayan sa mortal na buhay. Ang mga espirituwal na pagpapala ay mga bagay na walang hanggan. Kabilang dito ang ating patotoo, ang ating kaugnayan sa Diyos at sa ating pamilya, pagpapatawad sa mga kasalanan, patnubay sa pamamagitan ng Espiritu Santo, at iba pa.

Ang mga sumusunod na aktibidad ay maaaring hatiin sa mga learning station. Maaaring gamitin ng mga estudyante ang mga ibinigay na handout upang magkakasunod na magawa ang mga aktibidad nang mag-isa o sa maliliit na grupo. Isiping ipakumpleto ang aktibidad A sa buong klase upang maipakita kung ano ang inaasahan sa mga estudyante.

Ang Pinagpala at Maligayang Kalagayan ng mga Yaong Sumusunod sa mga Kautusan

Manwal ng Aklat ni Mormon para sa Seminary Teacher (2024)—“Mosias 2:19–41: ‘Pinagpala sa Lahat ng Bagay’”

Aktibidad A

“Isaalang-alang ang pinagpala at maligayang kalagayan ng mga yaong sumusunod sa mga kautusan ng Diyos. … Sila ay pinagpala sa lahat ng bagay, kapwa temporal at espirituwal.”

Tingnan ang mga pagpapalang inilista mo sa simula ng lesson na ito. Magdagdag pa ng mga pagpapala na maiisip mo. Salungguhitan ang mga pagpapalang mas temporal at bilugan ang mga pagpapalang mas espirituwal. Matatanto mo na ang ilan ay akma sa dalawang kategorya.

• Anong katibayan ang nakita mo sa iyong buhay na totoo ang pahayag na ito mula sa Mosias 2:41?

• Basahin ang Doktrina at mga Tipan 130:20–21. Ano ang natututuhan mo tungkol sa kaugnayan ng pagsunod sa mga kautusan at pagtanggap ng mga pagpapala ng Diyos? Maaari mong i-cross reference o iugnay ang mga talatang ito sa Mosias 2:41.

• Sa iyong palagay, bakit tayo binibigyan ng Ama sa Langit ng temporal at espirituwal na mga pagpapala? Ano ang itinuturo nito tungkol sa Kanya?

---

Aktibidad B

“Kung sila ay mananatiling matapat hanggang wakas, sila ay tatanggapin sa langit upang doon sila ay manahanang kasama ng Diyos sa kalagayan ng walang katapusang kaligayahan.”

Isulat ang pahayag na ito sa gitna ng isang blangkong pahina sa iyong study journal, at mag-iwan ng espasyo sa paligid nito upang makapagsulat ng mga tala. Bilugan ang mga salita o parirala sa pahayag na mahalaga sa iyo. Maglagay ng word bubble sa bawat binilugang salita o parirala, at sumulat ng kahulugan, mga kaugnay na scripture passage, o anumang iba pang mga ideyang mayroon ka.

Halimbawa, kung binilugan mo ang pariralang “tatanggapin sa langit,” maaaring kabilang sa kaugnay na word bubble ang isang bagay tulad ng “Ang salitang tatanggapin ay nagpapahiwatig na may isang tao roon na naghihintay o umaasa sa akin. Itinuro ni Jesus na maghahanda Siya ng lugar para sa atin sa langit at tatanggapin tayo roon (tingnan sa Juan 14:2–3). Ang mapagmahal kong mga magulang sa langit at si Jesucristo ay naroroon at tatanggapin nila ako kung mananatili akong matapat.”

Gumawa ng word bubble para sa bawat salita o parirala na binilugan mo. Bigyang-pansin ang mga tanong o impresyon na maiisip mo.

• Ano ang mga nalaman mo habang ginagawa ang aktibidad na ito?

• Paano makatutulong sa iyo ang mga ideyang ito sa iyong buhay ngayon?

---

Aktibidad C

“Tandaan, tandaan na ang mga bagay na ito ay totoo; sapagkat ang Panginoong Diyos ang siyang nagsabi ng mga ito.”

• Ano ang ilang bagay na madaling tandaan? Anong mga bagay ang mas mahirap tandaan?

Alalahanin ang natutuhan mo tungkol sa Diyos sa iyong pag-aaral ng Mosias 2. Basahin ang Mosias 2:22, at alamin ang mga walang-hanggang katotohanan tungkol sa Diyos.

• Ano ang alam mo tungkol sa Diyos na makatutulong sa iyo na magtiwala sa Kanyang mga pangako at sundin ang Kanyang mga kautusan?

• Ano ang magagawa mo upang matandaan ito tungkol sa Kanya?

© 2023 by Intellectual Reserve, Inc. All rights reserved.

Tapusin ang klase sa pag-anyaya sa mga estudyante na talakayin ang nadama at natutuhan nila sa kanilang pag-aaral. Hikayatin sila na hangarin ang mga pagpapala ng Panginoon sa pamamagitan ng tapat na pagsunod at pagsisisi.

Komentaryo at Impormasyon ng Konteksto

Bakit tila kahit sinusuway ng mga tao ang mga kautusan ay masaya pa rin sila?

Itinuro ni Elder D. Todd Christofferson ng Korum ng Labindalawang Apostol:

Kadalasan, ang mga taong sadyang bumabalewala sa mga banal na utos na tulad ng batas ng kalinisang-puri, pamantayan ng katapatan, at kabanalan ng Sabbath ay tila umuunlad at nagtatamasa ng mabubuting bagay sa buhay, na higit pa kung minsan kaysa sa mga taong nagsisikap na maging masunurin. Nagsisimulang mag-isip ang ilan kung sulit ba ang pagsisikap at mga sakripisyo. …

Maghintay lang kayo, sabi ng Panginoon, hanggang sa “araw na aking gawin, sa makatuwid baga’y isang tanging kayamanan. … Kung magkagayo’y … makikilala ninyo ang matuwid at ang masama, yaong naglilingkod sa Dios at yaong hindi naglilingkod sa kaniya” [Malakias 3:17–18]. Ang masasama ay “[may] kagalakan sa kanilang mga gawa nang kaunting panahon” [3 Nephi 27:11], ngunit pansamantala lamang iyon palagi. Ang kagalakan ng mga Banal ay nagtatagal. …

Wala pa akong nakilalang sinuman na nakatuklas sa ebanghelyo sa kanilang katandaan na hindi nagnais na sana’y natuklasan nila iyon nang mas maaga. “Ah, ang dami kong maling pagpapasiya at pagkakamali na sana’y naiwasan ko,” sasabihin nila. Ang mga utos ng Panginoon ay ating gabay para sa mas mabubuting pagpapasiya at mas masasayang resulta. Dapat tayong magalak at pasalamatan natin Siya dahil ipinakita Niya sa atin ang mas mabuting paraang ito. (D. Todd Christofferson, “Ang Kagalakan ng mga Banal,” Liahona, Nob. 2019, 15–16)

Sulit ba talaga ang tapat na pagsunod sa Diyos?

Itinuro ni Pangulong Russell M. Nelson:

Ang espirituwal na katotohanan ay hindi maaaring balewalain—lalo na ang mga banal na utos. Ang pagsunod sa mga banal na utos ay naghahatid ng mga pagpapala, sa tuwina! Ang pagsuway sa mga banal na utos ay naghahatid ng pagkawala ng mga pagpapala, sa tuwina! (Russell M. Nelson, “Ipakita ang Inyong Pananampalataya,” Liahona, Mayo 2014, 30)

Itinuro ni Elder Richard G. Scott (1928–2015) ng Korum ng Labindalawang Apostol:

Ang tunay at nagtatagal na kaligayahan, na may kasamang katatagan, lakas ng loob, at kakayahang mapaglabanan ang matitinding paghihirap, ay darating kapag itinuon ninyo ang inyong buhay kay Jesucristo. Ang pagsunod sa Kanyang mga turo ay nagbibigay ng tiyak na pag-unlad sa buhay na ito. Kailangan dito ang pagsisikap. Bagamat walang garantiya ng mabilisang resulta, may katiyakan na, sa takdang oras ng Panginoon, darating ang mga solusyon, mananaig ang kapayapaan, at makadarama kayo ng kaligayahan. (Richard G. Scott, “Matitiyak ng Pagbabayad-sala ang Inyong Kapayapaan at Kaligayahan,” Liahona, Nob. 2006, 41)

Mga Karagdagang Aktibidad sa Pag-aaral

Video

Maaari mong ipapanood ang video sa Aklat ni Mormon na nagpapakita ng ilang bahagi ng mensahe ni Haring Benjamin na nakatala sa Mosias 2:29–41.

Walang hanggang pagkakautang sa Diyos

Ipabasa nang malakas sa isang estudyante ang Mosias 2:34. Ituon ang pansin ng mga estudyante sa linyang “kayo ay may walang hanggang pagkakautang sa inyong Ama sa Langit.”

Maaari mong pagpartner-partnerin ang mga estudyante o hatiin sa maliliit na grupo ang klase. Ipabasa sa kanila ang Mosias 2:18–24 at ipasagot sa kanila ang mga sumusunod na tanong:

• Ano ang ilang pagpapala mula sa Diyos na inilarawan sa talata 20–21 na maaaring hindi mapansin ng mga tao? Maaari mong markahan ang iyong mga pagpapala na kapareho sa mga pagpapala ng mga tao ni Haring Benjamin.

• Bakit may walang hanggang pagkakautang tayo sa Ama sa Langit?

Mga bunga ng pagtanggi sa ebanghelyo ni Jesucristo

Matapos tulungan ang mga Nephita na matanto ang kanilang mga pagpapala, pinagnilayan ni Haring Benjamin ang maraming maaaring gawin ng mga tao na magiging dahilan upang mawala sa kanila ang kanilang mga pagpapala. Itinuro din niya ang mga walang hanggang ibubunga ng mga kilos at pag-uugaling iyon.

Ipabasa sa mga estudyante ang Mosias 2:32–40. Sabihin sa kanila na isiping salungguhitan ang mga paraan kung paano mawawala sa mga tao ang kanilang mga pagpapala at bilugan ang mga ibubunga ng mga kilos at pag-uugaling yon.