Mosiah 27:24–37

“Natawo sa Dios”

Ang paghinulsol ni Alma nga Batan-on ug sa anak nga mga lalaki ni Mosiah makahatag og paglaum ni bisan kinsa nga naghunahuna kon posible ba nga mausab. Ang Manluluwas mitabang niini nga mga batan-ong lalaki , kinsa gihulagway nga “ang labing dautan sa mga makasasala” (Mosiah 28:4), nga mausab “ngadto sa usa ka kahimtang sa pagkamatarong” (Mosiah 27:25). Kini nga leksiyon makatabang kanimo sa paghinulsol ug pagpakita og hugot nga pagtuo nga ang Manluluwas makausab sa imong kasingkasing.

Pagtabang sa mga estudyante nga makaila ni Jesukristo.Samtang ang mga estudyante makaila sa Manluluwas sa ilang kaugalingon, makakat-on sila gikan Kaniya ug tinuyo nga maningkamot nga mahisama Kaniya. Makakat-on sila sa pagdawat sa Iyang pagtabang, paglaum, ug pag-ayo sa tibuok nilang kinabuhi. Mabati nila ang gugma sa Dios.

Pagpangandam sa estudyante: Ikonsiderar ang pagdapit sa mga estudyante sa paghunahuna og mga butang sa kinaiyahan nga dako og kausaban (sama sa ulod ngadto sa alibangbang). Mahimo silang magkuha og hulagway sa usa ka butang aron ipakita sa klase.

Mga Posibleng Kalihokan sa Pagkat-on

Pagka-usab

Dapita ang mga estudyante sa pagpaambit og mga butang sa kinaiyahan nga dako og kausaban, sama sa usa ka bulak nga nahimong bunga o usa ka liso nga nahimong usa ka kahoy. Dayon ipakita kini nga hulagway samtang imong ipangutana ang mosunod nga mga pangutana.

• Sa unsang paagi ang atong espirituhanong pag-uswag ikatandi sa ulod nga nahimong alibangbang?

• Sa unsang paagi gihimo sa Dios nga posible alang kanato nga mausab ug mahimong mahisama Kaniya?

Hunahunaa sa makadiyot ang imong pag-uswag sa pagkahimong mahisama sa Dios. Aduna bay bahin sa imong kaugalingon nga gusto nimong usbon o pauswagon? Unsa nga mga babag ang mahimo nimong atubangon sa paghimo niining gitinguha nga mga pagbag-o?

Karong adlawa tun-an nimo ang usa ka milagrosong kausaban nga gihimo sa Manluluwas sa kinabuhi sa pipila ka mga batan-ong lalaki. Samtang magtuon ka, paminaw sa mga pag-aghat sa Espiritu kon sa unsang paagi ang Manluluwas makatabang usab nimo nga mausab.

Alma nga Batan-on ug ang anak nga mga lalaki ni Mosiah

Ikonsiderar ang pagpakita sa mosunod nga hulagway ug hangyoa ang usa ka estudyante sa pagpahinumdom sa klase sa asoy nga gipakita niini. Gamita lamang ang impormasyon sa mosunod nga parapo kon gikinahanglan.

Hinumdomi nga ang unang bahin sa Mosiah 27 naglangkob og asoy sa pagtubag sa Dios sa mga pag-ampo ni Alma. Ang Dios mipadala og anghel aron sa pagkombinser kang Alma nga Batan-on ug sa anak nga mga lalaki ni Hari Mosiah sa sayop sa ilang mga paagi. Si Alma nga Batan-on dili makasulti o makalihok sulod sa pipila ka mga adlaw human niini nga panghitabo (tan-awa sa Mosiah 27:19, 23). Atol nianang panahona, nasinati niya ang dili mahulagway nga kaguol tungod sa iyang mga sala. Sa dihang siya hingpit nga makasulti pag-usab, iyang gihulagway ang gibuhat sa Ginoo alang kaniya.

Ikonsiderar ang pagdapit og usa ka estudyante sa paghimo sa mosunod diha sa pisara para magamit sa klase sa tibuok leksiyon.

Isulat ang “Ang kausaban posible pinaagi ni Jesukristo” sa ibabaw sa usa ka piraso nga papel. Dayon pagdrowing og duha ka pabarog nga linya aron bahinon ang papel ngadto sa tulo ka patas nga kolum. Butangi og label ang wala nga kolum nga “sa wala pa,” ang tunga nga kolum nga “tahas ni Jesukristo,” ug ang tuo nga kolum “pagkahuman.”

Alang sa mosunod nga pagtuon sa kasulatan, dapita ang katunga sa klase sa pagbasa sa mga bersikulo 8–10 ug ang laing katunga sa pagbasa sa mga bersikulo 32–37. Dayon dapita ang mga estudyante sa pagsulat diha sa pisara kon unsay ilang napalgan.

Basaha ang Mosiah 27:8–10; 28:4 aron sa pagrebyo kon unsa si Alma nga Batan-on ug ang anak nga mga lalaki ni Mosiah sa nahiunang parte sa ilang mga kinabuhi. Isulat ang mga paghulagway kanila diha sa “sa wala pa” nga kolum sa imong papel.

Karon basaha ang Mosiah 27:32–37, ug isulat ang mga paghulagway kon nahimo silang si kinsa diha sa “pagkahuman” nga kolum.

Hunong sa makadiyot aron mamalandong sa kausaban nga imong nakita sa usa ka tawo kinsa naghinulsol nga adunay hugot nga pagtuo sa Manluluwas. (Mahimo gani nga maghunahuna ka sa imong kaugalingon.) Idugang ang mga paghulagway diha sa imong mga kolum kon unsa sila (o ikaw) sa wala pa ug pagkahuman niini nga kausaban.

Dapita ang mga estudyante sa pagduol diha sa pisara ug pagsulat og usa ka butang ubos sa matag kolum aron ipakita ang kausaban nga ilang nakita sa tawo nga ilang gihunahuna.

Basaha ang Mosiah 27:23–26, mangita sa mga hugpong sa mga pulong nga naghulagway sa kausaban nga gikinahanglan aron kita mahimong mahisama sa Manluluwas. Mahimong makatabang nga mahibaloan nga ang pulong kalibutanon (bersikulo 25) mahimong magpasabot nga mahilayon, ug ang hugpong sa mga pulong nga “nahimo nga mga anak nga mga lalaki ug anak nga mga babaye sa [Dios]” (bersikulo 25) nga mahimong magtumong niadtong “makapanunod sa gingharian sa Dios” (bersikulo 26).

Diha sa kolum sa “tahas ni Jesukristo” sa imong papel, pagsulat og mga pulong nga mipatigbabaw kanimo. Paggahin og kadiyot aron pagpamalandong kon unsay gipasabot niini. Kon gikinahanglan, pangitaa ang bisan unsang mga pulong nga gusto nimong mas masabtan diha sa Giya ngadto sa mga Kasulatan.

Ikonsiderar ang paghangyo sa mga estudyante sa pagpaambit sa unsa nga mga hugpong sa mga pulong ang ilang gisulat ug unsay gipasabot niini. Mahimo usab ka nga mangutana kon sa unsang paagi kini maayo nga mga paghulagway sa mga kausaban nga ilang nakita niadtong miduol sa Manluluwas. Pipila sa mga hugpong sa mga pulong nga mahimong makit-an sa mga estudyante naglakip sa mosunod:

• Natubos na sa Ginoo

• Natawo pag-usab

• Natawo sa Dios

• Nausab gikan sa ilang kalibutanon nga kahimtang

• Nahimo nga iyang anak nga mga lalaki ug anak nga mga babaye

• Nahimo nga bag-o nga mga linalang

Usa ka kamatuoran nga gitudlo niini nga mga bersikulo mao ang ang tanang mga katawhan kinahanglang mausab pinaagi sa Pag-ula ni Jesukristo.

Ikonsiderar ang pagbutang og hulagway ni Jesukristo diha sa tunga sa pisara ug ipangutana ang mosunod nga mga pangutana:

• Unsa nga mga hugpong sa mga pulong nga naghulagway sa mga kausaban nga nahimong posible pinaagi ni Jesukristo ang labing makahuluganon kanimo? Ngano man?

• Sa unsang paagi nga ang pagdawat sa kapasayloan sa Manluluwas makapausab kanato?

• Sumala sa bersikulo 24, unsa ang gikinahanglan kanato sa pagdapit sa Manluluwas sa pag-usab kanato?

Ang kausaban usa ka proseso, dili usa ka panghitabo

Si Elder Neil L. Andersen sa Korum sa Napulog Duha ka Apostoles mitudlo:

Samtang alang sa uban ang proseso sa paghinulsol mahimong mahitabo nga kalit kaayo, sama sa nahitabo kang Alma, kini dili sagad kay sa kasagarang hitabo. Kadaghanan kanato molihok sa lakang sa matag lakang, hinay-hinay padulong sa mas dugang nga pagkamaayo, mas tukma sa atong mga pakigsaad, dugang pag-alagad ug pasalig. (Neil L. Andersen, The Divine Gift of Forgiveness [2019], 11)

• Ngano nga ang pamahayag ni Elder Andersen importante nga hinumdoman?

Paggahin og panahon sa paglista og pipila ka mga buhat nga atong mahimo aron sa paghinulsol ug sa hinay-hinay mausab pinaagi sa Ginoo. (Alang sa mga ideya, basaha pag-usab ang pamahayag ni Elder Andersen sa ibabaw ug ikonsiderar ang pagbasa sa pipila sa mosunod nga mga bersikulo: Mosiah 26:29; 27:35; Alma 36:18; 3 Nephi 9:22; Doktrina ug mga Pakigsaad 6:9; 58:42–43).

• Unsa ang atong mahimo aron mobalik ngadto sa Ginoo ug maghinulsol?

• Sa imong hunahuna sa unsang paagi kini nga mga paningkamot makatabang kanato nga inanay nga mausab pinaagi sa Manluluwas?

Ipamatuod nga ang asoy sa Mosiah 27 nagpakita sa gahom ug tinguha sa Manluluwas sa pag-usab ni bisan kinsa nga maghinulsol nga adunay hugot nga pagtuo diha Kaniya.

Dayon dapita ang mga estudyante sa pagkompleto sa mosunod diha sa ilang journal sa pagtuon.

Paggahin og kadiyot sa pagpamalandong kon sa unsang paagi kini nga leksiyon magamit kanimo. Irekord ang imong mga hunahuna mahitungod sa mosunod nga mga pangutana diha sa imong journal sa pagtuon:

1. Unsa ang anam-anam nga mga kausaban nga natabang na sa Manluluwas nga imong nahimo? Unsay imong gibati sa imong mga paningkamot ug sa tabang sa Ginoo?

2. Unsa ang sunod nga lakang nga imong gibati nga gusto sa Ginoo nga imong buhaton aron maghinulsol ug magpadayon sa pag-usab pinaagi Kaniya?

3. Unsa ang mga babag nga mahimo nimong atubangon niini nga proseso, ug unsaon nimo pagdangop ngadto sa Ginoo aron sa pagtabang kanimo sa pagbuntog niini?

Komentaryo ug Background nga Impormasyon

Ngano nga wala ko makakita og milagrosong mga kausaban sama sa kang Alma nga Batan-on sa akong kinabuhi?

Si Elder D. Todd Christofferson sa Korum sa Napulog Duha ka Apostoles mipasabot:

Kamo mangutana, Ngano nga kining dako nga kausaban dili dali dayon mahitabo kanako? Kinahanglang hinumdoman ninyo ang talagsaong mga ehemplo sa katawhan ni Hari Benjamin, ni Alma ug ang uban sa kasulatan ingon lamang niana—talagsaon ug dili kasagaran. Alang sa kadaghanan kanato, ang mga kausaban mas hinayhinay ug mahitabo sa kadugayan. Ang pagkatawo pag-usab, dili sama sa atong pisikal nga pagkatawo, mas usa kini ka proseso kay sa usa ka hitabo. Ug ang pag-apil niana nga proseso mao ang labing importante nga katuyoan sa pagka-mortal.

… Ako mopamatuod nga samtang kamo mopadayon diha sa dalan sa espirituhanon nga pagkatawo pag-usab, ang maulaon nga grasya ni Jesukristo mokuha sa inyong mga sala ug sa lama niadto nga mga sala ninyo, ang mga pagtintal mawad-an sa ilang pagkamadanihon, ug pinaagi ni Kristo kamo mahimong balaan, sama nga Siya ug ang atong Amahan mga balaan. (D. Todd Christofferson, “Natawo Pag-usab,” Liahona, Mayo 2008, 78)

Sanglit ang Dios mahigugmaon kaayo, nganong kinahanglan nga maghinulsol kita ug mag-usab?

Si Elder Jeffrey R. Holland sa Korum sa Napulog Duha ka Apostoles mitudlo:

“Duol kon unsa kamo,” nag-agda nato ang mahigugmaong Amahan, apan midugang siya, “Ayaw pagplano nga magpabilin nga mao ra gihapon kamo.” Mopahiyum kita ug mohinumdom nga ang Dios determinado sa paghimo kanatong labaw pa kay sa atong mahunahuna. (Jeffrey R. Holland, “Mga Awit nga Naawit ug Wala Maawit,” Liahona, Mayo 2017, 51)

Dugang nga mga Kalihokan sa Pagkat-on

Ang paghinulsol ug kausaban nagkinahanglan og panahon ug balik-balik nga paningkamot

Aron matabangan ang mga estudyante nga makasabot nga ang paghinulsol ug kausaban aron mahimong mahisama sa Manluluwas usa ka proseso, dili usa ka panghitabo, ikonsiderar ang pagdapit kanila sa pagbuhat og usa ka butang nga dili hingpit nga mahimo sa unang higayon. Dayon dapita sila sa pagpauswag sa ilang gibuhat sa makadaghang higayon. Pananglitan, hangyoa sila sa pagdrowing og dali sa ilang balay, ug dayon hangyoa sila sa pagdugang og usa ka butang sa ilang drowing o usba ang usa ka butang aron kini mas tukma. Pangutan-a ang mga estudyante kon kapila nila masubli kini nga proseso ug makahimo gihapon sa pagpauswag sa drowing. Dayon ipaambit ang mosunod nga pamahayag ni Elder D. Todd Christofferson sa Korum sa Napulog Duha ka Apostoles, ug hangyoa ang mga estudyante sa pagpaambit kon sa unsang paagi kini may kalabotan sa kausaban nga gisulti ni Alma diha sa Mosiah 27:24–26.

“Aron makasagubang sa dako nga butang, tingali kita kinahanglang magtrabaho niini sa ginagmay, inadlaw nga mga paagi. …

“Ang paglambigit sa bag-o ug maayo nga mga naandang buhaton ngadto sa atong kinaiya o pagbuntog sa dili maayo nga mga naandang buhaton o pagkaadik sa kasagaran nagpasabut nga usa ka paningkamot karon nga pagasundan sa lain pagkaugma ug dayon sa lain, tingali sulod sa daghang mga adlaw, gani mga bulan ug mga tuig. … Apan ato kining mabuhat tungod kay makapangamuyo kita sa Dios … alang sa tabang nga gikinahanglan nato sa matag adlaw” (“Pag-ila sa Kamot sa Dios diha sa Atong Inadlaw nga mga Panalangin,” Liahona, Ene. 2012, 28–29).

Mga pipino ug mga atsara

Aron matabangan ang mga estudyante nga makasabot sa kausaban nga gikinahanglan aron mahimong mahisama sa Manluluwas, ikonsiderar ang pagdapit kanila sa pagbasa sa seksiyon sa “Mga Pipino ug mga Atsara” sa pakigpulong nga “Kinahanglang Matawo Kamo Pag-usab” ni Elder David A. Bednar sa Korum sa Napulog Duha ka Apostoles (Liahona, Mayo 2007, 19). Kini nga ideya mahimong gamiton sa pagsugod sa leksiyon puli sa pagpaambit sa mga butang nga mausab sa kinaiyahan.