Mosias 3:1–17

Kaligtasan sa pamamagitan ni Jesucristo

Jesucristo

Sa buong kasaysayan, dumalaw ang mga anghel sa mundo upang magpatotoo tungkol kay Jesucristo at ipahayag ang “masayang balita ng dakilang kagalakan” (Mosias 3:3; Alma 13:22; Helaman 16:14). Nakatanggap si Haring Benjamin ng gayong pagdalaw. Ibinahagi niya sa kanyang mga tao ang patotoo ng anghel tungkol kay Jesucristo, ang mga bagay na mararanasan ng Tagapagligtas, at ang katotohanan na ang kaligtasan ay dumarating lang sa pamamagitan ng pangalan ni Cristo. Ang lesson na ito ay makatutulong sa iyo na maunawaan ang kahalagahan ng ginawa ni Jesucristo upang maligtas ka.

Pagtulong sa mga estudyante na matutong magnilay. Ang ibig sabihin ng “magnilay” ay magbulay-bulay o mag-isip nang malalim tungkol sa isang bagay, at kadalasan ay may kasama itong panalangin. Habang natututuhan ng mga estudyante na magnilay sa kanilang personal na pag-aaral ng banal na kasulatan, ang Espiritu ay maghahayag sa kanila ng katotohanan at tutulong sa kanila na malaman kung paano sila magiging higit na katulad ni Jesucristo.

Paghahanda ng estudyante: Maaari mong anyayahan ang mga estudyante na talakayin sa isang kapamilya, kaibigan, o lider ng Simbahan ang mga pagpapalang posible lamang dahil kay Jesucristo.

Posibleng Aktibidad sa Pag-aaral

Masayang balita ng dakilang kagalakan

Magpakita ng larawan ng mga anghel na nagbabalita ng pagsilang ng Tagapagligtas.

• May naiisip ba kayong mga pagkakataon na pumarito sa lupa ang mga anghel upang magpatotoo tungkol kay Jesucristo?

Ang isang halimbawa ay nasa Lucas 2:10–12. ChurchofJesusChrist.org

Nagpakita rin ang isang anghel kay Haring Benjamin. Basahin ang Mosias 3:3–4, at alamin ang mga pagkakatulad ng sinabi ng anghel sa mga pastol at ng sinabi ng anghel kay Haring Benjamin.

• Ano ang nalalaman mo tungkol kay Jesucristo na maituturing na “masayang balita ng dakilang kagalakan”?

Sa kanyang mensahe sa kanyang mga tao na kasama sa Mosias 3:1–17, ibinahagi ni Haring Benjamin ang ilan sa mensahe ng anghel. Tinalakay ng mensaheng ito ang buhay at misyon ni Jesucristo, kung paano sila makatatanggap ng kagalakan, at kung ano ang maibibigay ni Jesus na hindi maibibigay ng sinuman.

Ang tanging pangalan na magdadala ng kaligtasan

Basahin ang Mosias 3:17, at alamin kung ano ang maibibigay ni Jesucristo.

• Anong katotohanan ang matutukoy mo sa talata 17?

Maaaring makatukoy ang mga estudyante ng iba’t ibang katotohanan—halimbawa, ang kaligtasan ay dumarating lamang sa pamamagitan ni Jesucristo. Pasalamatan ang mga estudyante sa pagbabahagi ng mga katotohanang nalaman nila, at maaari mong isulat ang isa o mahigit pa sa pisara.

Basahin ang sumusunod na pahayag ni Elder Neil L. Andersen ng Korum ng Labindalawang Apostol at alamin kung saan tayo inililigtas ni Jesucristo:

Elder Neil L. Andersen

Ang ating Panginoon at Tagapagligtas na si Jesucristo, sa pamamagitan ng Kanyang di-masukat na kaloob na Pagbabayad-sala, ay hindi lamang tayo inililigtas mula sa kamatayan at inaalok tayo, sa pamamagitan ng pagsisisi, ng kapatawaran para sa ating mga kasalanan, kundi handa rin Siyang iligtas tayo mula sa mga kalungkutan at sakit ng ating sugatang kaluluwa. (Neil L. Andersen, “Sugatan,” Liahona, Nob. 2018, 85)

Ang mga sumusunod na tanong ay naglalayong tulungan ang mga estudyante na madama na kailangan nila ang Tagapagligtas. Sabihin sa mga estudyante na tahimik na pag-isipan ang kanilang mga sagot. Humingi ng patnubay mula sa Espiritu upang malaman ang iba pang mga paraan kung paano mo matutulungan ang mga estudyante na maunawaan na kailangan ng bawat isa sa kanila si Jesucristo.

Isipin kung saan mo kailangang mailigtas. May mga kasalanan ka bang sinisikap na madaig? May mga kalungkutan o pasakit ka bang nararanasan? Habang pinag-aaralan mo ang Mosias 3, maghangad ng inspirasyon sa pamamagitan ng Espiritu Santo upang matulungan kang malaman kung paano mo matatanggap ang kaligtasang ibinibigay ni Jesucristo.

Basahin ang Mosias 3:5–10, at alamin ang ginawa ni Jesucristo upang mailigtas ka. Mag-ukol ng oras na magbasa nang dahan-dahan at magnilay. Ang pagninilay ay isang paraan upang maanyayahan ang Espiritu Santo na turuan ka. Maaari kang magsulat ng mga ideya at saloobin sa iyong mga banal na kasulatan o study journal.

Tiyakin na may sapat na oras ang mga estudyante na basahin at pagnilayan ang mga banal na kasulatan. Dahil may ilang estudyante na mas mauunang matapos sa pagbabasa kaysa sa iba, maaari mo silang anyayahang basahing muli ang ilang talata, hanapin ang mga footnote, o mag-ukol ng mas maraming oras upang magnilay.

Pagkatapos ng sapat na oras, hikayatin ang mga estudyante na ibahagi ang impresyon nila sa kanilang pinag-aralan. Isiping gamitin ang ilan o lahat ng sumusunod na tanong. Maaari mo ring sabihin sa mga estudyante na magtanong tungkol sa mga talata.

• Ano ang mga naging impresyon mo habang pinag-aaralan mo ang mga talatang ito?

• Ano ang ilan sa mga parirala sa mga talatang ito ang pinakanapansin mo?

• Ano ang nalaman mo na ikinagalak mo?

ChurchofJesusChrist.org

Maaari kang magbahagi ng personal na karanasan o patotoo tungkol sa Tagapagligtas at sa kaligtasang ibinibigay Niya. Anyayahan din ang mga estudyanteng handang magbahagi ng kanilang mga karanasan at patotoo.

Basahin ang Mosias 3:11–13, at alamin kung ano ang kailangan mong gawin upang makatanggap ng kagalakan at kaligtasan sa pamamagitan ni Jesucristo. Basahin nang dahan-dahan at pagnilayan ang mga talatang ito. Ang mga sumusunod na tanong ay makatutulong sa iyong magnilay.

Gamitin ang ilan sa mga tanong sa ibaba, o iba pa na nahihikayat kang itanong, upang matulungan ang mga estudyante na talakayin ang kagalakang maaaring madama sa pamamagitan ng pagsisisi. Maaari mo ring ibahagi ang pahayag ni Elder Dale G. Renlund tungkol sa kagalakan at pagsisisi sa bahaging “Komentaryo at Impormasyon ng Konteksto.”

Maaaring makatulong sa mga estudyante na tukuyin ang sumusunod na alituntunin: Kung mananampalataya tayo kay Jesucristo at magsisisi, maililigtas tayo mula sa ating mga kasalanan at magagalak nang may labis na kagalakan.

• Ano ang natutuhan o nadama mo tungkol kay Jesucristo na naghihikayat sa iyo na magsisi?

• Sa iyong palagay, bakit nagdudulot ng kagalakan ang kapatawaran ng mga kasalanan?

Alalahanin kung saan mo kailangang mailigtas. Isipin ang napag-aralan mo sa Mosias 3 at ang mga impresyong natanggap mo mula sa Espiritu. Sikaping manampalataya, magsisi, at maniwala kay Cristo upang matanggap mo ang tulong ng Tagapagligtas at ang kagalakang nagmumula sa pagpapatawad.

Komentaryo at Impormasyon ng Konteksto

Mosias 3:7. Gaano ang pagdurusa ni Jesucristo upang mailigtas ako?

Itinuro ni Elder James E. Talmage (1862–1933) ng Korum ng Labindalawang Apostol:

Elder James E. Talmage

Naghirap Siya at dumaing sa pasakit na hindi kayang isipin o maunawaan ng sinumang nilalang na nabuhay sa mundo. Hindi lamang hirap ng katawan, ni pagdadalamhati ng isipan, ang naging sanhi ng pagdanas Niya ng gayon katinding pagdurusa kaya’t nilabasan ng dugo ang bawat butas ng Kanyang balat; kundi iyon ay isang espirituwal na pasakit ng kaluluwa na tanging Diyos lamang ang may kakayahang makadama. … Sa sandaling iyon ng hapis at dalamhati hinarap at dinaig ni Cristo ang lahat ng paninindak na magagawa ni Satanas, “ang pinuno ng sanlibutan” [Juan 14:30]. …

Sa ilang paraan, na lubhang totoo bagama’t hindi kayang maunawaan ng tao, inako ng Tagapagligtas ang bigat ng kasalanan ng sangkatauhan mula kay Adan hanggang sa katapusan ng daigdig. (James E. Talmage, Jesus the Christ, 3rd ed. [1916], 613)

Mosias 3:8. Bakit isinilang si Jesus ng isang imortal na ama at isang mortal na ina?

Ibinahagi ni Elder Robert D. Hales (1932–2017) ng Korum ng Labindalawang Apostol:

Elder Robert D. Hales

Bakit si Jesucristo, at Siya lamang, ang maaaring magbayad-sala para sa mga kasalanan ng sanlibutan?. …

Si Jesucristo lamang ang makagagawa ng nagbabayad-salang sakripisyo—ipinanganak Siya ng isang mortal na ina, si Maria, at nakatanggap ng kapangyarihan ng buhay mula sa Kanyang Ama (tingnan sa Juan 5:26). Dahil sa kapangyarihan ng buhay na ito, nadaig Niya ang kamatayan, nawalan ng saysay ang kapangyarihan ng libingan, at Siya ang naging Tagapagligtas at Tagapamagitan natin at ang Panginoon ng Pagkabuhay na Mag-uli—ang paraan kung saan ang kaligtasan at imortalidad ay ibinigay sa ating lahat. Tayong lahat ay mabubuhay na mag-uli at magiging imortal dahil sa nagbabayad-salang sakripisyo ni Jesucristo. (Robert D. Hales, “Ang Pagbabayad-sala ng Tagapagligtas: Pundasyon ng Tunay na Kristiyanismo,” Liahona, Abril 2017, 23)

Ano ang tungkuling ginagampanan ng Tagapagligtas sa pagsisisi, at ano ang responsibilidad ko?

Itinuro ni Elder Dieter F. Uchtdorf ng Korum ng Labindalawang Apostol:

Elder Dieter F. Uchtdorf

Hindi lang pagsisisi ang nagliligtas sa tao. Ang dugo ni Jesucristo ang siyang nagliligtas sa atin. Hindi lamang sa ating taos-puso at tapat na pagbabago ng ugali kung kaya tayo naliligtas, kundi “sa pamamagitan ng biyaya, sa kabila ng lahat ng ating magagawa” (2 Nephi 25:23). Gayunpaman, tunay na pagsisisi ang kailangan upang mapatawad tayo ng Diyos. (Dieter F. Uchtdorf, “Hangganan ng Ligtas na Pagbalik,” Liahona, Mayo 2007, 100)

Paano ako makadarama ng kagalakan sa pamamagitan ng pagsisisi?

Itinuro ni Elder Dale G. Renlund ng Korum ng Labindalawang Apostol:

Elder Dale G. Renlund

Inaanyayahan ko kayo na damhin ang mas malaking kagalakan sa inyong buhay: kagalakan sa kaalaman na totoo ang Pagbabayad-sala ni Jesucristo; kagalakan sa kakayahan, kahandaan, at kagustuhang magpatawad ng Tagapagligtas; at kagalakan sa pagpili na magsisi. Sundin natin ang tagubilin ng Tagapagligtas na “[umigib] ng tubig na may kagalakan sa mga balon ng kaligtasan” [Isaias 12:3]. Nawa’y piliin nating magsisi, talikuran ang ating mga kasalanan, ibaling ang ating mga puso at kalooban sa pagsunod sa ating Tagapagligtas. (Dale G. Renlund, “Pagsisisi: Isang Pagpiling Puno ng Kagalakan,” Liahona, Nob. 2016, 124)

Mga Karagdagang Aktibidad sa Pag-aaral

Video ng Aklat ni Mormon

Maaari mong ipapanood ang video na “Ibinahagi ni Haring Benjamin ang Propesiya ng Isang Anghel tungkol kay Jesucristo” mula sa time code na 0:00 hanggang 3:28.

Ang pagdurusa ni Jesucristo

Maaaring basahin ng mga estudyante ang mga sumusunod na scripture passage upang mas maunawaan ang pagdurusa ni Jesucristo: Mateo 26:38–39; Lucas 22:42–44; Doktrina at mga Tipan 19:16–19.

Pagpaplanong magkasala ngayon at magsisi kalaunan

Upang matulungan ang mga estudyante na makita ang panganib ng sadyang pagkakasala nang may planong magsisi kalaunan, maaari mong gamitin ang aktibidad na ito.

Basahin ang Mosias 3:12 at talakayin kung ano ang ibig sabihin ng maghimagsik laban sa Diyos. Maaari mong ibahagi ang sumusunod mula sa Para sa Lakas ng mga Kabataan:

“Ang ilang tao ay sadyang lumalabag sa mga utos ng Diyos at pinaplanong magsisi na lang kalaunan, halimbawa ay kapag bago sila pumunta sa templo o magmisyon. Ang gayong sadyang paglabag ay paghamak sa Pagbabayad-sala ng Tagapagligtas” (Para sa Lakas ng mga Kabataan [buklet, 2011], 29).

Talakayin kung paano hinahamak ng sadyang paggawa ng kasalanan ang Pagbabayad-sala ng Tagapagligtas at kung paano nakikita sa taos-pusong pagsisisi na pinahahalagahan natin ang ginawa ng Tagapagligtas para sa atin. Maaari mong banggitin ang Mosias 3:7 sa talakayang ito.

Ang kaligtasan ng maliliit na bata

Kung makikinabang ang mga estudyante sa pag-unawa kung paano maililigtas ang maliliit na bata sa pamamagitan ng Pagbabayad-sala ng Tagapagligtas, maaaring makatulong ang aktibidad na ito.

Basahin ang Mosias 3:16–18, at alamin ang itinuro ni Haring Benjamin tungkol sa maliliit na bata at sa Pagbabayad-sala ni Jesucristo. Maaari ding basahin at talakayin ng mga estudyante ang Moroni 8:8–12 at Doktrina at mga Tipan 137:10. Sabihin sa mga estudyante na ibahagi kung ano ang itinuturo ng kaligtasan ng maliliit na bata tungkol sa Ama sa Langit at kay Jesucristo.