Mosiah 25–28

Kinatibuk-ang Pagpasabot

Isip halangdon nga pari [high priest] sa Simbahan sa Manluluwas, si Alma nakadawat og instruksiyon gikan sa Ginoo sa pagtabang niadtong kinsa nakahimo og bug-at nga mga sala. Siya ug si Hari Mosiah parehong nahibalo sa kasakit sa pagtan-aw sa mga sakop sa pamilya nga misukol batok sa Manluluwas. Pinaagi sa kaluoy ni Kristo, sila sa kataposan napanalanginan nga mobati sa kalipay nga makita kining mga minahal nga naghinulsol. Ang Manluluwas mitabang kang Alma nga Batan-on ug sa anak nga mga lalaki ni Mosiah, kinsa gihulagway nga “ang labing dautan sa mga makasasala” (Mosiah 28:4), nga mausab “ngadto sa usa ka kahimtang sa pagkamatarong” (Mosiah 27:25). Human sa ilang pagkakabig, ang anak nga mga lalaki ni Mosiah miadto aron sa pagsangyaw sa ebanghelyo ngadto sa mga Lamanite.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

Mosiah 26

Katuyoan sa leksiyon: Kini nga leksiyon gituyo aron matabangan ang mga estudyante nga makasabot sa mahigugmaon ug mapasayloon nga kinaiya sa Langitnong Amahan ug ni Jesukristo ug nganong kinahanglan kitang maghinulsol sa atong mga sala.

• Pagpangandam sa estudyante: Dapita ang mga estudyante sa pagpamalandong sa ilang mga pangutana mahitungod sa paghinulsol. Dasiga sila sa pagbasa sa Mosiah 26, mangita sa mga tubag niini nga mga pangutana.

• Handout: “Mga kabalaka mahitungod sa Paghinulsol”

• Sugyot sa pagtudlo pinaagi sa videoconference: Ikonsiderar ang pag-email o pagmensahe sa handout ngadto sa imong mga estudyante sa dili pa ang klase. Kon mopili ka og kabalaka nga tun-an sa tibuok klase, ikonsiderar ang pagdapit sa mga estudyante nga i-type sa chat ang sulat sa kabalaka nga gusto nilang tun-an. Makatabang kini kanimo nga mahibaloan kon unsa ang gusto nga makat-onan sa kadaghanan sa mga estudyante. Kon ang mga estudyante tagsa-tagsa nga mopili og usa ka kabalaka nga tun-an, tugoti sila nga makahuman sa ilang pagtuon, ug dayon ikonsiderar ang pagdapit kanila sa pag-type diha sa chat sa sulat sa kabalaka nga ilang gitun-an. Depende sa mga panginahanglan sa klase, mahimo nimong tawagon ang mga estudyante nga nagtuon sa samang kabalaka aron hisgotan ang ilang nakat-onan sa usag usa. O, alang sa kalainan, mahimo kang mopili og mga estudyante nga nagtuon og lain-lain nga mga kabalaka aron hisgotan ang ilang nakat-onan sa usag usa.

Mosiah 27:1–24

Katuyoan sa leksiyon: Kini nga leksiyon makatabang sa mga estudyante sa pagdiskobre og mga paagi sa pagtabang niadtong misalikway sa mga pagtulun-an ni Jesukristo nga makabalik ngadto Kaniya.

• Pagpangandam sa estudyante: Ikonsiderar ang pagdapit sa mga estudyante sa pagpangandam sa pagpaambit og mga istorya gikan sa mga kasulatan diin ang Ginoo mitabang sa usa ka tawo nga nahisalaag o masupilon nga mag-usab.

• Video: “Si Alma nga Batan-on Nakabig ngadto sa Ginoo” (11:32; tan-awa gikan sa time code 3:06 hangtod sa 6:59)

• Sugyot sa pagtudlo pinaagi sa videoconference: Sa hapit na ang kataposan sa leksiyon, aron matabangan ang mga estudyante nga magtuon sa pagpuasa o paghatag og pagpamatuod, ikonsiderar ang paggrupo kanila sa mga breakout room. Siguroha nga ipakita ang mga instruksiyon sa pagtuon sa bisan hain nga hilisgotan, pagtakda og limitasyon sa oras (pananglitan, unom ka minuto), ug pahibaloa ang mga estudyante nga ilang ipaambit ang ilang nakat-onan kon sila mag-uban pagbalik isip usa ka klase.

Mosiah 27:24–37

Katuyoan sa leksiyon: Kini nga leksiyon makatabang sa mga estudyante sa paghinulsol ug pagpakita og hugot nga pagtuo nga ang Manluluwas makausab sa ilang mga kasingkasing.

• Pagpangandam sa estudyante: Ikonsiderar ang pagdapit sa mga estudyante sa paghunahuna og mga butang sa kinaiyahan nga dako og kausaban (sama sa ulod ngadto sa alibangbang). Mahimo silang magkuha og hulagway sa usa ka butang aron ipakita sa klase.

• Mga Hulagway aron ipakita: Usa ka hulagway sa ulod ug alibangbang; usa ka hulagway sa anghel nga nagpakita ngadto kang Alma nga Batan-on; usa ka hulagway ni Jesukristo

• Sugyot sa pagtudlo pinaagi sa videoconference: Ikonsiderar ang pagdapit og usa ka hamtong nga kinabig sa Simbahan sa pagtambong sa klase o sa pagrekord og bidyo diin siya mipaambit kon sa unsang paagi ang Manluluwas mitabang kaniya nga mag-usab. Seguroha nga makakuha og pagtugot gikan sa imong koordinator ug lokal nga lider sa pagkapari sa dili pa dapiton ang tawo sa pagtambong.

Mosiah 28

Katuyoan sa leksiyon: Kini nga leksiyon gituyo aron matabangan ang mga estudyante nga madugangan ang ilang tinguha sa pagpaambit sa ebanghelyo.

• Pagpangandam sa estudyante: Ikonsiderar ang pagdapit sa mga estudyante sa pagpakig-istorya sa usa ka indibidwal nga ilang gituohan nga nakabig pag-ayo sa ebanghelyo ni Jesukristo. Unsa ang nakatabang niana nga indibidwal sa iyang dalan sa pagkakabig? Mahimo usab nimong ikonsiderar ang pagdapit sa mga estudyante sa pagtimbang-timbang sa ilang tinguha sa pagpaambit sa ebanghelyo.

• Butang: Usa ka butang (o usa ka hulagway sa usa ka butang) nga ganahan kaayo ka, nga malipay ka nga ipaambit kini sa uban

• Sugyot sa pagtudlo pinaagi sa videoconference: Sa pagsugod sa leksiyon, ikonsiderar ang pagdala o pagpakita og hulagway sa usa ka butang nga imong ganahan kaayo nga malipay ka nga ipaambit kini sa uban. Ipaambit kini sa mga estudyante una mangutana kanila sa unang pangutana sa leksiyon.

Rebyo 9 sa Doktrinal nga Kahanas

Katuyoan sa leksiyon: Kini nga leksiyon makatabang sa mga estudyante nga makasabot sa doktrina nga gitudlo sa mga tudling sa doktrinal nga kahanas ug makapasabot niini sa uban.

• Pagpangandam sa estudyante: Dapita ang mga estudyante sa pagtambong nga andam sa pagpaambit mahitungod sa usa ka higayon sa dihang ang ilang mga kinabuhi napanalanginan pinaagi sa usa ka tawo nga mipasabot sa mga kasulatan ngadto kanila o sa dihang sila nakahimo sa pagpanalangin sa kinabuhi sa laing tawo pinaagi sa paggamit o pagpasabot sa mga kasulatan.

• Video: “Pagpalawom sa Atong Pagkakabig ngadto kang Jesukristo” (10:05; tan-awa gikan sa time code 6:25 hangtod sa 7:31)

• Sugyot sa pagtudlo pinaagi sa videoconference: Ipakita ang tulo ka mga lakang sa pagsabot ug pagpasabot sa mga kamatuoran gikan sa mga kasulatan. Paandama ang mga estudyante sa pagpaambit og bersikulo sa doktrinal nga kahanas ngadto sa laing tawo gamit kini nga mga lakang. Ikonsiderar ang pagbahin sa mga estudyante ngadto sa mga breakout room aron i-drama-drama ang pagpasabot sa tudling sa doktrinal nga kahanas nga ilang napili.