“Mosiah 28: Personal nga Pagkakabig ug Pagpaambit sa Ebanghelyo,” Manwal sa Magtutudlo sa Basahon ni Mormon (2024)
“Mosiah 28,” Manwal sa Magtutudlo sa Basahon ni Mormon
Mosiah 28
Personal nga Pagkakabig ug Pagpaambit sa Ebanghelyo
Unsa nga mga kasinatian ang imong nasinati sa pagpaambit sa ebanghelyo ni Jesukristo? Human sa ilang pagkakabig, ang anak nga mga lalaki ni Mosiah miduol sa hari alang sa pagtugot sa pagsangyaw sa ebanghelyo ngadto sa mga Lamanite. Si Hari Mosiah nangutana una sa Ginoo, dayon mitugot sa iyang anak nga mga lalaki sa paglakaw aron sila makadala sa pulong sa Dios ngadto sa mga Lamanite (tan-awa sa Mosiah 28:1). Kini nga leksiyon gituyo aron sa pagtabang kanimo nga madugangan ang imong tinguha sa pagpaambit sa ebanghelyo.
Tabangi ang mga tigkat-on nga makakita og kalabotan sa mga kamatuoran sa ebanghelyo.Ang ubang mga estudyante mahimong maglisod sa pagkakita kon sa unsang paagi ang ebanghelyo may kalabotan sa ilang matag adlaw nga kinabuhi. Mainampoong magtinguha og mga paagi aron sa pagtabang kanila nga mobati nga ang unsay ilang nakat-onan makahuluganon ug mapuslanon sa ilang personal nga mga kahimtang, mga pangutana, ug mga panginahanglan.
Pagpangandam sa estudyante: Ikonsiderar ang pagdapit sa mga estudyante sa pagpakig-istorya sa usa ka indibidwal nga ilang gituohan nga nakabig pag-ayo sa ebanghelyo ni Jesukristo. Unsa ang nakatabang niana nga indibidwal sa iyang dalan sa pagkakabig? Mahimo usab nimong ikonsiderar ang pagdapit sa mga estudyante sa pagtimbang-timbang sa ilang tinguha sa pagpaambit sa ebanghelyo.
Mga Posibleng Kalihokan sa Pagkat-on
Pagpaambit ug pagkakabig
Ikonsiderar ang pagdala o pagpakita og litrato sa usa ka butang nga imong ganahan pag-ayo nga malipay ka nga ipaambit kini sa uban. Ipakigbahin kini nga butang diha sa mga estudyante sa dili pa mangutana sa sunod nga pangutana.
-
Unsa ang pipila ka mga butang nga imong ganahan pag-ayo nga gusto nimong ipakigbahin kini sa uban?
Si Elder David A. Bednar sa Korum sa Napulog Duha ka Apostoles mitudlo nga dili talagsaon alang kanato ang pagpaambit sa mga butang nga makahuluganon kanato. ChurchofJesusChrist.org
Good Things to Share
Sharing what matters most is not unusual at all. What good things will you share?
Ang pagpakigbahin sa uban sa mga butang nga labing makahuluganon nato o nakatabang nato sagad lang.
Kining sama nga sumbanan makita sa mga butang nga may dakong espirituhanong importansya ug sangpotanan. …
Ang imbitasyon nga among ipaabut ninyo aron makat-on ug masulayan ang among mensahe tungod sa positibong epekto sa ebanghelyo ni Jesukristo sa among kinabuhi. Usahay maulaw o direkta o pursigero mi sa among paningkamot. Ang among yano nga tinguha mao ang pagpakigbahin nganha kaninyo sa kamatuoran nga bililihon para namo. (David A. Bednar, “Dali ug Tan-awa,” Liahona, Nob. 2014, 108, 110)
Gradohi kon unsa ka tinuod ang mosunod nga mga pamahayag alang kanimo sa sukdanan nga 1 ngadto sa 5 (diin ang 1 dili tinuod alang kanimo ug ang 5 tinuod kaayo alang kanimo):
Ikonsiderar ang pagpakita sa mosunod nga mga pamahayag alang sa mga estudyante samtang sila mamalandong ug maghunahuna sa ilang mga kinabuhi.
-
Ang mga kamatuoran mahitungod sa Manluluwas nga si Jesukristo ug sa Iyang ebanghelyo bililhon kaayo kanako.
-
Aduna akoy tinguha sa pagpaambit sa Iyang ebanghelyo ngadto sa uban.
Samtang magtuon ka sa mga kinabuhi ug mga ehemplo sa anak nga mga lalaki ni Mosiah, pamalandongi ang imong tinguha sa pagpaambit sa ebanghelyo sa Manluluwas. Tinguhaa ang pagpadayag aron makahibalo unsa ang sunod nga mga lakang nga gusto sa Ginoo nga imong buhaton aron ang ebanghelyo mahimong mas makahuluganon kanimo ug ang imong tinguha sa pagpaambit sa ebanghelyo molambo.
Ang mga anak nga lalaki ni Mosiah
Hinumdumi nga human sa ilang pagkakabig, ang mga anak nga lalaki ni Hari Mosiah misangyaw sa ebanghelyo sa ilang kaugalingong yuta, nagtinguha sa pagtul-id sa ilang mga sayop (tan-awa sa Mosiah 27:32–37).
Basaha ang Mosiah 28:1–5, mangita sa unsay gitinguha sa mga anak nga lalaki ni Mosiah ug ngano. (Mahimo nimong markahan ang imong napalgan diha sa imong mga kasulatan.)
-
Hain nga mga pulong o mga hugpong sa mga pulong niini nga mga bersikulo ang mipatigbabaw diha kanimo? Unsa ang mga rason sa mga anak nga lalaki ni Mosiah sa pagpaambit sa ebanghelyo ngadto sa mga Lamanite?
Ikonsiderar ang pagdapit og pipila ka mga estudyante sa pagpaambit sa unsay ilang nakaplagan.
-
Ngano kaha nga kini makapadasig nga mga rason sa pagpaambit sa ebanghelyo?
-
Unsa nga mga kamatuoran ang imong nakat-onan gikan niini nga mga bersikulo?
Ang mga estudyante mahimong mopaambit og nagkalain-laing tinuod nga mga baroganan. Kon dili hisgotan sa mga estudyante ang gipabaga pagkasulat nga baroganan sa ubos, ikonsiderar ang pagpangutana sa mosunod: Sa unsang paagi nga ang atong tinguha sa pagpaambit sa ebanghelyo may kalabotan sa atong personal nga pagkakabig? Ngano man?
Usa ka kamatuoran nga atong makat-onan gikan niini nga mga bersikulo mao nga samtang ang atong pagkakabig ngadto sa Ginoo nagkalawom, ang atong tinguha sa pagpaambit sa ebanghelyo molambo.
Si Presidente Dallin H. Oaks sa Unang Kapangulohan mikumpirmar niini nga kamatuoran sa dihang iyang gitudlo ang mosunod:
Ang kakusog sa atong tinguha sa pagpaambit sa ebanghelyo usa ka mahinungdanong timailhan sa giladmon sa atong personal nga pagkakabig (Dallin H. Oaks, “Sharing the Gospel,” Ensign, Nob. 2001, 7).
-
Unsa nga mga kasinatian nga aduna ang anak nga mga lalaki ni Mosiah nga nakatabang kanila nga makabig ngadto ni Jesukristo ug sa Iyang ebanghelyo? (Tan-awa sa Mosiah 27:34–36; 28:4).
Ikonsiderar ang pagpakita sa mosunod nga mga pangutana aron pamalandongan o tubagon sa mga estudyante diha sa ilang mga journal sa pagtuon sa dili pa motubag.
-
Unsa nga mga kasinatian ang nakatabang nimo o niadtong imong nailhan aron mahimong mas makabig ngadto ni Jesukristo ug sa Iyang ebanghelyo?
-
Unsa ang imong gihigugma mahitungod ni Jesukristo ug sa Iyang ebanghelyo nga gusto nimong ipaambit sa uban? (Pananglitan, tingali aduna kay makahuluganon nga mga kasinatian sa pagpasaylo sa Manluluwas, gugma sa Dios, pag-ampo, ug uban pa.)
Bisan kon kita nakabig ngadto sa Ginoo, tingali adunay mga rason nganong ang pagpaambit sa ebanghelyo lisod gihapon.
-
Kon ikaw usa sa anak nga mga lalaki ni Mosiah, unsa kaha ang imong mga kabalaka mahitungod sa pagsangyaw sa ebanghelyo ngadto sa mga Lamanite?
Isip ilang amahan ug isip hari, si Mosiah adunay daghang mga rason nga mabalaka mahitungod sa pagpadala sa iyang anak nga mga lalaki sa pagsangyaw sa ebanghelyo ngadto sa mga Lamanite. Si Hari Mosiah nahadlok dili lamang alang sa kahilwasan [safety] sa iyang anak nga mga lalaki apan lakip na usab nga kon ang iyang anak nga mga lalaki mobiya, wala siyay manununod nga koronahan isip sunod nga hari sa mga Nephite.
Basaha ang Mosiah 28:6–8, mangita kon nganong gitugotan ni Mosiah ang iyang anak nga mga lalaki nga moadto sa ingon ka delikado nga misyon.
-
Unsa nga mga panalangin ang gisaad sa Ginoo kang Mosiah?
Imong sunod nga mga lakang
Paggahin og higayon sa paglista sa mga kabalaka nimo o sa uban mahitungod sa pagpaambit sa ebanghelyo.
Ilista diha sa pisara ang mga tubag sa mga estudyante. Pagdesisyon kon labing maayo ba nga mopili og usa ka kabalaka alang sa tibuok klase nga dungan nga pagatutokan o tugotan ang mga estudyante nga mobuhat nga magtinagsa o sa gagmay nga mga grupo.
Pagpili og usa niini nga mga kabalaka ug pag-ampo alang sa giya samtang magsiksik ka sa mga kasulatan ug mamalandong unsaon pagbuntog niini nga kabalaka. Pananglitan, kon aduna kay usa sa mosunod nga mga kabalaka, mahimo nimong pamalandongan ang mga pangutana ug tun-an ang mga kasulatan nga gilista human sa mga pamahayag.
Ikonsiderar ang pagpakita sa mosunod nga mga pamahayag o pagsulat niini diha sa pisara.
Dili ko segurado nga igo na kong nakabig aron sa pagpaambit sa ebanghelyo.Sa unsang paagi nga ang mga ehemplo sa anak nga mga lalaki ni Mosiah makatabang kanimo? (Tan-awa sa Mosiah 28:1–5.) Samtang magbasa ka sa pipila sa mosunod nga mga bersikulo, pangita og mga paagi nga mas makabig ka: Mga Buhat 3:19; Santiago 5:20; Enos 1:2–5; Mosiah 3:19; 5:2; 27:25; Alma 5:12–14; 22:15–18; 53:10; Helaman 15:7; 3 Nephi 9:20.
Mahadlok ko nga isalikway.Rebyoha sa Mosiah 28:2–4 ang mga rason nga ang anak nga mga lalaki ni Mosiah gustong mopaambit sa ebanghelyo bisan tuod daghan ang naghunahuna nga ang mga Lamanite dili modawat niini. Sa unsang paagi kini nga mga rason makatabang kanimo? Sa unsang paagi kaha ang paghunahuna mahitungod sa unsay nahimo sa Manluluwas alang kanimo (ug mahimo alang sa uban) makatabang kanimo sa pagbuntog sa imong kahadlok?
Wala ako nahimong labing maayo nga ehemplo sa pagsunod sa ebanghelyo.Sa wala pa ang ilang pagkakabig, ang anak nga mga lalaki ni Mosiah misangyaw batok sa ebanghelyo (tan-awa sa Mosiah 27:8–10), apan human sila maghinulsol, nahimo silang pipila sa labing malamposon nga mga misyonaryo sa Basahon ni Mormon (tan-awa sa Alma 17:4). Unsa ang gidasig sa ilang ehemplo diha kanimo nga buhaton? Unsa ang ubang mga ehemplo diha sa mga kasulatan nga imong mahunahunaan nga makatabang?
Dapita ang pipila ka mga estudyante sa pagpaambit sa unsay ilang napalgan ug sa unsang paagi kini makatabang sa kabalaka.
Ikonsiderar ang pagpakita sa mosunod nga mga kapahayag alang sa mga estudyante samtang sila mamalandong ug motubag diha sa ilang mga journal sa pagtuon.
-
“Usa sa labing importante nga mga butang nga akong nakat-onan gikan sa anak nga mga lalaki ni Mosiah mao …”
-
“Usa ka butang nga akong gibati nga gusto sa Ginoo nga akong buhaton sa pagsunod sa ehemplo sa anak nga mga lalaki ni Mosiah mao …”
-
“Aron makahimo og epektibo nga aksiyon niini, mahimo nako …”
Dapita ang mga estudyante sa pagpaambit. Mahimong makatabang ang pagtapos pinaagi sa pagpaambit sa imong pagpamatuod, mga pagbati, ug mga impresyon o pinaagi sa pagdapit og usa o duha ka estudyante sa pagbuhat sa ingon.