Mosiah 5:1–5

Wala Nay Tinguha sa Pagbuhat og Dautan

Hari Benjamin namulong sa iyang katawhan

Usahay, bation tingali nato ang panginahanglan sa paghimog mga kausaban o pagpauswag sa usa ka butang nga atong gibuhat. Ang katawhan ni Hari Benjamin mibati niini nga paagi human maminaw kaniya nga namulong mahitungod ni Jesukristo ug kon gikan sa unsa kita Niya giluwassa. Kini nga leksiyon makatabang kanimo nga madugangan ang imong tinguha nga mag-usab o magpadayon sa pag-usab uban sa tabang sa Ginoo.

Pagbuhat sa mga pagtulun-an sa Manluluwas.Si Jesukristo mitudlo sa tinuod nga doktrina ug mga baroganan aron ang atong kinabuhi mausab alang sa kaayohan. Kanunay nga magtinguha og mga kahigayonan sa pagdapit sa mga estudyante sa paghimo og epektibo nga matarong nga binuhatan base sa Iyang mga pagtulun-an. Ang mga buhat mahimong lahi alang sa matag estudyante, apan ang Espiritu Santo makatabang nila sa pag-ila kon unsay ilang mahimo sa pagsunod sa Manluluwas.

Pagpangandam sa estudyante: Ikonsiderar ang pagdapit sa mga estudyante sa paghunahuna kon unsay mga hinungdan nga gusto nilang moduol sa Langitnong Amahan ug ni Jesukristo.

Mga Posibleng Kalihokan sa Pagkat-on

Pagkahimong sama ni Jesukristo

Ikonsiderar ang pagpakita sa mosunod nga mga hulagway o pagdala sa pipila ka mga butang ngadto sa klase kon anaa. Dayon gamita ang mga pangutana sama sa mosunod aron matabangan ang mga estudyante nga makahunahuna kon sa unsang paagi ang mga kausaban sa mga butang mahimong matandi kanato nga nagbag-o ug nahimong mas sama sa Langitnong Amahan ug ni Jesukristo.

ice cubes, tubig, ug alisngaw

karbon [coal]

• Unsa ang mga hinungdan sa kausaban niini nga mga butang?

• Unsa ang mga hinungdan sa kausaban sa mga tawo?

• Sa unsa kaha nga paagi nga ang Ginoo mousab sa atong mga kasingkasing susama o lahi gikan sa unsa nga paagi kini nga mga butang mausab?

Ikonsiderar ang pagpakita sa mosunod nga pamahayag o pagsulat niini diha sa pisara. Dapita ang mga estudyante sa paghunahuna kon unsa ka dako paminaw nila nga ang pamahayag may kalabotan ngadto nila.

• Gusto nako nga tabangan ko sa Ginoo nga mag-usab alang sa kaayohan.

Dapita ang mga estudyante sa pagkonsiderar nganong ingon niini ang ilang gibati. Mahimong maglakip kini sa pagpamalandong sa mga paagi nga ang Ginoo mitabang kanila kaniadto.

Samtang magtuon ka sa Mosiah 5, pangitaa ang mga rason nga mahimo nimong tinguhaon ang pagpangayo og tabang sa Ginoo nga mag-usab ug molambo.

Pagsinati og kausaban sa kasingkasing

Human namulong si Hari Benjamin ngadto sa iyang mga katawhan, gusto niyang mahibaloan kon sila “mituo ba sa mga pulong nga iyang gikapamulong ngadto kanila” (Mosiah 5:1).

Basaha ang Mosiah 5:1–5 aron makita kon giunsa nila pagtubag. Mahimong makatabang ang pagkahibalo nga ang pulong nga hilig nagpasabot sa kalagmitan o gusto sa usa ka tawo, kon unsa ang gikahiligan niya. Mahimo usab nimong tan-awon ang bidyonga “Ang Katawhan ni Hari Benjamin Naghimo og Pakigsaad” gikan sa time code 0:00 hangtod sa 1:37, anaa sa https://www.churchofjesuschrist.org/study/video/mosiah-1-5/2020-03-0150-the-people-of-king-benjamin-make-a-covenant-mosiah-5-1080p?lang=ceb ChurchofJesusChrist.org.

Aron matabangan ang mga estudyante nga mas makasabot niini nga mga bersikulo, mahimo nimong dapiton sila sa pagkopya ug pagkompleto sa mosunod nga tsart diha sa ilang mga journal sa pagtuon. O ang mga estudyante mahimong mobasa sa mga bersikulo ug markahan kon unsay ilang makit-an sa ilang mga kasulatan. Pananglitan, mahimong linginan sa mga estudyante ang mga pulong ug hugpong sa mga pulong nga nagpakita kon sa unsang paagi nausab ang mga tawo ug linyahan ang mga pulong ug hugpong sa mga pulong nga nagpakita kon unsay hinungdan nga nausab ang mga tawo.

Giunsa pag-usab sa mga tawo	Unsa ang hinungdan sa pag-usab sa mga tawo
Giunsa pag-usab sa mga tawo	Unsa ang hinungdan sa pag-usab sa mga tawo

Mahimo nimong dapiton ang mga estudyante sa pagpaambit sa unsay ilang nakaplagan. Dapita ang mga estudyante sa pag-summarize sa mga baroganan nga ilang nakat-onan. Ang mosunod nga kalihokan maoy usa ka paagi nga mahimo nila kini.

Base sa Mosiah 5:1–5, kompletoha ang mosunod nga hugpong sa mga pulong.

Samtang ang among mga kasingkasing nausab pinaagi sa Espiritu sa Ginoo, kami …

Ang mga estudyante mahimong mokompleto sa pamahayag sa nagkadaiyang mga paagi. Ang pipila ka posible nga mga paagi naglakip sa, Samtang ang among mga kasingkasing nausab pinaagi sa Espiritu sa Ginoo, kami …

• mawad-an sa tinguha sa pagbuhat og dautan ug makaangkon og tinguha sa pagbuhat og maayo sa kanunay.

• mobati og kalipay.

• andam nga mosulod ngadto sa mga pakigsaad sa pagsunod sa mga sugo.

Tingali makatabang ang pagdapit sa mga estudyante sa paglista sa mga baroganan diha sa pisara ug sa pagrekord niini diha sa ilang mga kasulatan. Gamita ang pipila o ang tanan sa mosunod nga mga pangutana aron matabangan ang mga estudyante nga makasabot ug makapamalandong sa kamahinungdanon sa mga kamatuoran nga ilang nailhan.

Importante nga masabtan nga bisan og ang mga katawhan ni Hari Benjamin “wala nay hilig [o gusto] sa pagbuhat og dautan” (Mosiah 5:2), wala kini nagpasabot nga wala na sila nakasala pag-usab. Hinoon, giusab sa Ginoo ang ilang mga kasingkasing sa sinsero nga pagtinguha sa pagbuhat og maayo ug sa paglikay sa sala.

• Kanus-a ka, sama sa katawhan ni Hari Benjamin, adunay dakong tinguha sa “pagbuhat og maayo sa kanunay”? Unsay nakatabang nimo nga mobati niini nga paagi?

• Ngano sa imong hunahuna nga daghan kanato ang dili mobati niini sa tanang panahon?

• Unsa sa imong hunahuna ang mahimo sa usa ka tawo aron mobati og ingon niini sa kanunay?

Pagsabot sa kausaban

Ikonsiderar ang pagmarka sa Mosiah 5:3 ang hugpong sa mga pulong nga “pinaagi sa walay kinutuban nga kaayo sa Dios.” Aron tinuod nga masabtan ang kausaban nga nahitabo sa mga katawhan ni Hari Benjamin, kinahanglan natong masabtan kon sa unsang paagi si Jesukristo makatabang nato nga magbag-o.

Si Sister Wendy W. Nelson mipasabot:

Ikonsiderar ang pagpakita sa mosunod nga pamahayag ug dapita ang mga estudyante sa pagpangita sa mga pulong o hugpong sa mga pulong nga nakapadani nila.

Sister Wendy W. Nelson

Ang Manluluwas mao ang kinatas-an ug bugtong tinuod ug buhi nga ahente sa kausaban. Siya ang tinubdan sa tanang kausaban. … Siya makapagawas sa labing maayo gikan kaninyo, samtang kamo modangop ngadto Kaniya. Luwason gayod Niya ang tanan nga labing maayo sa imong kahiladman. …

… Siya naghigugma kaninyo. Ganahan Siya sa inyong mga paningkamot sa kausaban.

Ang Iyang tinguha mao nga kamo nga mag-usab, sa paglabay sa panahon, hingpit nga isalikway ang kinaiyanhon nga tawo, nga makabaton og kausaban sa kasingkasing, kausaban sa kinaiya. Gibuhat ni Jesus nga Kristo ang tanan nga Iyang gibuhat aron ikaw mahimong mag-usab! Siya ang inyong Manluluwas ug akong Manluluwas!

Ug samtang kita aktibo, makanunayon nga nangamuyo alang sa gahom sa Iyang walay kinutuban ug maulaong sakripisyo nga magamit sa atong mga kinabuhi, ang Iyang kataposang pagkaayo magdala sa matag usa sa atong mga kinabuhi sa kataposang kausaban nga atong gitinguha pag-ayo. (Wendy W. Nelson, “Change: It’s Always a Possibility!” [Debosyonal sa Brigham Young University, Abril 7, 1998], 10, speeches.byu.edu)

• Sumala ni Sister Nelson, unsa ang mabuhat ni Jesukristo aron matabangan kita nga mag-usab?

• Unsa ang imong nakat-onan mahitungod sa imong papel sa pag-usab?

Dapita ang mga estudyante sa paghunahuna og usa ka tawo nga ilang nailhan nga nausab uban sa tabang ni Jesukristo. ChurchofJesusChrist.org Mahimong makatabang usab ang pagpaambit bahin sa usa ka tawo nga imong nailhan nga nausab.

Dayon pangutana sa mga estudyante sama sa mosunod:

• Giunsa pagtabang sa Ginoo kini nga tawo?

• Unsa nga kaugalingon nga mga paningkamot ang gihimo niini nga tawo aron mausab?

• Ngano sa imong hunahuna nga kini nga mga kausaban nagdala ngadto sa mas dakong kalipay?

Paghimo sa kausaban nga permanente

Aron tapuson ang imong pagtuon, hunahunaa ang imong kinabuhi ug ang imong kasamtangan nga pag-uswag ngadto sa pagkahimong sama sa Langitnong Amahan ug ni Jesukristo. Pamalandongi kon unsay imong gibati nga gusto sa Espiritu Santo nga imong buhaton isip resulta sa imong nakat-onan ug gibati.

Ipaambit ang imong pagpamatuod nga ang Ginoo, pinaagi sa Iyang Espiritu, motabang sa mga estudyante nga mausab ug mahimong mas sama sa Langitnong Amahan ug ni Jesukristo.

Komentaryo ug Background nga Impormasyon

Ang kausaban ba sa kasingkasing ug tinguha diha-diha dayon o nagkinahanglan ba kini og panahon?

Si Bradley R. Wilcox sa Kinatibuk-ang Kapangulohan sa Young Men miingon:

Brother Bradley R. Wilcox

Ang pagpahilayo gikan sa sala ug ang pagka “wala nay hilig sa pagbuhat og daotan, apan sa pagbuhat og maayo sa kanunay” [Mosiah 5:2] mga tinguha sa tibuok kinabuhi.

Ang kinabuhi sama sa usa ka layo kaayo nga biyahe libot sa tibuok nasod. Kita dili makaabot sa atong destinasyon sa usa lang ka tangke nga gasolina. Kita kinahanglan nga magbalik-balik og pagtubil. Ang pag-ambit sa sakramento sama sa paghunong sa gasolinahan. Samtang kita maghinulsol ug mobag-o sa atong mga pakigsaad, kita mosaad sa atong kaandam sa paghupot sa mga sugo, ug ang Dios ug si Kristo mopanalangin kanato sa Balaang Espiritu. Buot ipasabot, kita mosaad nga magpadayon sa unahan sa atong panaw, ug ang Dios ug si Kristo nagsaad sa pagtubil sa atong tangke. (Bradley R. Wilcox, “Ang Pagkatakos Dili ang Pagkawalay Tatsa,” Liahona, Nob. 2021, 62)

Si Sister Becky Craven sa Kinatibuk-ang Kapangulohan sa Young Women mitudlo:

Sister Becky Craven

Ang mga kasulatan wala mag-ingon nga sila [mga katawhan ni Hari Benjamin] diha dayon nahimo nga hingpit, hinoon, ang ilang tinguha sa pag-usab mipugos kanila sa paglihok. Ang ilang kausaban sa kasingkasing nagpasabut sa pagsalikway sa kinaiyanhon nga pagkalalaki o pagkababaye ug motahan ngadto sa Espiritu samtang naningkamot nga mahimong mas mahisama ni Jesukristo. …

Hiusahon ang atong mga paningkamot uban sa abilidad sa Manluluwas sa pag-usab kanato, kita mahimong bag-ong mga binuhat. (Becky Craven, “Imo na ang Sukli,” Liahona, Nob. 2020, 58)

Unsa ang tahas sa Espiritu Santo sa pagtabang kanato nga mausab?

Si Brother Brian K. Ashton, kanhi Kinatibuk-ang Kapangulohan sa Sunday School, mipasabot:

Brother Brian K. Ashton

Ang proseso sa pagbalaan dili lang molimpyo kanato, apan naghatag usab kanato sa gikinahanglan nga espirituhanong mga gasa o balaanong mga kinaiya sa Manluluwas ug mousab sa ato mismong kinaiya, maingon “nga kita wala nay hilig sa pagbuhat og dautan.” [Mosiah 5:2]. Matag higayon nga atong madawat ang Espiritu Santo sa atong kinabuhi pinaagi sa hugot nga pagtuo, paghinulsol, mga ordinansa, Kristohanong pagserbisyo, ug uban nga matarung nga mga paningkamot, kita mausab hangtod sa hinay-hinay, anam-anam kita mahimong sama kang Kristo. (Brian K. Ashton, “Ang Doktrina ni Kristo,” Liahona, Nob. 2016, 108)

Dugang nga mga Kalihokan sa Pagkat-on

Posible ang kausaban pinaagi sa tabang sa Ginoo ug sa atong paningkamot

Kon gitinguha, ang mga estudyante mahimong mogahin og dugang nga panahon sa pagsuhid sa ilang kaugalingong mga paningkamot sa pag-usab ug sa unsang paagi ang Ginoo motabang kanato nga mag-usab. Mahimo kang maghimo og tsart diha sa pisara ug butangan og label ang usa ka kilid nga Ang Tabang sa Ginoo ug ang pikas nga bahin Ang Atong Paningkamot. Ang mga estudyante mahimong mopaambit og mga ideya ubos sa matag ulohan.

Mahimong ilista sa mga estudyante ang “mga pagbati sa paglaum,” “determinasyon,” o “kalig-on sa pagsulay pag-usab” ubos sa “Ang Tabang sa Ginoo.”

Mahimo nilang ilista ang “pag-ampo,” “sakripisyo,” o “paglikay sa daotan” ubos sa “Ang Atong Paningkamot.”

Ang Balaang Espiritu ug kausaban

Mahimong makatabang ang pagpahinumdom sa mga estudyante sa papel sa Espiritu Santo sa pagtabang kanato nga mag-usab. Dapita ang mga estudyante sa pagrebyo sa Mosiah 3:19, mangita kon unsay gitudlo ni Hari Benjamin mahitungod sa Balaang Espiritu ug sa Iyang tahas sa pagtabang kanato nga mausab. Mahimong itandi sa mga estudyante kini nga bersikulo kon giunsa pagtubag sa mga tawo diha sa Mosiah 5:2–3 ug unsay ilang gisulti mahitungod sa Espiritu sa Ginoo. Mahimo nimong pangutan-on ang mga estudyante kon sa unsang paagi ang Espiritu Santo nakatabang nila nga mausab. Seguroha nga pasidan-an sila nga dili ipaambit ang bisan unsa nga personal ra kaayo o pribado.

Rebyoha ang importante nga mga kamatuoran gikan sa wali ni Hari Benjamin

Dapita ang mga estudyante sa pagbasa o pagrebyo sa Mosiah 5:1–5, mangita sa kamahinungdanon sa pagtuo sa mga pagtulun-an sa mga propeta ug sa ubang mga lider sa Simbahan. Tabangi ang mga estudyante sa paghunahuna mahitungod sa mga kamatuoran nga ilang nakat-onan gikan sa dinasig nga mga lider nga makadugang sa ilang tinguha sa pagbuhat og maayo ug sa pagsunod sa Manluluwas. Dapita ang mga estudyante sa paggahin og pipila ka minuto sa pagrebyo sa mga kamatuoran nga ilang nakat-onan gikan sa pakigpulong ni Hari Benjamin sa Mosiah 1–4. Mahimo silang mangita sa mga kamatuoran nga ilang gibati nga makapaduol nila sa Ginoo ug makadapit Kaniya sa pag-usab sa ilang kasingkasing. Mahimo dayon nilang tubagon ang mosunod nga mga pangutana:

• Unsa ang labing menos duha ka kamatuoran nga imong nakaplagan?

• Sa unsa nga paagi ka makapakita og hugot nga pagtuo niini nga mga kamatuoran?

• Samtang nagpakita ka og hugot nga pagtuo niini nga mga kamatuoran, sa unsang paagi kaha ang Ginoo makausab sa imong mga tinguha ug makatabang kanimo nga mobati og dugang nga kalipay?