Rebyo 9 sa Doktrinal nga Kahanas: Pagsabot ug Pagpasabot sa mga Kamatuoran
“Rebyo 9 sa Doktrinal nga Kahanas: Pagsabot ug Pagpasabot sa mga Kamatuoran,” Manwal sa Magtutudlo sa Basahon ni Mormon (2024)
“Rebyo 9 sa Doktrinal nga Kahanas,” Manwal sa Magtutudlo sa Basahon ni Mormon
Rebyo 9 sa Doktrinal nga Kahanas
Pagsabot ug Pagpasabot sa mga Kamatuoran
Imahe
batan-on nga nagpasabot sa mga kamatuoran sa ebanghelyo ngadto sa uban
Ang mga tudling sa doktrinal nga kahanas adunay importante nga mga kamatuoran mahitungod ni Jesukristo ug sa Iyang ebanghelyo. Kini nga leksiyon makatabang nimo nga masabtan ang doktrina nga gitudlo diha sa mga tudling sa doktrinal nga kahanas ug mapasabot kini sa uban.
Tabangi ang mga tigkat-on nga mapalambo ang abilidad sa paghisgot sa mga pagtuo sa ebanghelyo ngadto sa uban.Ang pagpasabot sa doktrina ug mga baroganan, pagpaambit og mga panabot ug may kalabotan nga mga kasinatian, ug pagpamatuod sa balaanong kamatuoran nagklaro sa pagsabot sa mga estudyante sa doktrina ug mga baroganan sa ebanghelyo ug nagpalambo sa abilidad sa mga estudyante sa pagtudlo sa ebanghelyo ngadto sa uban. Paghatag og kanunay nga mga kahigayonan alang sa mga estudyante sa pagpasabot sa ilang nakat-onan.
Pagpangandam sa estudyante: Dapita ang mga estudyante sa pagtambong nga andam sa pagpaambit mahitungod sa usa ka higayon sa dihang ang ilang mga kinabuhi napanalanginan pinaagi sa usa ka tawo nga mipasabot sa mga kasulatan ngadto kanila o sa dihang sila nakahimo sa pagpanalangin sa kinabuhi sa laing tawo pinaagi sa paggamit o pagpasabot sa mga kasulatan.
Mga Posibleng Kalihokan sa Pagkat-on
Ang usa ka leksiyon sa tudling sa doktrinal nga kahanas mahimong kinahanglan nga itudlo puli niini nga leksiyon sa pagrebyo. Tan-awa ang eskedyul sa pagtudlo nga gihatag sa inyong direktor o koordinitor sa area o rehiyon aron maseguro nga matudlo ang matag leksiyon sa tudling sa doktrinal nga kahanas samtang anaa sa sesyon ang seminary.
Pagpasabot sa mga kamatuoran gikan sa mga kasulatan
Ipakita ang mosunod nga pangutana alang sa mga estudyante ug dapita sila sa pagsulat sa ilang mga tubag diha sa pisara.
Unsa ang pipila ka mga panghitabo nga ang imong abilidad sa pagsabot ug pagpasabot sa mga kasulatan makahimo o nakahimo og kalainan sa kinabuhi sa usa ka tawo?
Si Elder Arnulfo Valenzuela sa Seventy mipaambit og usa ka kasinatian sa dihang nakahimo siya sa pagpanalangin sa uban pinaagi sa klaro nga pagtudlo sa mga kasulatan. Tan-awa ang bidyo sa “Pagpalawom sa Atong Pagkakabig ngadto kang Jesukristo” gikan sa time code 6:25 hangtod sa 7:31, anaa sa https://www.churchofjesuschrist.org/study/general-conference/2021/10/34valenzuela?lang=ceb ChurchofJesusChrist.org, o basaha ang pamahayag sa ubos.
Imahe
Elder Arnulfo Valenzuela
Samtang nangalagad og misyon isip usa ka batan-ong lalaki, nakaobserbar ko nga pinaagi sa among pagtudlo gamit ang mga kasulatan, ang kinabuhi sa daghang mga tawo nausab. Nasayod ako sa gahom niini ug kon unsaon niini pag-usab sa atong kinabuhi. Ang matag tawo nga among natudloan sa gipahiuli nga ebanghelyo talagsaon nga indibidwal nga adunay lain-laing panginahanglan. Ang balaan nga mga kasulatan—oo, ang mga panagna nga nasulat sa balaan nga mga propeta—nakahatag kanila og hugot nga pagtuo diha sa Ginoo ug ngadto sa paghinulsol ug pagkausab sa ilang mga kasingkasing.
Ang mga kasulatan mipuno kanila sa kalipay samtang gidawat nila ang inspirasiyon, direksiyon, kahupayan, kalig-on, ug mga tubag sa ilang mga panginahanglan. Kadaghanan kanila nakahukom sa paghimo og mga kausaban sa ilang kinabuhi ug misugod sa paghupot sa mga sugo sa Dios. (Arnulfo Valenzuela, “Pagpalawom sa Atong Pagkakabig ngadto kang Jesukristo,” Liahona, Nob. 2021, 60)
Ngano sa imong hunahuna nga ang mga kasulatan adunay dako kaayong epekto sa mga tawo nga gitudloan ni Elder Valenzuela?
Ang mga estudyante tingali nagkinahanglan og panahon sa pagpamalandong sa mosunod nga mga pangutana. Mahimong makatabang ang pagpangutana ug dapita ang mga estudyante sa paghunahuna sa ilang mga tubag samtang imong ipaambit ang imong kaugalingong tubag.
Kanus-a ang imong kinabuhi napanalanginan pinaagi sa usa ka tawo nga mipasabot sa mga kasulatan diha kanimo?
Kanus-a ka nakahimo sa pagpanalangin sa uban pinaagi sa pagpasabot sa mga kasulatan ngadto kanila?
Pamalandongi kon sa unsang paagi nimo mapalambo pa ang imong mga abilidad sa pagsabot ug pagpasabot sa mga kasulatan. Hunahunaa kon sa unsang paagi ang pagbuhat sa ingon makatabang nimo nga mahimong mas mahisama sa Manluluwas, kinsa sa kasagaran migamit sa mga kasulatan sa pagtudlo sa uban (tan-awa sa Lucas 24:27; Juan 10:34–36).
Doktrinal nga Kahanas sa Basahon ni Mormon
Ang unang 12 ka tudling sa doktrinal nga kahanas sa Basahon ni Mormon nalista sa ubos. Ikonsiderar ang pagmarka niini nga mga tudling ug sa ilang mahinungdanon nga mga hugpong sa mga pulong sa kasulatan kon wala pa nimo kini mabuhat.
Ipakita ang mosunod nga tsart aron ang mga estudyante makakita niini sa tibuok nga leksiyon.
Unang 12 ka Tudling sa Doktrinal nga Kahanas ug Mahinungdanon nga Hugpong sa mga Pulong
Manwal sa Magtutudlo sa Basahon ni Mormon (2024)
Pakisayran sa Kasulatan
Mahinungdanon nga Hugpong sa mga Pulong sa Kasulatan
Ikonsiderar kon sa unsang paagi ang paggamit sa mosunod nga sumbanan makatabang nimo nga mas makasabot ug makapasabot sa mga kamatuoran gikan sa mga kasulatan.
Ipakita o ihatag sa mga estudyante ang mosunod nga tulo ka lakang nga sumbanan.
Lakang 1: Sabta ang konteksto sa kasulatan ug tinoa kon unsaon kini pagpasabot sa imong kaugalingong mga pulong. Ang konteksto mahimong maglakip kon diin nahitabo ang mga panghitabo ug kinsa ang nakig-istorya ngadto kang kinsa ug ngano. Ang pagbasa sa ulohan sa kapitulo ug pipila ka naglibot nga mga bersikulo makatabang niini nga paningkamot.
Lakang 2: Sabta ang mga kamatuoran nga makita diha sa kasulatan nga igo nga makahimo sa pagpasabot niini. Aron matabangan ka, ikonsiderar ang pagpangutana sa imong kaugalingon sama sa mosunod: Unsa man ang unod nga mga mensahe nga gipaningkamotan nga ipakigbahin sa tagsulat? Unsa ang gitudlo sa tudling mahitungod sa Langitnong Amahan ug ni Jesukristo? Unsaon nako pagsulti ang mga kamatuoran sa yano nga paagi? Unsa ang pipila ka mga sitwasyon diin ang usa ka tawo mahimong makakuha og kaayohan gikan sa pagsabot niini nga mensahe?
Lakang 3: Hunahunaa kon sa unsang paagi ang mga kamatuoran nga imong nahibaloan makatabang sa tawo nga imong gipasabot. Hunahunaa ang ilang mga kahimtang sa kinabuhi ug ang mga problema nga ilang giatubang. Paghimo og mga koneksiyon tali sa mga kamatuoran ug niini nga mga kahimtang ug mga problema.
Pagbansay
Pagpili og usa o duha ka mga tudling sa doktrinal nga kahanas gikan sa tsart sa ibabaw nga gusto nimong mas masabtan o nga imong gibati nga mahimong panalangin kanimo o sa imong kaila. Gamita ang sumbanan nga bag-o lang nimong nakat-onan sa pagsulat kon unsaon nimo kini pagpasabot ngadto sa laing tawo.
Human sa igong panahon sa pagtuon ug pagpangandam, ikonsiderar ang pagdapit sa mga estudyante nga i-role-play ang pagpasabot sa mga kamatuoran sa kasulatan ngadto sa usag usa.
Kon nahuman na nimo, tubaga ang mosunod nga mga pangutana:
Sa unsang paagi nga ang paggamit niini nga sumbanan nakapalawom sa imong pagsabot? Sa unsa nga paagi kini nakatabang kanimo samtang ikaw miandam ug mipasabot sa tudling ngadto sa uban?
Sa unsang paagi nga ang mga kamatuoran nga imong nasabtan ug gipasabot makatabang kanimo sa imong personal nga mga kahimtang?
Sa unsang paagi nga ang mas makanunayong paggamit niini nga sumbanan sa pagsabot ug pagpasabot sa mga kasulatan makatabang kanimo nga mahimong mahisama sa Manluluwas?