Mosaea 26

“Afai e Tautino Mai e Ia Ana Agasala … ma Salamo”

E mafai faapefea e le salamo ona fesoasoani ia i tatou i o tatou olaga i aso taitasi? Aisea e manaomia ai ona ta’uta’u atu a tatou agasala o se vaega o lo tatou salamo? I le avea ai ma faitaulaga sili i le Ekalesia a le Faaola, sa manao Alema e fesoasoani ia i latou o e sa faia ni agasala matuia. Na tuuina atu e le Alii ia te ia le taitaiga manino i le mea e tatau ona ia faia. O lenei lesona ua faamoemoe e fesoasoani ia te oe e malamalama ai i le natura alofa ma le finagalo faamagalo o le Tama Faalelagi ma Iesu Keriso ma pe aisea e tatau ai ona tatou salamo ia tatou agasala.

Alofa ia i latou e te aoaoina. E ala i le mana o le Agaga Paia, e mafai ai ona faatumulia i tatou i le alofa o le Tama Faalelagi ma Iesu Keriso. Tatalo ina ia mafai ona faatumulia oe i lenei alofa mo au tagata aoga ma vaavaai mo avanoa e faaali atu ai lou alofa i auala talafeagai a o e aoao atu.

Sauniuniga a le tagata aoga: Valaaulia tagata aoga e mafaufau i ni a latou fesili o i ai e uiga i le salamo. Uunaia i latou e faitau le Mosaea 26, ma vaavaai mo tali i nei fesili.

Gaoioiga e Ono Mafai Ona Aoao Ai

O le a se mea e te faia?

Manatu faapea na e faalogo o ta’ua e se tasi fesili ma atugaluga nei e uiga i le salamo:

Mafaufau e tusi faamatalaga ma fesili nei i luga o le laupapa a o lei amataina le vasega.

• Ou te le mautinoa pe aoga le salamo.

• Aisea e tatau ai ona ou ta’uta’u atu a’u agasala? Aisea e manaomia ona ta’uta’u atu nisi o agasala i se taitai perisitua?

• Ua tele a’u agasala mo le faamagaloga a le Alii ia te au.

Fesoasoani i tagata aoga e toe manatunatu i o latou lagona e uiga i le salamo. O le gaoioiga lenei o se tasi lea o auala e faia ai lenei mea.

Mafaufau mo sina taimi pe afai e te iloa se tasi e ono fesootai i soo se tasi o nei atugaluga.

• O a nisi fesili po o atugaluga e ono i ai i se tasi e uiga i le salamo?

Mafaufau e faaopoopo i luga o le laupapa soo se fesili po o atugaluga na ta’ua e tagata aoga.

Mafaufau loloto po o le fea o se tasi pe lua o nei fesili po o atugaluga o le a sili ona anoa mo oe e taulai atu i ai a o e suesueina lenei lesona. Saili le taitaiga mai le Tama Faalelagi e fesoasoani ia te oe ia maua tali ma faateleina lou malamalama i le salamo.

Faafitauli i le Ekalesia

Ina ua uma ona laveai e le Alii ia Alema ma ona tagata mai le nofopologa, sa latou auai faatasi ma sa Nifae ma le nuu o Limae i Saraemila. O iina, na tofia ai e le Tupu o Mosaea ia Alema e avea ma taitai o le Ekalesia. O nisi tagata i lalo o le taitaiga a Alema sa faia ni agasala matuia ma e lei salamo ai (tagai Mosaea 26:1–6). Sa aumai i latou i luma o Alema, ae sa tauivi Alema ia iloa pe faapefea ona tali atu.

Faitau le Mosaea 26:13–15, 19–24, 28–31 ma vaavaai mo le taitaiga na tuuina atu e le Alii ia Alema.

Valaaulia ni nai tagata aoga e faasoa mai mea sa latou aoaoina. Afai latou te taua mataupu faavae moni, tusi i luga o le laupapa. Afai e aoga, mafaufau e fai atu nisi po o fesili uma nei:

• O le a le mea na fetalai le Alii e tatau ona faia e tagata ina ia taliaina ma faamagaloina e Ia?

• E tusa ai ma le fuaiupu 23, aisea e agavaa ai le Faaola e fuafua po o ai e mafai ona faamagaloina ma maua le ola e faavavau?

• O le a se isi upumoni e uiga i le Alii na e aoaoina mai nei fuaiupu?

Afai tatou te salamo

Atonu na e faailoa maia mataupu faavae e pei o nei: Afai tatou te ta’uta’u atu a tatou agasala ma salamo faamaoni o tatou loto, o le a faamagaloina i tatou e le Alii. O le a lava le faatele ona tatou salamo, o le a faamagaloina i tatou e le Alii.

• O le a le uiga o le ta’uta’u atu o a tatou agasala?

• O le a sou manatu o le a le uiga o le “[salamo] ma le faamaoni o [lou] loto” (Mosaea 26:29)?

• E faapefea e le iloaina o le natura loto faamagalo o le Alii ona aafia ai ou uiga faaalia i le salamo?

O nei mataupu faavae e mafai ona fesoasoani i fesili ma atugaluga e uiga i le salamo mai le amataga o le lesona.

Mafaufau pe sili atu le taulimaina o atugaluga uma e fa pe taulai atu i se tasi pe lua atonu e sili ona talafeagai i au tagata aoga. E mafai foi ona aoga le vaevae o tagata aoga i ni vaega toalaiti ma tuu i latou e nafa ma le saunia e tali atu i popolega eseese.

E mafai foi ona e valaaulia lou epikopo po o le peresitene o le paranesi o i ai nei e asiasi i le vasega e tali fesili e uiga i le salamo ma le faamagaloga.

Salamo

Tusi Lesona a le Faiaoga o le Tusi a Mamona (2024)—“Mosaea 26: ‘Afai Na te Ta‘uta‘u Atu Ana Agasala … ma Salamo‘”

Popolega A

Ou te le mautinoa pe aoga le salamo.

• O a mau ma mataupu faavae mai le Mosaea 26, po o isi mau, e mafai ona e faasoa atu e ono fesoasoani i lenei atugaluga?

Afai e aoga, mafaufau e valaaulia tagata aoga e iloilo le Mosaea 26:23, 29–30, faapea foi le faitauina o nisi o fuaiupu nei: 2 Nifae 9:23; 3 Nifae 9:22; 3 Nifae 27:19–20; Mataupu Faavae ma Feagaiga 18:10–12; 19:15–20; 58:42–43.

Manatua na faia e Alema lava ia ni agasala matuia i le amataga o lona olaga ma sa salamo ma maua le faamagaloga e ala i le Faaola o Iesu Keriso (tagai Mosaea 11:5–7; 18:1–3; 26:15, 20).

• O le a sou manatu i se mea e ono faasoa atu e Alema i se tasi o i ai lenei atugaluga?

Mafaufau loloto i mea na e oo i ai po o i latou e te iloa ina ua e liliu atu i le Faaola o Iesu Keriso e ala i le salamo.

Popolega E

Aisea e tatau ai ona ou ta’uta’u atu a’u agasala? Aisea e manaomia ona ta’uta’u atu nisi o agasala i se taitai perisitua?

Na ta’u atu e le Alii ia Alema o i latou o e na agasala o le a manaomia ona “ta’uta’u atu ana agasala i ou luma [Alema, lo latou taitai perisitua] ma a’u [o le Alii]” (Mosaea 26:29).

• Talu ai ua uma ona silafia e le Alii a tatou agasala, aisea e taua ai lo tatou ta’uta’u atu o na agasala ia te Ia? O le a faapefea ona faamanuiaina ai o tatou olaga?

O nisi o manatu atonu e aofia ai le fesoasoani ia i tatou e tali atu ai mo a tatou amioga, faateleina lo tatou lotomaualalo, ma faamalosia sootaga patino ma le Alii pe a tatou ole atu ma maua le faamagaloga.

Faitau faamatalaga nei mai le tamaitusi o le Mo le Malosi o le Autalavou ma Elder C. Scott Grow, Pulega o le Fitugafulu ua faamalolo manumalo, ma vaavaai mo ni malamalamaaga e uiga i le taimi ma pe aisea e tatau ai ona tatou ta’uta’u atu i se epikopo po o se peresitene o le paranesi.

O lou epikopo e umia ki o le perisitua ma meaalofa faaleagaga e fesoasoani ia te oe ia salamo. E mafai ona e sailia lana fesoasoani ma fautuaga i soo se taimi. Afai na e faia ni mea sese matuia, e pei o le solia o le tulafono o le legavia, talanoa ma lou epikopo. Na te le tausalaina oe. O ia o se sui o Iesu Keriso ma o le a fesoasoani ia te oe ia iloa le ala e salamo atoatoa ai ma maua le mana faamalolo ma le faamalosiau a le Faaola. (Mo Le Malosi o le Autalavou, 8)

Ua agavaa le epikopo i faaaliga mai le Agaga Paia e faatatau i tagata o lana uarota, e aofia ai oe. … “E mafai ona fesoasoani le epikopo ia te oe i le faagasologa o le salamo i auala e le mafai e ou matua po o isi taitai ona tuuina atu ai. …

[Afai tatou te le ta’uta’u atu, ua tatou] tauaveina le amoina o le agasala e na o i tatou lava, nai lo le tuuina atu i le Faaola e aveesea le avega. (C. Scott Grow, “Aisea ae O a foi Mea e Tatau ona Ta’uta’u Atu i Lo’u Epikopo?” New Era, Oke. 2013, 28–29)

• E mafai faapefea ona fesoasoani lenei faamatalaga i se tasi e i ai ni atugaluga e uiga i le ta’uta’u atu i lo latou taitai perisitua?

Popolega I

Ua tele a’u agasala mo le faamagaloga a le Alii ia te au.

• E mafai faapefea e afioga a le Alii i le Mosaea 26:29–30 ona fesoasoani i lenei atugaluga? (E mafai foi ona e mafaufau e suesue le 1 Timoteo 1:15; 1 Ioane 1:9; po o le Mataupu Faavae ma Feagaiga 18:10–12; 58:42–43.)

• O a tala faatusi paia e uiga i le Faaola ua faapupula mai ai Ona lagona e uiga ia i latou o e taumafai e salamo ma Lona naunau e faamagalo?

O nisi o faataitaiga e ono aofia ai le fafine na mulumulu aao o le Faaola i ona loimata (tagai Luka 7:36–50), o le faataoto i le atalii faamaumau oa (tagai Luka 15:11–32), ma le faamagaloga a le Alii ia Paulo (tagai 1 Timoteo 1:15–16).

Popolega D

O lau filifliga

Mafaufau i se isi atugaluga moni po o se fesili atonu o i ai i se tasi e uiga i le salamo. Suesue le “Salamo” po o le “Ta’uta’u Atu” i le Taiala i Tusitusiga Paia (scriptures.ChurchofJesusChrist.org), vaavaai mo upumoni e mafai ona fesoasoani. E mafai foi ona e iloiloina mau e faatatau i le “Salamo” po o le “Tautau Atu” i le Taiala o Autu (ChurchofJesusChrist.org). E ono fesoasoani foi le suesue o le “salamo” i le tamaitusi o le Mo le Malosi o le Autalavou ma mafaufau loloto ai i mea ua e iloa e uiga i le Alii e ono fesoasoani.

Valaaulia tagata aoga e faasoa mai mea na latou aoaoina ma pe faapefea ona fesoasoani i se tasi i lena fesili po o le atugaluga. Vaavaai mo ni auala e faamamafa atu ai le alofa ma le finagalo o le Alii e faamagalo i tatou a o tatou salamo.

O le a le mea na tupu?

Faitau le Mosaea 26:34–37, ma vaavaai mo mea na tutupu a o mulimuli Alema i faatonuga a le Alii.

Tusi i lau api talaaga mo suesuega mea atonu e te manao e manatua pe faia ona o lenei lesona. O lenei manatunatuga e mafai ona aofia ai le auala e te manao e manatua ai le naunau o le Alii e faamagalo atu po o le auala foi e te manao ai e taumafai e ta’uta’u atu ma salamo i au lava agasala.

Mafaufau e molimau atu i mataupu faavae na aoaoina i lenei lesona.

Manatu ma Talaaga o Faamatalaga

E mafai faapefea e Satani ona faaosoosoina i tatou e aua nei ta’uta’u atu a tatou agasala?

Na aoao mai Sister Linda S. Reeves, o lē sa avea ma Fesoasoani o le Au Peresitene Aoao a le Aualofa:

A tatou agasala, e masani ona taumafai Satani e tauanau i tatou e faapea o le mea e le manatu faapito e fai, o le puipui o isi mai le lofituina i le iloaina o a tatou agasala, e aofia ai le ‘aloese mai le ta’uta’u atu i lo tatou epikopo, o lē e mafai ona faamanuiaina o tatou olaga e ala i ki o le perisitua o se faamasino lautele i Isaraelu. Peitai, o le mea moni, o le mea e le manatu faapito ma faaKeriso e fai, o le ta’uta’u atu ma salamo. O le fuafuaga tele lenei o le togiolaina a le Tama Faalelagi. (Linda S. Reeves, “O Le Fuafuaga Tele o le Togiolaina,” Liahona, Nov. 2016, 88)

Mosaea 26:32. O le a le uiga o le le toe faitauina faatasi ma le nuu o le Alii?

Sa faatonuina e le Alii ia Alema afai e mumusu tagata e salamo ia latou agasala, “o ia lava lea ia lē faitauina i totonu o lo’u nuu” (Mosaea 26:32). Faitau le faamatalaga lenei e iloa ai pe faapefea, i nisi taimi, ona galulue taitai perisitua i ni tulaga faapena i aso nei ma pe aisea:

Afai e solia e se tagata se agasala matuia, e fesoasoani le epikopo po o le peresitene o le siteki ia te ia ia salamo. I le avea ai o se vaega o lenei faagasologa, e ono manaomia ona ia tapui mai nisi o avanoa o le avea ma tagata auai o le Ekalesia mo se taimi. I nisi o tulaga, e ono manaomia ona ia faamatuuese le tagata mai le avea ai ma se tagata auai o le Ekalesia mo se taimi.

O le tapui po o le faamatuueseina o se tagata mai le avea ma tagata o le Ekalesia e le o faamoemoe e faasala ai. Ae, o nei faatinoga o nisi taimi e tatau ai ina ia fesoasoani i se tagata ia salamo ma ia lagona ai se suiga o le loto. E avatu ai foi i se tagata le taimi e sauniuni ai faaleagaga e toefaafou ma toe tausi ana feagaiga. Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 33.2, ChurchofJesusChrist.org)

Gaoioiga Faaopoopo e Aoao Ai

Mataupu Faavae i le Mosaea 25

Faamalamalama atu ina ua uma ona sosola ese le nuu o Limae ma le nuu o Alema mai le nofopologa ma faatasia ma tagata sa nonofo i Saraemila, sa faitau atu e le Tupu o Mosaea a latou talafaamaumau i tagata uma.

Valaaulia tagata aoga e faitau le Mosaea 25:7–11 po o le Mosaea 25:19–24, ma vaavaai mo mataupu faavae moni. Talanoaina pe aisea e taua ai le malamalama i mataupu faavae na latou faailoa mai ma pe mafai faapefea ona latou fesoasoani ia i tatou i aso nei.

O le tupulaga faiae na se ese

O le malamalama i mafuaaga e ono se ese ai tagata mai le Ekalesia pe ua amata ona faia le agasala e mafai ona fesoasoani ia i tatou e puipuia ai mai le tupu ia i tatou. Valaaulia tagata aoga e faitau le Mosaea 26:1–6, ma vaavaai mo filifiliga na taitaiina atu ai le toatele o le tupulaga talavou e pauu ese mai le Ekalesia po o i le agasala. Fai atu ia i latou e faasoa mai pe faapefea ona pei nei fuaiupu o mea o tutupu i aso nei. Talanoaina pe mafai faapefea ona tatou puipuia le autalavou mai le pauu ese po o le faia o le agasala i le lumanai.

Mataupu faavae faaopoopo e uiga i le faamagaloga

Valaaulia tagata aoga e faitau le Mosaea 26:31–32 ma vaavaai mo mataupu faavae faaopoopo e uiga i le faamagalo atu. Atonu latou te maua mataupu faavae e pei o nei: Afai tatou te filifili e le faamagalo atu i isi, ona tatou aumaia lea o i tatou lava i lalo o le ta’usalaga (tagai Mosaea 26: 31). Afai tatou te filifili e le salamo ia tatou agasala, ona le faitauina lea o i tatou faatasi ma le nuu o le Alii (tagai Mosaea 26:32). Mafaufau e fesili pe aisea e taua ai mo i tatou ona faamagalo atu i isi ma pe faapefea ona fesootai le salamo ma le faamagalo atu o isi (tagai 3 Nifae 13:14–15; MF&F 64:8–11).