Վարդապետության սերտում. Մոսիա 4.9

«Հավատացե՛ք Աստծուն»

Մոսիա 4.9–10 հատվածն ուսումնասիրելիս սովորեցիք Աստծուն հավատալու կարևորության մասին: Այս դասը կօգնի ձեզ մտապահել Մոսիա 4.9 հատվածի վարդապետության սերտման հղումն ու հիմնական արտահայտությունը, բացատրել վարդապետությունը և իրական կյանքի իրավիճակներում կիրառել հոգևոր գիտելիքներ ձեռք բերելու սկզբունքները:

Կենտրոնացեք Երկնային Հոր և Հիսուս Քրիստոսի վրա: Չկա ուսանողներին ավելի մեծ օրհնություն բերող բան, ինչը ուսուցիչները կարող են անել, քան այն, որ նրանք ճանաչեն ու սիրեն Երկնային Հորը և Հիսուս Քրիստոսին: Պատրաստվելու և ուսուցանելու ընթացքում շարունակաբար փնտրեք ոգեշնչում, թե ինչպես կարող եք անել դա:

Ուսանողի նախապատրասում. ուսանողներին առաջարկեք ընտանիքի անդամներին կամ ընկերներին հարցնել, թե ինչու են որոշել հավատալ Աստծուն:

Հնարավոր ուսումնական վարժություններ

Վարդապետության սերտման այս դասը պետք է անցկացնեք «Մոսիա 4.9–10» հատվածի դասից հետո, որը Մոսիա 4.9 հատվածի վարդապետության սերտման համատեքստային դասն է: Եթե վարդապետության սերտման այս դասն անհրաժեշտ է տեղափոխել մեկ այլ շաբաթ, համոզվեք, որ այդ շաբաթ կուսուցանվի նաև համապատասխան համատեքստային դասը:

Մտապահեք և բացատրեք

Ստորև ներկայացված է մի եղանակ, որը կօգնի ուսանողներին սեփական բառերով բացատրել Մոսիա 4.9 հատվածում ուսուցանվող վարդապետությունը:

Վերհիշեք ձեր փորձառությունը, երբ Մոսիա 4.9–10 հատվածում ուսումնասիրում էիք Բենիամին թագավորի ուղերձն Աստծուն հավատալու մասին, որն ուղղված էր իր ժողովրդին: Ըստ անհրաժեշտության՝ կարող եք կրկին կարդալ այդ հատվածները և վերանայել ձեր օրագրում նախորդ դասի համար ստեղծած գծապատկերը:

• Բենիամին թագավորն Աստծո մասին ի՞նչ կարևոր բնութագրիչների կամ հատկանիշների էր առաջարկում իր ժողովրդին հավատալ:

• Աստծո այդ հատկանիշներին հավատալն ի՞նչ ազդեցություն կարող է ունենալ ձեր կյանքում:

Ընտրեք Մոսիա 4.9–10 հատվածում հիշատակվող Աստծո բնութագրիչներից կամ հատկանիշներից մեկը, որոնց Բենիամին թագավորն ուսուցանում էր իր ժողովրդին հավատալ: Կիսվեք, թե դա ինչպես կբացատրեիք որևէ մեկին, ով չի հասկանում, թե ինչ է դա նշանակում:

Ուսանողներին առաջարկեք մտապահել Մոսիա 4.9 վարդապետության սերտման հատվածի հղումը և ուղեկցող սուրբ գրության հիմնական արտահայտությունը՝ «Հավատացե՛ք Աստծուն. … հավատացե՛ք, որ նա ունի բոլոր իմաստությունը»: Հետևյալ օրինակը ցույց է տալիս, թե ինչպես կարելի է դա անել:

Ձեր օրագրում մեծ տառերով գրեք հավատացե՛ք բառը: Ներքևում գրեք Աստծուն բառը, իսկ դրա ներքևում գրեք հավատացե՛ք, որ նա ունի բոլոր իմաստությունը արտահայտությունը: Ներքևում մեծ տառերով գրեք սուրբ գրության հղումը՝ Մոսիա 4.9: Սկսելով վերևից՝ մատով ցույց տվեք բառը, արտահայտությունը կամ հղումը և բարձրաձայն ասեք յուրաքանչյուր տող: Այս վարժությունը կրկնեք մի քանի անգամ, մինչև մտապահեք:

Որպես նախորդ վարժության այլընտրանքային տարբերակ կարող եք գրատախտակին գրել հավատացե՛ք բառը: Բացատրեք, որ այս բառը Մոսիա 4.9 սուրբ գրության հիմնական արտահայտության մեջ երկու անգամ է հանդիպում: Ուսանողներին առաջարկեք նախ մտապահել «Հավատացե՛ք Աստծուն.», ապա՝ «հավատացե՛ք, որ նա ունի բոլոր իմաստությունը» արտահայտությունները: Հետո հանձնարարեք մտապահել Մոսիա 4.9 սուրբ գրության հղումը: Այնուհետև, երեք ուսանողի հրավիրեք կանգնել դասարանի առաջ: Յուրաքանչյուր ուսանողի հանձնարարեք կրկնել մտապահված հատվածներից մեկը: Ուսանողների հետ կրկնեք սա երեք հոգուց կազմված խմբերով, որպեսզի օգնեք նրանց հիշողության մեջ ամրապնդել հիմնական արտահայտությունը և հղումը:

Գործնական կիրառում

Ուսանողներին առաջարկեք կրկնել հոգևոր գիտելիք ձեռք բերելու սկզբունքները: Ժամանակ հատկացրեք և հանձնարարեք նրանց կատարել ստորև ներկայացված վարժությունը: Այս վարժությունը կարող եք հարմարեցնել՝ դասարանով թվարկելով սկզբունքները, ապա առաջարկելով ուսանողներին ընտրել մեկ սկզբունք և բացատրել, թե ինչպես են օգտագործել կամ ինչպես կարող էին օգտագործել այն: Բոլոր երեք սկզբունքները կրկնելու համար ուսանողները կարող են ուսուցանել միմյանց:

Կրկնեք հոգևոր գիտելիքներ ձեռք բերելու սկզբունքները, որոնք ուսուցանվում են «Ձեռք բերել հոգևոր գիտելիքներ» բաժնի 5–12 պարբերություններում՝ Վարդապետության սերտման հիմնական փաստաթղթում (2022): Կարող եք փորձել անգիր թվարկել բոլոր երեք սկզբունքները: Այնուհետև ձեր օրագրում գրեք, թե ինչպես եք օգտագործել կամ ինչպես կարող էիք օգտագործել այդ սկզբունքները:

Ստորև ներկայացվող սցենարը կարող է օգնել ուսանողներին փորձել իրական կյանքի իրավիճակներում կիրառել Մոսիա 4.9 հատվածի ուսմունքները և հոգևոր գիտելիքներ ձեռք բերելու սկզբունքները: Որպես այլընտրանքային տարբերակ կարող եք թույլ տալ ուսանողներին անհատապես սովորել՝ ստեղծելով իրենց սեփական սցենարը և փորձելով կիրառել հոգևոր գիտելիքներ ձեռք բերելու սկզբունքները: Դա կարող է օգնել, որ սովորելու գործընթացն իրենց համար ավելի համապատասխան ու կիրառելի լինի:

Հետևյալ սցենարը մեկ այլ այլընտրանք կարող է լինել «Նրա շնորհը. ընտրել Աստծուն հավատալը» տեսանյութը (4:07), որը հասանելի է ChurchofJesusChrist.org կայքում: Եթե որոշեք սցենարի փոխարեն տեսանյութն օգտագործել, այն թույլ կտա տարբեր կետերում ընդմիջել դիտումը և ուսանողների հետ քննարկել, թե ըստ իրենց՝ տեսանյութի երիտասարդ տղան ինչպես է ցուցադրում հոգևոր գիտելիքներ ձեռք բերելու սկզբունքներից յուրաքանչյուրը: Կարող եք ուսանողներին հանձնարարել նաև տեսանյութում փնտրել մեկ սկզբունք և ուշադրություն դարձնել, թե երիտասարդ տղան ինչպես է օգտագործում այդ սկզբունքը: Հետո ուսանողները կարող են միմյանց ուսուցանել, թե ինչ դիտեցին և զգացին:

Միրան սովորում է մի դասարանում է, որտեղ ուսուցիչը ծաղրում է կրոնը և Աստծուն չի հավատում: Ուսուցչի մեկնաբանությունները սկզբում անհանգստացնում էին Միրային, բայց մի քանի ամիս այդ դասարանում սովորելով՝ նա սկսեց մտածել, որ գուցե իր ուսուցիչը ճիշտ է: Նա միշտ հավատացել է Աստծուն, բայց այժմ զգում է, որ կարող է սկսել կասկածել Աստծո գոյությանը:

Օգտագործեք հոգևոր գիտելիքներ ձեռք բերելու սկզբունքները և Մոսիա 4.9 հատվածի վարդապետությունը, որպեսզի օգնեք Միրային նրա իրավիճակում կամ Աստծուն հավատալու հետ կապված մեկ այլ սցենարում, որն առնչվում է ձեր կյանքին:

Պարտադիր չէ հետևյալ հարցերը մեկը մյուսի հետևից տալ դասարանին: Դրանք նախատեսված են որպես հարցերի օրինակներ, որոնք կարող եք տալ ուսանողներին, երբ նրանք փորձեն օգտագործել հոգևոր գիտելիք ձեռք բերելու սկզբունքները: Ուսանողներին թույլ տվեք միմյանց ուղղել հարցերը և պատասխանել դրանց: Փնտրեք Սուրբ Հոգու առաջնորդությունը, որպեսզի իմանաք երբ տալ և երբ չտալ ստուգիչ հարցերը (այստեղ թվարկվածները կամ այլ հարցեր):

Գործեք հավատքով

• Ի՞նչ հավատքով լի գործողություններ կարելի է ձեռնարկել, եթե դժվար է Աստծուն հավատալը:

• Այդ գործողությունների կատարումն ինչպե՞ս կարող է օգնել նրանց:

Քննեք հասկացություններն ու հարցերը հավերժության հեռանկարով

• Մոսիա 4.9 հատվածի ո՞ր ուսմունքները կարող են օգնել այս իրավիճակում՝ հավերժության հեռանկար ունենալու համար:

• Աստծուն հավատալու կամ չհավատալու որոշումն ինչպե՞ս կարող է ազդել մարդու ապագայի վրա:

Ձգտեք մեծացնել հասկացողությունը աստվածայնորեն սահմանված աղբյուրների միջոցով

• Սուրբ գրությունների ի՞նչ լրացուցիչ հատվածներ կամ փորձառություններ (որոնք ունեցել եք դուք կամ ուրիշները) կարող են օգնել այս խնդրին:

• Ուրիշ որտե՞ղ կարելի է տեղեկություններ գտնել, որոնք կօգնեն այս իրավիճակում: Գտեք առնվազն մեկ այլ աղբյուր և բացատրեք, թե այն ինչպես կարող է օգնել:

Այս դասը եզրափակելու համար կարող եք ուսանողներին առաջարկել մտածել այնպիսի իրավիճակների մասին, որոնցում հայտնվել են իրենք կամ ուրիշները կամ կարող են հայտնվել, և որոնցում իրենց հավատքն առ Աստված կարող է հարցականի տակ դրվել և օգնեք նրանց պատրաստվել այդ փորձառություններին: Դա կարող եք անել՝ ուսանողներին տալով հետևյալ հարցերից մի քանիսը.

• Այսօրվա ձեր փորձառությունն ինչպե՞ս կարող է օգնել այդ իրավիճակներում:

• Հատկապես ի՞նչը կցանկանայիք հիշել, եթե տատանվեիք Աստծո հանդեպ ձեր հավատքի հարցում:

Որպես այս քննարկման մաս վկայեք կամ առաջարկեք ուսանողներին վկայել Աստծուն հավատալու կարևորության մասին:

Վարդապետության սերտման կրկնություն

Ստորև ներկայացվող կրկնության վարժությունն օգտագործեք այս դասից անմիջապես հետո:

Դասը սկսեք՝ գրատախտակին գրելով սուրբ գրության Մոսիա 4.9 հղումը և Հավատացե՛ք Աստծուն. … հավատացե՛ք, որ նա ունի բոլոր իմաստությունը հիմնական արտահայտությունը՝ յուրաքանչյուր անգամ գրելով մեկ բառ: Նախքան հաջորդ բառը գրելը սպասեք՝ տեսնելու, թե արդյոք ուսանողները կարող են ասել այն մինչև ձեր գրելը: Սա կրկնեք մի քանի անգամ, մինչև ուսանողները կարողանան անգիր ասել այն:

Օժանդակ ուսումնական վարժություններ

Այլընտրանքային սցենար

Կարող եք օգտագործել ստորև ներկայացվող սցենարը՝ որպես դասի սցենարի այլընտրանք:

Կանատոն ամբողջ կյանքում Եկեղեցու անդամ է եղել, բայց հստակ չի իմացել, թե Աստծո մասին ինչին է հավատում։ Աշխարհում այնքան շատ հակասող գաղափարներ ու կարծիքներ կան, և նա չի համոզվել, որ Աստված իրական է, կամ որ իր հավատքն առ Աստված իսկապես կարևոր է: