Mosaea 25–28

Vaaiga Aoao

I le avea ai ma faitaulaga sili i le Ekalesia a le Faaola, sa maua ai e Alema le faatonuga mai le Alii e fesoasoani ia i latou o e na faia ni agasala matuia. Sa iloa uma e Alema ma le Tupu o Mosaea le lototiga i le vaai atu i tagata o le aiga ua fouvale faasaga i le Faaola. E ala i le alofa mutimutivale o Keriso, na iu ai ina faamanuiaina i laua e lagonaina le olioli o le vaaia o i latou nei e pele ua salamo. Sa fesoasoani le Faaola ia Alema le Itiiti ma atalii o Mosaea, o e sa faamatalaina o “tagata agasala sili ona leaga” (Mosaea 28:4), ina ia suia “i se tulaga o le amiotonu” (Mosaea 27:25). Ina ua uma lo latou liliuga, sa o atu atalii o Mosaea e talai le talalelei ia sa Lamana.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

Mosaea 26

Faamoemoega o le lesona: O lenei lesona ua faamoemoe e fesoasoani i tagata aoga ia malamalama i le natura alofa ma le finagalo faamagalo o le Tama Faalelagi ma Iesu Keriso ma le mafuaaga e tatau ai ona tatou salamo ia tatou agasala.

Sauniuniga a le tagata aoga: Valaaulia tagata aoga e mafaufau i ni a latou fesili o i ai e uiga i le salamo. Uunaia i latou e faitau le Mosaea 26, ma vaavaai mo tali i nei fesili.
Pepa e tufa atu: “Popolega e uiga i le Salamo”
Fautuaga faafaiaoga faavitio: Mafaufau e imeli atu pe lafo i se feau tusitusi le pepa e tufa atu i au tagata aoga a o lei amataina le vasega. Afai o loo e filifilia se popolega mo le vasega atoa e suesue ai, mafaufau e valaaulia tagata aoga e ta i totonu o le talanoaga le tusi o popolega latou te mananao e suesue. O le a fesoasoani lenei mea ia te oe e iloa ai mea e mananao le toatele o tagata aoga e aoao. Afai o filifili taitoatasi e tagata aoga se popolega e suesue, tuu atu ia i latou e faauma a latou suesuega, ona mafaufau lea e valaaulia i latou e ta i totonu o le talanoaga ia le tusi o popolega sa latou suesueina. E faalagolago i manaoga o le vasega, e mafai ona e valaau atu i tagata aoga o e sa suesueina le popolega lava lea e tasi e talanoaina mea sa latou aoaoina i le tasi ma le isi. Pe, mo ni mea eseese, e mafai ona e filifilia ni tagata aoga o e sa suesue i atugaluga eseese e talanoaina mea sa latou aoaoina i le tasi ma le isi.

Mosaea 27:1–24

Faamoemoega o le lesona: O lenei lesona e mafai ona fesoasoani i tagata aoga e iloa ai auala e fesoasoani ai ia i latou o e teena aoaoga a Iesu Keriso ina ia toe foi atu ai ia te Ia.

Sauniuniga a le tagata aoga: Mafaufau e valaaulia tagata aoga e sauni e faasoa mai ni tala mai tusitusiga paia lea na fesoasoani ai le Alii i se tasi na se pe fouvale ina ia suia.
Vitio: “Ua Liua Alema le Itiiti i le Alii” (11:32; matamata mai le faailotaimi 3:06 i le 6:59)
Fautuaga faafaiaoga faavitio: I le taufaaiuiuga o le lesona, ina ia fesoasoani i tagata aoga e suesue a le o le anapogi po o le tuuina atu o le molimau, mafaufau e faavasega i latou i potu e taapeape i ai. Ia mautinoa e faaali atu faatonuga mo le suesueina o autu, seti se taimi faatapulaa (mo se faataitaiga, ono minute), ma faailoa atu i tagata aoga o le a latou faasoa mai mea na latou aoaoina pe a latou toe foi faatasi mai o se vasega.

Mosaea 27:24–37

Faamoemoega o le lesona: O lenei lesona e mafai ona fesoasoani i tagata aoga ia salamo ma faaalia le faatuatua e mafai e le Faaola ona suia o latou loto.

Sauniuniga a le tagata aoga: Mafaufau e valaaulia tagata aoga e mafaufau i mea i le natura e matuai tele lava lona suia (e pei o se ketapila i se lelefua). E mafai ona latou pueina se ata o se mea e faaali atu i le vasega.
Ata e faaali atu: O se ata o se ketapila ma se lelefua; o se ata o le agelu ua faaali atu ia Alema le Itiiti; o se ata o Iesu Keriso
Vitio: “O Le Faamoemoe o le Malamalama o le Atua” (6:46)
Fautuaga faafaiaoga faavitio: Mafaufau e valaaulia se tagata matua ua liliu mai i le Ekalesia e auai i le vasega pe pue se vitio lea latou te faasoa mai ai pe na faapefea ona fesoasoani le Faaola ia i latou e sui. Ia mautinoa e maua mai le faamaoniga mai lau taitai faamaopoopo ma le taitai perisitua i le lotoifale a o lei valaauliaina le tagata e auai ane.

Mosaea 28

Faamoemoega o le lesona: O lenei lesona ua faamoemoe e fesoasoani i tagata aoga ia faateleina lo latou manao e faasoa atu le talalelei.

Sauniuniga a le tagata aoga: Mafaufau e valaaulia tagata aoga e talanoa i se tagata latou te talitonu ua matuai loloto lona liua i le talalelei a Iesu Keriso. O le a se mea na fesoasoani i lena tagata i lona ala o le liuaina? E mafai foi ona e mafaufau e valaaulia tagata aoga e iloilo lo latou naunautai e faasoa atu le talalelei.
Mea faitino: O se mea (po o se ata o se mea) e te fiafia tele i ai, e te fiafia e faasoa atu i isi
Vitio: “O Mea Lelei e Faasoa Atu” (2:21)
Fautuaga faafaiaoga faavitio: Ina ia amata le lesona, mafaufau e aumai i totonu pe faaali atu se ata o se mea e te fiafia tele i ai e te fiafia e faasoa atu i isi. Faasoa atu lenei mea i tagata aoga a o lei fai atu ia i latou le fesili muamua i le lesona.

Atamai i Aoaoga Faavae Iloiloga 9

Faamoemoega o le lesona: O lenei lesona e mafai ona fesoasoani ai i tagata aoga ia malamalama i le aoaoga faavae o loo aoaoina i fuaitau o le atamai i aoaoga faavae ma faamalamalama atu i isi.

Sauniuniga a le tagata aoga: Valaaulia tagata aoga e o mai saunia e faasoa mai e uiga i se taimi na faamanuiaina ai o latou olaga e ala i se tasi na faamatalaina tusitusiga paia ia i latou pe o le taimi foi na mafai ai ona latou faamanuiaina le olaga o se isi tagata e ala i le faaaogaina po o le faamalamalamaina o tusitusiga paia.
Vitio: “Faalolotoina o Lo Tatou Liua ia Iesu Keriso” (10:05; matamata mai le faailotaimi 6:34 i le 7:31)
Fautuaga faafaiaoga faavitio: Faaali atu laasaga e tolu i le malamalama ma le faamalamalamaina o upumoni mai tusitusiga paia. Tuu atu i tagata aoga e sauni e faasoa atu se fuaiupu o le atamai i aoaoga faavae i se isi tagata e faaaoga ai nei laasaga. Mafaufau e vaevae tagata aoga i ni potu e taapeape i ai e faatino ai le faamalamalamaina o le fuaitau o le atamai i aoaoga faavae sa latou filifilia.