Mosiah 27:1–24

“Siya Nag-ampo uban ang Hugot nga Pagtuo Mahitungod Kanimo”

Nahibalo ba ka kon unsa ang bation nga makita ang mga minahal nga nagsalikway sa kamatuoran? Si Alma ug si Hari Mosiah nahibalo sa kasakit sa pagtan-aw sa mga sakop sa pamilya nga misukol batok sa Manluluwas ug sa Iyang Simbahan. Pinaagi sa kaluoy ni Kristo, sila sa kataposan napanalanginan nga mobati sa kalipay nga makita kining mga minahal nga naghinulsol. Kini nga leksiyon makatabang nimo nga makahibalo og mga paagi sa pagtabang niadtong misalikway sa mga pagtulun-an ni Jesukristo sa pagbalik ngadto Kaniya.

Pagdapit sa mga estudyante sa pagsusi sa ilang mga pagbati.Pagpangutana og mga pangutana nga makatabang sa mga estudyante sa pagpamalandong sa espirituhanong mga kasinatian ug paghinumdom kanus-a sila mibati sa katinuod sa usa ka baroganan sa ebanghelyo. Ang paghinumdom niini nga mga pagbati makatabang sa mga estudyante nga magtinguha sa pagsunod sa ebanghelyo ug ibutang kini sa ilang mga kasingkasing. Ipaniguro sa mga estudyante nga OK ra kon wala pa silay mga kasinatian o wala pa sila kabantay og mga kasinatian sa gihatag nga baroganan.

Pagpangandam sa estudyante: Ikonsiderar ang pagdapit sa mga estudyante sa pagpangandam sa pagpaambit og mga istorya gikan sa mga kasulatan diin ang Ginoo mitabang sa usa ka tawo nga nahisalaag o masupilon nga mag-usab.

Mga Posibleng Kalihokan sa Pagkat-on

Adunay paglaom pinaagi ni Kristo

Dapita ang mga estudyante sa hilom nga pagpamalandong sa mosunod:

Aduna bay bisan kinsa nga imong gikabalak-an tungod kay sila espirituhanong naglisod o gani misukol batok sa Dios? Kon mao, hinumdomi kini nga tawo samtang magtuon ka karon. Sa samang paagi, kon ikaw espirituhanong naglisod, mahimo nimong hinumdoman ang imong kaugalingong sitwasyon sa tibuok leksiyon.

Ipakita ang mosunod nga pagsukod sa kaugalingon. Dapita ang mga estudyante sa pagpaambit sa ilang mga hunahuna, lakip ang mga ehemplo gikan sa pagpangandam sa estudyante.

Pamalandongi kon unsa ka tukma ang mosunod nga mga pamahayag nga naghulagway kanimo:

1. Nagtuo ko nga dili pa ulahi ang tanan alang niadtong kinsa espirituhanong naglisod o misukol aron ayohon ni Jesukristo.

2. Nakakita ko og mga ehemplo diha sa mga kasulatan ug sa mga tawo sa akong palibot nga naghatag kanako og paglaum alang sa mga tawo nga espirituhanong naglisod o misukol.

3. Nahibalo ako kon unsa ang akong mahimo aron matabangan ang mga tawo nga espirituhanong naglisod o misukol.

Samtang imong tun-an ang Mosiah 27 karon, pangitaa ang mga rason aron makabaton og paglaom ug unsay imong mabuhat sa pagtabang niadtong kinsa espirituhanong naglisod o misukol.

Pagtabang sa espirituhanong nahisalaag

Basaha ang Mosiah 27:1, 8–10 aron makita kon kinsa ang gikabalak-an ni propeta Alma ug Hari Mosiah.

• Sa unsang paagi kaha sa imong hunahuna nga ang mga pagpili niining batan-ong mga lalaki nakaapekto sa ilang mga ginikanan, mga igsoon, ug mga higala?

Basaha ang Mosiah 27:11–16, 19 aron makita kon unsa ang gibuhat sa Ginoo sa pagtabang kang Alma nga Batan-on sa pag-usab sa iyang kinabuhi ug ngano. Mahimo usab nimong tan-awon ang bidyo nga “Si Alma nga Batan-on Nakabig ngadto sa Ginoo” gikan sa time code 3:06 hangtod sa 6:59.

• Unsa nga mga hugpong sa mga pulong gikan sa mensahe sa anghel sa imong hunahuna ang labing nakaimpluwensiya niining mga batan-ong lalaki?

• Sa unsang paagi kini nga kasinatian makapakita sa gugma ug tinguha sa Dios sa pagluwas niining mga batan-ong lalaki (ingon man usab sa uban nga espirituhanong nahisalaag)?

• Sumala sa Mosiah 27:14, nganong miingon man ang anghel nga miadto siya kang Alma nga Batan-on ug sa anak nga mga lalaki ni Mosiah? (Ikonsiderar ang pagmarka sa tubag niini nga pangutana diha sa imong mga kasulatan.)

Paggahin sa makadiyot sa pagpamalandong kon unsa nga mga baroganan ang imong makat-onan gikan niini nga mga bersikulo.

Dapita ang mga estudyante sa pagpaambit og nagkalain-laing mga baroganan. Ikonsiderar ang pagsulat diha sa pisara sa mga baroganan nga ilang gihisgotan. Kon dili kini masulti sa mga estudyante nga walay tabang, ikonsiderar ang pagsulat sa mosunod nga baroganan diha sa pisara:

Usa ka baroganan nga atong makat-onan mao nga ang pag-ampo nga may dakong hugot nga pagtuo alang niadtong kinsa espirituhanong naglisod o misukol nagdapit sa Ginoo sa pagtabang kanila nga makaabot sa kahibalo sa kamatuoran.

Hinumdomi nga ang Ginoo dili mopatigbabaw sa moral nga kabubut-on niadtong atong giampo. Bisan pa nga gibisitahan sa usa ka anghel, si Alma ug ang anak nga mga lalaki ni Mosiah makagamit gihapon sa ilang kabubut-on sa dili paghinulsol. Bisan og ang Langitnong Amahan dili mopadala og anghel sa atong mga minahal, Siya motubag sa atong mga pag-ampo sa Iyang paagi ug panahon. Makasalig kita Kaniya sa pagtabang. Makakat-on ka og dugang mahitungod sa tahas sa Ginoo sa kausaban ni Alma sa sunod nga leksiyon.

• Unsa kaha sa imong hunahuna ang mga pag-ampo ni Alma nga Elder? Unsa sa imong hunahuna ang gipasabut sa pag-ampo “uban ang hugot nga pagtuo” (Mosiah 27:14)?

  Kini ang ubang posible nga follow-up nga mga pangutana: Ngano sa imong hunahuna nga kita makabaton og hugot nga pagtuo nga ang Ginoo mobuhat sa labing maayo alang niadtong kinsa naglisod? Nganong maayo man nga mag-ampo nga unta sila “madala ngadto sa kasayoran sa kamatuoran” (Mosiah 27:14)?

• Ngano sa imong hunahuna nga ang Ginoo gusto nga kita mag-ampo alang niadtong kinsa espirituhanong nanlimbasug o misukol?

  Pagdasig og mga boluntaryo sa pagpaambit og mga kasinatian agig tubag sa mosunod nga mga pangutana. Mahimo ka usab mopaambit og personal nga kasinatian.

• Kanus-a nimo gibati nga ang imong mga pag-ampo nakahimo og kalainan sa kinabuhi sa uban? Kanus-a sa imong hunahuna ang pag-ampo sa uban nakatabang kanimo?

Pamalandongi ang piho nga mga butang nga mahimo nimong iampo kon mangayo sa Langitnong Amahan sa pagtabang sa usa ka tawo nga espirituhanong naglisod. Mahimo gani nimong ihunong ang imong pagtuon aron iampo sila karon.

Unsa pa may akong mahimo?

Ikonsiderar ang pagpares sa mga estudyante, nga ang matag pares nagtuon sa usa sa mosunod nga mga tudling sa kasulatan. Dapita sila sa pagpaambit sa usag usa unsay ilang nakat-onan.

Basaha ang mosunod nga mga tudling sa kasulatan, mangita kon unsay gibuhat ni Alma ug sa uban, agi og dugang sa pag-ampo, sa pagtabang sa iyang anak nga lalaki nga makabalik ngadto sa Ginoo.

Mosiah 27:20–24

Alma 36:17–19 (Ang paghulagway ni Alma nga Batan-on sa unsay gitudlo sa iyang amahan ug sa unsang paagi kini nakatabang kaniya)

• Unsa ang gibuhat ni Alma, agi og dugang sa pag-ampo, sa pagtabang sa iyang anak nga lalaki?

Ikonsiderar ang pagtugot sa managpares sa pagpili kon hain sa mosunod ang gusto nilang tun-an nga magkauban.

Tun-i ang usa sa mosunod nga mga butang nga gibuhat ni Alma ug irekord ang imong mga hunahuna. Samtang magtuon ka, mahimo nimong hinumdoman ang usa ka minahal nga espirituhanong naglisod o gani misukol:

1. Pagpuasa—Pagkat-on og dugang mahitungod sa pagpuasa pinaagi sa pagsearch sa https://www.churchofjesuschrist.org/study/handbooks-and-callings?lang=ceb ChurchofJesusChrist.org, ang Gospel Library app, ang Giya ngadto sa mga Kasulatan, o ubang mga tudling sa kasulatan sama sa Marcos 9:17–18, 25–29. Sa unsang paagi ang pagpuasa makatabang kanimo o sa imong minahal? Aduna bay uban nga mahimo nimong dapiton sa pag-apil kanimo sa pagpuasa?

2. Pagpamatuod—Itandi ang kasinatian ni Alma nga gihulagway sa Alma 36:17–19 ngadto sa kasinatian ni Enos sa Enos 1:1–5. Pamalandongi ang abilidad sa Espiritu Santo sa pagpahinumdom sa mga tawo sa unsay ilang nadungog sa higayon nga gikinahanglan nila kini (tan-awa sa Juan 14:26). Makahatag kini kanato og kaisog sa pakigbahin sa atong pagpamatuod ni Kristo bisan niadtong ingon og dili maminaw. Makatabang usab kini kanato sa paghinumdom sa unsay atong nahibaloan ug gituohan mahitungod sa Manluluwas sa higayon nga gikinahanglan nato kini pag-ayo. Unsaon kaha nimo pagpaambit ang imong pagpamatuod sa Manluluwas?

Dapita ang managpares sa pagpaambit sa klase sa unsay ilang nakat-onan ug sa pagpaambit og mga kasinatian nga ilang nasinati sa pagpuasa o uban sa Espiritu Santo nga nagpahinumdom kanila sa mga butang sa higayon nga gikinahanglan nila kini.

Ikonsiderar ang pagpakita sa mosunod nga mga pangutana ug paghatag og panahon sa mga estudyante sa pagtubag diha sa ilang mga journal sa pagtuon.

• Unsay imong nakat-onan gikan niini nga asoy kon unsaon pagtabang niadtong espirituhanong naglisod?

• Unsa nga tambag ang imong ipakigbahin sa usa ka tawo kansang minahal dili dayon mausab?

• Unsa ang tahas sa Manluluwas sa pagtabang niadtong atong minahal? Ngano nga makasalig ka Kaniya sa pagtabang kanila?

• Unsa nga piho nga mga butang ang imong gibati nga naaghat nga buhaton o isulti aron matabangan ang usa ka tawo nga makabalik sa Manluluwas?

Komentaryo ug Background nga Impormasyon

Unsa ang gibati sa Langitnong Amahan mahitungod niadtong kinsa nahisalaag o misukol?

Si Elder Jeffrey R. Holland sa Korum sa Napulog Duha ka Apostoles mitudlo:

Ang malumo nga imahe sa [ang mausikon nga anak nga lalaki] nabalaka, matinud-anong amahan niining batang lalaki nga nagdagan aron sa pagsugat kaniya ug paghalok kaniya maoy usa sa labing makatandog ug makalolooy nga talan-awon nga anaa sa mga kasulatan. Nagsulti kini sa matag anak sa Dios, badlungon o dili, kon unsa ka gusto sa Dios nga mahibalik kita sa proteksiyon sa Iyang mga bukton. (Jeffrey R. Holland, “The Other Prodigal,” Ensign, Mayo 2002, 62)

Ngano nga ang kausaban sa akong minahal (o sa akong kaugalingon) dugay kaayo itandi sa kasinatian ni Alma nga Batan-on?

Si Presidente Ezra Taft Benson (1899–1994) mipasabot:

Ang mga kasulatan nagrekord og talagsaong mga istorya sa mga tawo kinsang mga kinabuhi mahinuklugong nausab, dihadiha, sama ni: Alma nga Batan-on, Pablo diha sa dalan paingon sa Damascus, Enos nag-ampo hangtod sa lawom sa kagabhion, Hari Lamoni. Ang ingon nga makahibulong nga mga ehemplo sa gahom sa pag-usab bisan niadtong naumol sa sala naghatag og pagsalig nga ang Pag-ula makakab-ot bisan niadtong labing nailadman sa pagkawalay paglaom.

Apan kita kinahanglan gayod nga magmatngon samtang kita maghisgot niining talagsaong mga ehemplo. Bisan tuod kini mga tinuod ug gamhanan, kini dili sagad kay sa kasagarang hitabo. Kay sa matag Pablo, matag Enos, ug matag Hari Lamoni, adunay gatosan ug liboan ka mga tawo kinsa nakakaplag sa proseso sa paghinulsol nga mas hinay, mas hapit dili maila. Matag adlaw nagkaduol sila sa Ginoo, wala kaayo makaamgo nga sila nagtukod og diosnong kinabuhi. Sila nagpakabuhi sa kamaayo, pagserbisyo, ug pasalig. (Ezra Taft Benson, “A Mighty Change of Heart,” Ensign, Okt. 1989, 5)

Unsa nga mga panalangin ang moabot pinaagi sa pagpuasa?

Si Elder Shayne M. Bowen sa Seventy mitudlo:

Unsa kaha kon adunay paagi sa pagbuntog sa atong mga kinaiya, mga pagkaadik, ug mga palas-anon? Unsa kaha kon adunay paagi nga makaangkon og igong pagsalig sa Ginoo nga imong matawag ang mga gahom sa langit? Unsa kaha kon adunay mga baroganan nga imong matudlo sa imong mga minahal nga, kon ipadapat, magtugot kanila sa pagbuntog sa personal nga mga kahuyangan ug mas masuod ngadto sa Dios?

Samtang kita sakto nga makasabot ug mosunod sa balaod sa puasa, kining gitinguha nga mga panalangin maato. (Shayne M. Bowen, “Fasting with Power,” Ensign, Abr. 2009, 64)

Dugang nga mga Kalihokan sa Pagkat-on

Ang gahom ug katungod sa Dios

Usa ka anghel ang gipadala ngadto kang Alma nga Batan-on agig bahin aron sa “pagdani [kaniya] sa gahom ug pagtugot sa Dios” (Mosiah 27:14). Adunay daghan pang mga paagi sa pag-ila sa gahom ug katungod sa Dios. Ang uban tingali mobati niini pinaagi sa pagkakita sa Iyang mga gilalang, ang uban pinaagi sa gitubag nga mga pag-ampo. Dapita ang mga estudyante sa pagpaambit og mga paagi nga ilang nailhan ang gahom ug katungod sa Dios.

Pagpuasa

Dapita ang mga estudyante sa pagpaambit sa unsay ilang nahibaloan mahitungod sa pagpuasa ug unsa nga mga panalangin ang ilang nasinati pinaagi sa pagpuasa. ChurchofJesusChrist.org

Mga anghel sa Dios

Si Elder Jeffrey R. Holland sa Korum sa Napulog Duha ka Apostoles mitudlo: “Ako magpamatuod sa mga anghel, langitnon man o mortal. … Anaa ang mga anghel kinsa moabot ug molakaw libot kanato, makita ug dili makita, nailhan ug wala mailhi, mortal ug imortal” (“Ang Pagpangalagad sa mga Anghel,” Liahona, Nob. 2008, 31).

Bisan og usa ka anghel gikan sa langit mipakita aron sa pagtabang kang Alma nga Batan-on, ang Dios sa kasagaran mopadala sa Iyang mortal nga mga sulugoon sa pagbuhat sa Iyang buhat. Sa usa ka diwa, kining mortal nga mga mensahero sa Dios mahimong isipon nga mga anghel. Dapita ang mga estudyante sa pagpaambit kon kinsa ang gipadala sa Dios aron sa pagpanalangin, pagkorihir, paghupay, o paghatag og mga mensahe ngadto kanila. Mahimo usab nimong ipaambit ang usa ka personal nga kasinatian sa usa ka tawo nga sama sa usa ka anghel sa imong kinabuhi o tubag sa usa ka pag-ampo nga imong gihalad o gihalad sa uban.