Mosiah 7–8

Ang mga Propeta sa Ginoo isip mga Manalagna

Sama nga ang Manluluwas adunay mga titulo nga nagtudlo kanato mahitungod Kaniya, ang mga sulugoon sa Ginoo adunay mga titulo nga makatabang kanato nga makasabot sa ilang mga tahas sa plano sa Langitnong Amahan. Sa dihang si Hari Limhi nangayo og tabang sa usa ka buluhaton nga wala niya mahibaloi kon unsaon sa paghuman, usa ka tawo nga ginganlan og Ammon mitudlo kaniya ngadto sa propeta. Gipasabot usab ni Ammon ngadto sa hari ang importante nga mga kamatuoran mahitungod sa tahas sa mga propeta, mga manalagna, ug mga tigpadayag. Kini nga leksiyon makatabang nimo nga masabtan ang kamahinungdanon sa mga propeta nga mga manalagna usab sa plano sa Langitnong Amahan.

Paghatag og pagpamatuod sa buhi nga mga propeta.Pagtinguha og mga kahigayonan sa pagpaambit sa imong pagsaksi sa mga pulong sa buhing mga propeta. Si Elder Dean M. Davies (1951–2021) sa Seventy mitudlo, “Ang pagpaminaw ug pagpatalinghog sa buhi nga mga propeta adunay talagsaon, gani makapausab nga mga epekto sa atong kinabuhi. Kita malig-on. Kita mas segurado ug makasalig diha sa Ginoo. Kita makadungog sa pulong sa Ginoo” (“Dali, Paminaw sa Tingog sa usa ka Propeta,” Liahona, Nob. 2018, 36).

Pagpangandam sa estudyante: Ikonsiderar ang pagdapit sa mga estudyante sa paghunahuna kon unsaon nila sa pagtubag kon adunay mangutana kanila nganong mituo sila sa mga propeta.

Mga Posibleng Kalihokan sa Pagkat-on

Mga pangutana mahitungod sa mga propeta

Ikonsiderar ang pagdapit sa mga estudyante nga i-role-play ang pagtubag sa unang tulo sa mosunod nga mga pangutana. Mahimo usab nilang tubagon ang ikaupat kon komportable sila sa pagbuhat niini.

Handurawa nga ang usa ka tawo nga imong kaila nakahibalo nga ikaw nagtuo sa modernong mga propeta. Moduol sila kanimo ug mangutana sa mosunod:

• Nakadungog ko nga ang inyong simbahan adunay propeta. Unsa ang iyang gibuhat?

• Nganong nagkinahanglan pa man kita og propeta karon?

• Nakabasa ko sa online nga mihubad si Joseph Smith og karaan nga libro. Aduna bay laing karaan o modernong mga propeta nga nakahimo niana?

• Unsay imong gituohan mahitungod sa mga propeta?

Mahimong makatabang ang pagpangutana sa mga estudyante kon aduna ba silay mga pangutana mahitungod sa mga propeta. Ikonsiderar ang pagsulat sa ilang mga pangutana diha sa pisara.

Ang Basahon ni Mormon naglangkob og daghang mga pagtulun-an mahitungod sa mga propeta, lakip kon giunsa sila sa paggamit sa Langitnong Amahan sa pagtabang kanato. Samtang magtuon ka, pamalandonga ang mga pangutana sa ibabaw ug tinguhaa ang paglig-on sa imong pagpamatuod sa mga propeta. Pangitaa usab ang mga tubag sa dugang nga mga pangutana nga aduna ka bahin sa mga propeta.

Tulo ka mga panaw

Ikonsiderar ang pagpakita sa mosunod nga paghulagway ug pagpasabot sa mosunod nga impormasyon. (Mahimo nimong kopyahon ang hulagway ngadto sa pisara ug ibilin kini didto alang sa pakisayran [reference] atol sa sunod nga pipila ka mga klase.) O mahimo nimong ihatag sa mga estudyante ang mga pakisayran sa mosunod nga duha ka mga parapo ug dapita sila sa pagbasa sa mga tudling ug pagsummarize sa unsay ilang nakat-onan.

Sa dihang ang amahan ni Hari Benjamin (Mosiah) mao ang hari, usa ka tawo nga ginganlan og Zeniff ang mibiya sa Zarahemla uban sa usa ka grupo sa mga tawo aron sa pagbawi sa yuta sa Nephi (tan-awa sa Mosiah 9:3–4). Ang grupo ni Zeniff wala na igdungog sulod sa daghang katuigan, mao nga ang sunod nga hari, si Mosiah (anak ni Hari Benjamin), mipadala og grupo nga gipangulohan ni Ammon aron sa pagpangita kanila (tan-awa sa Mosiah 7:1–3). Ilang nakaplagan ang mga katawhan ni Zeniff, kinsa gipangulohan sa apo ni Zeniff, si Hari Limhi. Ang katawhan ni Limhi naulipon sa mga Lamanite “tungod sa [ilang] mga kadautan” (Mosiah 7:20).

Si Hari Limhi misulti kang Ammon nga siya mipadala og usa ka grupo sa tigpangita aron sa pagpangita sa Zarahemla, apan wala sila magmalamposon. Nakadala hinoon sila pagbalik og mga relikyas gikan sa yuta paingon sa amihanan, lakip ang usa ka talaan nga gisulat sa 24 ka bulawan nga mga palid (tan-awa sa Mosiah 8:7–9). Si Hari Limhi naglaom nga si Ammon makahubad sa rekord o nakaila og tawo nga makahimo sa paghubad (tan-awa sa Mosiah 8:6, 11–12).

Basaha ang Mosiah 8:13–14, mangita kon kinsa ang giingon ni Ammon nga makahubad sa rekord ug ngano.

• Unsa man ang imong napalgan?

Mahimong makatabang ang pagkahibalo nga sila si Mosiah ug Joseph Smith adunay espesyal nga mga instrumento nga gitawag og Urim ug Thummim nga giandam sa Dios aron sa pagtabang kanila sa paghubad sa karaang mga rekord. (Tan-awa sa Mosiah 28:13–14; Joseph Smith—Kasaysayan 1:35. Kon gusto nimong mahibalo og dugang, pangitaa ang “Urim ug Thummim” sa Giya ngadto sa mga Kasulatan .)

Ang tahas sa usa ka manalagna

Basaha ang Mosiah 8:15–18 aron makat-on unsa ang mga manalagna ug nganong ang usa ka mahigugmaong Langitnong Amahan mihatag og mga manalagna alang kanato.

• Unsay imong nakat-onan?

Tingali makatabang ang paghangyo sa mga estudyante nga moduol diha sa pisara ug mosulat og daghang kamatuoran kutob sa ilang mapalgan. Kon ang mga estudyante mosulat og pamahayag nga dili kaayo husto, tabangi sila sa pag-adjust sa pamahayag aron mahimo kining tinuod. Ang pagbuhat sa ingon makatabang sa mga estudyante sa pagrebyo sa ilang kaugalingon nga mga obserbasyon ug pagklaro sa ilang nakat-onan. Usa ka kamatuoran nga gihulagway niini nga asoy mao nga ang Ginoo naghatag og mga propeta, mga manalagna, ug mga tigpadayag aron makahatag og kaayohan sa katawhan. Mahimo nimong dapiton ang mga estudyante sa pagmarka sa mga pulong o hugpong sa mga pulong nga nagtudlo niini nga kamatuoran o isulat kini nga kamatuoran duol sa mga bersikulo nga nagtudlo niini.

Ang Giya ngadto sa mga Kasulatan nagpasabot sa tahas sa usa ka manalagna sama sa mosunod:

Usa ka tawo nga gihatagan og katungod sa Dios sa pagkakita uban sa espirituhanong mga mata sa mga butang nga gitago sa Dios gikan sa kalibotan (Moises 6:35–38). Siya usa ka tigpadayag ug usa ka propeta (Mosiah 8:13–16). Diha sa Basahon ni Mormon, si Ammon mitudlo nga usa lamang ka manalagna ang makagamit og espesyal nga mga tighubad, o usa ka Urim ug Thummim (Mosiah 8:13; 28:16). Ang usa ka manalagna nasayud sa nangagi, karon, ug sa umaabot. Sa karaan, ang usa ka propeta sa kanunay gitawag nga usa ka manalagna (1 Sam. 9:9; 2 Sam. 24:11).

Si Joseph Smith mao ang bantogang manalagna sa ulahing mga adlaw (D&P 21:1; 135:3). Dugang pa, ang Unang Kapangulohan ug ang Konseho sa Napulog Duha gipaluyohan isip mga propeta, mga manalagna, ug mga tigpadayag. (Giya ngadto sa mga Kasulatan, “Manalagna,” scriptures.ChurchofJesusChrist.org)

• Unsa ang imong nakat-onan mahitungod sa tahas sa propeta isip usa ka manalagna?

• Ngano sa imong hunahuna nga ang Langitnong Amahan mohatag niini nga mga abilidad ngadto sa Unang Kapangulohan ug sa Korum sa Napulog Duha ka Apostoles?

• Sa unsang paagi nga ang mga propeta, mga manalagna, ug mga tigpadayag ebidensiya sa gugma sa Dios alang kanimo?

Ang bili sa mga manalagna sa atong panahon

Unsa nga kalihokan sa pagkat-on ang makatabang sa imong mga estudyante sa pagpalawom sa ilang pagtuo nga ang Unang Kapangulohan ug ang Korum sa Napulog Duha ka Apostoles mga propeta, mga manalagna, ug mga tigpadayag? Ang mosunod maoy pipila ka mga ideya. Pagpili og usa o labaw pa, o paghimo og imong kaugalingong mga ideya. Ang mga estudyante mahimong mobuhat nga magtinagsa o may kapares.

• Paghunahuna og labing menos tulo ka mga sitwasyon diin ang pagkahibalo nga ang mga propeta sa Langitnong Amahan mga manalagna nga makatabang kanimo nga magpabiling matinud-anon sa Ginoo. Irekord kini nga mga sitwasyon.

• Pagtuon og bag-ohay lang nga pakigpulong sa kinatibuk-ang komperensiya gikan sa usa ka sakop sa Unang Kapangulohan o sa Korum sa Napulog Duha ka Apostoles. Pagrekord og mga ehemplo nga naghulagway nga sila mga manalagna.

• Dapita ang mga estudyante sa pagbasa sa “Mensahe gikan sa Unang Kapangulohan,” makita sa atubangan sa Alang sa Kalig-on sa mga Kabatan-onan nga booklet (2022, 2). Irekord kon sa unsang paagi sa imong hunahuna kini nga mensahe ug ang mga sumbanan nga gilakip niini nga pamphlet nagpakita nga ang mga miyembro sa Unang Kapangulohan mga manalagna.

• Irekord ang mga kaayohan nga nasinati nimo o sa imong pamilya gikan sa pagsunod sa mga manalagna.

Dapita ang mga estudyante sa pagpaambit unsay ilang gitun-an ug giandam.

Mahimong makatabang ang pagkahibalo nga gihubad ni Hari Mosiah ang mga rekord (tan-awa sa Mosiah 28:11–19). Makabasa ka og bahin niadto nga mga rekord kon magtuon ka sa basahon ni Ether.

Bisan sa wala pa mahubad ang mga rekord, si Hari Limhi naimpluwensiyahan sa kahibalo nga si Hari Mosiah makahubad. Basaha ang Mosiah 8:19–20, mangita kon unsay reaksiyon ni Hari Limhi sa dihang iyang nahibaloan nga ang Dios nagtawag og mga propeta, mga manalagna, ug mga tigpadayag.

• Sa unsang paagi nga ang pagbaton niini nga kahibalo nakaapekto kang Limhi?

Pamalandongi kon unsay imong gibati mahitungod sa Langitnong Amahan nga naghatag og mga propeta, mga manalagna, ug mga tigpadayag sa paggiya kanato karon. Mahimo nimong irekord ang imong mga hunahuna diha sa imong journal sa pagtuon.

Ipaambit ang imong pagpamatuod sa kamahinungdanon sa mga propeta ug giunsa nila pagpanalangin ang imong kinabuhi.

Komentaryo ug Background nga Impormasyon

Giunsa ni Joseph Smith paghubad ang Basahon ni Mormon?

ChurchofJesusChrist.org

Unsa ang gibuhat sa mga propeta alang kanato?

Si Elder Neil L. Andersen sa Korum sa Napulog Duha ka Apostoles mipasabot:

Ang labing importante nga tahas sa propeta sa Ginoo mao ang pagtudlo kanato bahin sa Manluluwas ug ang paggiya kanato ngadto Kaniya. …

Ang propeta usa ka magbalantay sa tore, nga manalipod kanato gikan sa espiritwal nga mga kakuyaw nga mahimong dili nato makita. …

… Alang niadtong makugihong nagtinguha og kinabuhing dayon, ang tingog sa propeta nagdala og espiritwal nga kaluwasan sa gubot kaayo nga panahon. …

Ang propeta dili tigpataliwala ninyo ug sa Manluluwas. Hinoon, mobarog siya tupad kaninyo ug motudlo sa dalan paingon sa Manluluwas. Ang labing mahinungdanon nga responsibilidad ug labing bililhon nga gasa sa propeta ngari kanato mao ang iyang tinuod nga pagsaksi, ang iyang sigurado nga kahibalo, nga si Jesus mao ang Kristo. Sama ni Pedro sa karaan, ang atong propeta namahayag, “[Siya] mao ang Kristo, ang Anak sa Dios nga buhi” [Mateo 16:16].

Sa umaabot nga adlaw, nga magtan-aw og balik sa atong pagkamortal, magmaya kita nga nakalakaw kita dinhi sa yuta sa panahon sa usa ka buhi nga propeta. (Neil L. Andersen, “Ang Propeta sa Dios,” Liahona, Mayo 2018, 25–27)

Dugang nga mga Kalihokan sa Pagkat-on

Pagpaluyo sa mga manalagna sa Ginoo

Aron matabangan ang mga estudyante nga makakita nga ang Unang Kapangulohan ug Korum sa Napulog Duha ka Apostoles mga propeta, mga manalagna, ug mga tigpadayag, ikonsiderar ang pagpakita sa bahin sa pinakabag-o nga kinatibuk-ang komperensiya sa dihang gipaluyohan sila. Dapita ang mga estudyante sa pagpaminaw og maayo kon unsa ang atong gipaluyohan kanila. Mahimo nimong dapiton sila sa pagpamalandong kon nakahunahuna ba gayod sila sukad kon unsay gipasabot niana.

Mosiah 8:16. Ang mga manalagna mao ang mga propeta ug mga tigpadayag

Aron matabangan ang mga estudyante nga mahanduraw kon unsay gitudlo ni Ammon kang Hari Limhi, mahimo nimong ikonsiderar ang pagdrowing og dako nga lingin diha sa pisara nga nagrepresentar sa usa ka manalagna. Mahimo dayon kang magdrowing og duha ka gagmay nga mga lingin sulod niini nga lingin, nga magbutang og sulat sa usa ka lingin nga “propeta” ug ang lain “tigpadayag.”

Pag-ila sa lainlaing mga baroganan sa Mosiah 7

Human ma-outline ang mga panaw gamit ang paghulagway sa leksiyon, dapita ang mga estudyante sa pagbasa sa Mosiah 7:26–33, mangita sa lain-laing mga kamatuoran nga ilang magamit sa ilang kinabuhi. Pipila sa mga kamatuoran nga tingali ilang makit-an naglakip sa ang pagsalikway sa mga propeta sa Ginoo modala ngadto sa kasakit ug pagkabihag (tan-awa sa Mosiah 7:26–32), ang mga saad sa Ginoo matuman (tan-awa sa Mosiah 7:32), ug kon kita modangop ngadto sa Ginoo, Siya makaluwas kanato gikan sa pagkaulipon (tan-awa sa Mosiah 7:33). Dapita ang mga estudyante sa pagpaambit sa mga kamatuoran nga ilang napalgan ug sa unsang paagi paminaw nila ang mga kamatuoran makatabang sa uban nga mosalig ni Jesukristo. Samtang magpadayon sila sa pagtuon sa Basahon ni Mormon, ilang makita kon sa unsang paagi natuman ang saad ni Ammon Mosiah 7:33.

Dapita ang uban sa pagtan-aw ngadto ni Jesukristo

Human makit-an ni Ammon ug sa iyang mga tawo si Hari Limhi, gidapit ni Limhi ang iyang katawhan sa pagbutang sa ilang pagsalig diha ni Jesukristo (tan-awa sa Mosiah 7:19), kinsa mao ang Dios ni Abraham, Isaac, ug Jacob (tan-awa sa 1 Nephi 19:10). Dapita ang mga estudyante sa pagbasa sa Mosiah 7:19 aron makakita og mga ehemplo sa mga tawo kinsa mibutang sa ilang pagsalig sa Dios. Dayon dapita sila sa pag-ila sa ubang mga ehemplo diha sa mga kasulatan ug sa ilang kaugalingong kinabuhi diin ang Dios nagluwas sa Iyang mga anak. Mahimong mangita dayon ang mga estudyante og mga paagi sa pagdasig sa uban nga mosalig sa Dios.