Mosiah 5:6–15

“Modala diha Kaninyo sa Ngalan ni Kristo”

Ang mga ngalan mahimong adunay dakong kahulogan. Unsa ang gipasabot sa pagdala diha sa imong kaugalingon sa ngalan ni Kristo? Ang Mosiah 5 naglangkob sa panapos sa pakigpulong ni Hari Benjamin ngadto sa iyang mga katawhan sa dihang iyang gipundok ang mga katawhan aron sa paghatag kanila og ngalan (tan-awa sa Mosiah 1:11). Kini nga leksiyon makatabang nimo nga makasabot sa kamahinungdanon sa pagdala diha kanimo sa ngalan ni Jesukristo.

Pagsunod sa ehemplo ni Jesukristo.Ang Manluluwas mipakita sa hingpit nga ehemplo kon sa unsang paagi kita kinahanglang magpakabuhi aron mahisama Kaniya. Samtang imong tabangan ang mga estudyante sa pag-ila sa mga pulong, binuhatan, ug mga hiyas ni Jesukristo, dapita sila sa pagpangita og mga paagi sa pagsunod sa Iyang ehemplo sa ilang personal nga mga kinabuhi.

Pagpangandam sa estudyante: Dapita ang mga estudyante sa pagpamalandong sa pangutana nga “Unsa ang gipasabot sa pagdala diha sa imong kaugalingon sa ngalan ni Kristo?”

Mga Posibleng Kalihokan sa Pagkat-on

Usa ka bag-ong ngalan

Ang mosunod nga kalihokan maoy usa ka paagi sa pagtabang sa mga estudyante nga maandam sa pagkat-on mahitungod sa pagdala diha kanila sa ngalan ni Kristo. Kung adunay mga estudyante nga mahimong sensitibo sa ideya sa mga ilo o pagsagop, ikonsiderar ang usa ka alternatibo nga kalihokan.

Handurawa ang usa ka ilo nga walay bisan usa nga motabang o moamuma kaniya kinsa sa kataposan makaila og usa ka mahigugmaon, lig-on nga pamilya nga nagtanyag sa pagsagop kaniya.

• Unsa ang pipila ka mga rason nga ang ilo mahimong gusto nga sagopon ug mogamit sa ngalan sa ilang bag-ong pamilya?

• Unsa nga mga panalangin ang ikatanyag sa iyang bag-ong inahan ug amahan nga dili mahatag sa ilo sa iyang kaugalingon?

• Unsa kaha ang bation sa ilo bahin sa ilang bag-ong pamilya?

Sa iyang mahinungdanong pakigpulong ngadto sa iyang mga katawhan, si Hari Benjamin miingon, “Ako manghinaot nga kamo kinahanglan modala diha kaninyo sa ngalan ni Kristo” (Mosiah 5:8) ug pagatawgon nga “mga anak ni Kristo” (Mosiah 5:7). Pipila sa mga katawhan ni Hari Benjamin mga Nephite, ug ang uban mga kaliwat ni Mulek. Gusto ni Hari Benjamin nga ang tanang mga katawhan magkahiusa ubos sa usa ka ngalan sama sa usa ka pamilya.

Samtang magtuon ka sa mga kasulatan karon, pamalandongi ang mga paagi nga posibleng mamahimong mahisama ka sa ilo sa sitwasyon sa ibabaw ug ang Ginoo sama sa bag-ong ginikanan.

Ikonsiderar ang pagdrowing sa mosunod nga tsart diha sa pisara. Mahimo nimong ipares-pares ang mga estudyante ug i-assign ang matag estudyante og usa sa mga kolum.

Mga panalangin sa pagdala ngari kanato sa ngalan sa Manluluwas	Giunsa nako pagdala ang ngalan sa Manluluwas ngari kanako

Hinumdomi nga sa Mosiah 5:1–5, ang mga tawo mipamatuod nga ang Espiritu sa Ginoo mihimo og “usa ka dako nga kausaban” diha kanila ug nga sila “mauyunon sa pagsulod ngadto sa usa ka pakigsaad uban sa … Dios sa pagbuhat sa iyang kabubut-on” (Mosiah 5:2, 5).

Hangyoa ang mga estudyante sa pagbasa og maayo sa Mosiah 5:6–10 ug isulat ang bisan unsa nga ilang makita nga may kalabotan sa ilang kolum. Human sa igong panahon, tugoti ang mga estudyante nga mopaambit sa usag-usa, ug ilakip diha sa pisara ang ilang mga tubag. Mahimong makatabang ang pagpahibalo sa mga estudyante nga ang tuo nga kamot sa Dios nagsugyot og simbolikong pagpabor ug ang wala nga kamot nagsimbolo sa dili pag-uyon.

Kon ang mga estudyante dili natural nga mopaambit sa mga tubag sa mosunod nga mga pangutana, ikonsiderar ang pagpangutana kanila:

• Unsa nga mga panalangin ang imong gusto sa imong kinabuhi nga ang Manluluwas lamang ang makahatag? (Ikonsiderar ang paggamit sa mga hugpong sa mga pulong nga imong naila gikan sa pakigpulong ni Hari Benjamin aron sa pagtubag niini nga pangutana.) Ngano nga gusto nimo kini nga mga panalangin?

• Sa unsang paagi nga ang Manluluwas mahimong sama sa usa ka mahigugmaong ginikanan ngari kanato?

  Mahimo kang mangutana og follow-up nga mga pangutana sama sa “Sa unsang mga paagi nga ang Manluluwas naghimo kanato nga gawasnon?” “Ngano nga mapuslanon ang pagkahibalo nga ‘wala nay lain nga ngalan … diin ang kaluwasan moabot’?”

• Sumala ni Hari Benjamin, sa unsang paagi ang mga tawo nahimong mga anak ni Kristo, o midala diha sa ilang mga kaugalingon sa ngalan ni Jesukristo?

Giunsa nato pagdala ang ngalan ni Kristo

Usa ka kamatuoran nga atong makat-onan gikan ni Hari Benjamin mao nga samtang kita mohimo ug motuman sa sagradong mga pakigsaad, kita mahimong mga anak ni Kristo ug modala diha sa atong kaugalingon sa Iyang ngalan.

Basaha ang mosunod nga pamahayag ni Presidente Dallin H. Oaks sa Unang Kapangulohan aron sa pagklaro kon giunsa nato pagdala ngari kanato ang ngalan sa Manluluwas.

Nagsunod sa sumbanan sa kasulatan, ang mga tawo nga nabunyagan nagsaksi sa atubangan sa Simbahan “nga sila tinuod nga naghinulsol sa tanan nilang mga sala, ug andam nga modala diha kanila sa ngalan ni Jesukristo, nga adunay determinasyon sa pag-alagad kaniya hangtod sa kataposan.” (D&P 20:37; tan-awa usab ang 2 Ne. 31:13; Moroni 6:3.) Kon kita moambit sa sakramento, atong gibag-o kini nga pakigsaad ug ang tanang ubang mga pakigsaad nga atong gihimo diha sa tubig sa bunyag. (Dallin H. Oaks, “Taking upon Us the Name of Jesus Christ,” Ensign, Mayo 1985, 80)

• Sa unsang paagi nga ang paghimo ug pagtuman sa mga pakigsaad nakapaduol nimo sa Manluluwas?

Aron matabangan ka nga magpadayon sa pagpalawom sa imong pagsabot mahitungod sa pagdala sa ngalan ni Jesukristo, basaha ang Mosiah 5:11–13, 15, mangita og dugang tambag gikan ni Hari Benjamin mahitungod sa pagdala sa ngalan ni Jesukristo diha sa imong kaugalingon.

ChurchofJesusChrist.org

Ikonsiderar ang pagpangutana og follow-up nga pangutana sama sa mosunod: “Unsa sa imong hunahuna ang gipasabot nga ang ngalan ni Kristo nahisulat sa imong kasingkasing?” (tan-awa sa Mosiah 5:11–12). “Unsa nga mga panalangin ang moabot niadtong kinsa nagbaton sa ngalan ni Kristo nga nahisulat diha sa ilang mga kasingkasing?” “Sa unsang paagi nga ang pagdala diha kanimo sa ngalan ni Kristo sa imong inadlaw-adlaw nga mga hunahuna ug mga lihok modasig kanimo nga mahimong mas maayo Niya nga disipulo?”

Paghunahuna og mga ehemplo nga imong nakita sa imong kinabuhi sa mga tawo nga nagdala diha sa ilang mga kaugalingon sa ngalan ni Kristo.

• Unsa ang ilang gibuhat nga nagpakita nga ilang gidala diha sa ilang kaugalingon ang Iyang ngalan?

• Unsa nga tahas ang mahimo sa sakramento sa pagtabang kanato sa pagbuhat niini nga mas maayo?

Ang ngalan ni Jesukristo

Aron matabangan ang mga estudyante sa pagtimbang-timbang kon unsa ka maayo nila pagdala ang ngalan sa Ginoo diha sa ilang kaugalingong kasingkasing, ikonsiderar ang pagdapit kanila sa hilom nga pagpamalandong sa mosunod:

• Unsa ang pipila ka mga paagi nga imong mapakita nga imong gidala diha sa imong kaugalingon ang ngalan ni Kristo?

• Unsa nga mga panalangin ang miabot pinaagi sa pagdala diha sa imong kaugalingon sa ngalan ni Kristo?

Ikonsiderar ang mga hunahuna ug mga impresyon nga imong nadawat gikan sa Espiritu Santo samtang nagtuon ka karon. Hunahunaa kon unsay imong mahimo aron mas hingpit nga madala diha sa imong kaugalingon ang ngalan ni Kristo.

Dasiga ang mga estudyante sa pagbuhat sa unsay ilang gibati nga giaghat nga buhaton. Ikonsiderar ang pagpaambit kon sa unsang paagi ang pagdala sa ngalan ni Kristo diha sa imong kaugalingon nakaimpluwensiya sa imong kinabuhi.

Komentaryo ug Background nga Impormasyon

Unsa ang gipasabot sa pagdala ngari sa atong kaugalingon sa ngalan ni Kristo?

Sa iyang pakigpulong sa “Taking upon Us the Name of Jesus Christ [Pagdala ngari sa Atong Kaugalingon sa Ngalan ni Jesukristo]” (Ensign, Mayo 1985, 80–83), si Presidente Dallin H. Oaks sa Unang Kapangulohan mipasabot sa nagkalain-laing mga kahulugan sa pagdala sa ngalan ni Kristo ngari kanato.

Sa unsang paagi ang pagdala sa Iyang ngalan makaapekto kanato?

Si Presidente Henry B. Eyring sa Unang Kapangulohan mipaambit og pipila ka mga butang nga atong mahimo aron sa pagpakita nga atong gidala diha sa atong mga kaugalingon ang ngalan sa Manluluwas.

Misaad kita sa pagdala sa Iyang ngalan ngari kanato. Nagpasabot kana nga kinahanglan kita nga mokonsiderar sa atong mga kaugalingon sama Kaniya. Ato Siyang unahon diha sa atong mga kinabuhi. Kita gusto sa unsay Iyang gusto kay sa unsay atong gusto o unsay gitudlo sa kalibotan nga atong gustohon. (Henry B. Eyring, “Paghiusa,” Liahona, Sept. 2008, 5)

Unsa ang gipasabot sa pagkaandam sa pagdala ngari kanato sa ngalan ni Jesukristo?

Si Presidente Henry B. Eyring sa Unang Kapangulohan mitudlo:

Naghunahuna ko unsay ipasabut sa pagkaandam nga modala diha kanato sa ngalan ni Jesukristo.

Si Presidente Dallin H. Oaks mipasabot: “Mahinungdanon nga kon moambit kita sa sakramento dili kita mosaksi nga kita nagdala diha kanato sa ngalan ni Jesukristo. Mosaksi kita nga kita andam sa pagbuhat niana. (Tan-awa sa D&P 20:77.) Ang katinuod nga magsaksi lamang kita sa atong kaandam nagsugyot nga dunay laing butang nga kinahanglan gayud nga mahitabo sa dili pa kita modala nianang sagrado nga ngalan ngari kanato sa pinakamahinungdanong paagi” [Dallin H. Oaks, “Taking upon Us the Name of Jesus Christ,” Ensign, Mayo 1985, 81].

Ang pamahayag nga kita “andam nga modala diha [kanato]” sa Iyang ngalan nag-ingon kanato nga samtang una natong gidala ang ngalan sa Manluluwas dihang gibunyagan kita, ang pagdala sa Iyang ngalan wala matapos diha sa bunyag. Padayon pa kitang maningkamot sa pagdala sa Iyang ngalan sa tibuok natong kinabuhi, lakip sa higayon nga magbag-o kita sa atong mga pakigsaad sa pag-ambit sa sakramento ug makigsaad diha sa balaang mga templo sa Ginoo. (Henry B. Eyring, “Sulayi, Sulayi, Sulayi,” Liahona, Nob. 2018, 91)

Dugang nga mga Kalihokan sa Pagkat-on

Usa ka alternatibo nga pagsugod

Ikonsiderar ang pagdapit sa mga estudyante sa pagtubag sa mosunod nga mga pangutana nga magkapares o sa ginagmay nga mga grupo:

• Ngano nga ang mga tawo magbutang sa ilang mga ngalan sa mga butang sama sa mga buluhaton sa eskwelahan, mga jersey sa paugnat sa kusog, ug uban pa?

• Unsa ang pipila ka mga rason nga kita magsul-ob og sinina nga adunay piho nga mga ngalan o logo niini?

• Ngano kaha nga gusto natong mahibaloan sa uban nga kita kabahin sa pipila ka mga grupo o mga organisasyon?

Dapita ang mga estudyante sa pagpamalandong sa mosunod:

• Unsa sa imong hunahuna ang gipasabot sa pagdala sa ngalan sa Manluluwas diha sa imong kaugalingon?

• Sa unsang paagi nga ang pagbaton sa ngalan sa Manluluwas diha kanimo usa ka panalangin?

• Unsa ang imong gibati mahitungod sa uban nga nahibalo nga imong gidala ang ngalan sa Manluluwas diha sa imong kaugalingon?

Ang mga estudyante makapamalandong niini nga mga pangutana samtang magtuon sila niini nga leksiyon.

Modala diha sa imong kaugalingon sa ngalan ni Kristo

ChurchofJesusChrist.org

“Pag-awhag kanila sa paghinumdom sa panumpa nga ilang gihimo”

Hangyoa ang mga estudyante sa pagbasa sa Mosiah 6:1–3, mangita kon unsay gibuhat ni Hari Benjamin sa wala pa niya palakwa ang pundok sa katawhan. Pangutan-a ang mga estudyante sa mosunod nga mga pangutana.

• Ngano kaha nga gusto ni Hari Benjamin nga isulat ang mga ngalan sa tanan nga mihimo sa pakigsaad?

• Ngano nga si Hari Benjamin mitudlo og mga pari taliwala sa mga katawhan?

• Unsa ang atong mabuhat aron sa pagpahinumdom sa atong mga kaugalingon sa atong matag adlaw nga kinabuhi sa mga pakigsaad nga atong gihimo?

• Sa unsang paagi ang mga sakop sa korum o klase makatabang sa usag usa sa paghinumdom sa ilang mga pakigsaad?