Mosaea 27:1–24

“Sa Tatalo Atu o Ia ma le Faatuatua Tele e Uiga ia te Oe”

E te iloa pe faape’i le vaai atu i e pele ua teena le upumoni? Na silafia e Alema ma le Tupu o Mosaea le lototiga i le vaai atu i tagata o aiga ua fouvale i le Faaola ma Lana Ekalesia. E ala i le alofa mutimutivale o Keriso, na iu ai ina faamanuiaina i latou e lagonaina le olioli i le vaaia o e pele ia i latou ua salamo. O lenei lesona e mafai ona fesoasoani ia te oe e iloa ai auala e fesoasoani ai ia i latou o e teena aoaoga a Iesu Keriso ia toe foi atu ai ia te Ia.

Valaauliaina o tagata aoao e sailiili o latou lagona. Fai fesili e fesoasoani ai i tagata aoga e manatunatu i aafiaga faaleagaga ma manatua le taimi na latou lagonaina ai le moni o se mataupu faavae o le talalelei. O le manatuaina o nei lagona e mafai ona fesoasoani i tagata aoga e mananao e ola i le talalelei ma molioo ai i o latou loto. Faamautinoa atu i tagata aoga e le afaina pe afai latou te lei mauaina lava pe iloaina foi ni aafiaga i se mataupu faavae ua tuuina atu.

Sauniuniga a le tagata aoga: Mafaufau e valaaulia tagata aoga e sauni e faasoa mai ni tala mai tusitusiga paia lea na fesoasoani ai le Alii i se tasi na sē pe fouvale ina ia suia.

Gaoioiga e Ono Mafai Ona Aoao Ai

O loo i ai le faamoemoe e ala ia Keriso

Valaaulia tagata aoga e mafaufau loloto le leoa i fesili nei:

O i ai se tasi o loo e popole i ai ona o loo latou tauivi faaleagaga pe tetee foi i le Atua? Afai o lea, ia manatua lenei tagata a o e suesue i le asō. E faapena foi, afai o loo e tauivi faaleagaga, e mafai ona e mafaufau i lou lava tulaga i le gasologa atoa o le lesona.

Faaali atu le iloiloga patino lenei. Valaaulia tagata aoga e faasoa mai o latou manatu, e aofia ai faataitaiga mai le sauniuniga a le tagata aoga.

Mafaufau loloto pe o le a le sa’o o faamatalaga nei e faamatalaina ai oe:

1. Ou te talitonu e le o tuai tele mo i latou o loo tauivi faaleagaga pe fouvale ona faamaloloina e Iesu Keriso.

2. Ua ou vaai i faataitaiga i tusitusiga paia ma i tagata o siomia a’u lea e aumaia ia te au le faamoemoe mo tagata o loo tauivi pe fouvale faaleagaga.

3. Ou te iloa le mea e mafai ona ou faia e fesoasoani ai i tagata o loo tauivi pe tetee faaleagaga.

A o e suesueina le Mosaea 27 i le asō, vaavaai mo mafuaaga e maua ai le faamoemoe ma mea e mafai ona e faia e fesoasoani ai ia i latou o e o tauivi pe tetee faaleagaga.

Fesoasoani i e ua sē faaleagaga

Faitau le Mosaea 27:1, 8–10 e vaai ai po o ai na popole i ai le perofeta o Alema ma le Tupu o Mosaea.

• O le a sou manatu na faapefea ona aafia o latou matua, tei, ma uo i filifiliga a nei alii talavou?

Faitau le Mosaea 27:11–16, 19 e vaai po o le a le mea na faia e le Alii e fesoasoani ai ia Alema le Itiiti e suia lona olaga ma pe aisea. Atonu foi e te manao e matamata le vitio “Ua Liua Alema le Itiiti i le Alii” mai le faailotaimi 3:06 i le 6:59.

• O a fasifuaitau mai le savali a le agelu e te manatu e sili ona aoga i nei alii talavou?

• E mafai faapefea e lenei aafiaga ona faaalia le alofa ma le finagalo o le Atua e laveai ai nei alii talavou (faapea foi ma isi o e ua se faaleagaga)?

• E tusa ai ma le Mosaea 27:14, aisea na fai mai ai le agelu ua sau o ia ia Alema le Itiiti ma atalii o Mosaea? (Mafaufau e faailoga le tali i le fesili lenei i au tusitusiga paia.)

Faaalu sina taimi e mafaufau loloto ai po o a mataupu faavae e mafai ona e aoaoina mai nei fuaiupu.

Valaaulia tagata aoga e faasoa mai ni mataupu faavae eseese. Mafaufau e tusi i luga o le laupapa mataupu faavae latou te ta’ua. Afai e faafaigata i tagata aoga ona lagā, mafaufau e tusi le mataupu faavae lenei i luga o le laupapa:

O se tasi o mataupu faavae e mafai ona tatou aoaoina e faapea, o le tatalo ma le faatuatua tele mo i latou o e o tauivi faaleagaga e valaaulia ai le Alii e fesoasoani ia i latou ia maua se malamalama o le upumoni.

Manatua o le a le faoa lava e le Alii le faitalia tonu a i latou tatou te tatalo i ai. E ui ina sa asia e se agelu, ae sa mafai lava e Alema ma atalii o Mosaea ona faaaoga lo latou faitalia e le salamo ai. E ui atonu e le auina mai e le Tama Faalelagi se agelu i e pele ia i tatou, ae o le a Ia tali mai i a tatou tatalo i Lana ala ma le taimi. E mafai ona tatou faatuatuaina o Ia e fesoasoani mai. O le a e aoao atili e uiga i le matafaioi a le Alii i le suiga o Alema i le lesona e sosoo ai.

• O le a sou manatu pe atonu na faape’i tatalo a Alema le Matua? O le a sou manatu i le uiga o le tatalo “ma le faatuatua tele” (Mosaea 27:14)?

  O nisi nei o fesili tulitatao e ono i ai: Aisea e te manatu ai e mafai ona tatou maua le faatuatua o le a faia e le Alii le mea silisili mo i latou o loo tauivi? Aisea e ono lelei ai le tatalo “ina ia mafai ona aumai o [i latou] i le malamalama o le upumoni” (Mosaea 27:14)?

• Aisea e te manatu ai e finagalo le Alii ia tatou tatalo mo i latou o e o tauivi pe fouvale faaleagaga?

  Uunaia volenitia e faasoa mai ni aafiaga e tali atu ai i fesili nei. E mafai foi ona e faasoa atu se aafiaga patino.

• O anafea na e lagonaina ai o au tatalo ua faia ai se suiga i le olaga o se isi tagata? O anafea e te manatu na fesoasoani ai tatalo a se isi tagata ia te oe?

Mafaufau loloto i mea patino e mafai ona e tatalo ai pe a ole atu i le Tama Faalelagi e fesoasoani i se tasi o loo tauivi faaleagaga. E mafai foi ona e taofia au suesuega ina ia tatalo mo i latou i le taimi nei.

O le a se isi mea e mafai ona ou faia?

Mafaufau e vaevae tagata aoga i ni paga, ma suesue e paga taitasi se tasi o fuaitau o mau nei. Valaaulia i latou e faasoa atu i le tasi ma le isi mea ua latou aoaoina.

Faitau fuaitau o mau nei, vaavaai mo mea na faia e Alema ma isi, e faaopoopo i le tatalo, e fesoasoani ai i lona atalii ia toe foi atu i le Alii.

Mosaea 27:20–24

Alema 36:17–19 (o le faamatalaga mulimuli ane a Alema le Itiiti o mea na aoao atu e lona tama ma le ala na fesoasoani ai ia te ia)

• O le a le mea na faia e Alema, e faaopoopo i le tatalo, e fesoasoani ai i lona atalii?

Mafaufau e faataga ni paga e filifili po o fea o mea nei latou te mananao e suesue faatasi i ai.

Suesue se tasi o mea nei na faia e Alema ma tusifaamaumau ou manatu. A o e suesue, e mafai ona e mafaufau i se tasi e pele o loo tauivi faaleagaga po o fouvale foi:

1. Anapogi—Aoao atili e uiga i le anapogi e ala i le sailiili ChurchofJesusChrist.org, o le polokalama o le Gospel Library, o le Taiala i Tusitusiga Paia, po o isi fuaitau o mau e pei o le Mareko 9:17–18, 25–29. E mafai faapefea ona fesoasoani le anapogi ia te oe po o sē e pele ia te oe? O i ai nisi e mafai ona e valaaulia e faatasi atu ma oe i le anapogi?

2. Molimau atu—Faatusatusa le aafiaga o Alema o loo faamatalaina i le Alema 36:17–19 i le aafiaga o Enosa i le Enosa 1:1–5. Mafaufau loloto i le gafatia e le Agaga Paia ona faamanatu atu i tagata mea sa latou faalogo i ai pe a latou manaomia (tagai Ioane 14:26). O lenei mea e mafai ona tatou maua ai le lototele e faasoa atu a tatou molimau ia Keriso e oo lava ia i latou e foliga mai e le gauai mai. E mafai foi ona fesoasoani tatou te manatua ai mea ua tatou iloa ma talitonu i ai e uiga i le Faaola pe a oo ina o tatou matua manaomia. E ono faapefea ona e faasoa atu lau molimau o le Faaola?

Valaaulia ni paga e faasoa mai i le vasega mea na latou aoaoina ma faasoa mai ni aafiaga na latou maua i le anapogi po o le faamanatu atu foi a le Agaga Paia ia i latou mea pe a latou manaomia.

Mafaufau e faaali atu fesili nei ma tuu atu i tagata aoga se taimi e tali ai i a latou api talaaga mo suesuega.

• O le a se mea na e aoaoina mai lenei tala e uiga i le auala e fesoasoani ai ia i latou o loo tauivi faaleagaga?

• O le a se fautuaga o le a e faasoa atu i se tasi o loo i ai se tasi e pele ia te ia e le vave ona suia?

• O le a le matafaioi a le Faaola i le fesoasoani atu ia i latou tatou te alolofa i ai? Aisea e mafai ai ona e faatuatuaina o Ia e fesoasoani ia i latou?

• O a ni mea patino e te lagona le uunaia e faatino pe fai atu e fesoasoani ai i se tasi e toe foi atu i le Faaola?

Manatu ma Talaaga o Faamatalaga

O a ni lagonfouvale?

Na aoao mai Elder Jeffrey R. Holland o le Korama a Aposetolo e Toasefululua:

O foliga alofa naunautai ma le faamaoni o le tamā [o le atalii faamaimau oa] na tamo’e mai e faafetaia’i ia te ia ma sogi atu ia te ia o se tasi lea o vaaiga pito faamomoiloto ma le agaalofa i totonu o tusitusiga paia uma. O loo ta’u atu ai i fanau uma lava a le Atua, o e amio faaletatau pe leai, le matuai pulunaunau o le Atua ina ia tatou toe foi atu i le puipuiga malu a Ona aao. (Jeffrey R. Holland, “O le Isi Atalii Faama’imau ‘Oa,” Liahona, Me 2002, 62)

Aisea ua umi tele ai le suiga i le ua pele ia te au (po o au) pe a faatusatusa i le aafiaga o Alema le Itiiti?

Na faamalamalama mai e Peresitene Ezra Taft Benson (1899–1994):

Ua faamaumau i tusitusiga paia ni tala maoae e uiga i tagata o e na matua iloga ona liua o latou olaga, i lena lava taimi e pei o: Alema le Itiiti, o Paulo i le ala i Tamaseko, o Enosa na tatalo seia oo i le leva o le po, o le Tupu o Lamonae. O ia faataitaiga ofoofogia o le mana e liua ai, e oo lava i e ua i ai i le loloto o le agasala, e aumaia ai le talitonuga e mafai e le Togiola ona oo atu ia i latou ua matua gotouga i le atuatuvale lava.

Ae ao lava ona tatou faaeteete a o tatou talanoaina nei faataitaiga ofoofogia. E ui e moni ma mamana, ae ua o ni tuusaunoaga nai lo tuutuuga o le tulafono. Mo Paulo uma, mo Enosa uma, ma mo Tupu Lamonae uma lava, ua faitauselau ma faitauafe tagata o e ua iloa le faagasologa o le salamo e sili atu le faaleiloga ma le faalevaaia. O lea aso ma lea aso e latou te faalatalata atu ai i le Alii, ma le faaleiloaina lelei o loo latou fausia se olaga faale-Atua. E ola filemu i latou i ni olaga lelei, auauna atu, ma le tuuto. (Ezra Taft Benson, “A Mighty Change of Heart,” Ensign, Oct. 1989, 5)

O a faamanuiaga e oo mai e ala i le anapogi?

Na aoao mai Elder Shayne M. Bowen o le Fitugafulu:

Ae faapefea pe afai e i ai se auala e faatoilalo ai a tatou mausa, vaisu, ma avega? Ae faapefea pe afai e i ai se auala e maua ai se talitonuga mautu i le Alii e mafai ai ona e toina ifo mana o le lagi? Ae faapefea pe afai e i ai ni mataupu faavae e mafai ona e aoao atu i e pele ia te oe, afai e faaaogaina, o le a mafai ai ona latou faatoilaloina vaivaiga faaletagata lava ia ma faalatalata atili atu ai i le Atua?

A o tatou malamalama lelei ma ola ai i le tulafono o le anapogi, e mafai ona fai mo tatou nei faamanuiaga manaomia. (Shayne M. Bowen, “Fasting with Power,” Ensign, Ape. 2009, 64)

Gaoioiga Faaopoopo e Aoao Ai

O le mana ma le pule a le Atua

Sa auina atu se agelu ia Alema le Itiiti ina ia avea o se mea e “faatalitonu [o ia] i le mana ma le pule a le Atua” (Mosaea 27:14). E tele isi auala e iloa ai le mana ma le pule a le Atua. Atonu e lagona e nisi e ala i le vaaia o Ana foafoaga, a o isi e ala i tatalo na taliina. Valaaulia tagata aoga e faasoa mai ni auala ua latou iloa ai le mana ma le pule a le Atua.

Anapogi

Valaaulia tagata aoga e faasoa mai mea ua latou iloa e uiga i le anapogi ma pe o a faamanuiaga ua latou maua e ala i le anapogi. Afai e manaomia, ina ia fesoasoani i tagata aoga ia malamalama atili po o le a le anapogi ma pe faapefea ona faamanuiaina i tatou ma i latou tatou te anapopogi ai, mafaufau e faaali le vitio “Anapogi: Uarota a Talavou Nofofua Matutua, Amanda” mai le faailotaimi 0:00 i le 1:35. O loo maua lenei vitio i le ChurchofJesusChrist.org.

Agelu a le Atua

Na aoao mai Elder Jeffrey R. Holland o le Korama a Aposetolo e Toasefululua: “Ou te molimau atu e uiga i agelu, o agelu faalelagi ma agelu i la le tino. … E i ai lava agelu i taimi uma e o mai ma siomia i tatou, e vaaia pe le vaaia foi, e iloa pe le iloa foi, i le tino po o le tino ola pea” (“O Le Auaunaga a Agelu,” Liahona, Nov. 2008, 31).

E ui ina sa faaali mai se agelu mai le lagi e fesoasoani ia Alema le Itiiti, ae e masani lava ona auina mai e le Atua Ana auauna faaletino e fai Lana galuega. I se isi itu, o nei avefeau faaletino a le Atua e mafai ona ta’ua o agelu. Valaaulia tagata aoga e faasoa mai po o ai na auina mai e le Atua e faamanuia, faasa’o, faamafanafana, pe tuuina atu savali ia i latou. E mafai foi ona e faasoa atu se aafiaga patino o se tasi sa pei o se agelu i lou olaga po o se tali i se tatalo na faia e oe po o se isi tagata.